Baibolo nangwa bya mpito kechi byaambapo kino ne.

Jishinda jo batuntulwilamo kino kyepelo mu Mabaibolo avula jalengela bamo kulangulukanga’mba mu kimye kya kwa Paulo, bantu babatizhiwanga mu mema kwimenako bafwa. Baibolo umo waamba’mba: “Inge kechi kuji lusanguko ne, aba babatizhiwa na mambo a bafwa bakoba byepi?”—New International Version.

Nangwa byonkabyo, monai byaambapo bashayuka babiji ba Baibolo. Dr. Gregory Lockwood waambile’mba mulanguluko wa kuba’mba bantu babatizhiwanga “kwimenako bantu bafwa” ke “lubatizhilo lo babula kwambapo mu bya mpito nangwa mu mabuku akwabo a mu Baibolo ne.” Kabiji, Shayuka aye Gordon D. Fee wanembele’mba: “Mu bya mpito nangwa mu Baibolo kechi mujipo mo baamba’mba kwajinga bantu babatizhiwanga mu jino jishinda ne. Lulayañano Lupya kechi lwaambapo pa kino ne. Kabiji kechi pajipo kishiino kimwesha’mba bena Kilishitu batanshi byo byo baubanga ne, nangwatu machechi alengelwe batumwa byo bafwile kechi baubangapo kino ne.”

Baibolo waamba’mba baana ba bwanga ba kwa Yesu bafwainwa “kufunjisha bantu ba mu bisaka byonse bya bantu kwikala ke baana . . . ba bwanga, ne kwibabatizha . . . , ne kwibafunjisha kulama bintu byonse” byo akambizhe. (Mat. 28:19, 20) Muntu saka akyangye kubatizhiwa ne kwikala mwana wa bwanga, wafwainwa kufunda, kwitabila, ne kukookela Yehoba ne Mwananji. Muntu wafwa uji mu kilende kechi wakonsha kuba bino ne, kabiji kechi bakonsha kumubilako kino ku mwina Kilishitu uji na bumi ne.—Sapwi. 9:5, 10; Yoa. 4:1; 1 Ko. 1:14-16.

Pano nanchi Paulo waambilenga pa ka?

Bena Kolinda bamo baambilenga’mba bantu bafwa kechi bakasangulwa ne. (1 Ko. 15:12) Paulo wamwesheshe’mba ino milanguluko yatamine bingi. Waambile’mba ‘pa juba pa juba watalañananga na lufu.’ Ibyo kuba’mba waambile bino saka akiji mumi. Nangwa kya kuba wapichilenga mu bizumba, washiinwe’mba inge wafwa bakamusangula ne kwikala kilengwa kya mupashi byonka byo kyajinga kwi Yesu.—1 Ko. 15:30-32, 42-44.

Bena Kolinda bafwainwe kuyuka’mba byo bajinga bena Kilishitu bashingwa bakapitanga mu meseko pa juba pa juba ne kufwa saka bakyangye kwibasangula. Onkao mambo, byo ‘babatizhiwe mwi Kilishitu Yesu,’ ko kuba’mba bafwainwe ‘kubatizhiwa ne mu lufu lwanji.’ (Loma. 6:3) Kino kibena kulumbulula’mba byonka byo kyajinga kwi Yesu, ne abo bafwainwe kupita mu meseko ne kufwa pa kuba’mba bakebasangule ne kuya mwiulu.

Byo papichile myaka ibiji ne kichika kufuma kimye Yesu kyo abatizhiwe mu mema, wabuujile batumwa banji amba: “Lubatizhilo lo mbena kubatizhiwa, ne anweba mukabatizhiwa.” (Mako 10:38, 39) Pa kikye kimye, Yesu kechi wabatizhiwenga mu mema ne. Walumbulwilenga’mba bakamwipaya na mambo a kutwajijila kwikala wa kishinka kwi Lesa. Paulo wanembele’mba bashingwa ‘bakamanama nanji kuba’mba bakatumbijikilwe nanji pamo.’ (Loma 8:16, 17; 2 Ko. 4:17) Onkao mambo, nabo bafwainwa kufwa pa kuba’mba bakasangulwe ne kuya mwiulu.

Onkao mambo, byambo bya kwa Paulo byafwainwa kutuntululwa’mba: “Inge kiji bino, nga aba babena kubatizhiwa kuba’mba bakafwe, bakamwenamo ka? Umvwe bafu kechi bakasangulwa ne, mambo ka o babena kubatizhiwa kuba’mba bakafwe?”