1-2. Mambo ka Yehoba o etwichila kwikala mu kisemi kyanji, kabiji wauba byepi kino?

YEHOBA witwita kwiya mu kisemi kya bapopweshi banji. Luno ke lwito lwawama bingi. Mu kino kisemi kyetu muji bantu bepana bene kwi Lesa kabiji baji na lwitabilo mu kitapisho kya bukuzhi bwa Mwananji. Kisemi kyetu ke kisemi kya bantu ba lusekelo. Twikala bwikalo bwa lusekelo lonka luno, kabiji tuji na lusekelo na mambo a kwikala na luketekelo lwa bumi bwa myaka ne myaka mwiulu nangwa mu Paladisa pano pa ntanda.

² Yehoba witwita kwikala mu kisemi kyanji mambo witutemwa bingi. Pano bino, pa kuba’mba obe bino, waubile kintu kimo kyanema bingi. (Yoa. 3:16) ‘Betupotele pa mutengo mukatampe.’ (1 Ko. 6:20) Kupichila mu bukuzhi, Yehoba witukwasha kwikala balunda nanji. Twatokwa bingi pa kutela mwine wakila amba Tata. Kabiji byonka byo twafunjile mu mutwe wafumako, Yehoba ke Shetu wawama bingi.

3. Ñanyi mepuzho o twakonsha kwiipuzha? (Monai ne kakitenguluzha ka kuba’mba “ Nanchi Yehoba Wanta Muchima Nyi?”)

³ Byonka byaambile nnembi wa Baibolo umo, twakonsha kwipuzha’mba: “Ñanyi kintu kyo nkamupa Yehoba pa bintu byonse byawama byo angubila?” (Sala. 116:12) Mukumbu ke wa kuba’mba kafwako kyo twakonsha kupa Shetu wa mwiulu ne. Bino butemwe bwanji bwitutundaika ne atweba kumutemwa. Mutumwa Yoano wanembele’mba: “Atweba tutemwañana, mambo aye ye wajinga mutanshi kwitutemwa.” (1 Yoa.  4:19) Twakonsha kumwesha byepi amba twatemwa Shetu wa mwiulu?

4. Kwesakana na byaamba Yakoba 4:8, mambo ka o twafwainwa kwingijila na ngovu kufwenya kwipi ne Yehoba?

⁴ Yehoba ukeba’mba twikale balunda nanji ne kwisamba nanji. (Tangai Yakoba 4:8.) Witutundaika ‘kulomba na mukoyo,’ kabiji kimye kyonse umvwa inge twalomba kwi aye. (Loma 12:12) Kechi upayankana nangwa kukooka kya kuba wakankalwa kuteleka ku milombelo yetu ne. Kabiji tuteleka kwi aye inge ketutange Mambo anji, Baibolo, ne mabuku etukwasha kumvwisha Mambo a Lesa. Kabiji tuteleka kwi aye kupichila mu kutako muchima pa kupwila kwa bwina Kilishitu. Byonkatu kwisamba bulongo na baana byo kukwasha baana kutemwa bansemi babo, ne kwisamba ne Yehoba kwitukwasha kutwajijila kufwenya kwipi ne aye.

5. Twakonsha kuwamishako byepi milombelo yetu?

⁵ Langulukai pa milombelo yenu kwi Yehoba byo iji. Yehoba ukeba’mba tumubuulenga byonse biji mu muchima wetu. (Sala. 62:8) Twafwainwa kwiipuzha atweba bene buno bwipuzho: ‘Nanchi milombelo yami ijitu nobe kisela, nangwa nobe byambo bya kukopololatu nyi, inyi ifuma panshi ya muchima?’ Kwa kubula ne kuzhinaukatu ne, mwatemwa bingi Yehoba, kabiji mukeba kukosesha bulunda bwenu ne aye. Pa kuba’mba mube bino, mwafwainwa kwisambanga nanji kimye kyonse. Mubuulainga byonse byo mulanguluka. Mubuulainga bintu bimusangajika ne bimuletela bijikila. Shiinwai kuba’mba mwakonsha kulomba bukwasho kwi aye.

