1-2. (a) Ñanyi bintu Yehoba byo amona inge bantu bavula bakonkana ku Kijiilo kya Nkambo kya Mabanga? (Monai kipikichala kya pa nkupiko.) (b) Ñanyi bintu byo tusakwisambapo mu uno mutwe?

FWANYIKIZHAI bintu bimona Yehoba inge bantu bavula mwaya ntanda bakonkana ku Kijiilo kya Nkambo kya Mabanga. Kechi umonatu jibumba ja bantu ne, bino witumona atweba bonse pa muntu pa muntu. Umona ne boba batanwako pa mwaka pa mwaka. Pa bano bantu pakonsha kwikala boba batanwako nangwa kya kuba babena kwibamanyika. Bakwabo kechi beya na kupwila kimye kyonse ne, bino bamona kuba’mba kutanwa ku Kivuluko ke kintu kyanema bingi. Kabiji Yehoba umona ne boba beya na kutanwako kimye kitanshi ku Kivuluko, kampe na mambo a kuba’mba bakeba kuyuka byo tupwila.

² Yehoba umvwa bingi bulongo pa kumona bantu bavula batanwako ku Kivuluko. (Luka 22:19) Pano bino, Yehoba kechi uta muchima pa kuvula kwa bantu batanwako ku Kivuluko ne. Aye uta bingi muchima pa kintu kibalengela kutanwako. Mu uno mutwe, tusakwisamba pa bwipuzho bwanema bwa kuba’mba: Mambo ka o twafwainwa kutainwanga ku kupwila konse Yehoba ko anengezhezha bantu bamutemwa kechi kutanwatu ku Kivuluko konka ne?

3-4. (a) Ñanyi kintu kitulengela kupwila kimye kyonse? (b) Kutanwa ku kupwila kumweshapo ka pe atweba? (c) Kwesakana na byaamba 1 Kolinda 11:23-26, mambo ka o twafwainwa kubujila kushala ku Kivuluko?

³ Tutanwa ku kupwila mambo ke lubaji lwa mpopwelo yetu. Kabiji tutanwa ku kupwila mambo Yehoba ko ko etufunjishisha.  Bantu betota kechi bakeba kwibafunjisha ne. (3 Yoa. 9) Bino atweba tukebesha kwitufunjisha kwi Yehoba ne jibumba jo abena kwingijisha.—Isa. 30:20; Yoa. 6:45.

⁴ Kutanwa ku kupwila kumwesha’mba twi bantu bepelula bakeba kwibafunjisha. Tutanwa ku Kivuluko kya lufu lwa kwa Yesu mambo a kuba’mba twipelula ne kukookela mukambizho wa kwa Yesu wa kuba’mba: “Saka muba kino mu kumvuluka.” Kechi tutanwako na mambotu a kuba’mba betutundaika kutanwako ne. (Tangai 1 Kolinda 11:23-26.) Kivuluko kikosesha luketekelo lwetu lwa bwikalo bwa kulutwe kabiji kituvululamo butemwe bwitutemwa Yehoba. Pano bino, Yehoba wayuka’mba kechi tukebewa kwitutundaikatu jimo pa mwaka ne. Onkao mambo, witunengezhezha kupwila konse kabiji witutundaika kutanwangako milungu yonse. Kwipelula kwitulengela kukookela uno mukambizho. Twikala na kimye kya kunengezha kupwila konse ne kutanwako.

5. Mambo ka bantu bepelula o baswila lwito lwa Yehoba?

⁵ Pa mwaka pa mwaka, bantu bavula bepelula baswa lwito lwa Yehoba ne kwiya amba ebafunjishe. (Isa. 50:4) Beyowa bingi Kivuluko kabiji batendeka kutanwa ku kupwila konse. (Zeka. 8:20-23) Atweba bonse, babanda mu bukine ne bakatataka tumvwa bingi bulongo kwitufunjisha ne kwitutangijila kwi Yehoba “nkwasho [wetu] kabiji mupokolweshi [wetu].” (Sala. 40:17) Kafwako kintu kikwabo kyanema kukila kuswa lwito lwa kuba’mba betufunjishe kwi Yehoba ne Mwananji ye atemwa aye Yesu ne!—Mat. 17:5; 18:20; 28:20.

