1. Mambo ka o musanchila pa kwikala na Baibolo?

 Tusanchila bingi Yehoba Lesa pa kwitupa Baibolo. Mu Baibolo muji maana akonsha kwitukwasha kuyuka bya kuba inge twaikala na makatazho. Lesa witupa ne luketekelo lwa bwikalo bwawama bwa kulutwe. Kyakila pa byonse, Yehoba wingijisha Baibolo kwitubuula byubilo byanji byavula. Umvwe ketulanguluke pa byubilo byanji byawama tumutemwa bingi kabiji kino kitulengela kukeba kwikala balunda nanji.—Sala. 25:14.

2. Ñanyi mashinda apusana pusana Yehoba mo alengejile bantu kumuyuka?

² Yehoba ukeba’mba bantu bamuyuke. Kala kene, Yehoba walengejile bantu kulota biloto, kumona bimwesho ne kutuma bamalaika kuya na kubuula bantu byambo byanji. (Bala. 12:6; Byu. 10:3, 4) Bino biloto, bimwesho ne byambo byaambile bamalaika ku bantu ba Lesa umvwe kechi bebinembele ne, inge kechi twibiyuka ne. O ene mambo Yehoba o aambijile banabalume kuba’mba “banembe bino byambo mu buku.” Wakebelenga’mba twibiyuke. (Yele. 30:2) Na mambo a kuba’mba “jishinda ja Lesa wa kine jalumbuluka,” twakonsha kuketekela kuba’mba jishinda jo esambilamo ne atweba jawama kabiji jitukwasha.—Sala. 18:30.

3. Yehoba waubile byepi pa kuba’mba Baibolo atwajijile kwikalako ne ano moba? (Isaya 40:8)

³ Tangai Isaya 40:8. Mambo a Lesa akwasha banabalume ne banabakazhi ba kishinka pa myaka yavula bingi. Kino kyakonshekele byepi? Buno bwipuzho bwawama mambo Baibolo patanshi bamunembele kala kene pa mivungilo ne pa biseba byonaika bukiji. Onkao mambo, bino bintu byazhiile kala. Nangwa byonkabyo, Yehoba walengejile bantu kukopolola bino Binembelo byazhila. Nangwa kya kuba bano bantu bajinga bambulwa kulumbuluka bateleko bingi muchima kukopolola. Shayuka umo wanembele pa Binembelo bya Kihebelu amba:  “Twashiinwa kuba’mba uno buku wa kala bamukopolwele bingi bulongo.” Nangwa kya kuba Baibolo bamunembele kala kene pa bintu byonaika bukiji kabiji bamukopolwelenga bajinga bambulwa kulumbuluka bino twakonsha kushiinwa kuba’mba Baibolo ye tutanga ano moba muji milanguluko ya Mwine mwinaye, Yehoba.

4. Ñanyi bintu byo tusakwisamba mu uno mutwe?

⁴ “Bya bupe byonse byawama ne byalumbuluka” bifuma kwi Yehoba. (Yako. 1:17) Baibolo ke bupe bumo bwawama bwitupa Yehoba. Umvwe muntu witupa bupe kimwesha’mba wituyuka bulongo kabiji wayuka ne byo twakajilwa. Byo byo kiji ne ku Mwine witupa Baibolo. Buno bupe bwitufunjisha bintu byavula pe Yehoba. Tufunda kuba’mba wituyuka bingi bulongo kabiji wayuka byo twakajilwa. Mu uno mutwe, tusakwisamba pa Baibolo byo amwesha bino byubilo bisatu bya Yehoba: maana, bololoke ne butemwe. Patanshi twayai twisambe Baibolo byo amwesha maana a Lesa.

5. Ñanyi jishinda jimo Baibolo mo amweshesha maana a Lesa?

⁵ Yehoba wayuka kuba‘mba twafwainwa kumvwina lujimo lwanji. Kabiji mu bupe bo etupa bwa Baibolo, muji maana anji. Maana a mu Baibolo alengela bantu kuba byawama. Kabiji Baibolo upimpula bwikalo bwabo. Mosesa byo anembele mabuku atanshi a mu Baibolo, wabuujile bantu ba Lesa, bena Isalela amba: “[Bino] kechi byo byambo byatu ne, bikemulengela kwikala na bumi.” (Mpitu. 32:47) Bantu bakookejile bino Binembelo bajinga na lusekelo mu bwikalo bwabo. (Sala. 1:2, 3) Nangwa kya kuba Mambo a Lesa anembelwe kala kene bino aji na bulume bwa kukwasha bantu. Pa jw.org, mu bibaaba bya kuba’mba “Baibolo Upimpula Bwikalo bwa Bantu,” mukatanamo mashimikila kukila 50 amwesha Baibolo byo “abena kwingila [mu bantu] baitabila” ano moba.—1 Tesa. 2:13.

