Akimonai byakonsha kuba muntu inge kealanguluke bino. Mulongo umo, wajinga na mwana wamulume wiipayile, washikishe’mba: ‘Nanchi ko kuba Yehoba wamwenejile jimo amba amiwa ne mwinakwami twakonsha kuchinchika inge mwanetu wiipaya nyi?’ Nanchi kujipo bishinka byafwainwa kwitulengela kulanguluka’mba Yehoba ulengela bintu kwitumwekela mu jino jishinda nyi?

Inge twapitulukamo bulongo mu byambo byanembele Paulo pa 1 Kolinda 10:13, kyo tutaanapo ke kino: Kafwapo kishinka kya mu Binembelo kyafwainwa kwitulengela kulanguluka’mba Yehoba umwena jimo meseko o twakonsha kuchinchika ne kwitusajila meseko o tukapitamo ne. Twayai twisambe pa bishinka bina bitulengela kwamba bino.

Kitanshi, Yehoba wapa bantu luusa lwa kwifuukwila bintu. Ukeba’mba twisajilenga bintu byo tukeba kuba mu bwikalo bwetu. (Mpitu. 30:19, 20; Yosh. 24:15) Inge twasalapo kuba byawama, twakonsha kulomba Yehoba kwitutangijila. (Maana 16:9) Bino inge twasalapo jishinda jatama, tukemwena makatazho akafumamo mu byo twasalapo. (Nga. 6:7) Umvwe Yehoba witusajilanga meseko o twakonsha kupitamo, ko kuba’mba ubena kwitwangata luusa lwetu lwa kwifuukwila bintu.

Kya bubiji, Yehoba kechi witufya pa kuba’mba tubule kupita mu makatazho eya na mambo “bimye ne bintu bya kubula kuketekela” ne. (Sapwi. 9:11) Bintu byatama byakonsha kwitumwekela kwa kubula kuketekela, kampe na mambo a kuba twajinga pa mpunzha yatama. Yesu waambilepo pa bantu 18 bafwile na mambo a kuba kyamba kibaponejile ne kwibepaya, kabiji waambile’mba Lesa kechi ye walengejile luno lufu ne. (Luka 13:1-5) Nanchi twakonsha kwamba’mba Lesa usajila jimo bantu bakapuluka ne bakafwa mu bya malwa bya kubula kuketekela bikamweka kulutwe nyi? Ine.

Kya busatu, twafwainwa kwifuukwilapo atweba bene kwikala ba kishinka nangwa ne. Vulukai kuba’mba Satana wamba’mba aba bonse bengijila Yehoba kechi bakonsha kutwajijila kwikala ba kishinka kwi Yehoba inge bapita mu meseko ne. (Yoba 1:9-11; 2:4;  Lum. 12:10) Inge Yehoba wabula kwituswisha kupita mu makatazho amo o amona’mba kechi twakonsha kuchinchika ne, nanchi kino kechi kyakonsha kumwesha’mba byaambile Satana bya kine nenyi?

Kya buna, Yehoba kechi wikalatu na kumwena jimo bintu byonsetu biketumwekela ne. Bantu bamba’mba Lesa umwena jimo byonse bikamweka kulutwe, o ene mambo o balangulukila’mba witusajila meseko o tukapitamo. Bino Baibolo kechi byo byo aamba ne. Ibyo kuba’mba Lesa wakonsha kumona bintu bya kulutwe. (Isa. 46:10) Bino Baibolo umwesha kuba’mba ufuukulapo mwine byo akeba kumona pa bya kulutwe. (Nte. 18:20, 21; 22:12) Onkao mambo, nangwa kya kuba Lesa uji na bulume bwa kumona bya kulutwe, bino wituswisha kwifuukwila bintu. Kechi twakonsha kukumya pa kino ne, mambo Lesa wanemeka luusa lwetu lwa kwifuukwila bintu, kabiji kimye kyonse wingijisha bulume bwanji mu kwesakanya.—Mpitu. 32:4; 2 Ko. 3:17.

