1-2. Ñanyi kintu kyafunjile mulongo umo pa kupana lujimuno?

 MYAKA ya kunyumakwe, bakulumpe mu kipwilo babiji bafwakashijile nyenga umo walekele kupwila pa kimye kyabaya. Mukulumpe umo pa bano babiji wisambile na uno nyenga binembelo bimo byaamba pa kupwila. Uno mukulumpe walangulukile’mba kuno kufwakasha kwaendele bingi bulongo. Bino byo bayilenga, uno nyenga waambile’mba, “Anweba balongo kechi mwayuka bintu byo mbena kupitamo ne.” Abano bakulumpe bapaine lujimuno kwa kubula kuyuka makatazho apichilengamo uno nyenga. Kino kyalengejile uno nyenga kubula kumwenamo mu byo bamufunjileko.

² Mukulumpe mu kipwilo watangijile nyenga binembelo, waambile’mba: “Pa kyokya kimye namwene’mba uno nyenga kechi uji na mushingi ne. Bino byo nalangulukilepo bulongo, namwene kuba’mba nalangulukile pa binembelo bya kwingijisha kwa kubula patanshi kulanguluka pa byo apichilengamo. Nafwainwe kumwipuzha mepuzho nabiji a kuba’mba, ‘Ñanyi makatazho amo o mubena kupitamo mu bwikalo bwenu?’ ‘Kujiko bimo byo twakonsha kwimukwashako nyi?’” Uno mukulumpe wafunjijileko kintu kyanema ku kino kyamwekele. Lelo jino, uno mukulumpe ke kafunga wawama kabiji uji na kifyele.

3. Bañanyi bakonsha kujimunako bakwabo mu kipwilo?

 ³ Bakulumpe mu kipwilo byo baji bakafunga, baji na mwingilo wa kujimunako basapwishi inge kekikebewe. Pano bino, bimye bimo balongo ne banyenga bakonsha kujimunako bakwabo. Mulongo nangwa nyenga wakonsha kwingijisha Binembelo pa kujimunako mulunda nanji. (Sala. 141:5; Maana 25:12) Nangwa  nyenga wakoma wakonsha ‘kufundako nsongwakazhi’ nabiji pa bintu byo baambapo pa Titusa 2:3-5. Bansemi nabo bimye byavula bajimunako baana babo ne kwibololako. Nangwa kya kuba uno mutwe waamba kikatakata pa bakulumpe mu kipwilo, bino atweba bonse twakonsha kumwenamo kupichila mu kwisamba mashinda a kulondela pa kujimunako bakwetu mu mashinda atundaikañana kabiji “[alengela] muchima kusangalala.”—Maana 27:9.

4. Tusakwisamba pa ka mu uno mutwe?

⁴ Mu uno mutwe, tusakukumbula mepuzho ana aamba pa bya kufundako bakwetu: (1) Ñanyi kine kintu kilengela kujimunako bakwetu? (2) Nanchi alwe lujimuno kine lubena kukebewa nyi? (3) Bañanyi bakonsha kujimunako bakwabo? (4) Mwakonsha kufundako byepi bulongo bakwenu?

5. Ki ka kyakonsha kulengela bantu kukookela byo babena kwibajimunako ku bakulumpe mu kipwilo? (1 Kolinda 13:4, 7)

⁵ Bakulumpe mu kipwilo batemwa balongo ne banyenga. Kimye kimo, bamwesha butemwe kupichila mu kujimunako mulongo nangwa nyenga ubena kuya mu jishinda jingi. (Nga. 6:1) Mukulumpe mu kipwilo saka akyangye kupana lujimuno, kyawama kulanguluka pa bintu byaaambile mutumwa Paulo pa butemwe. Waambile’mba: “Butemwe butekanya ne kuba lusa. . . . Buvweta pa bintu byonse, bwitabila bintu byonse, buketekela bintu byonse, buchinchika bintu byonse.” (Tangai 1 Kolinda 13:4, 7.) Umvwe mukulumpe mu kipwilo ke alanguluke languluke pa bino byepelo bya mu Baibolo, bikamukwasha kujimunako mulongo nangwa nyenga mu jishinda ja butemwe. Umvwe ye babena kufundako wayuka’mba mukulumpe mu kipwilo wamutemwa, kikamukwasha kukookela byo bamufundako.—Loma 12:10.

6. Ñanyi kintu kyawama kyaubile Paulo?

