Jishimikila jiji pa Mpitulukilo ya mu Mizhilo 22:25-27 kechi jibena kwamba pa kushinawina mwanamulume amba walenga mambo ne, mambo mu jino jishimikila uno mwanamulume kyayukanyikilwa jimo amba walenga mambo. Uno muzhilo waikejileko kukwasha bantu kuyuka’mba mwanamukazhi kechi uji na mambo ne. Akimonai byambo bikwabo biji mu kino kinembelo.

Byepelo byatendekelako byaamba pa mwanamulume walaajile na mwanamukazhi ye baambishe “mu muzhi.” Na mambo a kyo aubile, uno mwanamulume bamupelemo mambo a bulalelale, mambo mwanamukazhi ye baambisha bamumonanga’mba wasongolwa. Pano nga mwanamukazhi kyajinga byepi? “Kechi watamine muteto mu muzhi ne.” Inge kya kuba’mba watamine muteto, bakwabo inge baumvwine ne kwiya na kumulamwinako. Bino kechi watamine muteto ne. Onkao mambo, naye waubile bulalelale, kyo kyalengejile bonse babiji kwibazhachisha na mambo.—Mpitu. 22:23, 24.

Uno muzhilo waambile ne kuba’mba: “Pakuba umvwe mwanamulume wataaine mungye uno nsongwakazhi ye baipanguzha wamukwata ne kumukila bulume kabiji wilaala nanji, uno mwanamulume walaajile nanji bakamwipaya bunke bwanji, bino nsongwakazhi kechi mukamube kintu nangwa kimo ne. Nsongwakazhi kechi walengele mambo a kumwipayilapo ne. Ano mambo ajitu pamo na mambo a mwanamulume walukuka mukwabo ne kumwipaya. Mambo wamutaaine mungye kabiji awo nsongwakazhi ye baipanguzha watamine muteto, bino kechi kwajinga muntu wa kumupokololako ne.”—Mpitu. 22:25-27.

Inge kyaikala bino, ba mitonyi baswanga byaamba nsongwakazhi. Mu ñanyi jishinda? Baswanga’mba nsongwakazhi “watamine muteto, bino kechi kwajinga muntu wa kumupokololako ne.” Onkao mambo, uno nsongwakazhi kechi waubileko bulalelale ne. Pakuba mwanamulume wazhatwanga na mambo a kulaala na mwanamukazhi kya kumukanjikizha ne bukende na mambo a kuba’mba ‘wamukijile bulume ne kulaala’ nanji.

Onkao mambo, nangwa kya kuba’mba uno muzhilo waamba pa kubingisha mwanamukazhi, bino jino jishimikila jalumbulula’mba mwanamulume wazhachilwe na mambo a kulaala na mwanamukazhi kya kumukanjikizha ne bukende. Twakonsha kushiinwa’mba bamitonyi bakebakebanga “bulongo bishinka pa oo mambo” ne kwiachiba kwesakana na mwayila mizhilo Lesa yo ebapele.—Mpitu. 13:14; 17:4; Lupu. 20:14.