Batata ba John Mills babatizhiwe mu 1913 mu New York City saka baji na myaka 25. Mulongo Russell ye waambile jashi ja lubatizhilo. Batata byo babatizhiwetu bayile ku Trinidad, ko basongwele ba Constance Farmer, bajinga mu jibumba ja Bafunda Baibolo baingila na mukoyo. Batata bakwashangako balunda nabo ba William R. Brown kutambisha “Mashikopo wa Bilengwa na Lesa.” Batwajijile kwingijila pamo kufikatu ne kimye kisemi kya ba Brown byo bebatumine kuya na kwingijila ku byalo biji ku muzhika wa Africa mu 1923. Batata ne bamama bonse bajinga na luketekelo lwa kuya mwiulu, batwajijile kwingijila mu Trinidad.

Bansemi betu bajinga na baana batanu na bana. Mubeji bamutumbile’mba Rutherford, jizhina ja mukulumpe watangijila kipamo kya Watch Tower Bible and Tract Society. Byo nasemekelwe pa 30 December, 1922, bantumbile jizhina ja Woodworth jajinga jizhina ja nnembi wa The Golden Age (luno utelwa’mba Labainga!) aye Clayton J. Woodworth. Bansemi betu bebikileko kwitufunjisha sukulu, bino betutundaikanga kwibikila bikonkwanyi bya mu mwingilo wa Lesa. Bamama bayukile bingi bya kwisamba na bantu kwingijisha Binembelo ne kwibafika pa muchima. Batata batemenwe bingi kwitufunjisha mashimikila a mu Baibolo, kabiji baingijisha binungwa bya mubiji pa kuba’mba tumvwishenga ano mashimikila.

Mwingilo waingijile bansemi betu wa kwitufunjisha mwafumine bintu byawama bingi. Pa baana babo babalume batanu, basatu twatainwe ku Sukulu wa Gileada. Banyenga yetu basatu abo baingijile bupainiya pa myaka yavula pa jikuji ja Trinidad ne ja Tobago. Na mambo a jishinda jawama jo betufunjishemo ne byubilo byabo byawama, bansemi betujimbile “mu nzubo ya Yehoba.” Byambo byabo bya lutundaiko bitulengejile kutwajijila kutenkuma “mu bipango bya Lesa wetu.”—Sala. 92:13.

Pa nzubo yetu po po twasambakenanga kuya na kusapwila. Bapainiya baiyanga kabiji javula baambanga  pa Mulongo George Young, wajinga mishonale wafumine ku Canada waishile na kufwakesha jikuji ja Trinidad. Bansemi baambanga byawama bingi pa kisemi kya ba Brown balunda nabo mo baingijilanga bajinga ku Muzhika wa Africa. Bino byonse byandengejile kutendeka kusapwila saka nji na myaka jikumi.

Magazini etu asololanga mafunjisho a bupopweshi bwa bubela, busulu bwa bujimbijimbi ne bya bumulwila ntanda. Kino kyalengejile ntangi wa bupopweshi kutundaika ndamakyalo wa pa jikuji ja Trinidad kukanya mabuku etu onsemu mwaka wa 1936. Twafile mabuku etu, bino twatwajijile kupana ku bantu kufikatu ne byo apwile. Twasapwilanga saka twavwala bipabi ne kwenda kisasa kya muñomba kabiji twaingijishanga ne makinga pa kusampanya tupepala. Twaingijilanga pamo na jibumba jafumanga mu muzhi wa Tunapuna jajinga na motoka wajinga na biñambañamba bya kwambilamo peulu, kuya na kusapwila mu mapunzha a kwalepa pa jikuji ja Trinidad. Kituletelanga bingi lusekelo. Kwingijila pamo na bantu batemenwe Lesa kwandengejile kubatizhiwa saka nji na myaka 16.

Bintu bitufunjishe bansemi ne bintu byo napichilemo saka nkiji mwanyike byandengejile kukeba kwikala mishonale. Muchima wa kukeba kwikala mishonale watwajijile kufikatu ne byo nayile ku jikuji ja Aruba mu 1944 na kwingijila pamo na Mulongo Edmund W. Cummings. Mu 1945, twaumvwine bingi bulongo pa Kivuluko byo twapwijile bantu jikumi. Mwaka walondejilepo, kipwilo kitanshi kyalengelwe pa jino jikuji.

Byo papichiletu moba acheche, nasapwijile mukwetu ye naingilanga nanji nkito aye Oris Williams busapwishi bwa kushukilwa. Oris wajinga bingi na mapata na mambo a mafunjisho o aitabijilemo. Pano bino, byo afunjile Mambo a Lesa waumvwishishe bukine, kabiji wabatizhiwe pa 5 January, 1947. Byo papichile kimye, twitemenwe kabiji namusongwele. Oris watendekele bupainiya mu November 1950. Bwikalo bwawamine bingi byo natendekele kwikala na mwinakwami Oris.

