Nasemekelwe mu 1937 ku kolkhoz, nangwa’mba mpunzha kwaikejile majimi a kafulumende kwipi na muzhi wa Tokmok mu kyalo kya Kyrgyzstan. Kisemi kyetu kyajinga kya bantu ba mu mukoka wa Kyrgyz, kabiji twaambanga mulaka wa Kyrgyz. Bansemi bami baingilanga mu ano majimi kutendeka ku manyanshi kufika kimye kya muntu wa muntu wa. Bantu baingijilanga pa fwamu bebapanga kajo, bino bebafoleshangatu mali jimo pa mwaka. Bamama kibakatazhanga bingi bya kwitulama amiwa ne nkasami wamukazhi. Byo nafunjilekotu myaka itanu ku sukulu, ne amiwa natendekele kwingila pa fwamu wa kolkhoz.

Bantu bavula baikalanga mu kijiiji mo twaikalanga bajinga bayanji, kabiji kyakebewanga kwingila na ngovu pa kuba’mba mumonepo mwa kwikela. Byo nakijinga nsongwalume, kechi nayukile ene mambo o twaikelako nangwa bikekala bwikalo kulutwe ne. Kechi nalangulukangapo’mba bukine bwaamba pe Yehoba Lesa ne pa kyaswa muchima wanji byakonsha kupimpula bwikalo bwami ne. Ke kintu kya kukumya inge nalanguluka pa bukine byo bwafikile mu Kyrgyzstan. Buno bukine bwatendekejile mu muzhi mo naikalanga ku kabeta ka ku buyeke bwa Kyrgyzstan.

Bukine bwaamba pe Yehoba Lesa bwafikile mu Kyrgyzstan mu myaka ya mu ma 1950. Kechi kyapeelele bantu kufunda bukine ne, mambo pa myaka yavula bebafunjishe kukookelatu kafulumende wa  Communist kwapwa. Mambo ka? Kyalo kitelwa luno amba Kyrgyzstan kala kyajinga pa byalo byajinga mu Union of Soviet Socialist Republics (USSR). Bakamonyi ba kwa Yehoba bonse bajinga mu byalo bya mu USSR, kechi bevwanganga mu bya bumulwila ntanda ne. (Yoa. 18:36) Onkao mambo, bebamanyikilenga mambo bebamonanga’mba basatukila kafulumende wa Communist. Pano bino, kafwako muntu wakonsha kukanya Mambo a Lesa kufika ku bantu ba bukishinka ne. Nafunda kuba’mba kwi Yehoba, “bintu byonse kechi byakatazha ne.”—Mako 10:27.

Kumanyika Bakamonyi ba kwa Yehoba kwalengejile Bakamonyi kuvula bingi mu Kyrgyzstan. Mambo ka? Kyalo kya Siberia kyajinga lubaji lwa USSR kabiji ko ko batwalanga bantu bo bamonanga’mba balwanyi ba kafulumende. Bano bantu byo bebakasulwile, bavula baishile ku Kyrgyzstan, kabiji bamo bajinga Bakamonyi. Umo pe abo wajinga Emil Yantzen wasemekejilwe mu Kyrgyzstan mu 1919. Emil wamonañene na Bakamonyi ba kwa Yehoba kimye kyo ajinga mu kampu wa lumanamo. Wafunjile bukine kabiji mu 1956 wabwelele ku kyalo ko afumine. Emil watendekele kwikala ku mpunzha iji kwipi na muzhi wa Sokuluk ko naikalanga. Kipwilo kitanshi mu Kyrgyzstan kyalengelwe mu muzhi wa Sokuluk mu 1958.

Byo papichile mwaka umo, mulongo wa jizhina ja Victor Vinter wavilukijile ku Sokuluk. Uno mulongo bamumanyikile bimye byavula. Bimye bibiji bamukashile pa myaka isatu na mambo a kukana kwivwanga mu bya bumulwila ntanda, kabiji kimye kikwabo bamukashile myaka jikumi, kunungapotu ne myaka itanu yo bamupangijile ku kyalo kingi. Pano bino, luno lumanamo kechi lwalengejile bukine kuzhiya ne.

