MUTWE WA KUFUNDA 51
LWIMBO 3 Mwi Lesa mo mo Twaketekela, bo Bulume Bwetu
Yehoba Umvwa Kujila Kwenu Kabiji Wimuta Muchima
“Longai mipolo yami mu fukuta wa kiseba. Nanchi kechi yanembwa mu buku wenu nenyi?”—SALA. 56:8.
BYO TUSAKWISAMBAPO
Yehoba wayuka makatazho onse o tupitamo kabiji witutekenesha.
1-2. Ñanyi bintu byakonsha kwitulengela kujila?
ATWEBA bonse pa bimye bimo tujila. Inge kwamweka bintu byawama, tujila na mambo a lusekelo. Kampe mwajijile byo kwamwekele bintu byawama, nabiji mwanenu byo asemekelwe, kimye kyo mwavulukile bintu byawama byamwekele mu bwikalo bwenu nangwa kimye kyo mwamonañene na mulunda nenu ye mwamwenepo kala.
2 Nangwa byonkabyo, javula tujila na mambo a kwikala na bulanda nangwa na mambo a kupita mu makatazho. Kabiji tujila inge muntu ye twaketekela wituba byatama. Twakonsha kujila inge tubena kumanama na kikola nangwa inge twafwisha mutemwe wetu. Pa bimye bya uno mutundu, twakonsha kumvwa byonka byaumvwine ngauzhi Yelemiya kimye kyo baonawine muzhi wa Yelusalema. Yelemiya waambile’mba: “Mipolo ibena kupompoloka mu meso ami . . . Mipolo ilukumukatu mu meso ami kwa kubula kuleka.”—Jila. 3:48, 49.
3. Yehoba umvwa byepi ku muchima inge wamona bakalume banji na kumanama? (Isaya 63:9)
3 Yehoba wayuka bimye byonse byo twajila mu bwikalo bwetu na mambo a makatazho o tupitamo. Baibolo witubuula’mba Yehoba wayuka makatazho onse apitamo bakalume banji kabiji umvwa inge twamujijila kuba’mba etukwashe. (Sala. 34:15) Nangwa byonkabyo, Yehoba kechi upelelatu pa kumona ne kumvwa inge twamulomba’mba etukwashe ne. Byonkatu biji nsemi uji na butemwe, Yehoba naye kimukola bingi ku muchima inge witumona na kujila kabiji ukebesha kwitukwasha.—Tangai Isaya 63:9.
4. Ñanyi bintu byo tufunjilako ku bantu bamo bo baambapo mu Baibolo pe Yehoba?
4 Mu Mambo anji, Yehoba witubuula byo aumvwine ku muchima kimye bakalume banji kyo bajijilenga. Twakonsha kufunjilako ku byamwekejile Hana, Davida ne Mfumu Hezekiya. Ñanyi bintu bibalengejile kujila? Yehoba wibakwashishe byepi byo bamujijile kuba’mba ebakwashe? Kepo tusakumona Yehoba byo etutekenesha inge tuji na bulanda, inge betwalukamo nangwa inge twapopomenwa.
KUJILA NA MAMBO A BULANDA
5. Bintu byapichilemo Hana byamulengelanga kumvwa byepi ku muchima?
5 Hana wapichile mu makatazho avula bingi amulengejile kwikala na bulanda. Mwatawanji wasongwele mpaji, kabiji mpaji nanji aye Penina wamushikilwe bingi. Kununga pa kino, Hana kechi wasemenepo baana ne. Pa kuba Penina wajinga na baana bavula. (1 Sam. 1:1, 2) Penina kimye kyonse waendelekanga Hana na mambo a kubula kusema. Inge yenu mwapichilenga mu luno lukatazho, inge mwaumvwinenga byepi ku muchima? Hana kyamukolanga bingi ku muchima kya kuba “waendangatu na kujila ne kuja ne,” kabiji “wajinga na bulanda bukatampe.”—1 Sam. 1:6, 7, 10.