6. Mambo ka o twakonsha kwambila’mba Baibolo wapusanako na mabuku akwabo?

⁶ Kafwako buku mukwabo waesakana na Mambo a Lesa ne. Mambo ka o kyaikela bino? Mambo Mwine mwina uno buku, Yehoba Lesa, ye wa bulume bonse, ye wa myaka ne myaka kabiji uji na maana akila. Mabuku amo, bantu batwajijila na kwiatanga nangwa kya kuba mwine wianembele wafwile kala. Kabiji mu kuya kwa kimye, mafunjisho aji mu ano mabuku aleka kwingila. Pakuba mafunde aji mu Baibolo engila kimye kyonse kabiji atwajijila kukwasha bantu kufumatu ne kala kene. Umvwe saka tutanga uno buku wazhila ne kulanguluka languluka pa byo tufunda,Mwine mwinaye ukengijisha mupashi wanji wazhila wa bulume kwitukwasha ne kumona byo twakonsha kwingijisha lujimo lwa mu Baibolo mu bwikalo bwetu. (Sala. 119:27; Mala. 3:16; Hebe. 4:12) Kya kine, Mwine mwina Baibolo winengezha kwitukwasha. Kino kitutundaika kutanga Baibolo kimye kyonse.

7. Baibolo wakwashishe byepi bantu ba Lesa ba kala kukwatankana?

⁷ Kuji ne kintu kikwabo kimwesha’mba mu Baibolo muji maana a Lesa. Ke kishinka kya kuba’mba Baibolo ukwasha bantu ba Lesa kukwatankana. Bena Isalela byo batwelele mu Ntanda ya Mulaye baikelenga mu mapunzha apusana pusana. Bamo bakwatanga masabi, bakwabo balamanga bañombe kabiji bakwabo bajinga banjimi. Bena Isalela baikalanga mu mpunzha imo bakonsheshe kuleka kulanguluka pa byapichilengamo bena Isalela bakwabo baikalanga mu mapunzha akwabo. Bino Yehoba wakambizhe bena Isalela kukonkana pamo pa bimye byapusana pusana  na kumvwa byambo byanji byo batangilenga ne kwibilumbulula. (Mpitu. 31:10-13; Ne. 8:2, 8, 18) Fwanyikizhai mwina Isalela wa kishinka byo afwainwe kumvwa bulongo pa kufika mu Yelusalema ne kumona bapopweshi bakwabo bavula bingi bafumine mu mapunzha akwabo mu kyalo kyabo. Na mambo a kuba bino, Yehoba wakwashishe bantu banji kutwajijila kukwatankana. Mu kuya kwa moba, kipwilo kya bena Kilishitu byo kyalengelwe, mwajinga banabalume ne banabakazhi baambanga milaka yapusana pusana. Bamo bajinga pa bifulo bikatampe, bakwabo ne. Kabiji bakwabo bajinga banonshi, pakuba bakwabo bajinga bayanji. Na mambo a kuba’mba bonse batemenwe Binembelo, bakwatankene mu kupopwela Lesa wa kine. Bantu baikele ke bena Kilishitu bakwatakenye Mambo a Lesa byo bebakwashishenga ku bapopweshi bakwabo ne kupwanañana nabo pamo.—Byu. 2:42; 8:30, 31.

8. Baibolo ukwatankanya byepi bantu ba Yehoba lelo jino?

⁸ Lesa wetu wa maana watwajijila kufunjisha bantu ne kwibakwatankanya kwingijisha Baibolo. Mu Baibolo mo muji bukine bonse bwaamba pe Yehoba bo twafwainwa kuyuka. Tukonkana pamo kimye kyonse ku kupwila kwa kipwilo, kubuñana ne kushonkena ko tumvwa Binembelo byo batanga, kwibilumbulula ne kwambapo. Onkao mambo, Baibolo wanema bingi mambo Yehoba ye ye engijisha  kukwasha bapopweshi banji kutwajijila “kumwingijila na muchima umo.”—Zefwa. 3:9.

