1. Pa kwamba pa kimye kya mpelo, Yesu wabuujile baana banji ba bwanga amba ka, kabiji wibajimwineko’mba ka?

 BYO kwashajiletu moba acheche Yesu kufwa, baana banji ba bwanga bana bamwipwizhe’mba: “Kiyukilo kya . . . mpelo ya buno bwikalo kyo kyepi?” (Mat. 24:3) Bano baana banji ba bwanga kyamweka bakebelenga kuyuka kimye kikonaunwa Yelusalema ne Nzubo ya Lesa. Yesu pa kwibakumbula, kechi waambiletu pa konaunwa kwa Yelusalema ne Nzubo ya Lesa ne, bino waambile ne pa “mpelo ya buno bwikalo.” Yesu byo aambilenga pa kimye kikeya mpelo, waambile’mba: “Pa mambo a joja juba nangwa kimye kafwako wayuka ne, nangwatu bamalaika ba mwiulu nangwatu Mwana, kanatu Batata.” Kepo ajimwineko baana banji ba bwanga bonse kuba’mba “mukenkentenga” ne kutwajijila ‘kulaba ne kukenkenta.’—Mako 13:32-37.

2. Mambo ka o kyanemejile bena Kilishitu bajingako mu myaka kitota kitanshi kutwajijila kulaba ne kukenkenta?

² Bena Kilishitu Bayudea mu myaka kitota kitanshi bafwainwe kulabanga ne kukenkenta pa kuba’mba bapulushe bumi bwabo. Yesu wabuujile baana banji ba bwanga bintu byo bafwainwe kutako muchima byafwainwe kwibakwasha kuyuka kimye kikafika mpelo ya bwikalo bwa Bayudea. Waambile’mba: “Umvwe mwamona Yelusalema bamuzhokoloka ku mazhita, mukayuke’mba lonaiko lwanji luji pepi.” Inge bamona bino bintu, bafwainwe kumvwina lujimuno lwa kwa Yesu ne ‘kutendeka kunyemena ku mitumba.’ (Luka 21:20, 21) Aba baumvwijile luno lujimuno bapulukile kimye bena Loma kyo baonawine Yelusalema.

3. Ñanyi bintu byo tusakwisambapo mu uno mutwe?

 ³ Ano moba, tubena kwikala ku mpelo ya buno bwikalo. Onkao mambo, ne atweba twafwainwa kulabanga ne kukenkenta. Mu uno mutwe, tusakwisamba pa byo twakonsha kuta muchima pa bintu bibena kumweka mu ntanda, byo twafwainwa kujimuka ne byo twakonsha kwingijisha bulongo kimye kyashalako.

4. Mambo ka o twafwainwa kutelako muchima ku bintu bibena kumweka mu ntanda bibena kufikizha bungauzhi bwa mu Baibolo?

⁴ Kyanema bingi kuta muchima ku bintu bibena kumweka mu ntanda byo bibena kufikizha bungauzhi bwa mu Baibolo. Yesu witubuujile jimo bintu bibena kumweka bibena kumwesha’mba mpelo ya buno bwikalo bwa kwa Satana ijitu pepi. (Mat. 24:3-14) Mutumwa Petelo witutundaikile kuta muchima ku bintu bibena kufikizha bungauzhi pa kuba’mba tukoseshe lwitabilo lwetu. (2 Pe. 1:19-21) Buku wapelako mu Baibolo watendeka na byambo bya kuba’mba: “Lumwekesho lwa Yesu Kilishitu lo bamupele kwi Lesa amba akamweshe bakalume banji bintu bikamweka palutwe kacheche.” (Lum. 1:1) Onkao mambo, bino bintu bitulengela kuta muchima ku bintu bibena kumweka mu ntanda lelo jino ne kuyuka byo bibena kufikizha bungauzhi bwa mu Baibolo. Kabiji tukebesha bingi kubuulako bakwetu bino bintu.

5. Ñanyi bintu byo twafwainwa kuchinuzhuka, pano bino twafwainwa kuba ka? (Monai ne bipikichala.)

⁵ Inge tubena kwisamba pa bungauzhi bwa mu Baibolo, twafwainwa kuchinuzhuka kusopelela bintu bikamweka. Mambo ka? Mambo kechi tukeba kwamba kintu kyakonsha kuleta mabano mu kipwilo ne. Kimo kimye twakonsha kumvwa bandamabyalo na kwamba pa byo bakonsha kupwisha lukatazho lumo pa kuba’mba balete mutende ne luzhikijilo. Kechi twafwainwa kusopelela’mba bino byambo bibena kufikizha bungauzhi buji pa 1 Tesalonika 5:3 ne, pakuba twafwainwa kuyuka byaambapo jibumba ja Yehoba. Umvwe mu misambo yetu saka twamba biji mu mabuku etu, tukakwasha kipwilo kukwatankana ne kwikala “na mulanguluko umo.”—1 Ko. 1:10; 4:6.

