1. Lunengezho lwa bukuzhi lwaleta ñanyi mapesho?

KITAPISHO kya bukuzhi kya kwa Yesu Kilishitu kituletela mapesho avula bingi. Bukuzhi bwashinkula jishinda ja kuba’mba baana ba kwa Adama batemwa bololoke bakekale mu kisemi kya Lesa. Kabiji bukuzhi bwitulengela kwikala na luketekelo lwa kwikala na bumi bwa myaka ne myaka kabiji bwa lusekelo. Bukuzhi bwa kwa Kilishitu bukaletela bantu mapesho avula. Yesu byo epaine kufwa pa kuba’mba ekale wa kishinka kwi Yehoba, waubile kintu kyanema bingi ku bantu ne ku bamalaika.—Hebe. 1:8, 9.

2. (a) Ñanyi bintu byakilamo kunema byo tutaana mu lulombelo lwa kwa Yesu? (Monai kipikichala kitanshi.) (b) Ñanyi bintu byo tusakwisambapo mu uno mutwe?

² Byo kwashajiletu myaka ibiji kuba’mba Yesu afwe ne kupana kitapisho kya bukuzhi, wafunjishe baana banji ba bwanga kulomba’mba: “Tata wetu wa mwiulu, jizhina jenu jizhile. Bufumu bwenu bwiye. Kyaswa muchima wenu kyubiwe pano pa ntanda,  byonka byo kibena kubiwa mwiulu.” (Mat. 6:9, 10) Twayai twisambe pa bukuzhi byo bwakwatankana na kuzhijika jizhina ja Lesa, kulama kwa Bufumu bwa Lesa, ne kufikizha kyaswa muchima wa Lesa.

3. Jizhina ja Yehoba jimwesha ka, kabiji Satana waletele byepi mwenga pa jino jizhina jazhila?

³ Kuzhijika jizhina ja Lesa kyo kintu kitanshi Yesu kyo atongwele mu lulombelo lwanji. Jizhina ja Yehoba, jimwesha buwame bwa Lesa, munema, ne buzhile. Mu lulombelo lukwabo, Yesu watelele Yehoba amba “Tata Wazhila.” (Yoa. 17:11) Na mambo a kuba’mba Yehoba wazhila, mafunde anji ne mizhilo yanji byonse byazhila. Nangwa byonkabyo, mu bujimi bwa Edena Satana wazhinaukile luusa lwa Lesa lwa kulama bantu. Na mambo a kubepela Yehoba bubela, Satana waletele mwenga pa jizhina ja Lesa jazhila.—Nte. 3:1-5.

4. Yesu wazhijikile byepi jizhina ja Lesa?

⁴ Yesu watemenwe bingi jizhina ja Yehoba. (Yoa. 17:25, 26) Yesu wazhijikile jizhina ja Lesa. (Tangai Salamo 40:8-10.) Na mambo a kutwajijila kwikala wa kishinka kimye kyo ajinga pano pa ntanda, Yesu wamwesheshe patoka’mba kyayilamo Yehoba kupana mizhilo yanji yaoloka ku bantu. Nangwatu kimye Satana kyo amumanyikile kufikatu ne ku lufu, Yesu watwajijile kwikala wa kishinka kwi Shanji wa mwiulu. Byo atwajijile kwikala wa kishinka, wamwesheshe kuba’mba muntu walumbuluka wakonsha kukookela mizhilo yaoloka ya Lesa.

5. Twakonsha kuba byepi pa kuba’mba ne atweba tuzhijike jizhina ja Lesa?

⁵ Twakonsha kumwesha byepi amba twatemwa jizhina ja Yehoba? Twakonsha kumwesha kino mu byubilo byetu. Yehoba ukeba’mba twikale bazhila. (Tangai 1 Petelo 1:15, 16.) Kino kibena kulumbulula’mba twafwainwa kupopwelangatu Yehoba bunke bwanji ne kumukookela na muchima yense. Nangwatu betumanyike, twafwainwa kwibikako kulondela mafunde anji aoloka ne mizhilo yanji. Inge twatwajijila kuba byaoloka, kyeya kyetu kimweka ku bantu bonse ne kuleta lukumo ku jizhina ja Yehoba. (Mat. 5:14-16) Inge twaikala bantu bazhila, tumwesha’mba mizhilo ya Yehoba yawama ne kushiina Satana amba wa bubela. Inge twatamisha, twafwainwa kulapila kufuma panshi ya muchima ne kuchinuzhuka byubilo byashikwa Yehoba.—Sala. 79:9.

