BANSONGWAKAZHI babiji bapichilenga mu mpunzha ya busulu mu muzhi wa Baguio City mu kyalo kya Philippines. Byo bapichilenga, bamwene kakutanchikapo mabuku, bino kechi bafwenyenye pepi ne. Nyenga Helen waimene kwipi na kano kakutanchikapo mabuku wamwemwesejile pa kwibamona. Abano bansongwakazhi kechi baimene ne, pano bino, baumvwine bulongo pa kumona nyenga Helen na kumwemwesela.

Bino byo babwelelenga ku nzubo mu sakya, bamwene Nzubo ya Bufumu panembelwe bisopelo bikatampe bya kuba’mba jw.org. Bavulukile’mba byo bisopelo bintutu bimo byo bamwene pa kakutanchikapo mabuku. Bonse babiji bapatukile mu sakya ne kuya na kumona mutanchi wa mwesheshenga kimye kipwila bipwilo byapusana-pusana pa yoya Nzubo ya Bufumu ye banembele pa jijiba.

Bano bansongwakazhi bayile na kutanwa ku kupwila kwalondejilepo. Kabiji ñanyi ye bamwene mu Nzubo ya Bufumu? Nyenga Helen! Bafikenejiletu kumuyuka na mambo a kumwemwesela kwanji. Nyenga Hellen waambile’mba: “Byo baishile po najinga, naakaminwe. Nalangulukile’mba kampe paji byatama byo nauba.” Bano bansongwakazhi babuujile nyenga Helen amba bamumwene saka aji pa kakutanchikapo mabuku.

Bano bansongwakazhi bamwenejilemo bingi mu kupwila ne kupwanañana na balongo ne banyenga. Byo bamwene balongo ne banyenga na kuwamisha mu Nzubo ya Bufumu, baipwizhe inge ne abo bakonsheshe kwingilako. Umo pa bano bansongwakazhi waya ku kyalo kingi, bino mukwabo washala watwajijila kupwila kabiji watendeka ne kufunda Baibolo. Abino byonse byaubiwe na mambotu a kumwemwesela.