⁶ Mutumwa Paulo wajinga mukulumpe mu kipwilo waingilanga bulongo. Kimye balongo bajinga mu Tesalonika kyo bakebewenga bukwasho, Paulo kechi wakankazhamine kwibafundako ne. Nangwa byonkabyo, mu nkalata Paulo yo ebanembejile, patanshi wibasanchijile pa mingilo yabo yamwesheshenga lwitabilo lwabo, butemwe, ne kuchinchika. Kabiji walangulukile pa byajinga bwikalo bwabo ne kwibabuula’mba wayukile makatazho o bapichilengamo. (1 Tesa. 1:3; 2 Tesa. 1:4) Wabuujile bano balongo amba bajinga ba kufunjilako bakwabo bena Kilishitu. (1 Tesa. 1:8, 9) Basangalele bingi pa byambo bya kwibasanchila bibambijile Paulo. Kwambatu kine Paulo watemenwe bingi balongo ne banyenga. O ene mambo o ebanembejile byambo bya kwibafundako biji mu makalata abiji a bena Tesalonika.—1 Tesa. 4:1, 3-5, 11; 2 Tesa. 3:11, 12.

7. Mambo ka bamo o bakonsha kubujila kutambwila lujimuno?

⁷ Ki ka kyakonsha kumweka inge twajimunako muntu mu jishinda jatama? Mukulumpe waingila pa myaka yavula waambile’mba: “Bamo bazhingila inge bebajimunako. Kino kechi kilumbulula’mba byambo byo bebafundako byatama ne, bino ke na mambo a kwibyamba mu jishinda jibula kumwesha butemwe.” Twakonsha kufunjilako ka ku kino? Kino kibena kwitufunjisha kuba’mba, bantu batambwila lujimuno inge bebafundako mu jishinda jimwesha butemwe kechi na bukaji ne.

8. Mukulumpe mu kipwilo wakonsha kwishikisha’mba ka saka akyangye kujimunako mulongo nangwa nyenga?

⁸ Bakulumpe mu kipwilo bafwainwa kutekanya pa kujimunako bakwabo. Mukulumpe saka a kyangye kufundako muntu, wafwainwa kwiipuzha’mba: ‘Nanchi awe mulongo ubena kukebewa lujimuno nyi? Abya nashiinwa kuba’mba kyauba mulongo kyatama nyi? Nanchi walala  mukambizho wa mu Baibolo nyi? Inyi bintu byo abena kuba byapusana na byo nakonsha kuba nyi?’ Bakulumpe mu kipwilo bachinuzhuka ‘kupelawizha kwamba.’ (Maana 29:20) Umvwe mukulumpe kechi wayuka bulongo inge wakonsha kujimunako musapwishi ne, wakonsha kushikisha mukulumpe mukwabo inge naye wamona amba mulongo wauba kintu kyapusana na byaamba Baibolo kya kumufunjilapo.—2 Timo. 3:16, 17.

9. Tubena kufunjilako ka kwi Paulo pa bya kufundako bakwetu pa mvwajilo ne mwekelo?

⁹ Langulukai pa kino. Twambe’mba mukulumpe mu kipwilo wamona mulongo nangwa nyenga wabula kuvwala bulongo nangwa wabula kuzañuna nsuki bulongo. Mukulumpe wafwainwa kwishikisha’mba, ‘Nanchi kujipo Kinembelo kyaambapo pa kino nyi?’ Na mambo a kuba’mba mukulumpe kechi ukeba kwamba mmweno yanji ne, wakonsha kwipuzhako mukulumpe mukwabo nangwa musapwishi wakoma mu lwitabilo kumvwa milanguluko yabo. Bakonsha kupitulukila pamo byambo bya kwa Paulo byamba pa mvwajilo ne mwekelo. (Tangai 1 Timoti 2:9, 10.) Paulo waambile mafunde amo a kuba’mba mwina Kilishitu wafwainwa kuvwalanga bulongo, na kwipelula ne kwikala na milanguluko yawama. Bino Paulo kechi wanembele mutanchi wa bivwalo byakonsha kuvwala muntu ne byo akonsha kubula kuvwala ne. Wayukile kuba’mba mwina Kilishitu wakonsha kusala bivwalo byo akeba kwesakana na byaamba Binembelo. Onkao mambo, pa kuba’mba bafundeko muntu, bakulumpe bafwainwa kulangulukapo umvwe mvwajilo yanji kechi imwesha kwipelula ne milanguluko yawama ne.

10. Ñanyi kintu kyakonsha kwitukwasha kunemeka byafuukulapo bakwetu?

