Mukivuluka Nyi?
Nanchi mwakonsha kukumbula ano mepuzho afuma mu Kyamba kya Usopa kya mu 2019 nyi?
Mulaye wa Lesa wa kuba’mba: “Kafwako kyela nangwa kimo kyo bakabunda kya kukulwishako kikengila ne” ulumbulula ka? (Isa. 54:17)
Twakonsha kuketekela kuba’mba Lesa uketuzhikijila ku bintu byakonsha kwitonauna nabiji inge betulukuka ku “bantu bashinta.” (Isa. 25:4, 5) Balwanyi betu kechi baketumanyikanga myaka ne myaka ne.—w19.01, ma. 6-7.
Bintu Lesa byo aubile na bena Kenana ne bena Isalela balekele kumupopwela bimwesha byepi bunchibamambo bwanji bwaoloka?
Lesa wakambwile boba bevwangile mu byubilo bya bulalelale ne bamanyikanga banabakazhi ne baana. Pakuba Yehoba wapesheshe bantu bajinga ba kishinka kwi aye kabiji baubilanga bakwabo byawama.—w19.02, ma. 22-23.
Twakonsha kuba byepi inge kya kuba twataanwapo pabena kulombela muntu wabula kwitabila?
Umvwe twataanwa mu luno lukatazho, twafwainwa kwikalatu nzoo ne kumwesha mushingi. Kechi twafwainwa kwambako amba “amena” nangwa kwikwata nabo ku maboko ne. Twakonsha kufuukulapo kulombela mu muchima.—w19.03, ji. 31.
Nanchi kukuna baana mambo akatampe nyi?
Kukuna mwana ke kulenga mambo muntu ye bakuna, kipwilo, kafulumende ne Lesa. Bakulumpe mu kipwilo bakookela mizhilo ya kafulumende yaamba pa kutwala mambo ku bakapokola inge kwamweka mambo a kukuna mwana.—w19.05, ma. 9-10.
Mwakonsha kupimpula byepi nangwa kuwamishako milanguluko ya mu michima yenu?
Bintu byakonsha kwimukwasha ke bino: Lombainga kwi Yehoba. Languluka-langulukainga pa kuba’mba mwipese-pese anweba bene. Salainga balunda bulongo.—w19.06, ji. 11.
Twakonsha kuba byepi pa kuba’mba twinengezhezhe jimo kumanyikwa?
Twafwainwa kukosesha bulunda bwetu ne Yehoba. Twafwainwa kushiinwa’mba witutemwa kabiji kechi uketulekelela ne. Twafwainwa kutanganga Baibolo ne kulomba kimye kyonse. Twafwainwa kushiinwa kuba’mba mapesho etulaya Lesa akafika. Twafwainwa kulabijila binembelo ne nyimbo ya kutota Lesa yo twatemwa.—w19.07, ma. 2-4.
Twakonsha kuba byepi pa kuba’mba tukwashe balongo betu kupuluka?
Kyanema kwibobila kifyele, kwikala na byubilo byawama pa kuba’mba baswe kufunda bukine, kwibatekenya ne kwibobila lusa bino saka tujimuka.—w19.08, ma. 15-17.
Mulaye witulayile Yesu uji pa kinembelo kya Mateo 11:28 witukokolosha byepi?
Tuji na bakalama bawama bingi, balunda bawama ne mwingilo wakilamo kuwama.—w19.09, ji. 23.
Yehoba wakonsha kwitupa byepi kizaku ne bulume bwa kwingila? (Fili. 2:13)
Inge ketutange Mambo a Lesa ne kulanguluka-langulukapo, Lesa uketukosesha, kwitupa kizaku kya kuba kyaswa muchima wanji ne kwitupa bulume bwa kwingila. Mupashi wanji wakonsha kwitupa bulume.—w19.10, ji. 21.
Ñanyi bintu byo twakonsha kuba saka tukyangye kufuukulapo bintu byanema?
Twafwainwa kuba bino bintu bitanu: Kukebakeba bishinka. Kulomba maana. Kulanguluka pa ene mambo o tubena kukebela kuba kyo kyo kintu. Kwibikila bikonkwanyi. Kumina kumo ne.—w19.11, ma. 27-29.
Nanchi lufunjisho lwa kuba’mba mweo kechi ufwa ne lwatendekele kimye Satana kyo esambile ne Evwa nyi?
Ine. Satana wabuujile Evwa amba kechi ukafwa ne. Kechi wamubuujile’mba ukobatu nobe wafwa ne. Bupopweshi bwa bubela bonse bwazhiile pa Muyulo. Lufunjisho lwa kuba’mba mweo wa muntu kechi ufwa ne lwafwainwa lwatendekele kimye Lesa kyo apalañenye bantu bashimikilenga kyamba kya Babela.—w19.12, ji. 15.