9. Ñanyi kyubilo kyo twafwainwa kwikala nakyo pa kuba’mba tumvwishenga byaamba Baibolo? (Luka 10:21)

⁹ Langulukai pa kintu kikwabo kimwesha maana a Yehoba. Lesa wamwene kuba’mba Binembelo byavula bebinemba mu jishinda ja kuba’mba kanatu bantu bepelula bo bakonsha kumvwisha byo batanga. (Tangai Luka 10:21.) Bantu bavula batanga Baibolo. Shayuka umo waambile’mba “bantu bavula bingi batanga Baibolo kukila mabuku akwabo kabiji batako bingi muchima pa kutanga uno buku.” Pano bino, bantu bepelula kya kine bo bakwatakanya byo batanga ne kwibingijisha.—2 Ko. 3:15, 16.

10. Ñanyi jishinda jikwabo Baibolo mo amweshesha maana a Yehoba?

¹⁰ Kuji jishinda jikwabo jo tufunjilamo pa maana a Yehoba mu Baibolo. Yehoba wingijisha Binembelo kufunjisha bantu banji bonse pamo, bino wibafunjisha ne kwibatekenesha pa muntu pa muntu. Inge twatanga Mambo a Lesa twakonsha kumona kuba’mba Yehoba wituta bingi muchima pa muntu pa muntu. (Isa. 30:21) Umvwe mubena kupita mu lukatazho, nanchi mwakitangapo kyepelo kimo mu Baibolo ne kumona nobe banembejiletu anweba nyi? Pano bino, Baibolo bamunembejile bantu bavula bingi kuba’mba bomvwishenga bijimo. Pano mambo ka o mwaikela byambo byaambatu pa bintu byo mubena kupitamo? Kiji bino, mambo Mwine mwina Baibolo uji bingi na maana.—2 Timo. 3:16, 17.

11. Lesa wamwesheshe byepi kubula misalululo kimye kyo banembelenga Baibolo?

¹¹ Bololoke ke kyubilo kikwabo kya Yehoba. (Mpitu. 32:4) Muntu uba byaoloka kechi wikala na misalululo ne. Ne Yehoba naye kechi uji na misalululo ne. (Byu. 10:34, 35; Loma 2:11) Twayuka kuba’mba kechi uji na misalululo ne, mambo Baibolo wanembelwe mu milaka yavula yaambanga bantu pa kyokya kimye. Mabuku atanshi 39 a mu Baibolo avula anembelwe mu Kihebelu, mulaka waumvwanga bantu ba Lesa pa kyokya kimye. Nangwa byonkabyo, mu myaka kitota kitanshi C.E., mulaka wa Kingiliki ye ye baingijishanga bantu bavula. Onkao mambo, mabuku apelako 27 a mu Baibolo avula beanembele mu uno mulaka. Yehoba kechi waambile’mba Mambo anji afwainwa kunembwatu mu mulaka umo ne. Ano moba bantu kukila 8 bilyonyi pano pa ntanda bamba milaka yavula bingi. Bantu bavula bibye bakonsha kufunda byepi pe Yehoba?

12. Bungauzhi buji pa Danyela 12:4 bubena kufika byepi mu ano moba a kupelako?

¹² Kupichila mwi ngauzhi Danyela, Yehoba walayile kuba’mba kimye kya ku mpelo, “maana a kuyuka bintu” aji mu Baibolo “akavula bingi.” Kino kikalengela bavula kwiakwatakanya. (Tangai Danyela 12:4.) Ano maana avula bingi mambo Baibolo ne mabuku alumbulula Baibolo beatuntulula ne kwiasampanya myaka yavula bingi. Baibolo ye buku umo ye batuntulula bingi ne kumusampanya mwaya ntanda. Ma Baibolo o banengezha ku tumpanyi twa busulu beapotesha pa mutengo wabaya bingi. Bantu ba Yehoba batuntulula Baibolo yense mutuntulu nangwa lubaji lumo mu milaka kukila 240, kabiji muntu yense wakonsha kutambula Baibolo kwa kubula kulipila. Na mambo a kino bantu ba mu bisaka byonse babena kufunda “mambo awama a Bufumu” mpelo saka ikyangye kufika. (Mat. 24:14) Lesa wetu wa bololoke wapa kimye bantu bavula kya kutanga Mambo anji pa kuba’mba bamuyuke mambo witutemwa bingi atweba bonse.

