BAIBOLO pamo pamo wabwezha bwezhapo byambo bintutu bimo kyambo pa kyambo. Akilangulukai pa bino bishinka bisatu byalengejile banembi kuba bino:

Kimye kyo bamunembelenga. Bena Isalela bavula kechi bajinga na muvungilo wa mizhilo wa kyabokyabo ne. Javula kisaka kyonse kyakonkananga pamo ku tente wa lusambakeno na kuteleka byo batanganga ino Mizhilo. (Mpitu. 31:10-12) Kyamweka bya kwibavulañanya byavulanga kimye kyo batelekanga ne kwimena kitala mu jibumba jikatampe. (Neh. 8:2, 3, 7) Pa bimye bya uno mutundu, babwezha bwezhangapo bishinka byanema byakwashishenga bantu kuvuluka binembelo ne mashinda mwa kwibingijisha. Kubwezha bwezhapo byambo bimo kwibakwashanga kikatakata kuvuluka bishinka byonse bya mizhilo Yehoba yo ebapele.​—Levi 18:4-22; Mpitu. 5:1.

Jishinda jo banembejilemo. Mabuku a mu Baibolo amo beanembele byonka byo banemba nyimbo nabiji buku wa Salamo, Lwimbo wa Solomone ne Majilo a Yelemiya. Kimo kimye nyimbo ibwezha bwezhapo byambo bintutu bimo kabiji kubwezha bwezhapo kwakoseshanga kishina kya lwimbo ne kulengela batelekelenga kulabijila byambo. Akimonai bino byambo biji pa Salamo 115:9-11 bya kuba’mba: “Obewa Isalela, ketekela mwi Yehoba​—Aye ye nkwasho wobe kabiji ye jikebo jobe. Anweba ba mu nzubo ya kwa Alona, ketekelai mwi Yehoba​—Aye ye nkwasho wenu kabiji ye jikebo jenu. Anweba mwakamwa Yehoba, ketekelai mwi Yehoba​—Aye ye nkwasho wenu kabiji ye jikebo jenu.” Onkao mambo, kubwezha bwezhapo bino byambo bintutu bimo kwakwashishe banyimbi kulabijila byambo byonse byanema ne kubula kwibilubamo.

Ene mambo o bebinembejile mu jino jishinda. Banembi ba Baibolo kimye kimo babwezhezhe bwezhezhengapo byambo byanema bintutu bimo. Yehoba byo akambizhe bena Isalela kubula kuja mashi, walengejile Mosesa kwamba bino byambo javula. Lesa wakebelenga kukosesha kishinka kya kuba’mba bumi bwa kintu kyonse kyumi ke mashi, ko kuba’mba mashi emenako bumi. (Levi 17:11, 14) Kabiji batumwa ne bakulumpe mu kipwilo bajinga mu Yelusalema banembele bintu byakonsheshe kukwasha bantu kuchinuzhuka kuba bintu bifichisha Lesa ku muchima. Baambile jikwabo kuba’mba bantu bafwainwa kukana kuja mashi.​—Byu. 15:20, 29.

Nangwa kya kuba pamo pamo Baibolo wabwezha bwezhapo byambo bintutu bimo, kino kechi kibena kulumbulula’mba ne atweba twafwainwa kuba bino ne. Yesu waambile’mba: “Pa kulomba, kange mwambengatu bintu bimo” ne. (Mat. 6:7) Kabiji waambile pa bintu bimo byo twafwainwa kulombapo. (Mat. 6:9-13) Nangwa kya kuba kechi tubwezha bwezhapo byambo bintutu bimo mu milombelo yetu ne, bino tukasuluka kwamba pa bintutu bimo.​—Mat. 7:7-11.

Kuji bishinka bimo byalengejile Lesa kutangijila banembi kubwezha bwezhapo byambo bintutu bimo mu Mambo anji. Jino najo ke jishinda Mufunjishi wetu Wakila jo etufunjishishamo kuba’mba tumwenemo.​—Isa. 48:17, 18.