“Mololoke Ukasangalela mwi Yehoba”
BA DIANA baji na myaka kukila pa 80. Ba mwatawabo bakolelwe kikola kya kavulamya kiya na mambo a bukote, kabiji saka bakyangye kufwa baikeleko mu nzubo mo balamina bakolwa. Ba Diana bafwishishe ne baana babo babalume babiji kabiji ne abo bene bajinga na kikola kya kansa ku jibele. Bino balongo ne banyenga mu kipwilo kyo bajimo inge bebamona ku Nzubo ya Bufumu nangwa mu busapwishi, bamona kuba’mba baji bingi na lusekelo.
Ba John bajinga ba kalama benda pa myaka kukila pa 43. Batemenwe bingi uno mwingilo, kabiji kechi balangulukangapo kumuleka ne. Pano bino, balekele uno mwingilo wabo wa kwenda pa kuba’mba baye na kulama mulongo wabo wakolelwenga, kabiji luno bengilatu mwingilo wa bukulumpe pa kipwilo. Balongo ne banyenga bayuka ba John inge bamonañana nabo pa kubuñana nangwa pa kushonkena, bamonatu nobe kafwako ne lupimpu lwaubiwa mu bwikalo bwabo ne. Batwajijilatu kwikala na lusekelo.
Ñanyi kintu kyalengela ba Diana ne ba John kutwajijila kwikala na lusekelo? Nga muntu ubena kuyanda wakonsha kwikala byepi na lusekelo? Kabiji muntu waleka kwingila mwingilo ye atemenwe bingi wakonsha kutwajijila byepi kwikala na lusekelo? Baibolo witubuula mukumbu. Waamba’mba: “Mololoke ukasangalela mwi Yehoba.” (Sala. 64:10) Twakonsha kumvwisha kino kishinka inge twayuka kine kintu kileta lusekelo lwa kine ne kilengela kubula kwikala na lusekelo.
LUSEKELO LWA PA KIMYE KICHECHE
Mwayuka kuba’mba kuji bintu bimo bileta lusekelo kimye kyonse. Akilangulukai pa bantu babiji betemwa babena kutwela mu masongola. Nangwa langulukai pa muntu wasema mwana nangwa ye bapa mwingilo mu jibumba ja Lesa. Abino bintu bileta lusekelo mambo bupe bufuma kwi Yehoba. Ye wabikileko lunengezho lwa masongola ne kupa bantu bulume bwa kusema baana, kabiji ye witupa mingilo mu kipwilo kya bena Kilishitu.—Nte. 2:18, 22; Sala. 127:3; 1 Timo. 3:1.
Nangwa byonkabyo, bintu bimo bituletela lusekelo kechi bibanda ne. Muntu uji mu masongola, mwinakwanji wakonsha kuleka kwikala wa kishinka nangwa wakonsha kufwa. (Ezi. 24:18; Ho. 3:1) Baana bamo bakonsha kuleka kukookela bansemi babo ne Lesa, kabiji kampe bakonsha ne kwibapanga mu kipwilo. Baana ba kwa Samwela kechi baingijilanga Yehoba mu bukishinka ne, kabiji Davida byo alengele mambo ne Betesheba watendekele kupita mu makatazho avula bingi mu kisemi kyanji. (1 Sam. 8:1-3; 2 Sam. 12:11) Bintu bya uno mutundu bileta bulanda ne binyenge. Kechi bituletelapo lusekelo nangwa pachechetu ne.
Kabiji bimye bimo twakonsha kuleka kwingila mwingilo ye twaingilanga mu jibumba ja Lesa, kampe na mambo a kukolwa, mitembo ya kisemi, nangwa lupimpu lubiwa mu jibumba ja Lesa. Bavula baleka kwingila mingilo yo batemenwe bamba’mba bavuluka bingi lusekelo lo baikalanga nalo pa kwingila ino mingilo.