¹⁰ Twafwainwa kuyuka kuba’mba bena Kilishitu babiji bakoma mu lwitabilo bakonsha kufuukula bintu byapusana. Bino kufuukula byapusana kechi kilumbulula’mba umo wafuukulapo bulongo kukila mukwabo ne. Kechi twafwainwa kukanjikizha bakwetu ba mu lwitabilo kuba kintu kyo twamona atweba’mba kyo kyawama ne.—Loma 14:10.

11-12. Umvwe ke kikebewe kujimunako mulongo nangwa nyenga, ñanyi mepuzho mukulumpe o akonsha kwiipuzha, kabiji mambo ka?

¹¹ Umvwe mulongo nangwa nyenga walubakanya kabiji kibena kukebewa kumujimunako, bwipuzho ke bwa kuba’mba, Bañanyi bafwainwa kupano luno lujimuno? Saka bakyangye kufundako nyenga wasongolwa nangwa mwana, mukulumpe mu kipwilo wafwainwa kwisamba na mutwe wa kisemi, kampe aye mwine wakonsha kukeba kupwisha luno lukatazho. * Nangwa mutwe wa kisemi wakonsha kwambila mukulumpe kuba’mba akekalepo kimye kyo akafundangako wa mu kisemi kyanji. Kabiji byonka byaamba  jifuka 3, kwakonsha kwikala kimye kikwabo nyenga  wakikulumpe po akonsha kufundako nyenga mwanyike.

¹² Kuji ne bintu bikwabo mukulumpe mu kipwilo byo afwainwa kulangulukapo. Mukulumpe wakonsha kwiipuzha’mba, ‘Nanchi yami nafwainwa kupana lujimuno nyi, inyi kyakonsha kuwama muntu mukwabo kuba bino?’ Umvwe kya kuba mulongo nangwa nyenga ulanguluka’mba kechi wanema ne, kyakonsha kuwama kumufundako ku mukulumpe wajinga na luno lukatazho. Mukulumpe wajinga na luno lukatazho ukayuka bulongo bibena kumvwa mulongo nangwa nyenga ne kwamba byambo byakonsha kumukwasha. Pano bino, bakulumpe mu kipwilo bonse baji na mwingilo wa kutundaika ne kukwasha balongo ne banyenga kupimpulako mubena kukebewa kwesakana na byaamba Binembelo. Onkao mambo, umvwe kekikebewe kujimunako mulongo nangwa nyenga, mukulumpe mu kipwilo wakonsha kupana lujimuno nangwa kya kuba kechi wakipitapo mu lolo lukatazho ne.

13-14. Mambo ka o kyanemena mukulumpe kuteleka?

¹³ Kyawama kuteleka. Umvwe mukulumpe mu kipwilo ubena kunengezha kuya na kufundañanako, wafwainwa kwiipuzha’mba: ‘Ñanyi bintu byo nayukapo pa lukatazho luji na mulongo? Bwikalo bwanji buji byepi? Nanchi ubena kupita mu makatazho o nabula kuyuka nyi? Ñanyi bukwasho bo abena kukebewa pa kino kimye?’

¹⁴ Mafunde aji pa Yakoba 1:19 akwasha boba bajimunako bakwabo. Yakoba wanembele’mba: “Muntu yense wafwainwa kupelawizha kumvwa, kabiji abande kwamba ne kubanda kuzhingila.” Mukulumpe mu kipwilo wakonsha kulanguluka amba wayuka bishinka byonse, nanchi kine wibiyuka nyi? Byambo bya Maana 18:13 bituvululamo kuba’mba: “Muntu inge wakumbula saka akyangye kumvwa bishinka, ko kukosama kabiji kilenga bingi bumvu.” Onkao mambo, kyanema kwipuzha mwine muntu kuba’mba etubuule bishinka. Kino kyavwangamo kuteleka saka tukyangye kwamba. Vulukai kishinka kyo twafunjilako ku mukulumpe ye twaambapo ku ntendekelo ya uno mutwe. Wamwene kuba’mba kechi kyayijilemo kufikenatu kutendeka kufundako nyenga na byambo byonka byo anengezhijile jimo kwa kubula patanshi kumwipuzha mepuzho nabiji ano: “Bwikalo bwenu buji byepi?” “Nakonsha kwimukwasha byepi?” Umvwe bakulumpe mu kipwilo baikala na kimye kya kukeba bishinka, po po bakonsha kukwasha ne kutundaika balongo ne banyenga.