6. Hana waubile byepi pa kuba’mba bamutekeneshe?
6 Hana wataaine kwepi lutekenesho? Kintu kimo kyamukwashishe ke kya kuba’mba wayanga na kupopwela Yehoba pa tente wa lusambakeno. Byo afikile kokwa, kampe kwipi na lubanza wa tente wa lusambakeno, “watatwile kulomba kwi Yehoba ne kujila bingi.” Wasashijile Yehoba amba: “Mumone lumanamo lwami amiwa wa mwingilo wenu ne kumvuluka.” (1 Sam. 1:10b, 11) Hana wabuujile Yehoba byonse byajinga ku muchima wanji. Yehoba byo amwene Hana na kujila, naye kyamukolele bingi ku muchima kabiji wakebelenga kutekenesha uno mwananji ye atemenwe bingi.
7. Hana waumvwine byepi ku muchima byo abuujile Yehoba makatazho o apichilengamo?
7 Hana waumvwine byepi ku muchima byo alombele kwi Yehoba ne kumutundaika kwi Ñanga Mukatampe aye Eli kuba’mba Yehoba usakukumbula lulombelo lwanji? Jishimikila jaamba’mba: “Uno mwanamukazhi wayile ne kuja wajiile, ne kilungi kyanji kechi kyaubilepo bulanda jibiji ne.” (1 Sam. 1:17, 18) Nangwa kya kuba makatazho o apichilengamo kechi apwile ne, bino walekele kumvwa bulanda. Watwikile Yehoba kisendwa kyanji. Yehoba wamwene kumanama kwanji, kujila kwanji kabiji wamupesheshe byo amulengejile kusema.—1 Sam. 1:19, 20; 2:21.
8-9. Kwesakana na byaamba Bahebelu 10:24, 25, mambo ka o twafwainwa kwibikangako kutanwa ku kupwila? (Monai ne kipikichala.)
8 Bintu byo tufunjilako. Nanchi ne anweba mubena kupita mu makatazho akatampe emulengela kumvwa bulanda ne kujila nyi? Kampe muji na bulanda na mambo a kufwisha wa mu kisemi kyenu nangwa mulunda nenu. Pa bimye bya uno mutundu, javula tukeba kwikalatu kwa bunke bwetu. Byonkatu kuya ku tente wa lusambakeno byo kwatundaikile ne kutekenesha Hana, ne anweba mwakonsha kutaana lutekenesho inge kemutaanwe ku kupwila kimye kyonse nangwa kya kuba muji na bulanda. (Tangai Bahebelu 10:24, 25.) Pa kupwila, batanga byepelo bya mu Baibolo bitutekenesha ne kwitutundaika. Jino jo jishinda jimo Yehoba mo etukwashisha kuleka kulanguluka pa bintu bituletela bulanda. Kino kitukwasha kubula kukizhamo kwikala na bijikila inge lukatazho kechi lubena kupwa bukiji ne.
9 Kabiji inge tubena kupwila, balongo ne banyenga betutundaika bingi ne kwitumwesha butemwe. (1 Tesa. 5:11, 14) Akilangulukai pa byamwekejile mulongo painiya wiikajila wafwishishe mukazhanji. Waambile’mba: “Ne lunotu nkijila. Pa bimye bimo, ngikalatu kwa bunke ne kujila mambo ntoonga bingi bakazhi bami. Nangwa byonkabyo, inge naya ku kupwila, ntundaikwa bingi. Byambo byawama biñambila balongo ne banyenga ne mikumbu yabo pa kupwila, bintundaika bingi. Inge naya ku kupwila, bijikila byonse byo najinga nabyo bipwa.” Inge tubena kupwila, Yehoba wakonsha kwingijisha balongo ne banyenga kwitutekenesha.