6. Mambo ka Yehoba o etutelela’mba twaoloka nangwa kya kuba twi bambulwa kulumbuluka?

⁶ Bantu inge baitabila mu kitapisho kya bukuzhi bwa kwa Kilishitu, Yehoba wibalekelako mambo. Utambwila bonse bepana kwi aye kwikala bapopweshi banji. Yehoba utela bena Kilishitu bashingwa amba baana banji, kabiji utela “mikooko ikwabo” amba balunda nanji baoloka. (Yoa. 10:16; Loma 5:1, 2; Yako. 2:21-25) Nangwatu luno, bukuzhi bwitukwasha kwikala baoloka kwi Shetu ne kuzhijika jizhina janji.

7. Na mambo a bukuzhi, ñanyi mapesho akaleta Bufumu bwa Lesa?

⁷ Mu lulombelo lwanji lo afunjishe baana banji ba bwanga, Yesu wanungilepo musashijilo kwi Lesa amba: “Bufumu bwenu bwiye.” Ñanyi lukwatankano luji pa bukuzhi ne Bufumu bwa Lesa? Bukuzhi bwalengela kuba’mba ba 144,000 bakekale bamfumu ne  bañanga pamo ne Kilishitu mwiulu. (Lum. 5:9, 10; 14:1) Yesu ne bo akalamanga nabo mu Bufumu bwa Lesa, bakengijisha bukuzhi kuletela bantu ba lukookelo mapesho avula pa myaka 1000. Ntanda ikekala ke paladisa, kabiji bantu bonse ba kishinka bakekala balumbuluka. Bakalume ba Lesa ba pano pa ntanda ne mwiulu bakekala ke kisemi kimo. (Lum. 5:13; 20:6) Kabiji Yesu ukafumpa muloolo ku mutwe ne kufumyapo makatazho onse aleta Satana pano pa ntanda.—Nte. 3:15.

8. (a) Yesu wakwashishe byepi baana banji ba bwanga kuyuka buneme bwa Bufumu bwa Lesa? (b) Tutundaika byepi Bufumu bwa Lesa lelo jino?

⁸ Byo ajinga pano pa ntanda, Yesu wakwashishe baana banji ba bwanga kuyuka buneme bwa Bufumu bwa Lesa. Yesu byo abatizhiwetu, watendekele kusapwila “mambo awama a Bufumu bwa Lesa” mu mapunzha apusana pusana. (Luka 4:43) Mu byambo byanji byapeleleko saka akyangye kubwela mwiulu, Yesu wibakambizhe baana banji ba bwanga kwikala bakamonyi banji “monse mwapela ntanda.” (Byu. 1:6-8) Na mambo a mwingilo wa kusapwila, bantu mwaya ntanda yonse babena kufunda pa bukuzhi pa kuba’mba bakekale bangikazhi ba mu Bufumu bwa Lesa. Lelo jino, tutundaika Bufumu kupichila mu kukwasha balongo ba kwa Kilishitu baji pano pa ntanda kusapwila mambo awama a Bufumu mwaya ntanda yonse.—Mat. 24:14; 25:40.

9. Mambo ka o twashiinwa’mba Yehoba ukafikizha kyaswa muchima wanji ku bantu?

⁹ Yesu walumbulwilenga ka byo aambile’mba: “Kyaswa muchima wenu kyubiwe”? Yehoba ye Mulenga. Inge waamba’mba kintu kikobiwa, kijitu nobe kyaubiwa ne kala. (Isa. 55:11) Kechi ukaswisha bunsatuki bwa kwa Satana kuvulañanya kyo akebelenga kubila bantu ne. Kufumatu ne ku ntendekelo, Yehoba wakebelenga’mba ntanda ikayule na baana baoloka ba kwa Adama ne Evwa. (Nte. 1:28) Inge kya kuba Adama ne Evwa bafwile kwa kubula baana, kyaswa muchima wa Lesa kya kuyuzha ntanda na baana babo inge kechi kyaubiwe ne. Onkao mambo, Adama ne Evwa byo balengele mambo, Yehoba wibaswishishe kwikala na baana. Na mambo a bukuzhi, aba bonse baji na lwitabilo bakekala balumbuluka ne kwikala na bumi bwa myaka ne myaka. Yehoba watemwa bantu, kabiji kyaswa muchima wanji ke kya kuba’mba bantu bakekale monka mo akebejilenga.