15. Bakulumpe mu kipwilo bakonsha kulondela byepi jifunde jiji pa Byambo bya Maana 27:23?

¹⁵ Yukai mikooko. Byonkatu byo kyaambiwa ku ntendekelo ya uno mutwe, kupana lujimuno lwawama kwavwangamo byavula, kechi kutangatu binembelo nangwa kubuula muntu bya kuba ne. Balongo ne banyenga bafwainwa kuyuka’mba twibata muchima, twayuka byo babena kupitamo, kabiji tukeba kwibakwasha. (Tangai Byambo bya Maana 27:23.) Bakulumpe mu kipwilo bafwainwa kwibikako kulenga bulunda na balongo ne banyenga.

16. Ñanyi kintu kikwasha bakulumpe kufundako bakwabo bulongo?

 ¹⁶ Bakulumpe kechi bafwainwa kulengela balongo ne banyenga kumona kuba’mba bapayankana bingi, kabiji amba bekalatu na kimye inge bakeba kujimunako mulongo nangwa nyenga walubankanya ne. Pano bino, kimye kyonse bafwainwa kwisambanga nabo, ne kumwesha’mba bebata muchima inge baji na makatazho. Mukulumpe mu kipwilo wingila bulongo waambile’mba: “Umvwe kemube bino, mukekala mulunda nabo, kabiji kikemupelela kwibafundako umvwe kekikebewe.” Kabiji kikapeelela ne ye mubena kufundako kuswa byo mubena kumufundako.

17. Ñanyi kimye mukulumpe mu kipwilo kyo akebewa kutekanya ne kumwesha lusa?

¹⁷ Batekenyai ne kwibobila lusa. Butekanye ne lusa bikebewa kikatakata inge muntu patanshi wakana kukookela byaamba Baibolo kimye kyo bamujimunako. Mukulumpe kechi wafwainwa kuzhingila inge muntu wakana kuswa lujimuno ne. Baibolo waamba pa bungauzhi bwa kwa Yesu amba: “Jitete jafyotoka kechi ukejichimuna ne, nangwa muzhinge ufutumuka kechi ukamuzhimya ne.” (Mat. 12:20) Onkao mambo, mu lulombelo lwanji lwa kwa bunke, mukulumpe wakonsha kulomba Yehoba kupesha muntu ubena kukebewa bukwasho, ne kumukwasha kuyuka ene mambo a kumufunjilako ne kukookela byo bamufundako. Mulongo ye bajimunako ukebewa kimye pa kuba’mba alangulukepo pa lujimuno lo bamupa. Umvwe mukulumpe wamwesha butekanye ne lusa kimye kyo abena kujimunako mulongo, kikamukwasha mulongo kuswa lujimuno. Nangwa byonkabyo, lujimuno lwafwainwa kwimena pa Mambo a Lesa.

18. (a) Umvwe tubena kupana lujimuno, ñanyi kintu kyo twafwainwa kuvulukanga? (b) Byonka byo bamwesha mu kipikichala pa kakitenguluzha, ñanyi bintu bibena kwisambapo bansemi?

¹⁸ Funjilaiko ku byo mulubankanya. Mambo a kuba’mba twibambulwa kulumbuluka, kechi kyakonsheka kulondela byonse biji mu uno mutwe ne. (Yako. 3:2) Tukalubankanyanga, bino inge twalubankanya, twafwainwa kwibikako kufunjilako. Umvwe balongo ne banyenga bayuka’mba twibatemwa, kikebapeelela kwitulekelako mambo inge twibalubankanya mu ñambilo  yetu nangwa mu byo tuba.—Monai kakitenguluzha ka kuba’mba “ Byambo ku Bansemi.”

19. Twakonsha kulengela byepi muchima wa balongo nangwa banyenga kusangalala?

¹⁹ Byonkatu byo twamona, kechi kyapeela kujimunako bakwetu bulongo ne. Twibambulwa kulumbuluka, byo biji ne balongo bo tujimunako. Vulukainga mafunde o twisambapo mu uno mutwe. Monai kuba’mba mubena kukwasha muntu na mulanguluko wawama. Kabiji yukai kuba’mba kibena kukebewa bingi kujimunako balubankanya, kabiji yenu mwafwainwa kupana luno lujimuno. Saka mukyangye kujimunako mulongo nangwa nyenga, ipuzhai mepuzho ne kutelekesha pa kuba’mba muyuke byo abena kupitamo. Mwenainga bintu mu jishinda jibena kwibimwenamo mwine uji na lukatazho. Ikalai batekanya, lengai bulunda na balongo ne banyenga. Vulukai kuba’mba kikonkwanyi kyetu kechi kufundañanatu mu jishinda jawama ne, bino ne ‘kulengela muchima kusangalala.’—Maana 27:9.