1-2. Ñanyi kya kukumya kyamwekele pa juba ja Pentekosita mu mwaka wa 33 C.E.?

JAJINGA juba ja pa Mulungu lukelo mu Yelusalema. Ajino juba jajinga juba ja Pentekosita mu mwaka wa 33 C.E. Jibumba ja baana ba bwanga 120 jakonkene mu kibamba kya peulu. (Byu. 1:13-15; 2:1) Moba a kunyuma, Yesu wibakambizhe kwikala mu Yelusalema mambo mo mo bafwainwe kutambwila bupe bwanema bingi. (Byu. 1:4, 5) Ñanyi kintu kyamwekele?

² “Ponkapotu mwiulu mwafumine kilulumo, nobe kinkunkwila kikatampe.” Kino kinkunkwila kyakumbene nzubo yonse. Kepo “njimi yamwekelenga nobe mujilo,” yaishile ne kwikala pa mitwe ya baana ba bwanga, kabiji bonse “bayujile mupashi wazhila.” (Byu. 2:2-4) Mu jino jishinda ja kukumya, Yehoba waitulwijile mupashi wanji wazhila pa jino jibumba. (Byu. 1:8) Bo bajinga batanshi kushingwa mupashi wazhila * ne kwikala na luketekelo lwa kulama pamo ne Yesu mwiulu.

3. Mambo ka aba batainweko pa Pentekosita o bashiinwe kuba’mba bashingilwe mupashi wazhila?

³ Inge mwajinga pa baana ba bwanga bakonkene mu kibamba kya peulu pa jo ja juba, inge kechi mwalubamo jino juba ne. Kintu kyamwekelenga nobe lubebe lwa mujilo kyaishile na  kwikala pa mutwe wenu kabiji mwatendeka kwamba mu njimi yapusana-pusana. (Byu. 2:5-12) Mwakonsheshe kushiinwa’mba mwashingwa mupashi wazhila. Nanchi bonse pa kushingwa mupashi wazhila paji bimweka bimwesha’mba bashingwa kabiji bashingwa mu jishinda jimotu nyi? Ine. Twayuka byepi?

4. Nanchi bonse bashingilwe mu kimye kya bena Kilishitu batanshi bebasajile pa kimye kimotu nyi? Lumbululai.

⁴ Twayai twisambe pa kimye muntu kyo akonsha kwikala mushingwa. Aja jibumba ja bena Kilishitu 120 kechi bo bonkatu bashingilwe mupashi wazhila pa Pentekosita mu 33 C.E. ne. Pa jonkaja juba, bantu bakwabo 3,000 nabo batambwile mupashi wazhila Yesu ye alayile. Bashingilwe kimye kyo babatizhiwe. (Byu. 2:37, 38, 41) Bino myaka yalondejilepo, kechi bena Kilishitu bonse bashingilwe pa jonka juba jo babatizhiwe ne. Bena Samaliya bamo bashingilwe saka papita ne moba kufuma juba jo babatizhiwe. (Byu. 8:14-17) Kabiji Koneleusa ne ba mu nzubo yanji bashingilwe saka bakyangye ne kubatizhiwa.—Byu. 10:44-48.

5. Kwesakana na byaamba 2 Kolinda 1:21, 22, ki ka kimweka inge muntu washingwa mupashi wazhila?

⁵ Twayai twisambe ne pa kimweka inge muntu washingwa mupashi wazhila. Bamo bashingwa kyakonsha kwibakatazha kuswa kuba’mba Yehoba wibasala. Bakonsha kulanguluka’mba, ‘Mambo ka Lesa o ansajila?’ Bakwabo kechi bakonsha kwikala na ino milanguluko ne. Monse mo kyakonsha kwikela, mutumwa Paulo walumbulwile kimweka ku bonse bashingwa amba: “Byo mwaitabijile mwabikilwe katetesho * na mupashi wazhila walayilwe kupichila mwi aye, ko kayukilo ko betupelejile jimo ka buswanyi bwetu.” (Efi. 1:13, 14; tubyambo twa munshi.) Onkao mambo, Yehoba wingijisha mupashi wanji wazhila kulengela bano bena Kilishitu kuyuka’mba kine wibasala kuya mwiulu. Mu jino jishinda, mupashi wazhila wikala “kayukilo [kishiino nangwa’mba mulaye]” kwi abo amba  bakekalanga myaka ne myaka mwiulu, kechi pa ntanda ne.—Tangai 2 Kolinda 1:21, 22.

6. Bena Kilishitu bashingwa bafwainwa kuba byepi pa kuba’mba bakatambule kilambu kya mwiulu?

⁶ Mwina Kilishitu inge washingwa, nanchi kilumbulula’mba kyapwa ukaya mwiulu nyi? Ine. Ushiinwa’mba bamusala kuya mwiulu. Bino wafwainwa kuvulukanga lujimuno lwa kuba’mba: “Balongo bami, ibikishaingako kuba’mba kwitwa ne kusalwa kwenu kutwajijile kwikala byonkabyo, mambo umvwe mwatwajijila kuba bino bintu, kechi mukakankalwa ne.” (2 Pe. 1:10) Onkao mambo, nangwa kya kuba mwina Kilishitu washingwa bamusala, nangwa’mba bamwita kuya mwiulu, inge wabula kwikala wa kishinka, kechi ukatambula kilambu kyanji ne.—Fili. 3:12-14; Hebe. 3:1; Lum. 2:10.