6. Twafwainwa kuba byepi pa kuba’mba tutwajijile kufwenya kwipi ne Shetu wa mwiulu?

⁶ Pa kuba’mba tutwajijile kufwenya kwipi ne Shetu wa mwiulu, twafwainwa kutwajijila kumusanchila. Twafwainwa kuswa byambo byanembele nyimbi wa masalamo amba: “Byo byavulapo bintu byo mwauba, anweba Yehoba Lesa wami! Mingilo yenu ya kukumya ne bintu byo mwitulangulukila. Kafwako waesakana ne anweba ne; inge nakeba namba mbulañane ne kwibyamba, byavujisha kabiji byakukankalwa kubala!” (Sala. 40:5) Kechi tupelelatu pa kusanchila mu muchima ne, pakuba tumwesha lusanchilo lwetu kwi Yehoba mu byambo ne mu byubilo. Kino kimwesha kuba’mba twapusanako na bantu bavula mu ntanda lelo jino. Twikala mu ntanda muji bantu babula kusanchila Lesa pa byonse byo ebobila. Kiji bino mambo kiyukilo kimo kimwesha’mba tubena kwikala mu “moba a kupelako” ke kya kuba’mba bantu kechi basanta ne. (2 Timo. 3:1, 2) Kange twikale na muchima wa kubula kusanta ne.

7. Yehoba ukeba’mba tubenga byepi, kabiji mambo ka?

⁷ Bansemi kechi bakeba baana babo kwitobosha ne, bino bakeba’mba bekale balunda. Ne Yehoba naye ukeba’mba baana banji bonse bomvwañanenga. Butemwe bo twitemwa ko kayukilo kamwesha’mba twi bena Kilishitu ba kine. (Yoa. 13:35) Tuswisha byambo byanembele nyimbi wa masalamo amba: “Byo kyawamapo ne byo kitutokela ku muchima balongo kwikala pamo saka bakwatankana!” (Sala. 133:1) Inge twatemwa balongo ne banyenga, tumwesha Yehoba amba twamutemwa. (1 Yoa. 4:20) Ke kintu kyawama bingi kwikala mu kisemi kya balongo ne banyenga beubila ‘lusa bene na bene, baji na michima ya kifyele.’—Efi. 4:32.

8. Kwesakana na byaamba 1 Yoano 5:3, ñanyi kishinka kine kitulengela kukookela Yehoba?

⁸ Yehoba ukeba’mba baana bakookelenga bansemi babo, kabiji ukeba’mba ne atweba  tumukookelenga. (Efi. 6:1) Twafwainwa kumukookelanga mambo ye Mulenga wetu, ye witupa byonse bitukwasha kwikala na bumi, kabiji ye nsemi wa maana kukila bantu bonse. Pano bino, kishinka kine kitulengela kukookela Yehoba ke kya kuba’mba twamutemwa. (Tangai 1 Yoano 5:3.) Nangwa kya kuba kuji bishinka byavula bitulengela kukookela Yehoba, bino aye kechi witukanjikizha kumukookela ne. Yehoba witupa luusa lwa kwifuukwila bintu, onkao mambo, umvwa bulongo inge twafuukulapo kumukookela na mambo a kuba’mba twamutemwa.

9-10. Mambo ka o kyanemena kuyuka mizhilo ya Lesa ne kwiikookela?

⁹ Bansemi bakeba baana babo kuzhikijilwa. O ene mambo o balengela mizhilo izhikijila baana babo. Inge baana bakookela ino mizhilo, bamwesha’mba baketekela bansemi babo ne kwibanemeka. Onkao mambo, kyanema bingi kuyuka mizhilo ya Shetu wa mwiulu ne kwiikookela. Inge twauba bino, tumwesha Yehoba amba twamutemwa ne kumunemeka, kabiji tumwenamo byawama. (Isa. 48:17, 18) Bino aba balengulula Yehoba ne mizhilo yanji beletelelatu bene.—Nga. 6:7, 8.

¹⁰ Inge ketutokeshe Yehoba ku muchima, tukazhikijilwa ku bintu byakonsha kwituletela makatazho, bijikila ne kwitonawina bulunda bwetu ne aye. Yehoba wayuka bintu bituwamina. Ba Aurora bekala ku United States, baambile’mba: “Nayuka’mba mu kukookela Yehoba mufuma byawama kimye kyonse.” Baambile kishinka. Nga anweba mwamwenamo  byepi mu kukookela lutangijilo lwa Yehoba?

11. Lulombelo lwitukwasha kuba byepi?

¹¹ Lulombelo lwitukwasha kukookela Lesa nangwa kya kuba kechi kyapeela ne. Bimye bimo, kitukatazha bingi kukookela Yehoba, bino twafwainwa kutwajijila kwibikako kumukookela. Nyimbi wa masalamo wasashijile Lesa amba: “Nkwashai ngikale na muchima wa kwimukookela.” (Sala. 51:12) Ba Denise bengila bupainiya bwa kimye kyonse baambile’mba: “Inge kekinkatazhe kukookela mukambizho umo wa Yehoba, ndomba kuba’mba ampe bulume bwa kuba byawama.” Twakonsha kuketekela kuba’mba Yehoba ukumbula milombelo ya uno mutundu.—Luka 11:9-13.