6. Kwipelula kwakwashishe byepi muntu umo kutanwa ku Kivuluko?

⁶ Pa mwaka pa mwaka, twingila na ngovu kwita bantu bavula kwiya na kutanwa ku Kivuluko kya lufu lwa kwa Yesu. Bantu bavula bepelula bamwenamo bingi inge baswa lwito. Monai byaubile umo. Myaka ya kunyuma kwe, mwanamulume uno bamupele kapepala ka lwito kuba’mba akatanwe ku Kivuluko, bino wabuujile mulongo wamupele kano kapepala kuba’mba kechi ukatanwako ne. Pano bino, pa juba ja Kivuluko, mulongo wakuminye bingi byo amwene uno mwanamulume watwela mu Nzubo ya Bufumu. Uno mwanamulume waumvwine bingi bulongo byo bamutambwijile kabiji kino kyamulengejile kutendeka kupwila kimye kyonse. Mwaka walondejilepo washajilepotu jisatu ku kupwila. Ki ka kyamulengejile kutendeka kupwila? Kwipelula ko kwamulengejile kupimpula milanguluko yanji. Mulongo waichile uno muntu waambile’mba: “Uno mwanamulume wipelula bingi.” Kwa kubula nangwa kuzhinaukatu ne, Yehoba ye waletele uno muntu mu bupopweshi bwanji kabiji luno ke mulongo wabatizhiwa.—2 Sam. 22:28; Yoa. 6:44.

7. Byo tufunda pa kupwila ne byo tutanga mu Baibolo byakonsha kwitukwasha byepi kwikala bepelula?

⁷ Bintu byo tufunda pa kupwila ne byo tutanga mu Baibolo byakonsha kwitukwasha kwikala bantu bepelula. Mu milungu ya kunangijila ku Kivuluko, kupwila kwetu javula kwamba bingi pe Yesu ne kwipelula ko amwesheshe pa kupana bumi bwanji kwikala bukuzhi. Kabiji inge kwashalatu moba acheche kuba’mba twikale na Kivuluko, betutundaika kutanga mashimikila a mu Baibolo aamba pa bintu byamwekele kimye kya lufu lwa kwa Yesu ne lusanguko. Bintu byo tufunda pa kupwila ne byo tutanga mu mashimikila a mu Baibolo bibayisha lusanchilo lwetu pa kitapisho kyapaine Yesu. Kwitutundaika kwikala bepelula byonka byo aji ne kuba kyaswa muchima wa Yehoba nangwatu mu bimye byakatazha.—Luka 22:41, 42.

8. Yesu wamwesheshe byepi kubula moyo?

⁸ Kabiji twibikako kwikala babula moyo byonka biji Yesu. Akilangulukai byo amwesheshe kubula moyo byo kwashajiletu moba acheche kufwa. Wayukile’mba kwashajiletu pacheche balwanyi banji kutendeka kumwendeleka, kumututaula ne kumwipaya. (Mat. 20:17-19) Nangwa byonkabyo, wipaine kufwa. Kimye byo kyafikile, waambijile batumwa banji ba kishinka bo ajinga nabo mu Ngesemani amba: “Imanai, twayai tuyenga. Talai! Wa kunsolola ujitu pepi.” (Mat. 26:36, 46) Kabiji jibumba ja bantu basendele bilwilo byo baishile na kumukwata, wayile kwi abo ne kwisolola aye mwine, kabiji wakambizhe bashilikale amba baleke batumwa banji bayenga. (Yoa. 18:3-8) Kine, Yesu wamwesheshe’mba kechi wajinga na moyo ne. Lelo jino, bena Kilishitu bashingwa ne mikooko ikwabo bebikako kwikala babula moyo byonka biji Yesu. Mu ñanyi jishinda?