Betwichile kuya na kutanwa ku Sukulu wa Gileada mu 1955. Byo twinengezhezhenga kuya ku sukulu, amiwa ne ba Oris twalekele nkito, twapoteshe nzubo yetu ne bipetu bikwabo ne kushajikapo balongo pa jikuji ja Aruba. Twapwishishe Sukulu wa Gileada wa nambala 27 pa 29 July, 1956, kabiji betutumine ku Nigeria.

Ba Oris baambile pa bintu byo bapichilemo amba: “Mupashi wa Yehoba wakonsha kukwasha muntu kuyuka mwakubila na makatazho pa kwingila bumishonale. Amiwa kechi nalangulukangapo kwikala mishonale byonka byalanguluka bamwatawami ne. Nakebanga kwikala na nzubo ne baana. Bino napimpwile ndangulukilo yami byo nayukile’mba mwingilo wa kusapwila mambo awama ubena kukebewa kumwingila bukiji bukiji. Kimye kyo twapwishishe Sukulu wa Gileada, nenengezhe kuya na kwingila bumishonale. Ba Worth Thornton baingijilanga mu ofweshi wa Mulongo Knorr, bo betushinjikinye kuya na kukanjila bwato bwatelwanga’mba Queen Mary. Betubuujile’mba mukengijilanga pa Betele. Naakaminwe bingi pa kumvwa bino. Pano bino, napimpwile milanguluko kabiji natemenwe bingi kwingijila pa Betele, kabiji naingilanga mingilo ya pusana-pusana. Mwingilo ye natemenwe bingi wajinga wa kwingijila mu kibamba mufikila benyi. Natemwa bantu kabiji uno mwingilo wandengejile kuyuka bulongo balongo ba ku Nigeria. Bavula bafikanga saka batokoloka, bakooka, kilaka ne nzala. Naumvwanga bingi bulongo kwibakwasha ne kwibatekenesha. Ino yonse yajinga mingilo yazhila ya Yehoba kabiji yandetelanga lusekelo.” Kya kine mingilo yonse itulengejile kwikala na bulunda bwakosa na Lesa.

Juba jimo banengezhezhe kijiilo kya kisemi kyetu kyonse mu Trinidad mu 1961. Mulongo Brown washimikizhepo bintu bimo byawama bingi byo bapichilemo kimye kyo baingijilanga mu Africa. Kepo naambile pa mwingilo byo ayijilengako palutwe mu Nigeria. Mulongo Brown wabikile kuboko kwanji pa kipuzhi kyami ne kwambila batata amba: “Ba Johnny, anweba mu kyangye kuyapo mu Africa ne, bino Woodworth wayile.” Batata baambile’mba: “Twajijila na mwingilo wobe, Worth! Kuleka ne!” Bino byambo bya lutundaiko kufuma ku bantu bajinga na lwitabilo lwakosa byantundaikile kwingila mwingilo wami na mukoyo.

Mu 1962, nayile na kufunjilapo bikwabo ku sukulu wa Gileada wa nambala 37 pa bañondo  jikumi. Mulongo Wilfred Gooch, watangijilanga ofweshi wa musampi wa mu Nigeria pa kyo kya kimye, aye watainwe ku sukulu wa Gileada wa nambala 38, kabiji bamutumine kuya na kwingijila ku England. Onkao mambo, bampele mwingilo wa kutangijila ofweshi wa musampi wa mu Nigeria. Kulondela byonka byaubanga Mulongo Brown nayanga mu mapunzha apusana-pusana mu kyalo kyonse, kabiji kino kyandengejile kuyuka ne kutemwa balongo ba mu Nigeria. Nangwa kya kuba kechi bajinga na bintu byavula byonka byo kiji mu byalo byanonka ne, lusekelo lo bajinga nalo ne kutondwa na bintu byonka byo bajinga nabyo kyamwesheshe kuba’mba lusekelo kechi lufuma mu kwikala na mali avula nangwa bunonshi ne. Kwesakana na byajinga bwikalo bwabo, kyantundaikanga bingi kwibamona saka bamweka bulongo mu bivwalo byawama pa kupwila. Pa kwiya na kushonkena bavula baiyanga na Bimbayambaya ne myotoka yatelwanga’mba bolekaja * (yo balengangatu bene monka mu Nigeria). Pa ino myotoka banembangapo byambo bya lutundaiko. Pa motoka umo banembelepo’mba: “Tucheche tuya pamo.”