Twakonsha kumona kuba’mba bintu bimo bituletela lusekelo kechi bibanda ne. Pano nanchi kujipo lusekelo lubula kupwa nangwatu inge kya kuba bintu byapimpulwa nangwa tubena kupita mu makatazho nyi? Luno lusekelo lwafwainwa kwikalako, mambo Samwela, Davida ne bakwabo batwajijile kwikala na lusekelo nangwa kya kuba bapichilenga mu meseko.
LUSEKELO LWA MYAKA
Yesu wayukile lusekelo byo luji. Saka akyangye kwiya pano pa ntanda, Baibolo witubuula’mba ‘waikalanga na lusekelo kwi Yehoba kimye kyonse.’ (Maana 8:30) Pano bino, byo aishile pano pa ntanda, bimye bimo wapitanga mu bintu byakatazha. Nangwa byonkabyo, Yesu wasekelanga mu kuba kyaswa muchima wa Shanji. (Yoa. 4:34) Nga kimye kyo amanaminenga, nanchi watwajijile kwikala na lusekelo nyi? Baibolo waamba’mba: “Na mambo a lusekelo lo bamutujile kulutwe, wachinchikile pa kichi kya lumanamo.” (Hebe. 12:2) Onkao mambo, twakonsha kufunda bintu bibiji Yesu byo aambile pa lusekelo lwa kine.
Pa kimye kimo, baana ba bwanga ba kwa Yesu 70 babwelele kwi aye byo bafumine na kusapwila. Basekejile bingi mambo baingijile mingilo ya kukumya, kubikapotu ne kupanga bandemona mu bantu. Bino Yesu wibambijile’mba: “Kange musekele na mambo a kuba’mba mipashi ibena kwimukookela ne, bino sekelai mambo mazhina enu anembwa mwiulu.” (Luka 10:1-9, 17, 20) Kya kine, kubilwa bibusa kwi Yehoba kwanema kukila mwingilo yense ye twakonsha kwingila mu jibumba ja Lesa. Kechi ukavulama baana ba bwanga ba kishinka ne, kabiji kino kyo kileta lusekelo lukatampe.
Pa kimye kikwabo, Yesu wafunjishenga jibumba. Mwanamukazhi umo Muyudea waumvwine bingi bulongo byafunjishenga Yesu kya kuba waambile’mba inanji Yesu wafwainwa wajinga bingi na lusekelo. Bino Yesu wamukwashishe ne kumubuula’mba: “Batokwa ke boba bomvwa mambo a Lesa ne kwialama!” (Luka 11:27, 28) Bansemi bomvwa bingi bulongo inge baana babo babena kuba bintu byawama; bino kukookela Yehoba ne kwikala na bulunda bwakosa ne aye kyo kileta lusekelo lukatampe.
Kine, kuyuka’mba tubena kutokesha Yehoba ku muchima kwituletela bingi lusekelo. Onkao mambo, nangwa kya kuba kafwako umvwa bulongo kupita mu meseko ne, bino kechi kwitulengela kuleka kwikala na lusekelo ne. Kabiji kuchinchika meseko mu bukishinka kwitulengela kwikala na lusekelo lukatampe. (Loma 5:3-5) Kikwabo, Yehoba upana mupashi wanji ku bantu bamuketekela, kabiji lusekelo ke kipangwa kya mupashi. (Nga. 5:22) Kino kitukwasha kuyuka ene mambo Salamo 64:10 o aambila’mba: “Mololoke ukasangalela mwi Yehoba.”
Ñanyi kintu kyakwasha ba John kutwajijila kwikala na lusekelo?
