Nasemekejilwe mu muzhi wa Quebec, mu kibunji kya Quebec mwikala bantu bamba mulaka wa Kifulenchi mu kyalo kya Canada. Bansemi bami ba Louis ne ba Zélia bankomeshe bulongo. Batata bajinga bingi na bumvu, kabiji batemenwe bingi kutanga. Natemenwe bingi bya kunemba-nemba kabiji nakebelenga kwikala ntapatwambo inge nakoma.

Byo nafikizhe myaka ya kusemwa 12, ba Rodolphe Soucy baingijilanga pamo ne batata ku nkito, baishile pa nzubo petu pamo na mulunda nabo. Bajinga Bakamonyi ba kwa Yehoba. Kechi nayukile byavula pa Bakamonyi ne, kabiji bupopweshi bwabo kechi nebukebanga ne. Pano bino, natemenwe byo bakumbwilenga mepuzho kwingijisha Baibolo. Bansemi bami baumvwine bingi bulongo, onkao mambo, twaswile kufunda Baibolo.

Pa kyo kya kimye, nafundanga pa sukulu wa Bakatolika. Bimye bimo nesambanga na bakwetu baana ba sukulu bintu byo nafunjilenga mu Baibolo. Mu kuya kwa kimye, bafunjishi, bajinga bantangi mu chechi baumvwine byo twisambanga na bakwetu. Kwa kubula kwingijisha Binembelo pa kuba’mba bamweshe’mba byo naambilenga kechi bya kine ne, mufunjishi umo wafikenejiletu kuñambila pa meso a baana ba sukulu mo twafunjilanga amba nensatuki. Nangwa kya kuba kino kyamwekele kyatamine bingi, bino mu uno mwisambo mwafumine byawama, mambo kyankwashishe kuyuka’mba mafunjisho a bya bupopweshi o bafunjishanga pa sukulu kechi akwatankene na byaamba Baibolo ne. Namwene kuba’mba nafwainwa kuleka kufunda pa uno sukulu. Nalombele bansemi kuba’mba bantwale pa sukulu mukwabo.

Natwajijile kufunda Baibolo, bino kechi nayijilengako palutwe ne, mambo nachinanga kusapwila ku nzubo ku nzubo. Chechi wa Katolika witwimenejile ku ntundwa kukanya mwingilo wetu wa kusapwila. Kiloolo wa kibunji kya Quebec aye Maurice Duplessis ye wakwatankene na chechi. Watundaikanga  bantu kuzakamisha ne kulukuka Bakamonyi. Pa kyo kya kimye, kyakebewanga kuchinchika pa kusapwila.

Mulongo John Rae watainwe ku Sukulu wa Gileada wa nambala 9, ye wankwashishe kushinda moyo. Mulongo John waingijile Lesa pa myaka yavula, wajinga muntu wakooka muchima kabiji wipelula. Javula kechi wañambilanga inge nabula kuba bulongo ne, bino nafunjijileko byavula kupichila mu kumona byo aubanga. Mulongo John kechi wayukile Kifulenchi ne, onkao mambo, nayanga nanji mu busapwishi ne kumukwasha bya kwamba uno mulaka. Kwingila kimye kyabaya na uno mulongo kwankwashishe kufuukulapo kwikala Kamonyi wa Yehoba. Nabatizhiwe pa 26 May, 1951, saka papita myaka jikumi kufuma kimye kitanshi kyo namonañene na Bakamonyi.

Mu kipwilo kyetu kicheche kya mu muzhi wa Quebec bapainiya bo bavujijilemo. Bano bapainiya bantundaikile kutendeka bupainiya. Mu yoya myaka, twaingijishangatu Baibolo pa kusapwila ku nzubo ku nzubo. Twaingijishanga bulongo Binembelo mambo kechi kwajinga mabuku a kupa bantu ne. Onkao mambo, naingijile na ngovu kuyuka byepelo bya mu Baibolo bya kwingijisha pa kulwilako bukine. Nangwa byonkabyo, bavula bakananga kutanga Baibolo inge kya kuba kechi bamuswisha ku Chechi wa Katolika ne.

