KYAMBA KYA USOPA—KYA KUFUNDAMO Nkubomukata 2017
Mu kino kyamba muji mitwe ya kufunda mu kutendeka pa April 3-30, 2017.
Kyaswa Muchima wa Yehoba Kikobiwa!
Mambo ka Lesa o alengejile ntanda ne bantu? Bintu byalubankene byepi? Kitapisho kya bukuzhi kya kwa Yesu kyaikala byepi ke jishinda Lesa mo akafikizha kyaswa muchima wanji?
Bukuzhi—‘Bupe Bwalumbuluka Kufuma kwi Shetu’
Bukuzhi bwitupa Lesa bwitushinkwila jishinda ja kutambwilamo mapesho avula, kabiji bwanema bingi ku bantu ne ku bamalaika.
JISHIMIKILA JA BWIKALO
Twimwenejile Lusa Lukatampe lwa Lesa mu Mashinda Apusana Pusana
Ba Douglas Guest ne ba Mary Guest bemwenejile lusa lukatampe lwa Lesa byo baingijilenga bupainiya mu Canada ne bumishonale mu Brazil ne mu Portugal.
Yehoba Utangijila Bantu Banji
Mu myaka ya kala, Yehoba watongwele banabalume ba kutangijila bantu banji. Ñanyi bishiino bimwesha’mba kine wakwashishenga bano banabalume?
Ñanyi Ubena Kutangijila Bantu ba Lesa Lelo Jino?
Yesu walayile baana banji ba bwanga amba ukekala nabo kufikatu ne ku mpelo ya buno bwikalo. Ubena kutangijila byepi bantu ba Lesa lelo jino?
Mepuzho Afuma ku Batanga
Mutumwa Paulo wanembele’mba Lesa “kechi ukemuleka’mba mwesekwe lweseko lwakila pa bulume bwenu ne.” Nanchi kino kyalumbulula’mba Yehoba umwena jimo meseko o twakonsha kuchinchika ne kwitusajila o tukapitamo nyi?
KUFUMA MU BUTALA BWETU
“Kafwako Makatazho Akonsha Kulengela Bakamonyi Kukankalwa Kusapwila Ne”
Mu myaka ya ma 1920 kufikatu ne mu ma 1930, bapainiya baingijilenga na mukoyo kuba’mba basapwile mambo awama a Bufumu bwa Lesa mu mapunzha a mwalepa a mu Australia.
