1, 2. Ñanyi kupwila kukakwatankanya bantu mu 2018, kabiji mambo ka? (Monai kipikichala kitanshi.)

JUBA byo jikazhikanga pa 31 March, 2018, bantu bavula bingi mu mapunzha apusana pusana bakatanwa pamo na bantu ba Lesa ku Kijiilo kya Nkambo kya Mabanga kikalako pa mwaka pa mwaka. Inge juba jazhika, kukekala kuvuluka lufu lwa kwa Kilishitu. Pa mwaka pa mwaka, kivuluko kikwatankanya bantu ba Lesa pa ntanda ponse.

² Yehoba ne Yesu basangalala bingi pa kumona bantu bavula bingi pa ntanda byo bakonkana pamo ku kuno kupwila kwanema bingi. Baibolo waambijile jimo amba “jibumba jikatampe jo bakonsha kubula kubala ku muntu nangwa umo, [kufuma] mu bisaka byonse, mu mikoka yonse, mu mitundu yonse ya bantu ne mu njimi yonse,” bakabijika’mba: “Lupulukilo lwetu lufuma kwi Lesa wetu waikala pa jitanda, ne ku Mwana Mukooko.” (Lum. 7:9, 10) Ke kintu kyawama  bingi kuba’mba pa mwaka pa mwaka bantu batumbijika Yehoba ne Yesu kupichila mu kutaanwa ku Kivuluko.

3. Ñanyi mepuzho asakukumbulwa mu uno mutwe?

³ Kuji mepuzho amo epuzha bantu akumbulwa mu uno mutwe. (1) Bantu bakonsha kwinengezha byepi kutaanwa ku Kivuluko ne kumwenamo? (2) Mu ñanyi mashinda Kivuluko mo kikosesha lukwatankano lwetu? (3) Mu ñanyi mashinda mo twakonsha kutundaikila lukwatankano pa muntu pa muntu? (4) Nanchi kukekalapo kivuluko kikapelako nyi? Inge ibyo, kikekalako ñanyi kimye?

4. Mambo ka o kyanemena kutaanwa ku Kivuluko nangwa kya kuba bintu byakatazha?

⁴ Langulukainga pa buneme bwa kutaanwa ku Kivuluko. Vulukai kuba’mba kupwila ke lubaji lwa mpopwelo yetu. Kine, Yehoba ne Yesu bamona byo twibikako kutaanwa ku kuno kupwila kwanema bingi kwikalako pa mwaka pa mwaka. Kwambatu kine, tukebesha kutaanwa ku Kivuluko nangwa bintu bikatazhepotu byepi. Umvwe twamwesha kuba’mba twanemeka bingi kupwila, tulengela Yehoba kunemba jizhina jetu mu ‘buku wa kwituvulukilako,’ ko kuba’mba “buku wa bumi,” muji mazhina a bantu bakatambula bumi bwa myaka ne myaka.—Mala. 3:16; Lum. 20:15.

5. Mu moba a kunangijila ku Kivuluko, twakonsha kwieseka byepi ne ‘kuyuka inge tukiji mu lwitabilo’?

⁵ Mu moba a kunangijila ku Kivuluko, twakonsha kwikalapo na kimye kya kulomba ne kulangulukishapo pa bulunda bwetu ne Yehoba. (Tangai 2 Kolinda 13:5.) Twakonsha kuba byepi bino? Twafwainwa ‘kwiesekanga atwe bene pa kuba’mba tuyuke kana tukiji monka mu lwitabilo nangwa ne.’ Twafwainwa kwishikisha’mba: ‘Nanchi naitabila na muchima yense kuba’mba jino jibumba jetu jo jonkatu Yehoba jo abena kwingijisha kuba kyaswa muchima wanji nyi? Abya mbena kwibikishako kusapwila ne kufunjisha mambo awama a Bufumu nyi? Nanchi byubilo byami bimwesha’mba nashiinwa kuba’mba tubena kwikala mu moba a kupelako a ino ntanda ibena kulamwa na Satana nyi? Nga luketekelo lwami mwi Yehoba ne Yesu nanchi lwakosatu byonka byo lwakosele kimye kyo nepaine kwi Yehoba Lesa nyi?’ (Mat. 24:14; 2 Timo. 3:1; Hebe. 3:14) Kulanguluka pa mikumbu ya ano mepuzho kuketukwasha kwipima ne kwiyuka byo tuji.

6. (a) Twafwainwa kuba byepi pa kuba’mba tukekale na bumi bwa myaka ne myaka? (b) Mukulumpe mu kipwilo umo unengezha byepi kuba’mba amwenemo mu Kivuluko, kabiji ne anweba mwakonsha kuba byepi bino?