10. Nga bafu bakamwenamo byepi mu bukuzhi?

¹⁰ Kikekala byepi ku bantu bavula bafwile kwa kubula kuyuka Yehoba ne kumwingijila? Na mambo a bukuzhi aba bonse bafwa bakasangulwa. Shetu wa mwiulu ukebasangula ne kwibapa kimye kya kufunda kyaswa muchima wanji ne kwikala na bumi bwa myaka ne myaka. (Byu. 24:15) Yehoba ukeba bantu kwikala na bumi, kechi kufwa ne. Byo aji Nsulo ya bumi, ukekala Shabo bonse bakasangulwa. (Sala. 36:9) Onkao mambo, kyayilamo bingi Yesu byo etufunjishe kulomba’mba: “Tata wetu wa mwiulu.” (Mat. 6:9) Yehoba wapa Yesu mwingilo wanema wa kusangula bafu. (Yoa. 6:40, 44) Mu Paladisa Yesu ukafikizha byambo bya kuba’mba ye “lusanguko ne bumi.”—Yoa. 11:25.

11. Lesa ukeba’mba ba mu “jibumba jikatampe” bakekale byepi?

¹¹ Yehoba kechi ubilatu byawama bantu  bacheche ne, mambo Yesu waambile’mba: “Yense uba kyaswa muchima wa Lesa, ye nkasami wa mulume, ye nyenga yami kabiji bo bamama.” (Mako 3:35) Ke kyaswa muchima wa Lesa kuba’mba “jibumba jikatampe” ja kukankalwa kubala kufuma mu bisaka byonse, mu mitundu yonse ya bantu ne mu njimi yonse bakekale bapopweshi banji. Aba baji na lwitabilo mu bukuzhi bwa kwa Kilishitu ne kuba kyaswa muchima wa Lesa bakekala pa boba bakabijika amba: “Lupulukilo lwetu lufuma kwi Lesa wetu waikala pa jitanda, ne ku Mwana Mukooko.”—Lum. 7:9, 10.

12. Misashijilo iji mu lulombelo lwa kwa Yesu imwesha byepi kyaswa muchima wa Yehoba ku bantu ba lukookelo?

¹² Misashijilo iji mu lulombelo lwa kwa Yesu imwesha bintu Yehoba byo akeba kubila bantu. Kulondela luno lulombelo, twafwainwa kwingila na ngovu kuzhijika ne kunemeka jizhina ja Yehoba. (Isa. 8:13) Jizhina ja Yesu jilumbulula’mba “Yehoba ye Lupulukilo,” kabiji kupuluka kwetu na mambo a bukuzhi kuleta munema ne lukumo ku jizhina ja Yehoba. Bufumu bwa Lesa bukalengela bantu ba lukookelo kumwenamo mu bukuzhi. Kya kine, lulombelo lwa kwa Yesu lumwesha’mba kafwako kyakonsha kukanya kyaswa muchima wa Lesa kubiwa ne.—Sala. 135:6; Isa. 46:9, 10.

13. Lubatizhilo lwetu lumwesha ka?

¹³ Jishinda jimo mo tumweshesha amba tusanchila Lesa pa bukuzhi ke kwipana atweba bene kwi Yehoba na mambo a kwitabila mu bukuzhi ne kubatizhiwa. Lubatizhilo lwetu lumwesha’mba “twi ba  kwa Yehoba.” (Loma 14:8) Kino kilumbulula’mba tubena kulomba kwi Lesa kuba’mba twikale na jiwi ja mu muchima jawama. (1 Pe. 3:21) Yehoba witukumbula kupichila mu kwitutokesha na mashi a kitapisho kya kwa Kilishitu. Kya kine twaketekela’mba uketupa byonse byo etulaya.—Loma 8:32.