Balongo ne banyenga bakonsha kwitutekenesha (Monai mafuka 8-9)
10. Twakonsha kuba byepi byonka byaubile Hana inge tuji na bulanda?
10 Kabiji Hana bamutekeneshe byo abuujile Yehoba byonse byajinga ku muchima wanji. Ne anweba mwafwainwa ‘kutaya bijikila byenu byonse pe Yehoba’ ne kushiinwa kuba’mba ukomvwa lulombelo lwenu ne kwimukwasha. (1 Pe. 5:7) Nyenga umo wafwishishe mwatawanji ye bapayile ku bangivi, waambile’mba: “Muchima wami walajikile kabiji naumvwinengatu nobe kechi nkekalapo na lusekelo jibiji ne. Bino kimye kyonse inge nalomba kwi Shetu wa mwiulu aye Yehoba wantekeneshanga. Bimye bimo nakankalwanga kumubuula bulongo byo mbena kumvwa ku muchima, bino aye wayukanga byo naumvwanga ku muchima. Bijikila inge byamvujila, nalombanga kwi Yehoba kuba’mba ampe mutende wa mu milanguluko. Ponkapotu naumvwangako bulongo ne kwingila bulongo mingilo pa jojo juba.” Inge mwalomba kwi Yehoba ne kumubuula bintu byonse bibena kwimulengela kwikala na bulanda, Yehoba naye kimukola bingi ku muchima pa bintu byatama byo mubena kupitamo. Nangwa kya kuba makatazho kechi apwa ne, Yehoba ukemutekenesha pa kuba’mba mwikale na mutende wa mu milanguluko. (Sala. 94:19; Fili. 4:6, 7) Kabiji ukemupesha pa kuchinchika kwenu mu bukishinka.—Hebe. 11:6.
KUJILA NA MAMBO A KWIMWALUKAMO
11. Makatazho apichilemo Davida amulengejile kumvwa byepi ku muchima?
11 Mu bwikalo bwanji, Davida wapichile mu bintu byakatazha pa bimye byavula byamulengejile kujila. Bamushikilwe ku bantu bavula kuvwangakotu ne kumwalukamo ku balunda ne balongo banji bakebelenga kumuba byatama. (1 Sam. 19:10, 11; 2 Sam. 15:10-14, 30) Pa kimye kimo wanembele’mba: “Nakooka na mambo a kubinza kwami; bufuku bonse nzobesha mwanya wami na mipolo; mwanya wami namuyuzha na mipolo.” Mambo ka Davida o aumvwijilenga bino? Walumbulwile’mba ke “na mambo a bonse bammanyika.” (Sala. 6:6, 7) Bintu byatama Davida byo bamubilenga ku bakwabo byamulengejile kwikala na bulanda kabiji wajijile bingi.
12. Kwesakana na byaamba Salamo 56:8, Davida wayukile’mba ka?
12 Nangwa kya kuba Davida wapichilenga mu makatazho, bino wayukile kuba’mba Yehoba wamutemwa. Davida wanembele’mba: “Yehoba ukomvwa kujila kwami.” (Sala. 6:8) Pa kimye kikwabo, Davida waambile byambo byawama bingi biji pa Salamo 56:8. (Tangai.) Bino byambo bimwesha patoka’mba Yehoba witutemwa bingi. Davida waumvwinetu nobe Yehoba ubena kulonga mipolo yanji mu fukuta nangwa kwiinemba mu buku. Davida wayukile’mba Yehoba wamwenenga makatazho onse o apichilengamo ne kwiavuluka. Kabiji Davida wayukile’mba Shanji wa mwiulu kechi wayukiletu bintu byo apichilengamo ne, bino wayukile ne byo aumvwinenga ku muchima.