Byo kyafikilenga mu 1963, mu Kyrgyzstan mwajinga Bakamonyi 160, kabiji bavula bafumine ku Germany, Ukraine, ne Russia. Kamonyi umo pa bano wajinga Eduard Varter, wabatizhiwe mu Germany mu 1924. Mu myaka ya mu ma 1940, Eduard bamukashile mu kampu wa lumanamo ku kafulumende wa Nazi, kabiji byo papichile myaka icheche, bamupangijile ku kyalo kingi ku kafulumende wa Communist mu USSR. Mu 1961, uno mulongo wavilukijile mu muzhi wa Kant, kwipi na ko naikalanga.

Kabiji mu muzhi wa Kant mwaikalanga ne kalume wa Yehoba mukwabo wa kishinka aye Elizabeth Fot. Uno nyenga waingilanga mwingilo wa kusona bivwalo bya banabakazhi. Na mambo a kuba’mba wayukile bingi uno mwingilo, badokotala ne bafunjishi bayanga na kusonesha bivwalo kwi aye. Mwanamukazhi umo wasoneshanga bivwalo kwi aye ke Aksamai Sultanalieva, wasongwelwe ku mukulumpe wa mingilo mu ofweshi wa mutonyi wa kyalo. Aksamai byo ayile na kusonesha kivwalo kwi Elizabeth, washikishe mepuzho avula pa ene mambo Lesa o alengejile bantu ne byo kikala inge muntu wafwa. Elizabeth wakumbwile ano mepuzho na Baibolo. Aksamai waikele musapwishi wabambakana bingi.

Pa kyonkakya kimye, Nikolai Chimpoesh wafumine ku kyalo kya Moldova bamutongwele kwikala kalama wa mwanzo, kabiji waingijile uno mwingilo pa myaka 30. Kununga pa kufwakashisha bipwilo, Nikolai watangijilanga ne mwingilo wa kukopolola ne kusampanya mabuku etu. Pano bino, mingilo yanji beitulukile ku bakulumpe mu kafulumende. Onkao mambo, Eduard Varter wajimwineko ba Nikolai amba: “Inge bakulumpe mu kafulumende bakemutebawizhe, mukebakumbuletu kishinka amba mabuku etu afuma ku ofweshi mukatampe mu Brooklyn. Mukamutajishe mu meso kapokola wa ba KGB ne kumukumbula. Kange mukachine ne.”—Mat. 10:19.

 Kechi pabanjile ne, ba Nikolai bebechile ku ofweshi mukatampe wa ba KGB mu Kant. Bashimikizhe byamwekele’mba: “Kapokola wangipwizhe ko twafumyanga mabuku etu. Namukumbwile’mba afuma ku Brooklyn. Byo namubuujile bino, wakankelwe bya kwambapo. Wankasulwile, kabiji kechi wangichilepo jibiji ne.” Bakamonyi babujile moyo bakwashishe bingi kusampanya mambo awama mu kibunji kya ku buyeke bwa Kyrgyzstan. Mwinakwami, aye Mairambubu, ye wajinga mutanshi kufunda bukine pe Yehoba mu kisemi kyetu mu 1981.

Mairambubu wakomejile mu kibunji kya Naryn mu Kyrgyzstan. Juba jimo mu August 1974, wafwakashijile nyenga yami, kabiji ko ko twamonañene. Kimye kitanshi kyo namumwenetu, namutemenwe bingi, kabiji twatwelele mu masongola pa jonkaja juba jo twamonañene.

Mu January 1981 Mairambubu byo ayilenga ku kisankanyi mu sakya, po po aumvwine byambo byo naji kwamba ku ntendekelo. Mwinakwami wakebeshe kuyukilapo byavula, onkao mambo waipwizhe jizhina ja mwanamukazhi ne ko aikalanga. Uno mwanamukazhi wakumbwile’mba jizhina janji wajinga Apun, bino wajimukile pa kukumbula, mambo ne mu yoya myakatu, mwingilo wa Bakamonyi bamukainye. Onkao mambo, aye ye waipwizhe benakwami amba bamubuule ko baikalanga. Benakwami basangalele bingi byo babwele ku nzubo.

