1, 2. Ñanyi lukatazho lupitamo bantu ba Lesa lelo jino? (Monai bipikichala bitanshi.)

BAMANASE ne badokotala bavula bebikako kukwasha bantu baji na bikola bisambukilañana. Bakwasha bano bantu na mambo a kwibata muchima. Pano bino, ne abo bene bafwainwa kwizhikijila pa kuba’mba babule kusambula byobyo bikola byo babena kubuka. Kyo kimotu, atweba bavula twikala ne kwingijila pamo na bantu babula kutemwa Lesa baji na byubilo byatama. Luno ke lukatazho lo twafwainwa kwizhikijilako.

² Bantu mu ano moba a kupelako baji na byubilo byatama. Mu nkalata yanji ya bubiji yo anembejile Timoti, mutumwa Paulo walumbulwile byubilo bya bantu babula kwingijila Lesa, kabiji waambile’mba bino byubilo bikavula bingi mu moba a kupelako. (Tangai 2 Timoti 3:1-5, 13.) Nangwa kya kuba bino byubilo twibishikwa bingi, bino twakonsha kutendeka kulondela bantu baji na bino byubilo. (Maana 13:20) Mu uno mutwe, tusakwisamba pa lupusano luji pa byubilo bya bantu mu ano moba a kupelako ne byubilo bya bantu ba Lesa. Tusakwisamba ne pa byo twakonsha kwizhikijila pa kuba’mba tubule kwikala na byubilo byonka byo tubena kukwasha bantu kuleka.

3. Ñanyi bantu Paulo bo aambile’mba bakekala na byubilo byo atongola pa 2 Timoti 3:2-5?

 ³ Mutumwa Paulo wanembele’mba: “Mu moba a kupelako kukeya bimye byakatazha.” Kepo atongwele byubilo 19 byatama biji na bantu mu ano moba. Bino byubilo bipasha na byo atongwele pa Loma 1:29-31, nangwa kya kuba mu nkalata yanji kwi Timoti mwatongolwa byubilo byabula mu mabuku akwabo a mu Binembelo bya Kingiliki bya Bwina Kilishitu. Pa kulumbulula bino byubilo byatama, Paulo watendekejilepo kwamba’mba: “Mambo bantu bakekala . . . ” Pano bino, kechi bantu bonsetu baji na bino byubilo ne. Bena Kilishitu baji na byubilo byawama.—Tangai Malakai 3:18.

4. Mwakonsha kulumbulula byepi bantu betota?

⁴ Patanshi, Paulo waambile’mba bantu baketemwatu abo bene ne kutemwa mali. Kepo aambile’mba bantu bakekala bejantula, belundumika, kabiji betota. Bino ke byubilo bya bantu bamona’mba banema kukila bakwabo na mambo kuba’mba balamba, baji na mali, nangwa baji na kifulo kikatampe. Bantu baji na bino byubilo bakebesha bingi kwibatakaika ku bakwabo. Nembi umo wanembele bino pa muntu witota, amba: “Mu muchima wanji, wifukamina ne kwipopwela aye mwine.” Bamo bamba’mba kwitota kwatama bingi kya kuba ne bantu betota bashikwa mukwabo witota.

5. Bakalume ba Yehoba ba kishinka bamo baikele byepi na bwitote?

⁵ Yehoba washikwa bingi bwitote. Washikwa “meso a bwitote.” (Maana 6:16, 17) Lesa kechi ubila lusa muntu witota ne. (Sala. 10:4) Ke kyubilo kya kwa Diabola. (1 Timo. 3:6) Kyatamakotu ke kya kuba’mba bakalume ba Yehoba bamo baikele na bwitote. Uzaya mfumu wa Yuda wajinga wa kishinka pa myaka yavula. Baibolo waamba’mba: “Nangwa byonkabyo, byo aikele na bulume, wilundumikile bingi ne kwiletela mwine lonaiko, kabiji walekele kwikala wa kishinka kwi Yehoba Lesa wanji, mambo watwelele mu nzubo ya Yehoba na kusoka bya kufutumuna pa kya kusokelapo bya kufutumuna.” Mfumu Hezekiya naye wilundumikile pa kakimye kacheche, bino wipelwile jibiji.—2 Moba 26:16; 32:25, 26.

6. Ñanyi bintu Davida byo ajinga nabyo byakonsheshe kumulengela kwitota, bino mambo ka o atwajijile kwipelula?