⁶ Twafwainwa kutanga ne kulanguluka pa bibaaba ne Binembelo byalumbulula buneme bwa Kivuluko. (Tangai Yoano 3:16; 17:3.) Twakonsha kwikalatu na bumi bwa myaka ne myaka inge ‘twamuyuka’ Yehoba ne ‘kwitabila’ mu Mwananji, aye Yesu. Pa kuba’mba mwinengezhe bulongo kumwenamo mu Kivuluko, tangaipo bibaaba bimo byakonsha kwimukwasha kufwenya kwipi ne Yehoba ne Yesu. Akimonai byuba mulongo umo wabanda bingi pa bukulumpe mu kipwilo. Pa myaka yapitapo, walama bibaaba bya mu Kyamba kya Usopa byamba pa Kivuluko ne pa butemwe bwitumwesha Yehoba ne Yesu. Mu milungu ya kunangijila ku Kivuluko, utanga bino bibaaba ne kulanguluka pa buneme bwa kuvuluka lufu lwa Nkambo. Kabiji inge wataanapo kibaaba kikwabo kyaamba pa bino bishinka, nakyo wikilama. Uno mukulumpe wataana kuba’mba na mambo a kutanga bino bibaaba ne kutanga Baibolo mu moba a Kivuluko ne kulangulukapo, ufunjilapo bintu bipya pa mwaka pa mwaka. Kyakilamo kunema, wamona kuba’mba butemwe bwanji bo atemwa Yehoba ne Yesu bubayilako pa mwaka pa mwaka. Ne anweba inge  kemube bino, butemwe bo mwatemwa Yehoba ne Yesu bukabayilangako, kabiji mukamwenangamo mu Kivuluko.

7. (a) Pa juba jo atendekeshe Kijiilo kya Nkambo kya Mabanga, Yesu walombele’mba ka? (b) Twayuka byepi amba Yehoba wakumbwile mulombelo wa kwa Yesu?

⁷ Bufuku pa juba jo atendekeshe Kijiilo kya Nkambo kya Mabanga, Yesu walombejileko baana banji ba bwanga kuba’mba bakwatankane byonkatu aye byo akwatankana na Shanji wa mwiulu. (Tangai Yoano 17:20, 21.) Kyamwekatu patoka’mba Yehoba wakumbula mulombelo wa Mwananji, kabiji luno bantu bavula baitabila kuba’mba Yehoba ye watumine Mwananji. Kafwako kupwila kukwabo kukosesha lukwatankano lwa Bakamonyi ba kwa Yehoba kukila Kivuluko ne. Kimye kya Kivuluko, bantu bafuma mu bisaka byapusana pusana bapwila pamo mu mapunzha avula mwaya ntanda. Mu byalo bimo, bantu kechi baswa kupwila pamo na bantu ba mu bisaka bikwabo ne, kabiji inge bapwila pamo, bantu bebalengulula. Pano bino, Yehoba ne Yesu bomvwa bingi bulongo kumona byo tukwatankana kimye kya Kivuluko.

8. Ñanyi byambo Yehoba byo aambijile Ezikyo pa mambo a lukwatankano?

⁸ Atweba bantu ba Yehoba kechi tukumya pa kumona byo twakwatankana ne. Yehoba waambijile jimo amba byo byo kikekala. Akilangulukai pa byambo Yehoba byo aambijile ngauzhi Ezikyo, bya kulamankanya pamo tubichi tubiji, “ka kwa Yuda” ne “ka kwa Yosefwa.” (Tangai Ezikyo 37:15-17.) Kibaaba kya “Mepuzho Afuma ku Batanga” kyajinga mu Kyamba kya Usopa kya July 2016 kyaambile’mba: “Yehoba wapele Ezikyo byambo bya luketekelo byo alayile kukwatankanya kisaka kya bena Isalela panyuma ya kwibabwezha mu Ntanda ya Mulaye. Bino byambo byaambijile jimo kukwatankanya bantu ba Lesa kwatendekele mu ano moba a kupelako.”