Mu 1952, nasongwele nyenga wa kishinka aye Simone Patry. Twavilukijile mu muzhi wa Montreal, kabiji mwaka saka akyangye kupwa, twasemene mwana wamukazhi aye Lise. Nangwa kya kuba nalekele bupainiya byo kwashajiletu pacheche kusongola, amiwa ne ba Simone twaikelenga bwikalo bwapeela pa kuba’mba twingilenga bulongo mingilo ya kipwilo.

Papichile myaka jikumi pa kuba’mba ntendeke kulanguluka jikwabo pa mwingilo wa kimye kyonse. Mu 1962, byo twajinga ku Sukulu wa Mwingilo wa Bufumu wa bakulumpe mu kipwilo pa ñondo umo pa Betele mu Canada, betupele kibamba kimo na mulongo Camille Ouellette. Natundaikilwe bingi pa kumona mulongo Camille byo aingilanga na mukoyo mwingilo wa kusapwila nangwa kya kuba wajinga na kisemi. Mu yoya myaka, balongo ne banyenga bachechetu ba mu Quebec baingilanga mwingilo wa bupainiya saka baji na baana, pano bino, mulongo Camille kyo kikonkwanyi kyo ebikijile. Kimye kyo twajinga pamo, uno mulongo wantundaikile kulanguluka pa bwikalo bwami. Byo papichile bañondo bacheche, nafuukwilepo kutendeka jikwabo bupainiya bwa kimye kyonse. Bamo baambilenga’mba kechi nafuukwilepo bulongo ne, bino natendekele bupainiya jikwabo mambo nashiinwe kuba’mba Yehoba ukankwasha kwingila pakatampe mwingilo wa kusapwila.

Mu 1964, betutongwele kwikala bapainiya beikajila mu muzhi wa Quebec mo twakomejile kabiji twaingijile uno mwingilo pa myaka yavula. Pa kikye kimye, mwingilo wa kusapwila waendelengatu bulongo, pano bino, bantu bamo betwimenanga ku ntundwa.

Juba jimo pa Kibelushi mute, bankwachile mu muzhi mucheche wa Sainte-Marie pepitu na muzhi wa Quebec. Kapokola wankwachile wantwajile ku ofweshi wa bakapokola ne kuntaya pa kazhima na mambo a kuba’mba nasapwijilenga ku nzubo ku nzubo kwa kubula kutambula luusa. Mu kuya kwa kimye, bantwajile ku mutonyi washinchile bingi wa jizhina ja Baillargeon. Wangipwizhe muntu wa kuñimenako mu kije kya mambo. Byo natongwele Glen How, * kamonyi wayukile mizhilo waimenangako bantu mu mambo, uno mutonyi waumvwine moyo ne kwamba’mba: “Ine, awo ne.” Glen How wajinga shabyambo wayukile bingi kwamba mambo kabiji wakwashishe Bakamonyi ba kwa Yehoba mu mambo avula pa kyokya kimye. Kechi papichile ne kimye kyabaya ne, kije kya mambo kyambuujile’mba kechi nalengelepo mambo ne.

Na mambo a kuba’mba mwingilo wetu bamwimenejile ku ntundwa mu Quebec, kyakatezhe bingi kusonkela kishimikwa kya kupwijilamo. Kipwilo kyetu kicheche kyataainetu kishimikwa kya kala kyo balaminangamo motoka kabiji mwaubile bingi mashika. Pa kuba’mba bantu babule kufwa na mashika, balongo banengezhezhe ka kiñambañamba ka kubikamo manyi pa kuba’mba katwishenga kyuya mu kino kishimikwa. Saka tukyangye kutendeka kupwila, twaikalanga ku kano ka kiñambañamba kuba’mba tumvweko kyuya ne kwishimikizha bintu byo bapichilengamo.