⁶ Bantu bamo betota na mambo a kulamba, kuya nkuwa, bunyimbi, bulume bwabo bwa kwingila, nangwa kifulo kikatampe kyo bajipo. Davida wajinga na bino bintu byonse, pano bino watwajijile kwipelula kufikatu ne byo afwile. Byo aipayile Goliata, Mfumu Saulo wamupele mwananji wamukazhi amba amusongole, bino Davida waambile’mba: “Yami ñanyi, kabiji balongo bami, ba mu kisemi kya batata bo bañanyi mu Isalela, kya kuba’mba ngikale muko wa mfumu?” (1 Sam. 18:18) Ki ka kyakwashishe Davida kwikala wipelula? Davida waambile’mba kyamulengejile kwikala na byubilo byawama ne bintu byonse byo ajinga nabyo ke na mambo a kuba’mba Lesa ‘wakunamine,’ nangwa’mba wipelwile, ne kumukwasha. (Sala. 113:5-8) Wayukile’mba kafwako kintu kyawama kyo ajinga nakyo kyo abujile kutambula kwi Yehoba ne.—Esakanyaiko 1 Kolinda 4:7.

7. Ñanyi kintu kiketukwasha kwikala bepelula?

⁷ Bantu ba Yehoba lelo jino bebikako kwikala bepelula, byonka byajinga Davida. Kitufika bingi pa muchima kuyuka kuba’mba Yehoba wipelula, nangwa kya kuba ye Mwine Wakila. (Sala. 18:35) Tumvwina lujimuno lwa kuba’mba: “Vwalai muchima wa kifyele, wa lusa, wa kwipelula, wakooka ne wa butekanye.”  (Kolo. 3:12) Kabiji twayuka’mba butemwe “kechi bwitota ne, kechi bwilundumika ne.” (1 Ko. 13:4) Inge twipelula, bantu bavula bakonsha kwiya mu jibumba ja Yehoba. Byonkatu banabalume babula kukookela mambo a Lesa byo bakonsha kwiakookela kwa kubula byambo kupichila mu byubilo bya bakazhi babo, ne bantu bakonsha kwiya kwi Lesa inge bantu banji baikala bepelula.—1 Pe. 3:1.

8. (a) Bantu bamo bamona byepi kubula kukookela bansemi lelo jino? (b) Binembelo byakambizha baana kuba byepi?

⁸ Paulo walumbulwile bantu ba mu moba a kupelako byo bakekalanga na bakwabo. Wanembele’mba mu moba a kupelako, baana kechi bakakookelanga bansemi ne. Nangwa kya kuba kino kyubilo bantu bamo bekimona’mba kijitu bulongo kabiji bekitundaika mu mabuku, mu mafilimu, ne pa TV lelo jino, bino kubula lukookelo kulengela kisemi kubula kukwatankana. Kufumatu ne kala, bantu bayuka kino kishinka. Mu mizhilo ya Bangiliki ba kala, inge muntu wapuma bansemi banji, kechi bamuswishanga kupwanañana na bakwabo ne; mu mizhilo ya bena Loma, kupuma bansemi kwajingatu pamo na kwipayañana. Binembelo bya Kihebelu ne Binembelo bya Kingiliki bya Bwina Kilishitu bikambizha baana kunemeka bansemi.—Lupu. 20:12; Efi. 6:1-3.

9. Ñanyi kintu kyakonsha kukwasha baana kukookela bansemi babo?

⁹ Baana bakonsha kuchinuzhuka mupashi wa kubula lukookelo inge kebalanguluke pa bintu byawama bibobila bansemi babo. Kintu kyakonsha kutundaika baana kukookela bansemi ke kuyuka kuba’mba kyo kikeba Lesa, Nsemi wetu atweba bonse. Inge baana ke banemeke bansemi babo, bakonsha kukwasha banyike bakwabo kunemeka bansemi. Pano bino, inge bansemi kechi batemwa baana babo ne, kyakonsha kukatazha baana kwibakookela na muchima yense. Inge kya kuba baana bamona’mba bansemi babo bebatemwa kya kine, bebikako kwibatokesha ku muchima nangwatu inge bintu byakatazha. Austin waambile’mba: “Nangwa kya kuba javula nakebanga kuba byatama, bansemi bami babikileko mizhilo yawama, kabiji bandumbulwijile ene mambo o babikijileko mizhilo kabiji bakasulukile kwisamba ne amiwa. Kino kyankwashishe kwikala na lukookelo. Byo namwene kuba’mba bansemi banta bingi muchima, ne amiwa nebikileko bingi kwibatokesha ku muchima.”

