BA SYLVIANA baji na myaka 27 kabiji bapainiya ba kimye kyonse baambile’mba: “Bintu byanshimikizhe mulunda nami wayile na kwingijila ku mapunzha kwakebewenga bapainiya byandengejile kukebesha kwimwena lusekelo lufuma mu kwingijila ku a ano mapunzha.” Kabiji banungilepo amba: “Bino nachiinenga’mba kechi nakonsha kuya na kwingijila kubena kukebewa ba mingilo bavula ne.”

Nanchi ne anweba byo byo mulanguluka nyi? Nanchi mukebesha kuya na kwingijila kubena kukebewa ba mingilo ba Bufumu bavula bino muchina amba kuba mwakonsha nenyi? Inge byo byo kiji, kechi mwafwainwa kwakamwa ne. Yehoba wakwasha balongo ne banyenga bavula bingi kushinda mikiika pa kuba’mba bengileko pakatampe mu mwingilo wa kusapwila. Pa kuba’mba tuyuke Yehoba byo akwashapo bamo, tusakwamba pa bayile na kwingijila pa jikuji jikatampe ja Madagascar.

Pa myaka jikumi ya kunyuma kwe, basapwishi ne bapainiya kukila pa 70 bengila na mukoyo bafumine mu byalo * 11 bayile na kwingijila ku ino nyaunda yawama ya mu Africa muji bantu bavula banemeka bingi Baibolo. Kabiji basapwishi bavula bingi ba mu kyokya kyalo nabo bepana kusampanya byambo bya Bufumu pa jino jikuji jonse. Twayai tufundeko pa bamo.

Ba mulume ne mukazhi baji na myaka kukila pa 30, ba Louis ne ba Perrine, bafumine ku France ne kuya na kwingijila ku Madagascar. Papichile myaka yavula na kulanguluka bya kwingilako pakatampe mwingilo wa kusapwila, bino ba muka Louis abo ba Perrine bachinanga kuvilukila ku mpunzha ingi. Balumbulwile’mba: “Nachinanga kuya ku mpunzha ko nabula kuyuka. Kechi nakebanga kusha balongo bami, kipwilo, nzubo yetu, ne mapunzha o napijilwe ne bintu byo twaubanga ne. Kwambatu kine, bijikila byami byo byajinga mukiika wabayile bingi ye nashinjile.” Mu 2012, ba Perrine bashinjile moyo, kabiji abo ne bamwata wabo ba Louis bavilukile. Nga luno bomvwa byepi pa byo bafuukwilepo? Baambile’mba: “Inge nalanguluka pa bintu byo twapitamo, nakonsha kwamba’mba lwitabilo lwetu lwakoselako pa kumona Yehoba byo abena kwitukwasha.” Ba Louis banungilepo amba: “Pa Kivuluko kitanshi kyo twaikele nakyo mu Madagascar, bantu 10 bo twafunjishanga Baibolo bataainweko.”

 Ñanyi kintu kyakwashishe bano ba mulume ne mukazhi kutwajijila kwingila mwingilo wabo ku kyalo kingi kimye kyo baikele na makatazho? Balombele kwi Yehoba milombelo ya misashijilo kuba’mba ebape bulume bwa kuchinchika. (Fili. 4:13) Ba Louis bashimikizhe’mba: “Twimwenejile Yehoba byo akumbwile milombelo yetu ne kwitupa ‘mutende wa Lesa.’ Twatwajijile kuta muchima pa lusekelo lwafuminenga mu mwingilo wetu. Kabiji balunda netu ku kyalo ko twafumine betutuminanga makalata ne byambo bya kwitutundaika kuba’mba tutwajijile kuchinchika.”—Fili. 4:6, 7; 2 Ko. 4:7.

Yehoba wibapesheshe bingi ba Louis ne ba Perrine pa kuchinchika kwabo. Ba Louis baambile’mba: “Mu October 2014, betwichile kuya na kutaanwa ku Sukulu wa Baibolo wa Bena Kilishitu Baji mu Masongola * ku France. Kutaanwa ku uno sukulu kyajinga kya bupe kyanema bingi kitupele Yehoba.” Bano ba mulume ne mukazhi byo bapwishishe sukulu, batemenwe bingi pa kwibabwezha na kwingijila ku Madagascar.