Baambile’mba: “Lelo nafunda bintu byawama bingi. Mwanamukazhi umo waji kufunjisha’mba kulutwe, bantu kechi bakafwanga ne. Ne banyama ba mungye bonse bakebalamanga ku bantu.” Abino byonse byajinga nobe bishimi kwi amiwa. Nakumbwile’mba: “Mwane tukipembelele tukomvwinepo ne bikwabo byo baketufwakashisha.”

Ba Apun betufwakashijile byo papichile bañondo basatu. Byo betufwakashijile pa bimye bikwabo, twamonañene na Bakamonyi batanshi ba mu mukoka wa bena Kyrgyz. Bano banyenga bo betufunjishe bintu byavula pe Yehoba ne ene mambo o alengejile bantu. Betufunjishanga mu buku wa kuba’mba From Paradise Lost to Paradise Regained. * Na mambo a kuba’mba mu muzhi wa Tokmok mwajingatu uno buku umo, twamukopolwele na maboko.

Kintu kimo kyo twafunjile ku ntendekelotu ke bungauzhi buji pa Ntendekelo 3:15. Yesu, aye Mesiasa kabiji Mfumu ye batongola kwi Lesa ye ukafikizha buno bungauzhi. Ano ke mambo awama bingi afwainwa kumvwa bantu bonse. Kabiji kino kyafwainwa kwitulengela atweba bonse kusapwila. (Mat. 24:14) Mu kimye kichechetu, bukine bwa mu Baibolo bwatendekele kupimpula bwikalo bwetu.

Mulongo mu kipwilo mu Tokmok witwichile ku kijiilo kya masongola. Byo twajinga ku masongola, twamwene Bakamonyi byo bapusana na bantu bonse. Kechi kwajinga maalwa ne, kabiji bantu bajinga na byubilo byawama. Ano masongola apusene bingi na masongola o twayangako, kwataanwanga bantu bapendwanga bingi, kuba byatama, ne kwamba mwenga.

Kabiji bimye bimo twapwilanga mu kipwilo kyajinga mu muzhi wa Tokmok. Kuno kupwila kwaikelanga mungye inge bwakya bulongo. Balongo ne banyenga bayukile’mba bakapokola bakainye kupwila, onkao mambo, kimye kya kupwila kwaikalanga balongo basopanga. Mu bañondo bamashika twapwilanga mu nzubo. Bimye byavula, bakapokola baiyanga ku nzubo ko twapwijilanga na kukeba kuyuka byo twaubanga. Amiwa ne ba Mairambubu byo twabatizhiwe mu July 1982 mu mukola wa Chüy twajimukile pa kwingila mwingilo. (Mat. 10:16) Balongo bacheche baishile kabiji twapwijile mungye. Twaimbile nyimbo ya Bufumu ne kuteleka ku jashi ja lubatizhilo.

Mu 1987 mulongo wañambijile kuya na kumona muntu wakebelenga kufunda bukine mu muzhi wa Balykchy. Naendele maola ana mu shitima pa kuba’mba nkafike koaikalanga. Byo twayileko ku uno muzhi pa bimye byavula, twataaineko bantu bavula bakebelenga kufunda bukine. Kino kitukwashishe kwingilako pakatampe mwingilo wa kusapwila.

Bimye byavula amiwa ne ba Mairambubu twayanga ku Balykchy. Ku mpelo ya mulungu bimye byavula koko twalaalanga, apa bino twaya na kupwila ne kusapwila. Bantu bakebelenga mabuku etu bavujile bingi. Twasendanga mabuku pa kufuma ku Tokmok mu mishok, ko kuba’mba jisaka jo baingijishanga kusendelamo ntamba. Masaka a mabuku abiji o twibatwajilanga pa ñondo akepanga mambo bantu bakebanga mabuku bavujile bingi. Nangwatu kimye kyo twayanga mu shitima pa kufuma ku Balykchy, twasapwilanga bantu bakajilangamo.

Mu 1995 kipwilo kyalengelwe mu Balykchy byo papichile myaka itanu na isatu kufuma kimye kitanshi kyo twayile ku uno muzhi. Mu yoya myaka yo twayanga na kusapwila ku Tokmok ne Balykchy twaingijishanga mali avula. Kechi twajinga na mali avula ne. Onkao mambo, pa kuba’mba twingile bulongo, kwajinga mulongo witupangapo mali a kwingijisha. Yehoba wamwene byo twakebelenga kwingilako pakatampe mu mwingilo, kabiji witushinkwijile “bipenze bya mwiulu.” (Mala. 3:10) Kine kafwako bintu byakatazha kwi Yehoba ne.