14. Mambo ka o betukambizhizha kutemwa bakwetu?

¹⁴ Ñanyi jishinda jikwabo jo tumwesheshamo amba tusanta pa bukuzhi? Yehoba uba bintu byonse na butemwe, kabiji ukeba’mba bapopweshi banji bonse bamweshenga butemwe. (1 Yoa. 4:8-11) Inge twatemwa bakwetu, tumwesha’mba tubena kukeba kwikala “baana ba [Shetu] wa mwiulu.” (Mat. 5:43-48) Mukambizho wa kutemwa bakwetu, ye wa bubiji ku mukambizho mutanshi wa kutemwa Yehoba. (Mat. 22:37-40) Jishinda jimo jo tumwesheshamo amba twatemwa bakwetu ke kukookela mukambizho wa kusapwila mambo awama a Bufumu bwa Lesa. Inge twatemwa bakwetu, tumwesha lukumo lwa Lesa. Butemwe bwa Lesa “bulumbulukila mwi atweba” inge twakookela mukambizho wa kutemwa bakwetu, kikatakata balongo.—1 Yoa. 4:12, 20.

15. (a) Ñanyi bintu byawama bibena kwitubila Yehoba kino kimye? (b) Ñanyi mapesho o tubena kutengela?

¹⁵ Lesa witulekelako mambo inge twaitabila mu bukuzhi. Mambo a Lesa etulaya’mba mambo etu bakonsha ‘kwiazhimañanya.’ (Tangai Byubilo 3:19-21.) Byonka byo twaambapo kala, na mambo a bukuzhi, Yehoba utela bakalume banji bashingwa amba baana banji. (Loma 8:15-17) Yehoba waita atweba ba mu “mikooko ikwabo” amba tukekale ba mu kisemi kyanji pano pa ntanda. Inge tukekale balumbuluka ne kushinda lweseko lukapelako, ne atweba Yehoba uketutongola kwikala baana banji bo atemwa. (Loma 8:20, 21; Lum. 20:7-9) Butemwe Yehoba bo atemwa baana banji kechi bupwa ne. Kabiji mapesho akafuma mu bukuzhi ke mapesho a myaka ne myaka. (Hebe. 9:12) Yehoba witupa buno bupe bwa bukuzhi, kabiji kafwako uketwangabo ne.

16. Bukuzhi bwitukasulula byepi?

¹⁶ Kafwako kintu nangwa kimo kikoba Diabola kikakanya bantu balapila kwiya mu kisemi kya Yehoba ne. Yesu waishile pa ntanda ne kufwa “jimotu.” Onkao mambo, bukuzhi bwapainwe kikupu. (Hebe. 9:24-26) Bukuzhi bwafumishepo luzhachisho lo twaswaine kufuma kwi Adama. Na mambo a kitapisho kya kwa Kilishitu, twapokololwa ku buzha bwa ino ntanda ya kwa Satana kabiji kechi tuchina lufu ne.—Hebe. 2:14, 15.

17. Mumvwa byepi inge mwalanguluka pa butemwe bwa Yehoba?

¹⁷ Milaye ya Lesa kimye kyonse ifika. Byonkatu mizhilo yo abikile mu bilengwa byo ibula kwaluka, Yehoba kechi ukankalwa kufikizha byo alaya ne. Kechi waluka ne. (Mala. 3:6) Yehoba uketubila bintu byavula bingi, kechi kwitupatu bumi kwapa ne. Lesa witutemwa. Baibolo waamba’mba: “Twayuka ne kwitaba abwa butemwe Lesa bo etutemwa. Lesa butemwe.” (1 Yoa. 4:16) Ntanda yonse ikekala paladisa kabiji bantu bonse bakamweshanga butemwe bwa Lesa. Kepo bakalume ba Lesa bonse ba kishinka pano pa ntanda ne mwiulu bakamba’mba: “Kutotwa ne lukumo ne maana ne sante ne munema ne bulume ne ngovu bikale kwi Lesa wetu myaka ne myaka. Amena.”—Lum. 7:12.