13. Mambo ka o twakonsha kwambila’mba Baibolo umwesha butemwe bwa Yehoba? (Yoano 21:25)

¹³ Baibolo witukwasha kuyuka kyubilo kyakila pa byonse kya Mwine mwinaye. Kino kyubilo ke butemwe. (1 Yoa. 4:8) Langulukai pa bintu Yehoba byo abikile mu Baibolo ne byo abujile kubikamo. Wabikilemo bintu bitukwasha pa kuba’mba twikale na bulunda ne aye, kwikala na lusekelo ne kukekala na bumi bwa myaka ne myaka. Nangwa byonkabyo, na mambo a kuba’mba Yehoba witutemwa kechi wabikilemo bintu byavula bingi byo twakonsha kukankalwa kukwatakanya ne.—Tangai Yoano 21:25.

14. Mu ñanyi jishinda jikwabo bintu biji mu Baibolo o bimweshesha’mba Lesa witutemwa?

¹⁴ Kabiji Yehoba umwesha butemwe bwanji mu jishinda jo esambilamo ne atweba jimwesha’mba witunemeka. Mu Baibolo kechi wabikilemo mutanchi wa mizhilo yonse yaambatu tonkotonko pa bintu byonse byo twafwainwa kuba ne byo twafwainwa kubula kuba ne. Pakuba wingijisha mashimikila a bwikalo bwa bantu, bungauzhi ne maana akonsha kwitukwasha kufuukula bulongo bintu. Na mambo a kwingijisha ano mashinda, Mambo a Lesa etutundaika kumutemwa ne kumukookela na muchima wetu yense.

15. (a) Yehoba wamwesha byepi kuba’mba wata bingi muchima bantu batanga Mambo anji? (b) Ñanyi bantu banembwa mu Baibolo baji pa kipikichala babena kulangulukapo kashimbi, mulongo wakipeela ne nyenga wakoma? (Nte. 39:1, 10-12; 2 Mfu. 5:1-3; Luka 2:25-38)

¹⁵ Baibolo umwesha kuba’mba Yehoba wituta bingi muchima. Umwesha byepi bino? Mu Mambo anji muji mashimikila a bantu bajinga na bulanda ne bajinga na lusekelo. Twakonsha kuyuka byaumvwinenga bantu banembwa mu  Baibolo mambo nabo bajingatu “byonka byo tuji.” (Yako. 5:17) Kyakilamo kunema, inge twamona Lesa byo aubile na bantu bajinga byonka byo tuji kitukwasha kuyuka kuba’mba “Yehoba ye wa kifyele ne lusa.”—Yako. 5:11.

16. Inge twatanga pa bantu banembwa mu Baibolo balengele mambo kitufunjishapo ka pe Yehoba? (Isaya 55:7)

¹⁶ Baibolo wamwesha jishinda jikwabo Yehoba mo amweshesha butemwe bwanji. Binembelo bitubuula’mba Lesa kechi uketusha inge twalubankanya ne. Bena Isalela bamulenganga mambo Yehoba bimye byavula bingi, bino inge balapila wibalekelangako mambo. (Tangai Isaya 55:7.) Bena Kilishitu batanshi nabo bayukile kuba’mba Lesa wibatemenwe bingi. Mupashi wazhila watundaikile mutumwa Paulo kutundaika bena Kilishitu bakwabo “kumulekelako mambo ne kumutekenesha” mwanamulume walengele mambo akatampe bino walapijile. (2 Ko. 2:6, 7; 1 Ko. 5:1-5) Kitutekenesha bingi kuyuka kuba’mba Yehoba kechi wakaine bapopweshi banji na mambo a kuba’mba balengele mambo ne. Pakuba wibolweleko ne kwibalengela kwikala balunda nanji jibiji. Walayile kuba’mba byo akobanga ne na bandengamambo balapila ano moba.—Yako. 4:8-10.

17. Mambo ka Baibolo o aikela bupe bwawama bingi?

¹⁷ Yehoba witupa bupe bwawama. Mambo ka Mambo anji kyo anemena? Twafunda kuba’mba Baibolo umwesha kuba’mba uji na maana, waoloka kabiji uji na butemwe. Uno buku wamwesha’mba Yehoba ukeba atweba kumuyuka. Kabiji ukeba’mba twikale balunda nanji.

18. Twakonsha kumwesha byepi amba tusanchila Yehoba pa “bupe bwawama” bwa Baibolo?

¹⁸ Twafwainwa kuvulukanga kuba’mba Mambo a Lesa ke “bupe bwawama.” (Yako. 1:17) Onkao mambo, twayai tutwajijile kusanta pa buno bupe. Twakonsha kuba bino, umvwe saka tulomba ne kutanga byambo byazhila ne kulanguluka langulukapo. Inge saka tuba bino twakonsha kushiinwa kuba’mba Mwine mwina Baibolo uketupesha kabiji ‘tukamuyuka Lesa.’—Maana 2:5.