6. Byambo biji pa 2 Petelo 3:11-13, bitufunjishapo ka?

⁶ Tangai 2 Petelo 3:11-13. Mutumwa Petelo witukwasha kuyuka ene mambo o twafwainwa kutela muchima kuyuka bungauzhi buji mu Baibolo. Witutundaika “kutengela ne kukebesha kwiya kwa juba ja Yehoba.” Mambo ka? Mambo tukeba kwingijisha bulongo kimye kyashalako ne “kwikala na byubilo byazhila ne kwingila mingilo ya kunemeka Lesa.” Bino kechi tuba bino kuba’mba tuyuke “juba ne kimye” Yehoba kyo akaleta Amagedonyi ne. (Mat. 24:36; Luka 12:40) Tukeba kwikala na byubilo byawama ne kumona’mba byonse byo twingila mu mwingilo wa Yehoba bibena kumwesha’mba twamutemwa. Pa kuba’mba tube bino, twafwainwa kujimuka.

7. Twakonsha kumwesha byepi’mba twajimuka? (Luka 21:34)

⁷ Yesu wabuujile baana banji ba bwanga kubula kutatu muchima ku bintu bibena kumweka mu ntanda bino ne kujimuka. Luno lujimuno belwambapo bulongo pa Luka 21:34. (Tangai.) Monai byaambile Yesu amba: “Jimukai.” Muntu wajimuka uyuka bintu byakonsha konauna bulunda bwanji ne Yehoba kabiji kechi wibyuba ne. Kabiji kuba bino kumulengela kutwajijila kwikala monka mu butemwe bwa Lesa.—Maana 22:3; Yuda 20, 21.

8. Mutumwa Paulo watundaikile bena Kilishitu amba ka?

 ⁸ Mutumwa Paulo watundaikile bena Kilishitu kwikala bajimuka. Wabuujile bena Kilishitu ba mu Efisesa amba: “Monainga bulongo byo mwenda, kechi mwendenga nobe bantu babula maana ne, poso nobe bantu ba maana.” (Efi. 5:15, 16) Satana ukebesha bingi konauna bulunda bwetu ne Yehoba. Onkao mambo, Baibolo witujimunako’mba ‘tuyukenga kyaswa muchima wa Yehoba’ pa kuba’mba tumushinde Satana.—Efi. 5:17.

9. Ñanyi bintu byo twafwainwa kuba pa kuba’mba tuyuke kyaswa muchima wa Yehoba?

⁹ Baibolo kechi watongaulatu byonse tonkotonko byakonsha konauna bulunda bwetu ne Yehoba ne. Javula tufuukula bintu byo babula kwambapo mu kushinkamika mu Binembelo. Pa kuba’mba tufuukulenga bulongo pa bintu, twafwainwa kuyuka “kyaswa muchima wa Yehoba.” Twakonshatu kuba bino inge ketufunde Mambo a Lesa pa juba pa juba ne kulanguluka langulukapo. Inge twayuka kyaswa muchima wa Yehoba ne kwikala na “muchima wa Kilishitu,” tukendanga “nobe bantu ba maana,” nangwatu inge kechi paji muzhilo washinkamika byo twafwainwa kuba ne. (1 Ko. 2:14-16) Kimo kimye kikatazha bingi kuyuka bintu byo twafwainwa kuchinuzhuka, pa bimye bikwabo kipeela bingi.

10. Ñanyi bintu bimo byo twafwainwa kuchinuzhuka?

¹⁰ Bintu bimo byo twafwainwa kuchinuzhuka ke kusengula kubi, kupendwapendwa, kukizhamo kuja, ñambilo ya mwenga, kutamba bya kisangajimbwe byatama, kutamba bipikichala bya mulekese ne bintutu bikwabo byatama. (Sala. 101:3) Mulwanyi wetu aye Diabola, witwimena kuntundwa na kukeba mashinda a konawinamo bulunda bwetu ne Yehoba. (1 Pe. 5:8) Inge kechi twajimuka ne, Satana ukabyala mu milanguluko yetu ne mu michima yetu nkunwa yatama nabiji kichima, kubula bukishinka, lwiso, lupato, kwilundumika ne kizhingijisha. (Nga. 5:19-21) Patanshitu, kechi mwakonsha kulanguluka’mba bino bintu byatama ne. Pano bino inge kechi twibisankilapo bukiji ne, byakonsha kujimba mizhazhi ne kwitubika mu lukatazho.—Yako. 1:14, 15.

11. Ñanyi kintu kimo kyakatazha kuyuka’mba kyatama kyo twafwainwa kuchinuzhuka, kabiji mambo ka?

