Mepuzho Afuma ku Batanga
Satana byo abuujile Evwa amba inge waja kipangwa ku kichi kya kuyuka byawama ne byatama kechi ukafwa ne, nanchi wamubuujilenga lufunjisho lwasampukila ne pa katele ano moba lwa kuba’mba mweo kechi ufwa nenyi?
Diabola kechi wabuujile Evwa amba inge waja kipangwa ku kichi kibakanyishe Lesa, ukobatu nobe wafwa bino kintu kimo kibula kumweka (kyo bamba bamo amba mweo ubula kufwa) kikatwajijila kwikala ku mpunzha ikwabo ne. Kupichila mu muloolo, Satana waambile’mba inge kya kuba Evwa waja ku kino kichi, ‘kine kechi ukafwa ne.’ Walumbulwilenga’mba ukatwajijila kwikala na bumi, kwiyowa bwikalo bwawama pa ntanda kwa kubula lutangijilo lwa Lesa.—Nte. 2:17; 3:3-5.
Inge kya kuba’mba lufunjisho lwa kuba’mba mweo kechi ufwa ne lo babena kufunjisha ano moba kechi lwatendekejile mu Edena ne, lwatendekele ñanyi kimye? Kechi twayuka bulongo ne. Twayuka kuba’mba bupopweshi bwa bubela bonse bwazhiile pa Muyulo wa Nowa. Kafwako wafunjishenga mafunjisho a bubela ne, mambo Nowa ne kisemi kyanji bo bonkatu bapulukile kabiji bonse bajinga bapopweshi ba kine.
Onkao mambo, lufunjisho lujiko luno lwa kuba’mba mweo wa muntu kechi ufwa ne, lwafwainwa lwatendekele Muyulo saka apita kala. Kimye Lesa kyo avulañenye milaka ya bantu pa Babela kabiji bantu bapalañenejile “pano pa ntanda ponse,” kwa kubula nangwa kuzhinaukatu ne, basendele mulanguluko wa kuba’mba mweo wa muntu kechi ufwa ne. (Nte. 11:8, 9) Nangwa kya kuba kechi twayuka kwine kwatendekejile luno lufunjisho lwa bubela ne, bino twayuka kuba’mba “shanja bubela,” aye Satana Diabola ye watundaikile luno lufunjisho, kabiji waumvwine bingi bulongo pa kumona lwasampukila ne pa katele.—Yoa. 8:44.