Abino byambo bya kine. Ne atweba twanungilepo ñambilo ya kuba’mba, mingilo yonse ingila muntu na ngovu mufuma byawama. Mu 1974 kyalo kya Nigeria kyo kyajinga kyalo kyaikele na basapwishi 100,000 byonka byo kyajinga mu United States. Mwingilo wayijileko palutwe.

Mwingilo byo ayijilengako palutwe, mu kyalo kya Nigeria mwabukile nkondo kutendeka mu 1967 kufika mu 1970. Balongo betu baikalanga ku mpunzha ya Biafran ku bushiya bwa mukola wa Niger kechi bajingapo na jishinda ja kwisambilamo na ofweshi wa musampi ne. Onkao mambo, twibatwajilangatu kajo ka ku mupashi. Byonka byo naamba kuntendekelo, twalombanga ne kuketekela mwi Yehoba, twaabukanga mukola bimye byavula bingi.

Kechi ndubamo byo twabikanga bumi mu kizumba pa kwabuka mukola wa Niger, kupita mu mapunzha mwaikalanga bashilikale baumvwanga bingi bulongo kwipaya bantu, bikola ne bintutu bikwabo ne. Twaumvwanga bingi moyo pa kupita mu mapunzha mwaikalanga bashilikale ba kafulumende, bino kyakijilemo pa kuya ku bushiya bwa mukola ku Biafran kwajinga bansatuki. Juba jimo nakanjijile mu bwato kuya na kwabuka mukola wa Niger bufuku byo nafuminenga ku Asaba kuya ku Onitsha ne ku Enugu ko nayile na kutundaika bakalama. Kabiji pa lwendo lukwabo nayile na kukosesha bakulumpe mu kipwilo mu muzhi wa Aba mo bazhiminye malaichi na mambo a nkondo. Muzhi mukwabo wa Port Harcourt twachibikizhetu misambo bukiji bukiji ne kulomba kimye bashilikale ba kafulumende kyo balukukile bansatuki kwapela muzhi wa Biafran.

Ino misambo yanemene bingi mambo yakwashanga balongo kuyuka’mba Yehoba wibata muchima kabiji twibatundaikanga kubula kwivwanga mu bya bumulwila ntanda ne kutwajijila kukwatankana. Balongo ba mu Nigeria bachinchikile mu bimye bya makatazho. Batwajijile kwitemwa bene na bene ne kukwatankana nangwa kya kuba bafuma mu bisho byapusana-pusana. Kyawamine bingi kutundaika balongo mu bimye bya meseko.

Mu 1969, Mulongo Milton G. Henschel ye wajinga wa ku mupando pa Kukonkana kwa Byalo kwajinga na mutwe wa kuba’mba “Mutende Pano pa Ntanda” kwaikejile mu kibanza kya mpila kya Yankee Stadium, mu New York, amiwa yami najinga nkwasho wanji, kabiji nafunjijileko bintu byavula. Luno lunengezho lwawamine mambo mu 1970 twaikele na Kukonkana kwa Byalo mu muzhi wa Lagos, mu Nigeria, kwajinga na mutwe wa kuba’mba “Bantu Baubilwa Bibusa.” Nangwa kya kuba nkondo po po yapwiletu, bino kuno kupwila kwaendeletu bulongo na mambo a mapesho a Yehoba. Ko kukonkana kutanshi kwaikeleko mu milaka 17, kabiji kwataainwe bantu 121,128. Mulongo Knorr ne Mulongo Henschel ne bakwabo baishile na ndeke kufuma ku United States ne England bashinkilweko ku lubatizhilo lwa bantu bavula bingi nobe boba babatizhiwe pa Pentekosita. Bantu babatizhiwe bajinga 3,775. Kimye kyo nakwashishenga mwingilo wa kunengezha kuno kupwila kyo kimye kyo napayankene bingi mu bwikalo bwami bonse. Kuno kuvujilako kwa basapwishi kyajinga kintu kya kukumya bingi.

Pa myaka kukila pa 30 yo naikele mu Nigeria, pa kimye kimo najinga kalama wenda, kabiji naingijileko ne mwingilo wa kufwakesha misampi mu byalo biji ku muzhika wa Africa. Bamishonale basantanga bingi pa kwibatundaika pa muntu pa muntu. Kyawamanga bingi kwibatundaika kuba’mba jibumba ja Lesa kechi jibalubako ne. Uno mwingilo wamfunjishe kuba’mba kuta bantu muchima kyo kintu kyakonsha  kwibakwasha kwingila bulongo mwingilo wa Lesa ne kutwajijila kutundaika lukwatankano mu jibumba ja Yehoba.