Kino kitukwasha kuyuka kyalengela ba Diana ne ba John bo twaambapo ku ntendekelo kutwajijila kwikala na lusekelo nangwa kya kuba bapichilenga mu bintu byakatazha. Ba Diana baambile’mba: “Yehoba kyo kya kufyamamo kyami, byonka mwana byo anyemena ku bansemi banji.” Kuyuka’mba Lesa wibakwasha kwibalengela kumvwa byepi? Banungilepo’mba: “Namona kuba’mba Lesa wampesha ne kumpa bulume bwa kusapwila kimye kyonse na lusekelo.” Ba John batwajijila kubambakana mu mwingilo wa kusapwila nangwa kya kuba baleka mwingilo wa kwenda ye batemenwe bingi. Balumbulula kibakwashishe amba: “Kufuma mu 1998 kimye kyo bampele mwingilo wa kufunjisha Sukulu wa Lufunjisho lwa Mwingilo, ngikala na kimye kyabaya kya kufunda Mambo a Lesa pa bunke kukila kala.” Pa kwamba pe abo bene ne benakwabo, banungilepo amba: “Na mambo a kuba’mba kufumatu ne kala twajinga na muchima wa kuba’mba twafwainwa kwingila mwingilo yense witupa Yehoba kwitukwashishe bingi kimye bwikalo kyo bwapimpwilwe. Kechi twilangulushapo ne.”
Kuji ne bakwabo bavula bemwena kuba’mba byambo biji pa Salamo 64:10 bya kine. Akilangulukai pa bamulume ne mukazhi baingijile pa Betele kukila pa myaka 30 mu United States. Bebatumine kuya na kwingila bupainiya bwiikajila. Baambile’mba: “Inge waleka kwingila mwingilo ye watemenwe bingi, kileta bingi bulanda.” Bino banungilepo’mba: “Kechi wafwainwa kwikala na bulanda myaka ne myaka ne.” Byo bafikiletu pa kipwilo kyo bebatuminepo, batatwile kwingijila pamo na kipwilo mwingilo wa kusapwila. Bano bamulume ne mukazhi baambile’mba: “Twalombanga milombelo ya kushinkamika pa bintu bimo. Kwimwena Lesa byo akumbulanga milombelo yetu kwitutundaikanga ne kwituletela lusekelo. Byo papichiletu kimye kicheche, bavula mu kipwilo batendekele bupainiya, kabiji twaikele na bantu babiji bo twafunjishanga Baibolo bakomejilengako mu maana a kuyuka Lesa.”
“KUSANGALALA MYAKA NE MYAKA”
Bino kwambatu kine, kyakatazha kutwajijila kwikala na lusekelo kikatakata inge mubena kupita mu makatazho. Pano bino, Yehoba witutekenesha na byambo byanembelwe na lutangijilo lwa mupashi wanji biji pa Salamo 64:10. Nangwatu mu bimye bya makatazho, twafwainwa kuketekela kuba’mba aba batwajijila kwikala ‘baoloka’ kupichila mu kutwajijila kwikala ba kishinka nangwa kya kuba bintu byapimpulwa mu bwikalo bwabo, ‘bakasangalelanga mwi Yehoba.’ Kabiji twafwainwa kutengelanga kufika kwa mulaye wa Yehoba wa kulenga “meulu apya ne ntanda ipya.” Mu ntanda ipya, Lesa ukafumyamo bumbulwa kulumbuluka bonse. Bantu ba Lesa bonse ‘bakasekelanga ne kusangalala myaka ne myaka’ na mambo a bintu byo abena kulenga ne byo akebobila.—Isa. 65:17, 18.
Kino kibena kulumbulula’mba, tukekala na butuntulu bwa mubiji bwalumbuluka kabiji pa juba pa juba tukabuukanga na bulume. Kechi tukavulukanga bulanda ne binyenge byo tuji nabyo luno ne. Lesa witulaya’mba “bintu bya kala kechi [tukebivulukapo] jibiji ne, kabiji kechi bikeyapo jibiji mu michima [yetu] ne.” Kabiji lusanguko luketulengela kumonañana jibiji na batemwe betu bafwa. Biumbi ne biumbi bya bantu bakomvwa bingi bulongo byonka byaumvwine bansemi ba kashimbi wajinga na myaka 12 ye basangwile kwi Yesu: “Bonse baikele na lusekelo lukatampe.” (Mako 5:42) Mu kuya kwa kimye, bantu bonse bakekala baoloka kabiji ‘bakasangalelanga mwi Yehoba’ myaka ne myaka.