Nanchi mwatanga Byamba bya Usopa bya uno mwaka nyi? Monai inge mwakonsha kukumbula ano mepuzho:

Twafwainwa kulondela byepi Yehoba pa byo twafwainwa kumonanga banabakazhi?

Kechi wibamona’mba bapusana na banabalume ne. Yehoba wayuka bijikila ne makatazho apitamo banabakazhi. Wibaketekela kabiji wibapa mingilo ya kwingila.—w24.01, ma. 15-16.

Twakonsha kwingijisha byepi byambo biji pa Efisesa 5:7, byaamba’mba: “Kange mupwanañanenga nabo ne”?

Mutumwa Paulo witujimwinengako kubula kupwanañana na bantu bakonsha kwitulengela kubula kukookela mizhilo ya Lesa. Kuno kupwanañana kwavwangamo ne bantu bo tumona kilungi na kilungi ne na boba bo twisamba nabo pa foni nangwa pa Intaneti.—w24.03, ma. 22-23.

Ñanyi mashimikila a bubela o twafwainwa kukana?

Twafwainwa kujimuka na mashimikila abula bishinka afuma ku balunda netu, bintu byaumvwa bantu byo betubuulako byo babula kuyuka inge abyo bintu bya kine nangwa ne, kwitutumina byambo pa keyala ku bantu bo twabula kuyuka ne bantu bafuma mu lwitabilo bamweka nobe bakeba kufunda bukine.—w24.04, ji. 12.

Ñanyi bintu byo twayuka ne byo twabula kuyuka pe Yehoba byo akachibila mambo Mfumu Solomone, bantu bafwile mu Sodoma ne Gomola ne boba bafwile na Muyulo?

Kechi twayuka inge Yehoba wibachibila mambo kwa kubula kwikala na luketekelo lwa kukasangulwa kulutwe ne. Nangwa byonkabyo, twayuka kuba’mba wayuka bishinka byonse kabiji uji na lusa lukatampe.—w24.05, ma. 3-4.

Kuyuka’mba Lesa ye “Jibwe” kwitulengela kwikala na ñanyi luketekelo? (Mpitu. 32:4)

Twakonsha kufyama mwi Yehoba. Aye ye wa kishinka kabiji kimye kyonse ufikizha milaye yanji. Kechi waluka ne, kabiji kechi upimpula byubilo byanji ne bintu byo afuukula kuba ne.—w24.06, ma. 26-28.

Ñanyi bintu byakonsha kwimukwasha kupijilwa mu kipwilo kyo mwavilukilamo?

Ketekelai mwi Yehoba. Aye ukemukwasha byonka byo akwashishe bakalume banji ba mu moba a kala. Kechi mwafwainwa kwesakanyanga bintu byo biji mu kipwilo kya katataka mo mwaiya na ko mwafuma ne. Payankanai mu kipwilo kya katataka mo muji ne kwibikako kwikala na balunda ba katataka.—w24.07, ma. 26-28.

Ñanyi bintu byo tufunjilako ku bishimpi bisatu biji mu Mateo kitango 25?

Kishimpi kyaamba pa mikooko ne bambuzhi kitukwasha kuba’mba twafwainwa kutwajijila kwikala ba kishinka. Kishimpi kya bakamwale ba maana ne bakosama kitufunjisha kuba’mba twafwainwa kwinengezhezha jimo ne kutwajijila kulaba ne kukenkenta. Kabiji kishimpi kya matalenta kyaamba pa buneme bwa kwingila na ngovu ne na mukoyo.—w24.09, ma. 20-24.

Kibamba kya pa kibelo ya nzubo ya Lesa yashimikile Solomone kyalepele byepi?

Mu mamanyusikilipiti amo a kala, pa kinembelo kya 2 Byambo bya Moba 3:4 paji byambo bya kuba’mba “makyubichi 120,” kino kibena kulumbulula’mba kyalepele mamita 53 kuya mwiulu. Pano bino Mabaibolo akwabo aamba’mba kyalepele “makyubichi 20,” nangwa mamita 9 mu kulepa. “Makyubichi 20” o aesakana na mujita wa bibumbulu bya ku nzubo ya Lesa.—w24.10, ji. 31.

Kilumbulula ka nkwasho kwikala ‘mwanamulume uji na mukazhi umo’? (1 Timo. 3:12)

Kilumbulula’mba wafwainwa kusongola mwanamukazhi umo kabiji kechi wafwainwa kuba bulalelale ne. Kabiji kechi wafwainwa kwifwalama na mwanamukazhi wabula mwinakwanji ne.—w24.11, ji. 19.

Mambo ka o twafwainwa kwambila’mba byambo biji pa Yoano 6:53 kechi byaambilenga pa byafwainwa kwikala Kijiilo kya Nkambo kya Mabanga ne?

Kinembelo kya Yoano 6:53 kyaamba pa kuja mubiji wa kwa Yesu ne kutoma mashi anji. Yesu waambile bino byambo mu 32 C.E., mu Ngalilea ku Bayudea bafwainwe kumwitabila. Pakuba Kijiilo kya Nkambo kya Mabanga wikitendekeshe saka papita ne mwaka umo mu Yelusalema. Pa kyokya kimye, Yesu waambilenga na bantu bo akalamanga nabo mwiulu.—w24.12, ma. 10-11.