13. Inge bakwetu betuba byatama, ñanyi kintu kyafwainwa kwitutekenesha? (Monai ne kipikichala.)
13 Bintu byo tufunjilako. Nanchi muji na bulanda na mambo a kuba’mba muntu ye mwaketekela wimukozhezhe ku muchima nangwa kwimwalukamo nyi? Kampe muji na bulanda na mambo a kuba’mba bulunda bwenu na muntu ye mwakebelenga kusongola nangwa kusongolwako bwapwa nangwa masongola enu apwa kwakubula kuketekela. Nangwa muntu ye mwatemwa waleka kwingijila Yehoba. Mulongo wajinga na mukazhi waubile bukende ne kumunyema, waambile’mba: “Kechi nayukile’mba kintu kya iwe mutundu kyakonsha kummwekela ne. Najinga bingi na bulanda, kuzhingila ne kwilengulula.” Inge bemukozha ku muchima na mambo a kwimwalukamo, yukai’mba Yehoba kechi ukemusha bunke ne. Uno Mulongo waambile’mba: “Bantu kechi bakonsha kutwajijila kwikala bakishinka kwi atweba ne, pakuba twafwainwa kuketekela’mba Yehoba ukatwajijila kwikala wa kishinka kwi atweba. Nangwa tukapite mu bintu bya mutundu ka, aye ukatwajijila kwitukwasha. Kechi ukalekelela bakalume banji ba kishinka ne.” (Sala. 37:28) Kabiji vulukainga ne kuba’mba kafwako muntu wakonsha kwitutemwa byonka bitutemwa Yehoba ne. Nangwa kya kuba kitukola bingi ku muchima inge betwalukamo ku muntu ye twaketekela, bino Yehoba utwajijila kwitutemwa ne kwituta muchima. (Loma 8:38, 39) Kishinka kyo twafwainwa kuvulukanga ke kya kuba’mba Shetu wa mwiulu ukatwajijila kwitutemwa nangwa kya kuba bakwetu betuba byatama.
Buku wa Masalamo witubuula’mba Yehoba uji kwipi na bonse balajika michima (Monai jifuka 13)
14. Kinembelo kya Salamo 34:18 kitutundaika byepi?
14 Inge muji na bulanda na mambo a kwimwalukamo, byambo byaambile Davida biji pa Salamo 34:18 byakonsha kwimutekenesha bingi. (Tangai.) Buku umo waamba’mba byambo bya kuba’mba “balajika michima,” byamba pa “bantu balanguluka’mba bwikalo bwabo kechi bukawamapo ne.” Yehoba ukwasha byepi bantu balanguluka bino na mambo a bintu byatama byo bapichilemo? Byonkatu biji nsemi wa butemwe utekenesha mwananji uji na bulanda, Yehoba naye “uji kwipi” ne atweba. Witumvwina lusa kabiji winengezha kwitukwasha inge betwalukamo. Ukebesha kwitutekenesha inge ketulanguluke amba kechi twanema ne. Kabiji witulaya bintu byawama bingi bitukwasha kuchinchika makatazho o tupitamo pa kino kimye.—Isa. 65:17.
KUJILA NA MAMBO A KUPOPOMENWA
15. Ñanyi kintu kyalengejile Hezekiya kujila?
15 Byo ajinga na myaka 39, Mfumu Hezekiya wa mu Yuda wakolelwe bingi. Ngauzhi Isaya wayile na kumubuula byambo byafumine kwi Yehoba kuba’mba usakufwa na mambo a kikola kyanji. (2 Mfu. 20:1) Hezekiya walangulukilenga’mba kyapwa usakufwa. Hezekiya wajijile bingi byo aumvwine bino byambo. Walombele kwi Yehoba na mukoyo.—2 Mfu. 20:2, 3.
16. Yehoba wakwashishe byepi Hezekiya?
16 Yehoba byo aumvwine lulombelo lwa kwa Hezekiya ne kumona mipolo yanji, wamumvwijile lusa ne kumwambila’mba: “Naumvwa lulombelo lobe. Namona mipolo yobe. Nsakukubuka.” Yehoba waingijishe Isaya kumubuula’mba wamunungilako moba a bumi bwanji kabiji amba ukapokolola Yelusalema ku bena Asilya.—2 Mfu. 20:4-6.