Ba mulume ne mukazhi ba Didier ne ba Nadine bafumine ku France ne kuvilukila ku Madagascar mu 2010 saka baji na myaka kukila pa 50. Ba Didier bashimikizhe’mba: “Twaingijileko bupainiya byo twakijinga banyike, kabiji mu kuya kwa kimye twaikele na baana basatu. Baana betu byo bakomene, twalangulukilepo kuya na kwingijila ku kyalo kingi.” Ba Nadine baambile’mba: “Nakankazhaminenga kuya ku kyalo kingi mambo kechi nakebelenga kusha baana bami ne, bino baana betubuujile’mba: ‘Inge mwaya na kwingijila ku kyalo kingi kubena kukebewa basapwishi bavula, muketuletela bingi lusekelo.’ Abino byambo bitutundaikile bingi ne kwitulengela kufuukulapo kuya. Nangwa kya kuba twikala kwalepa na ko twasha baana betu, bino tuji bingi na lusekelo mambo twisamba nabo bimye byavula.”

Bino lukatazho lumo lwapichilemo ba Didier ne ba Nadine ke kufunda mulaka wa Malagasy. Ba Nadine baambile’mba: “Banyike bafunda bukiji milaka, pano atweba twakoma.” Ki ka kibakwashishe kufunda uno mulaka? Patanshi, batendekele kupwila mu kipwilo kingijisha Kifulenchi. Mu kuya kwa kimye, bamwene kuba’mba pano bafwainwa kwikala na kimye kyabaya kya kufunda mulaka wa konkakwa. Onkao mambo, bavilukijile mu kipwilo kya mulaka wa Malagasy. Ba Nadine baambile’mba: “Bantu bavula bo tutaana kimye kyo tuya na kusapwila, batemwa bingi kufunda Baibolo. Javula betusanchila pa kwibafwakesha. Kimye kitanshi namwenengatu nobe mbena kulota. Natemwa bingi kwingijila bupainiya ku ino nyaunda. Moba onse pa kubuuka, ñamba’mba, ‘Kyawama byo nabuuka bulongo, nsakuya na kusapwila.’”

Ba Didier baseka inge bavuluka kimye kyo batendekele kufunda mulaka wa Malagasy. Bashimikizhe’mba: “Juba jimo natangijilenga kupwila kwa kipwilo bino kechi naumvwinenga mikumbu ya balongo ne banyenga ne. Naambilengatu’mba, ‘Twasanta.’ Byo nasanchijile nyenga umo pa mukumbu wanji, bajinga kunyuma yanji bamwesheshe kiyukilo kya kuba’mba mukumbu wanji kechi wajinga wa kine ne. Bukiji bukiji natongwele mulongo kuba’mba ambe mukumbu wa kine, kabiji naketekela waambile bya kine.”

Pa kushonkena kwa mu 2005, ba Thierry ne bakazhi babo ba Nadia batambile kifwanyikizho kya kuba’mba “Ibikaiko Kufikizha Bikonkwanyi Binemeka Lesa.” Kino kifwanyikizho  kya mu Baibolo kibafikile bingi pa muchima kabiji kibalengejile kukebesha kuya na kwingijila kubena kukebewa basapwishi ba Bufumu. Ba Thierry baambile’mba: “Kifwanyikizho byo kyapwile, saka tubena kupopwela nanongotwejile bakazhi bami amba, ‘Tukaya na kwingijila kwepi?’ Bakazhi bami baambile’mba ne abo kyo kyo balangulukilengapo.” Ponkapo batatwile kwinengezha kuba’mba bakafikizhe kino kikonkwanyi kyabo. Ba Nadia bashimikizhe’mba: “Twatendekele kukepeshako bintu byo twajinga nabyo kufikatu ne byo twashajile na bintu bicheche byatwelele mu byola bina byo twajinga nabyo.”