9. (a) Mambo ka o kikebewa kubula moyo pa kuba’mba tupwilenga kimye kyonse? (b) Kuchinchika kwetu kwakonsha kukwasha byepi balongo bo bakasa na mambo a lwitabilo lwabo?

⁹ Twafwainwa kwikala babula moyo pa kuba’mba tupwilenga kimye kyonse mu bimye bya makatazho. Balongo ne banyenga bamo batwajijila kupwila nangwa kya kuba babena kupita mu makatazho nabiji kufwisha, kulefulwa, nangwa kukolwa. Bakwabo batanwa ku kupwila nangwa kya kuba bebakanya ku balongo babo nangwa bantangi ba mu kafulumende. Akitulumainako pacheche ne kulanguluka pa kuchinchika kwetu byo kutundaika balongo bo bakasa na mambo a lwitabilo lwabo. (Hebe. 13:3) Inge baumvwa’mba twatwajijila kwingijila Yehoba nangwa kya kuba tubena kupita mu meseko, kibatundaika kutwajijila kwikala na lwitabilo lwakosa, kubula moyo ne kwikala ba kishinka. Byo byo kyajinga ne kwi mutumwa Paulo. Kimye kyo ajinga mu kaleya mu Loma, waumvwine bingi bulongo byo aumvwine’mba balongo batwajijila na kwingijila Lesa mu bukishinka. (Fili. 1:3-5, 12-14) Byo kwashajiletu pacheche kuba’mba bamukasulule nangwa byo bamukasulwiletu, Paulo wanembejile bena Kilishitu Bahebelu nkalata. Mu ino nkalata watundaikile bena Kilishitu ba kishinka kubula kuleka kupwila pamo ne kuba’mba “butemwe [bwabo] bwa kutemwa balongo butwajijile.”—Hebe. 10:24, 25; 13:1.

10-11. (a) Bañanyi bo twafwainwa kwitako ku Kivuluko? (b) Ñanyi kishinka kiji pa Efisesa 1:7 kitulengela kuba bino?

¹⁰ Tumwesha’mba kechi tuji na moyo ne, inge twaitako balongo betu, bantu bo twingila nabo nkito, ne bo twikala nabo kipikipi kwiya na kutaanwa ku Kivuluko. Mambo ka o twibechila? Tuji na lusanchilo lukatampe pa kintu kitubijile Yehoba ne Yesu kya kuba tukebesha kwitako bantu kuba’mba bakatanweko ku Kivuluko. Tukeba’mba nabo bafunde byo bakonsha kumwenamo mu ‘lusa lukatampe’ lwa Yehoba kupichila mu bukuzhi.—Tangai Efisesa 1:7; Lum. 22:17.

 ¹¹ Inge twamwesha kubula moyo kupichila mu kupwila pamo, tumwesha ne kyubilo kikwabo kyawama, Lesa ne Mwananji kyo bamwesha mu mashinda avula bingi.

12. (a) Kupwila kwitulengela byepi kukosesha butemwe bo twatemwa Yehoba ne Yesu? (b) Kinembelo kya 2 Kolinda 5:14, 15 kitutundaika byepi bya kuba pa kulondela Yesu?

¹² Kutemwa Yehoba ne Yesu kwitutundaika kupwila kimye kyonse. Kabiji byo tufunda pa kupwila bikosesha butemwe bo twatemwa Yehoba ne Mwananji. Pa kupwila, betuvululamo bintu bitubila Lesa ne Mwananji. (Loma 5:8) Kabiji Kivuluko kituvululamo butemwe bukatampe bwa Lesa ne Yesu, bo batemwa bantu bonse kubikapotu ne boba babula kuyuka buneme bwa bukuzhi. Na mambo kusanta pa byo betubila, twibikako kulondela Yesu mu byo tuba pa juba pa juba. (Tangai 2 Kolinda 5:14, 15.) Kabiji muchima wetu witutundaika kutota Yehoba pa kwitupa bukuzhi. Jishinda jimo ja kumutotelamo ke kukumbulapo pa kupwila kufuma panshi ya muchima.

