Betutemenwe Bingi mu Kipwilo
YOMARA ne bankasanji babiji Marcelo ne Hiver baikalanga mu muzhi mucheche mu Guatemala. Yomara watendekele kufunda Baibolo na Bakamonyi ba kwa Yehoba. Mu kuya kwa moba, bankasanji nabo batendekele kufunda Baibolo. Bino bajinga na lukatazho lumo. Bonse bajinga bampofu, kabiji kechi bayukile kutanga mabuku a bampofu ne. Onkao mambo, wibafunjishanga Baibolo ye watanganga mafuka ne byepelo biji mu lufunjisho lo babena kufunda.
Kabiji kechi kibapeelejile kutaanwa ku kupwila ne. Mambo kwajinga Nzubo ya Bufumu kwalepele. Bakonsheshe kwendapo maminiti 40. Bino balongo mu kipwilo banengezhezhe kwibasendanga ku kupwila konse. Kabiji bano bantu byo batendekele kwamba majashi a baana ba sukulu pa kupwila kwa mukachi ka mulungu, balongo bebakwashanga kulabijila byambo byo bafwainwe kwamba.
Mu May 2019, kupwila kwatendekele kwikalako mu muzhi mo baikalanga. Pa kyokya kimye, ba mulume ne mukazhi bapainiya bavilukijile mu yewa muzhi. Bebikileko bingi kufunjisha bano bantu basatu bya kutanga ne kunemba mabuku a bampofu, nangwa kya kuba abo bene kechi bayukile kutanga ano mabuku ne. Onkao mambo, bayile ku kishimikwa kwa kutangila ne kusengako mabuku a bampofu pa kuba’mba bafunde bya kufunjisha bakwabo kwingijisha ano mabuku.
Marcelo ubena kukumbulapo pa kupwila
Byo papichile bañondo bacheche, Yomara ne bankasanji batendekele kutanga bulongo mabuku a bampofu. a Luno Yomara, Marcelo ne Hiver ke bapainiya ba kimye kyonse. Marcelo nkwasho mu kipwilo. Bapayankana bingi kwingijila Yehoba mulungu yense. Bengijila bingi Yehoba na mukoyo kabiji kino kyalengela bakwabo nabo kutendeka kwingijila Yehoba na mukoyo.
Yomara ne bankasanji babena kusanchila balongo ne banyenga pa byo bebakwasha. Yomara waambile’mba: “Kutatulatu kimye kitanshi kyo twamonañene na Bakamonyi ba kwa Yehoba, betumwesha byo kilumbulula bena Kilishitu ba kine kutemwa bakwabo.” Marcelo naye wanungilepo’mba: “Twisampa bulunda na balongo ne banyenga mu kipwilo kyetu, kabiji tuji mu kisemi kya Yehoba kyakwatankana pano pa ntanda kabiji betemwa bene na bene.” Yomara ne bankasanji babena kutengela kumona Yehoba byo akalula ino ntanda kwikala ke paladisa.—Sala. 37:10, 11; Isa. 35:5.
a Buloshuwa ye banengezha kukwasha bampofu ne babula kumwesha kufunda kutanga ne kunemba.