10, 11. (a) Ñanyi byubilo byatama bimwesha’mba bantu kechi betemwa bene na bene ne? (b) Butemwe bwa bena Kilishitu ba kine bwibalengela kuba byepi?

¹⁰ Paulo wanembele byubilo byatama biji na bantu bimwesha’mba kechi betemwa bene na bene ne. ‘Kubula kukookela bansemi’ ko kulengela kubula kusanta, mambo bantu babula lukookelo kechi basanta pa kifyele kyo bebamwesha ku bakwabo ne. Kabiji Paulo waambile’mba bantu bakekala babula bukishinka, babula kukeba kumvwañana, ko kuba’mba babula kukeba kupwana na bakwabo. Bakekala ba mwenga, kabiji basolola bakwabo, bamba byatama pa bantu bakwabo ne pe Lesa. Kabiji bakekala ba luntepentepe, bantu batamisha mazhina a bakwabo. *

¹¹ Kupusanako na bantu babula kumwesha butemwe lelo jino, bapopweshi ba Yehoba bamwesha butemwe bwa kine. Kufumatu ne kala bantu ba Lesa bamwesha butemwe. Yesu waambile’mba mukambizho wa kutemwa mukwenu, ko kuba’mba butemwe bwa a·gaʹpe, ye mukambizho wa bubiji mu Mizhilo ya Mosesa,  mutanshi ke wa kutemwa Lesa. (Mat. 22:38, 39) Kabiji Yesu waambile’mba kutemwa bakwetu kyo kyubilo kimwesha’mba twi bena Kilishitu ba kine. (Tangai Yoano 13:34, 35.) Buno butemwe bwa bwina Kilishitu bwitulengela ne kutemwa balwanyi betu.—Mat. 5:43, 44.

12. Yesu wamwesheshe byepi amba watemwa bantu?

¹² Yesu watemenwe bingi bakwabo. Wayanga mu mizhi na kusapwila bantu mambo awama a Bufumu bwa Lesa. Wabukile bampofu, bilema, bajinga na mbumba, ne bakamaama. Wasangwile ne bafwa. (Luka 7:22) Yesu wapaine ne bumi bwanji kuba’mba bantu bonse bakapuluke, nangwa kya kuba bamushikilwe. Yesu wamwesheshe butemwe buji ne Shanji. Bakamonyi ba kwa Yehoba mwaya ntanda yonse bamwesha butemwe bujipo na Lesa.

13. Butemwe bo tumwesha bakwetu bwakonsha kwibakwasha byepi kufwenya kwipi ne Yehoba?

¹³ Butemwe bo tumwesha bo bulengela bantu kwiya kwi Shetu wa mwiulu. Mwanamulume umo mu kyalo kya Thailand waumvwine bingi bulongo pa kumona balongo byo bemwesheshe butemwe pa kushonkena kwa kijiiji. Byo abwelele ku nzubo, walombele kuba’mba bamufunjishenga Baibolo jibiji mu mulungu. Wasapwijile ku balongo banji bonse, kabiji byo papichiletu bañondo batanu na umo kufuma kimye kyo ataainwe ku kushonkena, waambile jashi jitanshi ja kutanga Baibolo mu Nzubo ya Bufumu. Pa kuba’mba tuyuke inge kya kuba tubena kumwesha bakwetu butemwe, twakonsha kwishikisha’mba: ‘Nanchi nepana kukwasha bakwetu mu kisemi, mu kipwilo, ne mu mwingilo nyi? Abya nebikako kumona bakwetu byonka Yehoba byo ebamona nyi?’

14, 15. Ñanyi byubilo bya bunyama bimwesha bantu bavula, bino bamo bapimpula byepi byubilo byabo?

¹⁴ Byubilo bikwabo biji na bantu mu ano moba a kupelako bilengela bena Kilishitu kuyuka kuba’mba kechi bafwainwa kupwanañananga na bantu ba uno mutundu ne. Baibolo waamba’mba bantu babula kwakamwa Lesa kechi batemwa kyawama ne. Mu Mabaibolo akwabo bino byambo byatuntululwa’mba,  “bashikwa kyawama” nangwa’mba “kechi bakeba bintu byawama ne.” Kabiji Baibolo waamba’mba bantu bakekala babula kwikanya, bashinta, kabiji babula kumvwa.