Yehoba ye witukwashishe kuchinchika makatazho aishileko na mambo a nkondo ne kukolwa. Twimwenanga mapesho a Yehoba kimye kyonse. Ba Oris baambile’mba:

“Twakolwanga kikola kya mashika bimye byavula. Pa kimye kimo, ba Worth bebatwajilenga ku kipatela mu Lagos saka bapungila. Bambujile’mba kyamweka kechi basakupuluka ne, bino kyawaminekotu bakosele. Byo bapupulukile, basapwijile mambo awama a Bufumu bwa Lesa ku manase wibalaminenga. Mu kuya kwa kimye, nayijile pamo ne ba Worth na kumona uno manase wamulume wa jizhina ja Nwambiwe, na kumutundaika kufunda Baibolo. Waswile kufunda bukine kabiji mu kuya kwa kimye waikele mukulumpe mu kipwilo mu muzhi wa Aba. Ne amiwa nakwashishe bantu bavula bingi, kubikapotu ne ba mu bupopweshi bwa ba Mozilemu kwikala bakalume ba Yehoba. Twasangalele bingi pa kuyuka bantu ba mu Nigeria, twibatemenwe bingi, kabiji twafunjile bisho byabo ne milaka yabo.”

Kintu kikwabo kyo twafunjile ke kino: Pa kuba’mba twingile bulongo mwingilo wetu mu kyalo kingi, twafwainwe kutemwa balongo ne banyenga nangwa kya kuba bafuma mu bisho byapusana na byetu.

Mu 1987 twafumine pa Betele mu Nigeria, mambo betupele mwingilo mukwabo wa bumishonale kabiji betutumine kuya na kwingijila pa jikuji ja St. Lucia pa kalunga ka mema ka Caribbean. Uno mwingilo wawamine bingi, pano bino, kwajinga ne makatazho o twapitangamo. Kupusanako na mu Africa muji kisho kya kusongola banabakazhi bavula, ku St. Lucia, lukatazho lwajingako ke mwanamulume ne mwanamukazhi kwikala pamo kwa kubula kwisongola mwayila mizhilo. Na mambo a bulume bwa Mambo a Lesa, bafunjilenga Baibolo bavula bapimpwile bwikalo bwabo.

Bulume bwetu bwa kwingila byo bwayilenga na kukepa na mambo a kukoma, Jibumba Jitangijila jituvilwijile ku ofweshi mukatampe wa ntanda yonse mu Brooklyn, New York, U.S.A., mu 2005. Nsanchila Yehoba pa juba pa juba pa kumpa ba Oris. Bafwile mu 2015, kabiji nebavuluka bingi. Wajinga mulunda nami wa pa muchima kabiji wantemenwe bingi. Natwajijile kwibatemwa pa myaka yonse 68 yo twaikele mu masongola. Twafunjile kuba’mba kintu kileta lusekelo mu masongola ne mu kipwilo ke kunemeka bumutwe, kwilekelako mambo, kwipelula, ne kumwesha bipangwa bya mupashi.

Bimye byo twapitanga mu makatazho, twalombanga Yehoba kwitukwasha kuba’mba tutwajijile kuta muchima pa kumwingijila na muchima yense. Twatwajijile kupimpulako milanguluko yetu kabiji bintu byaendanga bingi bulongo, kabiji tubena kutengela bintu byawamisha biji kulutwe.—Isa. 60:17; 2 Ko. 13:11.

Yehoba wapesheshe mwingilo wa bansemi bami ne balongo ne banyenga bakwabo mu Trinidad ne mu Tobago, mambo sawakya wa katataka umwesha’mba bantu 9,892 baiya mu bupopweshi bwa kine. Mu Aruba, balongo ne banyenga bavula batwajijila kutundaika kipwilo kyo najingamo. Pa jino jikuji luno paji bipwilo 14. Mu Nigeria, basapwishi bavujilako bingi, luno bafika 381,398. Kabiji pa jikuji ja St. Lucia, paji basapwishi ba Bufumu bwa Yehoba 783.

Luno nji na myaka ya kusemwa kukila pa 90. Salamo 92:14 waamba pa bantu bo bajimba mu nzubo ya Yehoba amba: “Nangwatu mu bukote bwabo, bakapanganga bipangwa; bakatwajijila kwikala na bulume saka batalala.” Nji bingi na lusekelo pa myaka yonse yo naingijila Yehoba. Bintu byo nafunjile ku bansemi saka njitu mwanyike byankwasha kwingijila Yehoba bulongo. Na mambo butemwe bwanji bubula kwaluka, Yehoba wankwasha kutwajijila ‘kutenkuma mu bipango bya Lesa wami.’—Sala. 92:13.