Mu 1992, batongwele kwikala mukulumpe mu kipwilo. Yami najinga mutanshi kwikala mukulumpe mu kipwilo kya mulaka wa Kyrgyz. Mu kipwilo kya kwetu mu muzhi waTokmok, kwakebewenga bamingilo. Kwajinga banyike ba mulaka wa Kyrgyz bafunjilenga Baibolo bajinga ku masukulu. Mwanyike umo ye nafunjishanga Baibolo luno uji mu Kavoto ka Musampi, kabiji bakwabo babiji bapainiya beikajila. Kabiji twakwashishe ne bakwabo bo twapwilanga nabo. Mu myaka ya mu ma 1990, twatendekele kwikala na mabuku etu mu mulaka wa Kilashani ne kupwila. Pano bino, bantu baambanga mulaka wa Kyrgyz byavujile. Onkao mambo, natuntululanga majashi pa kuba’mba bomvwishenga bukine.

 Amiwa ne ba Mairambubu twajinga na mwingilo wakukomesha baana. Twapwilanga ne kusapwila pamo na baana betu. Mwanetu wamukazhi aye Gulsayra pa kyokya kimye saka aji na myaka 12, waumvwanga bingi bulongo kusapwila bantu bapitanga mu jishinda. Baana betu batemenwe kulabijila Binembelo. Kino kibakwashishe kutemwa bingi mingilo ya Lesa. Pa baana 9 ne bankana 11 bakiji bomi, 16 bengijila Yehoba nangwa kupwila pamo na bansemi babo.

Balongo ne banyenga batendekele mwingilo wa Yehoba mu nyaunda yetu mu ma 1950 bakonsha kukumya pa kumona lupimpu lwaubiwa. Kufuma mu myaka ya mu ma 1990, tusapwila mambo awama ne kubuñana kwa kubula kwitukanya.

Mu 1991 amiwa ne mukazhami twatainwe ku kushonkena kutanshi mu muzhi wa Alma-Ata, luno utelwa’mba Almaty mu Kazakhstan. Kabiji mu 1993 balongo baikele na kushonkena mu Kyrgyzstan kwaikejile mu kibanza kya mpila kya Spartak kimye kitanshi. Basapwishi bawamishishe kino kibanza pa mulungu umo. Mukulumpe watalanga pa kino kibanza waumvwine bingi bulongo kabiji wituswishishe kushonkenamo kyatutu.

Kintu kikwabo kyanema kyaubiwe mu 1994 ke kwikala na mabuku atanshi mu mukala wa Kyrgyz. Ne luno batwajijila na kutuntulula mabuku a mu mulaka wa Kyrgyz pa ofweshi wa musampi mu muzhi wa Bishkek. Mu 1998, mwingilo wa Bakamonyi bamuswishishe ku kafulumende wa Kyrgyzstan. Bakamonyi bavujilako mu kino kyalo, luno tuji basapwishi kukila pa 5,000. Lelo jino, mu Kyrgyzstan muji bipwilo 83 ne mabumba 25 a mu mulaka wa Kichainizi, Kizungu, Kyrgyz, Kilashani, mulaka wa kwamba na maboko wa kina Russia, Turkish, Uighur, ne Uzbek. Bonse balongo ne banyenga bafuma mu bisho byapusana pusana bengijila Yehoba saka bakwatankana. Yehoba ye walengela luno lupimpu lonse.

Yehoba wapimpula bwikalo bwami. Nakomejile mu kisemi kya bayanji kabiji nafunjiletu sukulu myaka itanu. Bino Yehoba wankwashishe kufikilamo kwikala mukulumpe mu kipwilo ne kufunjisha bukine bwa mu Baibolo bwanema ku bantu bafunjile masukulu kufika palepa. Yehoba ulengela bintu bimweka kukatazha kubiwa. Bintu byo napitamo bindengela kutwajijila kushimuna bukamonyi pe Yehoba, mambo kwi aye “bintu byonse kechi byakatazha ne.”—Mat. 19:26.