Kituletela bingi lusekelo pa kumona byawama byafuma mu mwingilo wa kusapwila pa kupitapo myaka. Mu myaka ya mu ma 1960, mwajingatu bipwilo bicheche, mpunzha ya Quebec, mu kibunji kya Côte-Nord, ne mu Gaspé Peninsula. Lelo jino, muji balongo ne banyenga bavula bingi, kabiji balongo bapwila mu Mazubo a Bufumu awama bingi.

Amiwa ne benakwami betupele mwingilo wa mu mwanzo mu 1970. Kepo mu 1973 bantongwele kwikala kalama wa nkambi. Mu ino myaka yo twaingijilenga uno mwingilo, nafunjile byavula ku balongo nabiji Laurier Saumur * ne David Splane, * baingijilenga mwingilo wa kwenda. Kimye kyonse inge kubuñana kwapwa, amiwa ne David twisambanga pa byo twakonsheshe kuwamishako busendwe bwetu bwa kufunjisha. Mbena kuvuluka pa kimye kimo David wambuujile’mba: “Léonce, najikwiyowa jashi jobe ja kupelako. Jaji kuwama bingi, bino byambo byo waji kwamba inge amiwa nakonsha kufumyamo majashi asatu.” Natemwanga kwamba byambo byavula mu majashi ami. Nafwainwe kufunda kwambatu bishinka bicheche.

Bakalama ba nkambi bebapele mwingilo wa kutundaika bakalama ba mwanzo. Pano bino, basapwishi bavula mu Quebec bangyukile bingi. Javula bakebanga’mba ñingilenga nabo mwingilo wa kusapwila  inge nafwakesha mwanzo wabo. Nangwa kya kuba neyowanga kusapwila nabo, kechi naikalanga kimye kyabaya na kalama wa mwanzo ne. Pa kimye kimo, kalama wa mwanzo wamvulwilemo amba: “Kyawama bingi kuba’mba mwata muchima balongo, bino kange mulubeko kuba’mba mwaishile na kumfwakesha ne. Ne amiwa mbena kukeba lutundaiko.” Nafunjile byavula ku luno lujimuno.

Kyataminekotu, mu 1976 kwamwekele kintu kyo nabujilenga kuketekela. Benakwami ba Simone bakolelwe bingi kabiji bafwile. Wajinga mwanamukazhi wawama bingi mambo kechi wajinga na muchima wa kwitemwatu mwine ne, kabiji watemenwe bingi Yehoba. Kupayankana mu mwingilo wa kusapwila kwankwashishe bingi kukepeshako bulanda, kabiji nsanchila Yehoba pa kunkwasha mu kimye kya malwa. Mu kuya kwa kimye, nasongwele painiya waambanga Kizungu waishile na kwingijila ku Quebec kwakebewenga ba mingilo bavula aye Carolyn Elliott. Carolyn wakasulukile bingi kabiji watemenwe bingi bakwabo, kikatakata boba bajinga na bumvu nangwa babujile muntu wa kwisamba nanji. Wankwashishe bingi mu mwingilo wa kwenda.

Mu January 1978, bampele mwingilo wa kufunjisha Sukulu wa Mwingilo wa Bupainiya mutanshi mu Quebec. Naakaminwe mambo kechi nafunjilepo uno sukulu ne, kabiji kechi nakimwenepo kala bimweka buku wa bapainiya ne, onkao mambo, byonsetu byajinga bipya. Kyawaminekotu ke kya kuba’mba sukulu mutanshi ye nafunjishe mwajinga bapainiya baingijile pa myaka yavula. Nangwa kya kuba najinga mufunjishi, bino nafunjijileko byavula ku baana ba sukulu.