Bafikile mu Madagascar mu 2006 kabiji batendekele kwiyowa mwingilo wa kusapwila byo bafikiletu. Ba Nadia baambile’mba: “Bantu bo tutaana mu mwingilo betulengela kwikala bingi na lusekelo.”

Bino byo papichiletu myaka itanu na umo, bano ba mulume ne mukazhi bapichile mu lukatazho. Bainabo ba Nadia, abo ba Marie-Madeleine baikalanga mu France, baponene kabiji bachimukile mukoko, kabiji bekozhezhe ne ku mutwe. Bano ba mulume ne mukazhi besambile na dokotala wabukilenga bainabo inge kya kuba bakonsheshe kwita bainabo kwiya na kwikala nabo mu Madagascar. Nangwa kya kuba pa kyokya kimye bainabo bajinga na myaka 80, baswile lwito. Bomvwa byepi pa kuvilukila mu kyalo kingi? Baambile’mba: “Bimye bimo kikatazha kupimpula bwikalo, bino nangwa kya kuba nkankalwa kuba bintu bimo, mmona kuba’mba kipwilo kyannemeka bingi. Kabiji kintu kikwabo kindetela bingi lusekelo ke kya kuba’mba kwikala kuno kwakwasha baana bami kutwajijila kwingila mwingilo wabo.”

Mulongo wa jizhina ja Riana uji na myaka 22, kabiji wakomejile mu kibunji kya Alaotra Mangoro kyaikela ku musela wa kyalo kya Madagascar, mo bajima bijimwa byavula. Waubile bingi bulongo mu mpeso ya ku sekondale, kabiji wakebelenga kuya na kufunda pa sukulu mukatampe. Bino na mambo a byo afunjile mu Baibolo, wapimpwile mulanguluko wanji. Washimikizha’mba: “Nateleko bingi muchima kuba’mba mpwishe bukiji sukulu, kabiji nalayile Yehoba amba, ‘Inge nauba bulongo mu mpeso ya ku sukulu, nkatendeka bupainiya.’” Byo apwishishe sukulu, Riana wafikizhe byo alayile Yehoba. Watendekele kwikala na mulongo mukwabo painiya, kabiji watwelele nkito ya kwingila maola acheche ne kutendeka bupainiya. Waambile’mba: “Kyo kintu kyawamisha kyo nafuukulapo mu bwikalo bwami.”

Pano bino, balongo ba kwa Riana kechi bayukile ene mambo o afuukwijilepo kubula kuya ku sukulu mukatampe ne. Riana washimikizhe’mba: “Batata, bamwisho, ne bankambo bonse bantundaikile kufunda kufika palepa. Bino kechi nakebelenga kintu nangwa kimo kundengela kuleka bupainiya ne.” Kechi pabanjile ne, Riana watendekele kulanguluka pa kwingijila ku mpunzha kwakebewenga basapwishi ba Bufumu. Ki ka kyalengejile? Waambile’mba: “Bangivi batwelele mu nzubo ne kwiba bipe byami byavula. Kino kyamvulwilemo byambo byaambile Yesu amba twafwainwa ‘kwibikila nsabo mwiulu.’ Nafuukwilepo kwingila na ngovu ne kwibikila nsabo mwiulu.” (Mat. 6:19, 20) Wavilukijile ku mpunzha kwalepa ku bulenge bwa kyalo kya Madagascar, kwalepele makilomita 1,300 na ko aikalanga, kabiji kwajinga kyashi. Kuno ko ku mpunzha kwikala bantu ba mu mukoka wa Antandroy. Mambo ka o avilukijile kuno?

Ñondo umo saka bakyangye kumwibila bipe ku bangivi, Riana wafunjishe banabalume babiji ba mu mukoka wa Antandroy Baibolo. Byo ebafunjishenga, wafunjileko byambo bimo mu mulaka wabo, kabiji walangulukile’mba kwajinga bena Antandroy bavula babujile kumvwapo mambo awama a Bufumu. Waambile’mba: “Nalombele Yehoba amba ankwashe kuvilukila ku mpunzha kwikala bena Antandroy.”