9. Kufika kwa bungauzhi bwa kwa Ezikyo kumweka byepi pa Kivuluko?

⁹ Kufumatu mu mwaka wa 1919, Yehoba watendekele kukonkanya ne kukwatankanya bashingwa, bajinga nobe kakichi “ka kwa Yuda.” Kabiji bantu baji nobe kakichi “ka kwa Yosefwa,” ko kuba’mba aba baji na luketekelo lwa kwikala mu paladisa pano pa ntanda byo batendekele kuvula, bakwatankene pamo na bashingwa ne kwikala “jitanga jimo.” (Yoa. 10:16; Zeka. 8:23) Yehoba walayile kulamankanya tuno tubichi tubiji kuba’mba tukekale kakichi kamo mu kuboko kwanji. (Ezi. 37:19) Luno, ano mabumba abiji akwatankana kabiji atangijilwa na Mfumu umo, aye Yesu Kilishitu, Lesa ye atela mu bungauzhi bwa kwa Ezikyo amba “Kalume wami Davida.” (Ezi. 37:24, 25) Lukwatankano lwaambiwapo mu bungauzhi bwa kwa Ezikyo lumweka pa mwaka pa mwaka kimye bashingwa bashalapo lelo jino ne ba mu “mikooko ikwabo” kyo bapwila pamo pa Kivuluko kya lufu lwa kwa Kilishitu. Nga atweba pa muntu pa muntu twakonsha kutundaika byepi luno lukwatankano?

10. Twakonsha kutundaika byepi lukwatankano lwa bantu ba Lesa?

¹⁰ Jishinda jimo mo twakonsha kutundaikila lukwatankano lwa bantu ba Lesa ke kwipelula. Yesu byo ajinga pano pa ntanda, wakambizhe baana banji ba bwanga kwipelula. (Mat. 23:12) Inge twipelula, tukakana mupashi wa pano pa ntanda wa kwitumbijika. Kwipelula kuketukwasha kunekenena boba babena kutangijila, kabiji muchima wa lukookelo ulengela kipwilo kukwatankana. Kyakila pa byonse, kwipelula kwetu kusangajika Lesa, mambo aye “ukana bantu belundumika, pakuba ubila lusa lwanji lukatampe bantu bepelula.”—1 Pe. 5:5.

11. Kulanguluka pa buneme bwa shinkwa ne binyu bya pa Kivuluko kwitukwasha byepi kukwatankana?

 ¹¹ Jishinda ja bubiji mo twakosha kutundaikila lukwatankano ke kulanguluka pa buneme bwa shinkwa ne binyu byo twingijisha pa Kivuluko. Twafwainwa kulanguluka pa bino bintu mu moba a kunangijila ku Kivuluko, kikatakata mabanga pa kimye kya Kivuluko. (1 Ko. 11:23-25) Shinkwa wimenako mubiji wa kwa Yesu wabujile bundengamambo, kabiji binyu bimenako mashi anji aichikile. Pano bino, kechi twafwainwa kupelelatu pa kuyuka bino bintu byo bimenako ne. Vulukai’mba kitapisho kya bukuzhi bwa Kilishitu kimwesha butemwe bukatampe bwa Yehoba pa kupana Mwananji kwitufwila, ne butemwe bwa Yesu pa kwipana aye mwine kwitufwila. Kulanguluka pa butemwe bo betumwesheshe kuketulengela ne atweba kwibatemwa. Kabiji na mambo a kuba’mba atweba ne bapopweshi bakwetu twatemwa Yehoba, buno butemwe buji nobe lutambo witukasa pamo ne kukosesha lukwatankano pakachi ketu.

12. Mu kishimpi kyanji kya bazha bajinga na nkongole ku Mfumu, Yesu wamwesheshe byepi amba Yehoba ukeba’mba twilekelengako mambo?

¹² Jishinda ja busatu mo twakosha kutundaikila lukwatankano ke kulekelako bakwetu mambo. Inge twalekelako bakwetu mambo, tumwesha kuba’mba tusanchila Lesa pa kwitulekelako mambo etu kupichila mu kitapisho kya bukuzhi kya kwa Kilishitu. Akilangulukai pa kishimpi kyaelele Yesu kyanembwa pa Mateo 18:23-34. Ishikishai’mba: ‘Nanchi ndondela byafunjishe Yesu mu kino kishimpi nyi? Nanchi ntekenya balongo ne kwibalangulukilako nyi? Nanchi ndekelako mambo boba bamfichisha ku muchima nyi?’ Kya kine, mambo apusana pusana, kabiji bimye bimo kikatazha bingi bantu bambulwa kulumbuluka kwilekelako mambo. Pano bino, kino kishimpi kitufunjisha Yehoba byo akeba’mba tubenga. (Tangai Mateo 18:35.) Yesu wafunjishe’mba Yehoba kechi uketulekelako mambo inge twakana kulekelako bakwetu mambo saka balapila kya kine ne. Twafwainwa kulangulukishapo pa kino kishinka. Inge ketulekeleko bakwetu mambo byonka bitufunjishe Yesu, tukatundaika lukwatankano.