12. Kwesakana na byaamba Efisesa 5:1, twafwainwa kuba byepi?

¹² Tangai Efisesa 5:1. Byo tuji “baana bo atemwa” Yehoba, twibikako kulondela byubilo byanji. Tulondela byubilo byanji kupichila mu kwitemwa, kwiubila lusa ne kwilekelako mambo atweba bene na bene. Aba babula kuyuka Lesa inge bamona byubilo byetu byawama, bakonsha kutundaikwa kukeba kufunda byavula pe Lesa. (1 Pe. 2:12) Bansemi bena Kilishitu bafwainwa kwibikako kulondela Yehoba mu byo boba na baana babo. Inge bauba bino, baana babo bakakeba kwikala balunda na Shetu wa butemwe.

13. Twafwainwa kuba byepi pa kuba’mba tuchinchike?

 ¹³ Mwana wa mucheche umvwa bingi bulongo kwikala na bashanji kabiji ukasuluka kwisamba nabo. Ne atweba tumvwa bingi bulongo pa kwikala na Shetu wa mwiulu aye Yehoba, kabiji tukeba bantu bakwabo nabo kumuyuka. Mu muchima wetu, atweba bonse tumvwa byonka byaumvwine Mfumu Davida. Wanembele’mba: “Nketotela mwi Yehoba.” (Sala. 34:2) Pano bino, kimo kimye twakonsha kumvwa moyo kubuulako bantu pe Yehoba. Twakonsha kuba byepi pa kuba’mba tuchinchike? Tuchinchika inge twata muchima pa byo twakonsha kusangajika Yehoba ku muchima ne bantu bakwabo byo bakonsha kumwenamo mu kufunda pe aye. Yehoba uketukwasha kuchinchika. Wakwashishe bena Kilishitu batanshi kuchinchika, ne atweba uketukwasha.—1 Tesa. 2:2.

14. Ñanyi bishinka bimo bimwesha buneme bwa kwingila mwingilo wa kufunjisha bantu kwikala baana ba bwanga?

¹⁴ Yehoba kechi uji na misalululo ne, kabiji umvwa bingi bulongo inge witumona na kumwesha bakwetu butemwe nangwa kya kuba bafuma mu bisho byapusana-pusana. (Byu. 10:34, 35) Jishinda jimo jo twakonsha kumwesheshamo butemwe ke kusapwila bantu mambo awama. (Mat. 28:19, 20) Ñanyi bintu bikafuma mu uno mwingilo? Aba betumvwa bakonsha kwikala bwikalo bwawama luno ne kwikala na luketekelo lwa bumi bwa myaka ne myaka kulutwe.—1 Timo. 4:16.

15-16. Ñanyi bishinka bitulengela kwikala na lusekelo?

¹⁵ Yehoba ke nsemi wawama bingi, onkao mambo, ukeba kisemi kyanji kwikala na lusekelo. (Isa. 65:14) Kuji bishinka byavula byakonsha kwitulengela kwikala na lusekelo luno nangwa kya kuba tupita mu makatazho. Kishinka kimo ke kya kuba’mba, Shetu wa mwiulu witutemwa bingi. Kabiji twayuka bukine bwa mu Mambo a Lesa, Baibolo. (Yele. 15:16) Kabiji tuji mu kisemi kyawama bingi kya bantu batemwa Yehoba, batemwa mizhilo yanji, kabiji betemwa bene na bene.—Sala. 106:4, 5.

¹⁶ Twakonsha kutwajijila kwikala na lusekelo mambo tuji na luketekelo lwa kine lwa kuba’mba bwikalo bukawama bingi kulutwe. Twayuka kuba’mba katatakatu Yehoba akafumyepo babi bonse, kabiji ukengijisha Bufumu bwanji kwalula ino ntanda kwikala Paladisa. Kabiji tuji na luketekelo lwawama lwa kuba’mba aba bafwa bakasangulwa ne kubwela na kwikala pamo na balongo babo. (Yoa. 5:28, 29) Kino kiketuletela bingi lusekelo. Kabiji kyakilamo kunema, twashiinwa kuba’mba bilengwa byonse bya mwiulu ne pano pa ntanda bikapananga munema ne lutotelo kwi Shetu wa butemwe ne kumupopwela.