Riana wavilukile, bino byo afikiletu, waikele na lukatazho lumo. Wakankelwe kutaana nkito. Mwanamulume umo wamwambijile’mba: “Mambo ka o waishila kuno? Bantu kuno inge bakeba kutwela nkito, bavilukila konka ko wafuma.” Byo aikelekotu milungu ibiji, mali o ajinga nao apwile, kabiji byo ayilenga na kushonkena, waakaminwe bingi pa byo akekalanga. Juba japeleleko ja kushonkena, mulongo umo wabikile kintu mu pokochi wa kibaki kya kwa Riana. Byo avungulwile kino, Riana wataaine kuba’mba mwajinga mali avula bingi, kabiji waingijishe ano mali kubwelelamo ku mpunzha ya bena Antandroy ne kutendeka ka busulu ka kwikwashishamo. Riana waambile’mba: “Nemwenejile Yehoba byo ankwashishenga pa kimye kyafwainwa. Na mambo a buno bukwasho, natwajijile kufunjisha bantu babujile kuyuka Yehoba.” Mu kipwilo namo mwajinga mingilo yavula bingi. Riana wanungilepo’mba: “Naambanga jashi ja mvula bantu pa kupitapo mulungu umo. Yehoba wamfunjishenga byavula  mu jibumba janji.” Ne lelo jino, Riana ubena kusapwila mambo a Bufumu ku bena Antandroy bavula bakeba kuyuka Yehoba.

Yehoba witulaya’mba ‘yense ukakebanga bibusa pano pa ntanda bakamupesha kwi Lesa wa kine.’ (Isa. 65:16) Umvwe twibikako kushinda mikiika pa kuba’mba twingileko pakatampe mwingilo wa kusapwila, Yehoba witupesha. Akilangulukai pe ba Sylviana, bo twaambapo ku ntendekelo ya kino kibaaba. Vulukai kuba’mba balangulukanga’mba kechi bakonsha kuya na kwingijila kubena kukebewa basapwishi ba Bufumu ne. Mambo ka o balangulukilanga bino? Balumbulwile’mba: “Kulu kwami kwa ku kilujo kwalepa na masentimita 9 kukila kwa ku kipiko. Onkao mambo, nsunkuta pa kwenda kabiji nkooka bukiji.”

Nangwa byonkabyo, mu 2014 ba Sylviana bakwatankene pamo na nsongwakazhi painiya wa monka mu kipwilo mo bajinga aye Sylvie Ann, ne kuya ku mpunzha ya ku muzhi palepele makilomita 85 kufuma ko baikalanga. Nangwa kya kuba kwajinga mikiika, ba Sylviana bafikizhe kikonkwanyi kyabo, kabiji bamwenamo byawama bingi. Bashimikizhe’mba: “Byo napwishishekotu mwaka umo, nsongwakazhi wajinga na mwana ye nafunjishanga Baibolo aye Doratine, wabatizhiwe pa kubuñana kwa mwanzo.”

Byonkatu byaamba bano basapwishi bayile na kwingijila kwakebewenga ba mingilo ba Bufumu, inge twibikako kushinda mikiika kuba’mba twingileko pakatampe mwingilo, twimwena kufika kwa mulaye wa Yehoba wa kuba’mba: “Amiwa nkakukosesha ne kukukwasha.” (Isa. 41:10) Kabiji bulunda bwetu ne Yehoba bukoselako. Kikwabo, inge twipana na muchima yense, konka ko twikala nangwa kuya na kwingijila ku kyalo kikwabo, ko kuba’mba tubena kwinengezha kukengila mingilo ya Bufumu mu ntanda ipya. Byonkatu byaambile ba Didier bo twaambapo kala, “kwingijila kwakepa basapwishi ba bufumu kwitufunjisha byo tukengilanga mu ntanda ipya.” Onkao mambo, twimulomba kwipana kwingilako uno mwingilo pa kuba’mba mufunde mingilo.