17. Yehoba witutekenesha byepi inge tubena kukolwa kikola kikatampe? (Salamo 41:3) (Monai ne kipikichala.)
17 Bintu byo tufunjilako. Nanchi mubena kukolwa kikola kibena kwimulengela kulanguluka’mba musakufwa nyi? Mubuulai Yehoba byo mubena kumvwa ku muchima nangwa kya kuba mubena kujila. Baibolo witubuula’mba “Shanji bya lusa kabiji Lesa wa lutekenesho lonse” uketutekeneshanga mu meseko etu onse. (2 Ko. 1:3, 4) Lelo jino, kechi twafwainwa kuketekela Yehoba kufumyapo makatazho etu onse ne, bino twafwainwa kuketekela’mba uketukwashanga. (Tangai Salamo 41:3.) Yehoba wingijisha mupashi wanji wazhila kwitupa bulume, maana ne mutende wa mu milanguluko pa kuba’mba tuchinchike. (Maana 18:14; Fili. 4:13) Kabiji witupa luketekelo lwitutekenesha lwa kuba’mba kulutwe kafwako muntu ukakolwanga ne.—Isa. 33:24.
Yehoba ukakumbula milombelo yetu kupichila mu kwitupa bulume, maana ne mutende wa mu milanguluko (Monai jifuka 17)
18. Ñanyi kinembelo kimutekenesha inge mubena kupita mu lukatazho lukatampe? (Monai kakitenguluzha ka kuba’mba “ Binembelo Bitutekenesha Inge Tubena Kujila na Mambo a Makatazho.”)
18 Byambo Yehoba byo aambijile Hezekiya byamutekeneshe bingi. Ne atweba, Mambo a Lesa akonsha kwitutekenesha. Inge tuji na bijikila, byambo bya Yehoba biji mu Baibolo biketutekeneshanga ne kwitukwasha kwikala na mutende wa mu milanguluko. (Loma 15:4) Nyenga umo wikala ku muzhika wa Africa byo bamutaaine na kikola kya kansa, waendangatu na kujila. Waambile’mba: “Kinembelo kimo kintekenesha bingi ke Isaya 26:3. Nangwa kya kuba javula kechi twikala na bulume bwa kupwisha makatazho o tupitamo ne, kino kyepelo kinkwasha kuyuka’mba Yehoba wakonsha kwitupa mutende wa mu milanguluko witukwasha kubula kulukusha muchima.” Nanchi kujipo kinembelo kimutekenesha inge mubena kupita mu makatazho ashinkisha bulaka amweka nobe kechi akonsha kupwa nenyi?
19. Ñanyi bintu byawama biji kulutwe byo tubena kutengela?
19 Byo tubena kunangijila ku mpelo ya buno bwikalo, twafwainwa kuketekela’mba makatazho etulengela kwikala na bulanda ne kujila akayangatu na kuvujilako. Pano bino, byonka byo twafunda pe Hana, Davida ne Mfumu Hezekiya, Yehoba umona mipolo yo tujila kabiji naye umvwa bingi kutama ku muchima. Mipolo yetu yanema bingi kwi aye. Onkao mambo, inge tubena kupita mu makatazho, twafwainwa kumubuula Yehoba byonse biji ku muchima. Kechi twafwainwa kwitolwela ku balongo ne banyenga mu kipwilo ne. Kabiji twayai tutwajijile kutaana lutekenesho mu byambo biji mu Baibolo. Twafwainwa kushiinwa kuba’mba inge twatwajijila kuchinchika mu bukishinka, Yehoba uketupesha. Mu kino mwavwangwa ne mulaye wa kuba’mba ukashimuna mipolo yo tujila na mambo a bulanda, kwitwalukamo ne kupopomenwa. (Lum. 21:4) Kepo tukajilangatu mipolo ya lusekelo.
LWIMBO 4 “Yehoba ye Kafunga Wami”