¹⁵ Bantu bavula bajinga na bino byubilo bya bunyama bapimpula byubilo byabo. Luno lupimpu lwaambijilwe jimo mu bungauzhi bwa mu Baibolo. (Tangai Isaya 11:6, 7.) Abino byepelo byaamba pa banyama ba mungye nabiji misuka ne mabokwe, kuba’mba bakekalanga mu mutende na banyama ba kulela nabiji mikooko ne baana ba ñombe. Uno mutende ukekalako “mambo pano pa ntanda pakakumbana maana a kuyuka Yehoba.” (Isa. 11:9) Na mambo a kuba’mba banyama kechi bakonsha kufunda pe Yehoba ne, buno bungauzhi bubena kwamba pa bantu.

16. Baibolo ukwasha byepi bantu kupimpula byubilo byabo?

¹⁶ Bavula bashinchile nobe misuka kala, luno bapimpula byubilo byabo ne kwikala mu mutende na bakwabo. Mwakonsha kutanga mashimikila a bamo mu bibaaba bya kuba’mba “Baibolo Upimpula Bwikalo bwa Bantu,” bitaanwa pa jw.org. Aba bafunda pe Yehoba ne kumwingijila bapusanako bingi na bantu bamweka nobe baji na munema wa kunemeka Lesa, bino bakana bulume bwa uno munema, bantu bamba’mba bapopwela Lesa, bino saka baji na byubilo byatama. Bantu bajinga bashinta kala bapimpula byubilo ne “kuvwala bumuntu bupya bwalengelwe monka mwayila kyaswa muchima wa Lesa mu bololoke ne mu bukishinka bwa kine.” (Efi. 4:23, 24) Bantu inge bafunda pe Lesa, bamona kuba’mba bafwainwa kukookelanga mizhilo yanji. Kino kibalengela kupimpula bintu byo baitabilamo, miteeto, ne byubilo. Kechi kyapeela kupimpula bino bintu ne, bino mupashi wa Lesa ukwasha boba bakebesha kuba kyaswa muchima wa Lesa.

17. Twakonsha kuchinuzhuka byepi kwikala na byubilo biji na bantu babula kwakamwa Lesa?

¹⁷ Lupusano luji pakachi ka bantu bengijila Lesa ne boba babula kumwingijila lubena kumwekeshatu patoka. Atweba twingijila Lesa twafwainwa kujimuka pa kuba’mba tuchinuzhuke byubilo bya bantu babula koloka. Tukookela lujimuno lwa Lesa lwa kuvundamina bantu baji na byubilo byatongolwa pa 2 Timoti 3:2-5. Ibyo kuba’mba kechi twakonsha kuchinuzhuka kwisamba na bano bantu mu bintu byonsetu ne. Kampe bamo twingila nabo nkito, tufunda nabo sukulu, nangwa kampe twikala nabo. Bino twakonsha kuchinuzhuka kulanguluka byonka byo balanguluka ne kulondela byubilo byabo. Tuba bino inge ketukoseshe bulunda bwetu na Lesa kupichila mu kutanga Baibolo ne kupwanañana na bantu bengijila Yehoba.

18. Byubilo ne ñambilo yetu byakonsha kukwasha byepi bantu kwikala balunda na Lesa?

¹⁸ Kabiji twafwainwa kwingila na ngovu kukwasha bantu kwikala balunda na Lesa. Mwafwainwa kumonangapo bimye bya kusapwila, ne kulomba Yehoba kwimukwasha kwamba byambo byawama. Bantu bafwainwa kuyuka’mba twi Bakamonyi ba kwa Yehoba. Inge ketube bino, byubilo byetu byawama bikatumbijika Lesa kechi kwitumbijika atweba bene ne. Betufunjisha “kukana byubilo bya bumbulwa kwakamwa Lesa ne bya kusakasaka bya pano pa ntanda kabiji [betufunjisha] kulanguluka bulongo, ne kwikala baoloka ne kumwesha munema wa kunemeka Lesa mu buno bwikalo.” (Titu. 2:11-14) Inge twaikala na byubilo bitokesha Lesa ku muchima, bantu bakamona kabiji bamo bakonsha ne kwamba’mba: “Tubena kukeba kuya nenu, mambo twaumvwa’mba Lesa uji ne anweba.”—Zeka. 8:23.