13. Kwibikako kulama mutende na balongo kutundaika byepi lukwatankano?

¹³ Inge twalekelako bakwetu mambo, tumwesha’mba tukeba kwikala mu mutende. Vulukai  byaambile mutumwa Paulo, amba twafwainwa “kwibikishako kulama buumo bwa mupashi mu mutende ulengela kukwatankana.” (Efi. 4:3) Mu moba a Kivuluko kya uno mwaka, kikatakata pa juba jine ja Kivuluko, twafwainwa kulangulukapo bingi pa byo tuba ku balongo ne banyenga. Ishikishai’mba: ‘Nanchi mmwesha patoka ku balongo amba kechi ndama bintu ku muchima nenyi? Nanchi nayukanyikwa kuba’mba nebikako kutundaika mutende ne lukwatankano nyi?’ Ano ke mepuzho anema kulangulukapo kimye kya Kivuluko.

14. Twakonsha kumwesha byepi amba tubena ‘kwitekenya atwe bene na bene mu butemwe’?

¹⁴ Jishinda ja buna mo tutundaikila lukwatankano ke kumwesha butemwe byonkatu bitutemwa Yehoba Lesa wetu wa butemwe. (1 Yoa. 4:8) Kechi twafwainwa kwamba pa bapopweshi bakwetu amba: “Nebatemwatu na mambo a kuba’mba nabo ke balongo, kechi kuba’mba tumvwañana bingi ne.” Inge ketulanguluke bino, ko kuba’mba kechi tubena kulondela lujimuno lwa kwa Paulo, lwa kuba’mba “saka mwitekenya anwe bene na bene mu butemwe” ne. (Efi. 4:2) Paulo kechi waambiletu’mba “saka mwitekenya anwe bene na bene” kwapwa ne. Waambile’mba twafwainwa kwitekenya “mu butemwe.” Paji lupusano. Mu bipwilo mo tuji muji bantu bapusana pusana Yehoba bo akokela mu jibumba janji. (Yoa. 6:44) Pa kuba’mba Yehoba ebakoke, ko kuba’mba wibatemwa bingi. Pano atweba twakonsha kwamba byepi amba kechi twibatemwa ne? Twafwainwa kwibikako kwibatemwa, byonkatu Yehoba byo etukambizha kuba.—1 Yoa. 4:20, 21.

15. Twayuka byepi amba kukekala Kivuluko kikapelako?

¹⁵ Juba jimo, kukekala Kivuluko kikapelako. Twayuka byepi? Mu nkalata yanji itanshi ku bena Kolinda yo anembele na lutangijilo lwa mupashi wazhila, Paulo wanembejile bena Kilishitu bashingwa amba kupichila mu kuvuluka lufu lwa Yesu pa mwaka pa mwaka, ‘basapwila lufu lwa Nkambo poso akafike.’ (1 Ko. 11:26) Kyambo kya kuba’mba “akafike” kilumbulula kimye Yesu kyo aambile’mba ‘ukeya’ mu kimye kya mpelo. Byo aambile pa malwa akatampe ajitu pepi, waambile’mba: “Kiyukilo kya Mwana muntu kikamweka mwiulu, ne mikoka yonse ya bantu ikala pano pa ntanda ikatama miteto, kabiji ikamona Mwana muntu saka eya mu makumbi a mwiulu na bulume ne na lukumo lukatampe. Kabiji [Yesu] ukatuma bamalaika banji na kuvuma kukatampe kwa ntolompita, ne abo bakakonkanya pamo basalwa banji kufuma ku luvula luna lwa ntanda ne konse kwapela jiulu.” (Mat. 24:29-31) Kuno ‘kukakonkanya pamo basalwa’ kukobiwa kimye bena Kilishitu bashingwa bakiji pano pa ntanda kyo bakatambula mfweto yabo ya mwiulu. Kino kikobiwa mu kimye kya malwa akatampe, bino nkondo ya Amagedonyi saka ikyangye kutendeka. Kepo bonse 144,000 bakengijila pamo ne Yesu kushinda bamfumu ba pano pa ntanda. (Lum. 17:12-14) Kivuluko kikekalako Yesu saka akyangye ‘kwiya’ na kukonkanya bashingwa mwiulu kyo kikapelako.

16. Mambo ka o mwafuukwilapo kutaanwa ku Kivuluko kya uno mwaka?

¹⁶ Twayai twinengezhe kutanwa ku Kivuluko pa 31 March, 2018, pa kuba’mba tukamwenemo. Kabiji twayai tulombenga Yehoba kwitukwasha kukwatankana pamo. (Tangai Salamo 133:1.) Vulukainga kuba’mba, juba jimo kukekala Kivuluko kikapelako. Byo tubena kupembelela jino juba, twayai twibikengako kutanwa ku Kivuluko pa mwaka pa mwaka ne kwiyowa lukwatankano lwikalako.