Onkao mambo, nanchi byambo byanembele Paulo bya kuba’mba, “Lesa . . . kechi ukemuleka’mba mwesekwe lweseko lwakila pa bulume bwenu ne,” byatala mwepi? Paulo waambilenga pa byuba Yehoba kimye kyo tubena kupita mu meseko, kechi byo oba saka tukyangye kupita mu meseko ne. Byambo bya kwa Paulo bitukwasha kushiinwa’mba nangwa tupite mu meseko a mutundu ka, Yehoba uketukwasha inge twamuketekela. (Sala. 55:22) Byambo bya kwa Paulo byaimena pa bishinka bibiji bya mu Binembelo.

Kitanshi, meseko o tupitamo ke meseko apitamo ne “bantu bakwabo.” Kino kyalumbulula’mba makatazho o tupitamo o apitamo bantu mu ino ntanda yatama. Inge twaketekela mwi Lesa, twakonsha kuchinchika ano meseko. (1 Pe. 5:8, 9) Saka akyangye kwamba byambo biji pa 1 Kolinda 10:13, Paulo waambile pa meseko apichilemo bena Isalela kimye kyo bajinga mu kiselebwa. (1 Ko. 10:6-11) Meseko apichilemo bena Isalela kechi akijile bulume bwabo bwa kuchinchika ne. Bimye bina, Paulo waambile’mba “bamo” balengele mambo. Kyatamineko kya kuba’mba bena Isalela bamo balengele mambo na mambo a kuba kechi baketekejile mwi Lesa ne.

Kya bubiji, “Lesa wa kishinka.” Mashimikila a mu Baibolo aamba pe Lesa byo akwashishe bantu banji amwesha’mba aye umwesha butemwe bubula kwaluka ku “boba bamutemwa kabiji balama mikambizho yanji.” (Mpitu. 7:9) Kabiji amwesha kuba’mba Lesa ulama milaye yanji kimye kyonse. (Yosh. 23:14) Na mambo a kuba Lesa wa kishinka, bonse bamutemwa ne kumukookela bakonsha kuketekela’mba inge kebapite mu meseko, aye ukalama ino milaye yanji ibiji: (1) Kechi ukaswisha lweseko kutwajijila kukila pa bulume bwabo bwa kuchinchika ne, kabiji (2) ‘ukebamwena jishinda’ ja kuchinchikilamo.

Inge bantu baketekela mwi Yehoba, aye wibamwena byepi jishinda ja kuchinchikilamo meseko? Inge Lesa mwine wakeba, wakonsha kufumyapo lolo lweseko. Bino vulukai byaambile Paulo, amba: “Aye [Yehoba] ukemumwena jishinda ja kuchinchikilamo.” Onkao mambo, javula ‘witumwena jishinda’ kupichila mu kwitupa bintu bya kwitukwasha kuchinchika meseko. Akimonai mashinda amo Yehoba mo akonsha kwitumwena jishinda ja kuchinchikilamo:

• “Witutekenesha mu meseko etu onse.” (2 Ko. 1:3, 4) Yehoba wakonsha kwitutekenesha ne kukookolosha michima yetu kupichila mu Mambo anji, mupashi wazhila, ne na kajo ka ku mupashi ketupa kalume wa kishinka.—Mat. 24:45; Yoa. 14:16, tubyambo twa munshi, Loma 15:4.

• Wakonsha kwitutangijila na mupashi wazhila. (Yoa. 14:26) Inge ketupite mu meseko, mupashi wazhila wakonsha kwituvululamo Binembelo ne mafunde a mu Baibolo pa kuba’mba tukonshe kufuukula bintu bulongo.

• Wakonsha kutuma bamalaika banji amba betukwashe.—Hebe. 1:14.

• Wakonsha kwingijisha bena Kilishitu bakwetu kwitutekenesha na byambo byabo ne bukwasho bwabo, pa kuba’mba ‘betukoseshe.’—Kolo. 4:11, tubyambo twa munshi.

Onkao mambo, nanchi byambo bya kwa Paulo byanembwa pa 1 Kolinda 10:13 byatala mwepi? Yehoba kechi usajila jimo meseko o twakonsha kupitamo ne. Bino inge ketupite mu meseko, twafwainwa kushiinwa’mba: Inge twaketekela mwi Yehoba, aye kechi ukaswisha meseko etu kutwajijila kukila pa bulume bwetu bwa kuchinchika ne; uketumwena jishinda ja kuchinchikilamo. Kino kitutekenesha bingi.