Mu kuya kwa kimye, mu 1978, twaikele na Kushonkena Kukatampe mu kibanza kya Montreal’s Olympic Stadium. Kuno ko kushonkena kukatampe kwajingako mu Quebec kwataainwe bantu kukila pa 80,000. Bampele mwingilo wa kwingijila ku Dipatimenti wa Byambo. Nesambile na bantapatwambo bavula kabiji naumvwine bingi bulongo pa kumona kuba’mba bavula banembele bintu byawama pe atweba. Misambo ya mepuzho yo twajinga nayo na bantapatwambo beimwesheshe pa TV ne kwiibika pa waileshi pa maola kukila pa 20, kabiji beinembele ne mu bibaaba byavula mu mapepala a byambo. Kino kyashimwine bukamonyi bukatampe.

Lupimpu lukatampe lwaubiwe mu 1996. Kufuma kimye kyo nabatizhiwe, naingijilangatu mu nyaunda ya mulaka wa Kifulenchi mu Quebec, bino mu uno mwaka bantumine kuya na kwingijila mu nkambi muji bantu bamba Kizungu mu muzhi mukatampe wa Toronto. Nalangulukilenga’mba kechi nafikijilemo kwingila uno mwingilo ne, kabiji naakaminwe’mba kechi nkakonsha kwamba majashi ne, mambo kechi nayukishe Kizungu ne. Nalombele kwi Yehoba na mukoyo ne kumuketekela na muchima yense.

Najinga bingi na moyo kimye kyo natendekele uno mwingilo, bino luno nakonsha kwamba’mba neyowele bingi myaka ibiji yo naingijile mu nyaunda ya Toronto. Carolyn wankwashishe kubula kumvwa moyo pa kwamba Kizungu, kabiji balongo bavula bantundaikanga bingi. Twafikenejiletu kwikala na balunda bavula.

Kununga pa mingilo ikwabo yo naingilanga ne kunengezha kubuñana, javula pa Kitanu naingilangako jiola jimo mabanga mu mwingilo wa ku nzubo ku nzubo. Bamo kampe balangulukanga’mba, ‘Mambo ka a kuyila mu mwingilo saka muji na bya kuba byavula ku mpelo ya mulungu?’ Kwisamba na bantu mu mwingilo kwantundaikanga bingi. Nangwatu luno, ñumvwa bingi bulongo inge naya na kusapwila.

Mu 1998, amiwa ne Carolyn betutumine kuya na kwingila bupainiya bwiikajila mu muzhi wa Montreal. Pa myaka yavula, mwingilo wami wavwangilemo kunengezha busapwishi bwa ku mvula bantu ne kwisamba na bipamo bisampanya byambo kuba’mba tufumyepo milanguluko yatama yajinga na bantu pa Bakamonyi ba kwa Yehoba. Luno twiyowa kusapwila ku bantu bafuma mu byalo bikwabo beya mu Canada bakeba kufunda byavula pa Baibolo.

Inge nalanguluka pa myaka 68 yo naingijila Yehoba, mmona kuba’mba wampesha bingi. Nji bingi na lusekelo mambo nafunda bya kwiyowa mwingilo wa kusapwila ne kukwasha bantu bavula kuyuka bukine. Mwanami wa mukazhi aye Lise ne bamwatawanji byo bakomeshe baana babo, batendekele bupainiya bwa kimye kyonse. Kumona mwanami byo atwajijila kwingila mwingilo wa Lesa na mukoyo, kunsangajika bingi. Kikatakata nsanchila bingi bakwetu bena Kilishitu bankwashishe kupichila mu byubilo byabo byawama ne byambo bya lutundaiko kwikala na bulunda bwakosa ne Yehoba ne kumwingijila mingilo yapusana-pusana. Nafunda’mba pa kuba’mba tutwajijile kuba bitubuula jibumba ja Yehoba twafwainwa kuketekela mu bulume bwa mupashi wazhila wa Yehoba. (Sala. 51:11) Nsanchila Yehoba pa kunswisha kutumbijika jizhina janji janema.—Sala. 54:6.