13. Twakonsha kumwesha byepi byo twatemwa Yehoba ne Mwananji? Lumbululai.

¹³ Twakonsha kumwesha byo twatemwa bingi Yehoba ne Mwananji kupichila mu kwipana kuba byonse byo bakeba. Javula kikebewa kusankilapo bintu bimo pa kuba’mba tutanwenga ku kupwila. Bipwilo byavula bikala na kupwila mukachi ka mulungu mabanga bavula po bafuma ku makito saka bakooka. Kabiji kupwila kukwabo kwikalako ku mpelo ya mulungu bantu bavula po bakookoloka. Nanchi Yehoba umona byo twibikako kutanwa ku kupwila nangwa kya kuba twakooka nyi? Ee, umona. Inge ke twibikeko kutanwa ku kupwila, Yehoba usanta bingi pa kino mambo kimwesha byo twamutemwa.—Mako 12:41-44.

14. Twakonsha kufunjilako ka ku muchima wa kwipana wamwesheshe Yesu?

¹⁴ Atweba bonse twafwainwa kwikala na muchima wa kwipana ujipo ne Yesu. Wipaine kufwila baana banji ba bwanga kabiji wibakwashanga pa juba pa juba kechi witeletu muchima aye mwine ne. Watanwanga na baana banji ba bwanga nangwatu inge wakooka nangwa inge uji na bijikila. (Luka 22:39-46) Kabiji watele muchima pa kukwasha bakwabo  kechi aye kukeba bukwasho ku bantu ne. (Mat. 20:28) Umvwe butemwe bo twatemwa Yehoba ne balongo bwabaya, tukebikako kutanwa ku Kijiilo kya Nkambo kya Mabanga ne ku kupwila konse.

15. Bañanyi kikatakata bo tukebesha kukwasha?

¹⁵ Tuji mu kisemi kya bena Kilishitu ba kine, kabiji twingila na mukoyo kwita bantu bakwabo kwiya mu kino kisemi. Pano bino, twata muchima pa kukwasha “bakwetu ba mu lwitabilo” kikatakata aba baleka kusapwila ne kupwila. (Nga. 6:10) Tumwesha byo twibatemwa kupichila mu kwibatundaika kutanwa ku kupwila, kikatakata ku Kivuluko. Byonka byuba Yehoba ne Yesu, ne atweba tusangalala bingi inge muntu walekele kupwila ne kusapwila wabwela kwi Yehoba, Shetu wa butemwe kabiji Kafunga wetu.—Mat. 18:14.

16. (a) Twakonsha kwitutundaika byepi atweba bene na bene, kabiji kupwila kuketukwasha byepi? (b) Mambo ka kino kimye kya mwaka o kyawamina kuvuluka byambo bya kwa Yesu biji pa Yoano 3:16?

¹⁶ Mu milungu ibena kwiya, mukengile na ngovu kwita bantu bavula kwiya na kutanwa ku Kivuluko kikekalako pa Kitanu mabanga pa 19 April, 2019. (Monai ka kitenguluzha ka kuba’mba “ Mukebetako Nyi?”) Mu uno mwaka yense, twayai twitundaikenga kupichila mu kutanwa ku kupwila konse kwitunengezhezha Yehoba. Mpelo ya buno bwikalo byo ibena kufwenya pepi, twayai tupwilenga kimye kyonse pa kuba’mba tutwajijile kwikala bepelula, babula moyo kabiji baji na butemwe. (1 Tesa. 5:8-11) Twayai tumweshenga’mba tusanta na muchima yense pa butemwe bwitumwesha Yehoba ne Mwananji.—Tangai Yoano 3:16.