Nanchi mwatanga magazini a katataka a Kyamba Kya Usopa nyi? Monai inge mwakonsha kukumbula ano mepuzho:

Ñanyi bishiino bya mu Binembelo bimwesha’mba Lesa umvwina bantu Lusa?

Bena Isalela byo bajinga bazha mu Ijipita, Lesa wayukile byo byamanaminenga kabiji kyamukolelenga bingi ku muchima. (Lupu. 3:7; Isa. 63:9) Twalengelwe mu kipasha kya Lesa, ko kuba’mba twakonsha kwikala na lusa. Lesa witubila bingi lusa nangwatu inge muchima wetu ubena kwituzhachisha ne kwitulengela kumvwa nobe Lesa kechi wakonsha kwitubila lusa ne.—wp18.3, ma. 8-9.

Yesu wafunjishe byepi bantu buneme bwa kushinda misalululo ya mikoka?

Kimye Yesu kyo ajinga pano pa ntanda, Bayudea bajinga bingi na misalululo. Kilishitu waambile pa buneme bwa kwipelula kabiji wakainye kwitota na mambo a mukoka. Watundaikile baana banji ba bwanga kwimonanga’mba balongo ne banyenga.—w18.06, ma. 9-10.

Lesa byo abujile kuswisha Mosesa kutwela mu Ntanda ya Mulaye, kitufunjishapo ka?

Mosesa wajinga na bulunda bwakosa ne Yehoba. (Mpitu. 34:10) Byo papichile myaka 40 mu kiselebwa, bena Isalela batendekele kwijizhanya jikwabo na mambo a kubula mema. Lesa wabuujile Mosesa kwambila jibwe. Bino Mosesa kechi waambijile jibwe ne. Kyamweka Yehoba wazhingijile Mosesa mambo kechi walondejile byo amubuujile kuba ne, nangwa na mambo a kuba’mba kechi wapaine lukumo kwi Lesa pa kya kukumya kyo aubile ne. (Bala. 20:6-12) Kino kitufunjisha buneme bwa kukookela Yehoba ne kumupa lukumo.—w18.07, ma. 13-14.

Mambo ka o kyatamina kutala ku bilungi bya bantu?

Kuji bintu bisatu byakonsha kwitulengela kuzhachisha bakwetu. Bino bintu ke: Kikoba nangwa mukoka, bunonshi ne jifumbi. Kyanema bingi kumonanga bakwetu byonka Lesa byo ebamona. (Byu. 10:34, 35)—w18.08, ma. 8-12.

Mu ñanyi mashinda bena Kilishitu bakoma mo bakonsha kukwashisha bakwabo?

Bena Kilishitu bakoma baleka kwingila mingilo imo, Yehoba wibanemeka bingi kabiji bakonsha kukwasha bakwabo. Bano balongo bakonsha kukwasha banabalume babula kwitabila basongola banyenga mu kipwilo, bakooka mu lwitabilo, kufunjisha bantu Baibolo, ne kwingilako pakatampe mwingilo wa kusapwila.—w18.09, ma. 8-11.

Ñanyi bingijisho bena Kilishitu byo bengijisha pa kufunjisha bantu bukine?

Bengijisha tubikachi ne tupepala twakwichilapo bantu, matalakiti atanu na asatu apeela bingi kwingijisha pa kutendeka mwisambo ne magazini a Kyamba kya Usopa ne Labainga! Kabiji bengijisha mabuloshuwa ne mabuku abiji o tufunjishamo bantu, ne mavidyo ana, paji ne wa kuba’mba Mambo ka a Kufunjila Baibolo?—w18.10, ji. 16.

Mwina Kilishitu wakonsha kupota byepi “bukine” kwesakana na byaamba Byambo bya Maana 23:23?

Kechi tupota bukine na mali ne. Pano bino, twafwainwa kwingijisha kimye ne ngovu pa kuba’mba twibupote.—w18.11, ji. 4.

Twakonsha kufunjilako ka ku byaubile Hoseya na mukazhanji aye Goma?

Goma watwajijile kuba bupite, bino Hoseya kechi wamukaine ne, wamulekejileko mambo. Inge mwina Kilishitu walenga mambo a bukende, mwinakwanji wakonsha kufuukulapo kumulekelako mambo. Umvwe batendeka kusambakana ko kuba’mba mambo aswisha Binembelo kwikainapo apwa.—w18.12, ji. 13.