¹¹ Kintu kimo kyakatazha kuyuka’mba kyatama ke kupwanañana na babi. Akilangulukai pa kino. Twambe’mba mwingila na mukwenu wabula Kamonyi wa kwa Yehoba. Mukeba mukwenu kulangulukanga pa bintu byawama byuba Bakamonyi ba kwa Yehoba. Onkao mambo, mumubila lusa ne kumukwasha. Kimo kimye mujiila pamo kajo pachaile na yewo muntu. Kokyakayanga jonse mwatendeka kutanwa nanji pachaile. Kimye kimo uno muntu wamba pa bintu byatama, patanshi kechi mukeba kwambapo pa ino misambo ne. Pano bino kokyakayanga ino misambo yatendeka kumweka nobe ijitu bulongo. Kepo juba jimo uno mukwenu wimwambila’mba twaya tukatomepo tubintonto ne anweba mwaswa kuya nanji. Mu kuya kwa moba mwatendeka kuba bintu byonka byo oba. Kino kikemulengela kwikala na miteeto ijipo na yewo mukwenu mo mwingijila. Ibyo kuba’mba tubila lusa ne kunemeka bantu bonse. Pano bino inge ne kujimuka ne, twakonsha kutendeka kuba bintu byonka byubapo bakwetu bo tubena kupwanañana nabo kimye kyabaya. (1 Ko. 15:33) Inge twajimuka, tukalondela byaambile Yesu kabiji kino kiketulengela kuchinuzhuka kupwanañana na bantu babula kulondela mizhilo ya Yehoba. (2 Ko. 6:15) Tukayuka byubilo byatama ne kwibichinuzhuka.

12. Ñanyi mwingilo waingijilenga baana ba bwanga ba kwa Yesu aku saka bapembelela kufika kwa mpelo ya buno bwikalo?

¹² Yesu wakebelenga baana banji ba bwanga kutengela mpelo ya buno bwikalo aku saka bapayankana. Wibapele mwingilo. Wibakambizhe kusapwila mambo awama “mu Yelusalema, monse mu Yudea ne mu Samaliya, ne monse mwapela ntanda.” (Byu. 1:6-8) Uno mwingilo Yesu ye apele baana banji ba bwanga wabaile bingi. Bebikileko bingi kusapwila, kino kyamwesheshe’mba baingijishe kimye kyabo bulongo.

13. Mambo ka o twafwainwa kwingijishanga kimye kyetu bulongo? (Kolose 4:5)

¹³ Tangai Kolose 4:5. Pa kuba’mba twikale bajimuka, twafwainwa kulangulukishapo pa byo twingijisha kimye kyetu. Mambo “bintu bya kubula kuketekela” byakonsha kwitufikila atweba bonse. (Sapwi. 9:11) Twakonsha kufwa nobe mu kukopatu kwa jiso.

14-15. Twakonsha kwingijisha byepi bulongo kimye kyetu? (Bahebelu 6:11, 12) (Monai ne kipikichala.)

¹⁴ Twingijisha kimye kyetu bulongo inge saka tuba kyaswa muchima wa Yehoba ne kukosesha bulunda bwetu ne aye. (Yoa. 14:21) Twafwainwa kwikala “bashikimana, babula kutelengela, kimye kyonse saka twikala na  bya kuba byavula mu mwingilo wa Nkambo.” (1 Ko. 15:58) Umvwe twafwa nangwa mpelo ya buno bwikalo bwatama yafika kechi tukelangulusha’mba twakankelwe kwingijila Yehoba ne.—Mat. 24:13; Loma 14:8.

¹⁵ Ano moba, Yesu ubena kutangijila baana banji ba bwanga babena kusapwila pa Bufumu bwa Lesa pano pa ntanda ponse. Ubena kufikizha mulaye wanji. Ubena kwingijisha jibumba ja Yehoba kwitufunjisha bya kusapwila mambo awama kabiji witupa bintu byonse byafwainwa kwitukwasha kwingila bulongo uno mwingilo. (Mat. 28:18-20) Twibikako bingi kwingila uno mwingilo wa kusapwila ne kufunjisha kabiji tubena kulaba ne kukenkenta byo tubena kutengela Yehoba konauna buno bwikalo bwatama. Umvwe ketulondele lujimuno luji pa Bahebelu 6:11, 12, tukalumbulula luketekelo lwetu “kufika ne ku mpelo.”—Tangai.

16. Ñanyi bintu byo twafwainwa kubanga?

¹⁶ Yehoba wafuukwila jimo kimye kyo akonauna ino ntanda ya kwa Satana. Jino juba byo jikafika, Yehoba ukafikizha bungauzhi bonse bwanembwa mu mambo anji. Kimye kimo twakonsha kulanguluka’mba mpelo yabanda kufika. Nangwa byonkabyo, juba ja Yehoba ‘kechi jikakelwa ne!’ (Ha. 2:3) Onkao mambo, twayai twibikengako ‘kutalanga kwi Yehoba,’ ne kumwesha muchima wa ‘kupembelela Lesa wa lupulukilo lwetu.’—Mika 7:7.