Nangwa byonkabyo, Yehoba ukeba’mba tutwajijile kupembelela kimye kyanji kyo akapwishishamo makatazho onse. Pano mambo ka o akebela’mba tubenga bino? Ñanyi bintu biketukwasha kwikala na lusekelo kimye kyo tubena kupembelela?

MAMBO KA YEHOBA O AKEBELA’MBA TUPEMBELELENGA PE AYE?

Baibolo waamba’mba: “Yehoba wimutekenya kuba’mba emubile bibusa, kabiji ukemana kuba’mba emubile lusa. Mambo Yehoba ye Lesa uchiba mambo monka mo aolokela. Bo bene ba lusekelo aba bonse babena kumupembelela.” (Isa. 30:18) Isaya waambijile bino byambo Bayudea betotele bingi. (Isa. 30:1) Nangwa byonkabyo, Bayudea bamo bajinga ba kishinka kabiji bino byambo bibalengejile kwikala na luketekelo. Kabiji bino byambo bintutu bimo bilengela bantu ba Yehoba lelo jino nabo kwikala na luketekelo.

Onkao mambo, twafwainwa kutwajijila kupembelela saka twatekanya mambo Yehoba naye ubena kupembelela saka atekanya. Uji na kimye kyo atongola aye mwine kyo akaletelamo mpelo ya buno bwikalo kabiji ubena kupembelela jino juba ne kimye kufika. (Mat. 24:36) Pa kyokya kimye, kikamwekeshatu patoka’mba bintu byaambile Diabola pe Yehoba ne pa bantu banji bamwingijila bya bubela. Ukafumyapo Satana ne bonse bamutundaika. Pakuba atweba ‘uketubila bibusa.’

Pa kino kimye, Yehoba kechi wakonsha kufumyapo makatazho etu ne. Nangwa byonkabyo, witutundaika’mba twakonsha kwikala na lusekelo kimye kyo tubena kupembelela pe aye. Isaya waambile’mba twakonsha kwikala na lusekelo kimye kyo tubena kutengela kintu kyawama kufika. (Isa. 30:18) a Twakonsha kwikala byepi na luno lusekelo? Bintu bina byakonsha kwitukwasha.

BYO TWAKONSHA KWIKALA NA LUSEKELO KIMYE KYO TUBENA KUPEMBELELA

Tai muchima pa bintu byawama bibena kumweka mu bwikalo bwenu. Mfumu Davida wimwenejile bubi byo bwasampukijile ne pa katele mu bwikalo bwanji bonse. (Sala. 37:35) Nangwa byonkabyo, wanembele’mba: “Uzhindame kwi Yehoba kabiji umutengelenga saka watekanya. Kange uzhingile na mambo a muntu uba bintu byatama byo afuukula ne.” (Sala. 37:7) Davida walondejile bino byambo byo ateletu  muchima pa milaye ya Yehoba kabiji kuba bino kwamukwashishe bingi. Kabiji wasanchilanga Yehoba ne pa bintu byawama byo amubijile. (Sala. 40:5) Ne atweba inge ke tute muchima pa bintu byawama bibena kumweka mu bwikalo bwetu ne kubula kulangulukangatu pa makatazho o tubena kupitamo, kiketupelela bingi kutwajijila kupembelela pe Yehoba.

Totainga Yehoba kimye kyonse. Nembi wa Salamo 71, kyamweka Davida, waambile kwi Yehoba amba: “Nkatwajijila kwimupembelela; nkakizhamo kwimutota.” (Sala. 71, 14) Pano wakonsheshe kutota byepi Yehoba? Wambilenga pe Yehoba ku bantu ne kumwimbila nyimbo ya kumutota. (Sala. 71:16, 23) Byonka byaubile Davida, ne atweba twakonsha kwikala na lusekelo byo tubena kupembelela pe Yehoba. Tumutota mu mwingilo wetu wa kusapwila, kwamba pe aye ku balunda netu ne ba mu kisemi kyetu ne kwimba nyimbo yetu ya Bufumu. Kimye kyo mukembanga nyimbo yetu ya Bufumu, mukalanguluke pa byambo bijimo ne byo byakonsha kwimulengela kwikala na lusekelo.

Monaingapo kimye kya kwikala pamo na balongo ne banyenga pa kuba’mba bemutundaikenga. Davida byo apichilenga mu makatazho, waambile kwi Yehoba amba: “Ku meso a bakalume benu ba kishinka, nkaketekela mu jizhina jenu mambo jawama.” (Sala. 52:9) Ne atweba balongo ne banyenga bakonsha kwitutundaika bingi inge tuji nabo, kechi pa kupwilatu ponka ne mu mwingilo ne, bino ne pa tubimye twa kusangalela pamo.​—Loma 1:11, 12.

Koseshai luketekelo lwenu. Pa Salamo 62:5 paamba’mba: “Mpembelela Lesa saka natekanya mambo luketekelo lwami lufuma kwi aye.” Kyanema bingi kwikala na luketekelo lwakosa kikatakata mpelo inge yabula kwiya bukiji kwesakana na byo twalangulukilenga. Twafwainwa kushiinwa’mba milaye ya Yehoba ikafika nangwa kya kuba twakonsha kwiipembelela pa myaka yavula. Twakonsha kukosesha luketekelo lwetu inge ke tutange Mambo a Lesa, kulanguluka pa bungauzhi bwa mu Baibolo bwafika, bintu byanembele banembi ba Baibolo bapusana pusana byo byakwatankana ne bishinka Yehoba byo asolola pe aye mwine. (Sala. 1:2, 3) Kabiji twafwainwa kutwajijila “kulomba na mupashi wazhila” pa kuba’mba tulamawizhe bulunda bwetu ne Yehoba byo tubena kupembelela mulaye wanji waamba pa bumi bwa myaka ne myaka kufika.​—Yuda 20, 21.

Byonka byaubile Davida, shiinwai kuba’mba Yehoba utalatala boba batwajijila kumupembelela kabiji wibamwesha butemwe Bwanji bubula kwaluka. (Sala. 33:18, 22) Twajijilai kupembelela pe Yehoba saka mwatekanya. Mukatwajijila kuba bino, inge saka mutatu muchima pa bintu byawama bibena kumweka mu bwikalo bwenu, kutota Yehoba, kutambwila lutundaiko ku balongo ne banyenga ne kutwajijila kukosesha luketekelo lwenu.