7. Bashingwa bayuka byepi amba bebeta kuya mwiulu?

⁷ Pano muntu uyuka byepi amba bamwita kuya mwiulu? Mukumbu uji mu byambo byaambile Paulo ku balongo bashingwa bajinga mu Loma, “batelwa’mba bazhijikwa.” Wibambijile’mba: “Kechi mwatambwile mupashi wa buzha uleta moyo ne, bino mwatambwile mupashi wa kwimutongola kwikala baana, kabiji yenka uno mupashi witulengela kwamba’mba: ‘Abba, Tata!’ Uno mupashi ushimuna pamo na mupashi wetu kuba’mba twi baana ba Lesa.” (Loma 1:7; 8:15, 16) Na mupashi wanji wazhila, Lesa ulengela bashingwa kuyuka’mba baitwa kuya na kwikala mwiulu.—1 Tesa. 2:12.

8. 1 Yoano 2:20, 27 umwesha byepi kuba’mba bena Kilishitu bashingwa kechi bakeba muntu wa kwibabuula’mba bashingwa ne?

⁸ Yehoba ulengela bonse basalwa kuya mwiulu kushiinwa kuba’mba kine bebeta. (Tangai 1 Yoano 2:20, 27.) Bena Kilishitu bashingwa bakebewa kwibafunjisha kwi Yehoba kupichila mu kipwilo byonkatu byo afunjisha bantu bonse. Bino kechi bakeba muntu wa kwibabuula’mba bashingwa ne. Yehoba wingijisha bulume bukatampe, ko kuba’mba, mupashi wanji wazhila, pa kwibalengela kushiinwa’mba bashingwa.

9. Muntu inge washingwa, ñanyi lupimpu lubiwa kwi aye kwesakana na byaamba Efisesa 1:18?

⁹ Bakalume ba Lesa bavula lelo jino kyakonsha kwibakatazha kuyuka kimweka inge muntu bamushinga kwi Lesa. Kechi twakonsha kukumya ne, mambo abo kechi bashingwa ne. Lesa walengele bantu kwikala myaka ne myaka pano pa ntanda, kechi mwiulu ne. (Nte. 1:28; Sala. 37:29) Bino Yehoba wasala bamo kuya na kwikala mwiulu. Onkao mambo, inge washinga muntu, luketekelo lwa uno muntu ne ndangulukilo yanji byaluka, kya kuba utendeka kutengela kwikala mwiulu.—Tangai Efisesa 1:18.

10. “Kusemwa jibiji” kulumbulula ka? (Monai ne tubyambo twa munshi.)

¹⁰ Bena Kilishitu bashingwa mupashi wazhila ‘basemwa jibiji,’ nangwa’mba ‘basemwa mwiulu.’ * Yesu wamwesheshe ne kuba’mba kyakatazha kulumbulwila muntu wabula kushingwa byo kyumvwanyika “kusemwa jibiji,” nangwa’mba ‘kusemwa ku mupashi.’—Yoa. 3:3-8; tubyambo twa munshi.

11. Lumbululai lupimpu lubiwa mu milanguluko inge muntu washingwa.

¹¹ Ñanyi lupimpu lubiwa mu milanguluko ya bena Kilishitu bashingwa? Yehoba saka akyangye kwibashinga, bano bena Kilishitu bajinga na luketekelo lwa kwikala myaka ne myaka pano pa ntanda. Batengelanga kimye Yehoba kyo akafumyapo bubi bonse  ne kwakalula ino ntanda kwikala ke paladisa. Kampe bafwanyikizhanga babena kutambwila wa mu kisemi nangwa mulunda nabo wafwile. Pano byo bashingilwe, batendekele kulanguluka byapusanako. Ki ka kilengela? Kechi bapimpwile milanguluko yabo na mambo a kuba’mba luketekelo lwa kwikala pano pa ntanda lwatama ne. Kechi bapimpwile milanguluko na mambo a kupopomenwa nangwa kuyanda ne. Kechi balangulukile’mba bakomvwanga mukose kwikala pa ntanda myaka ne myaka ne kuba’mba kechi bakekala na lusekelo ne. Bino Yehoba ye waingijishe mupashi wanji wazhila kupimpula ndangulukilo yabo ne luketekelo lo banemeka.

12. Kwesakana na byaamba 1 Petelo 1:3, 4, bena Kilishitu bashingwa bomvwa byepi pa luketekelo lwabo?

¹² Muntu washingwa wakonsha kuzhinauka inge wafikilamo kwingila uno mwingilo. Bino kechi uzhinauka’mba Yehoba wamusala ne. Usangalala bingi ne kusanta pa luketekelo lwa kwikala mwiulu.—Tangai 1 Petelo 1:3, 4.

13. Bashingwa bomvwa byepi kwikala pano pa ntanda?

¹³ Nanchi kino kilumbulula’mba bashingwa bakeba kufwa nyi? Paulo wakumbwile buno bwipuzho. Waesakenye mibiji yabo ya bumuntu ku tente ne kwamba’mba: “Kabiji atweba tuji mu uno tente tubinza, tunemenwa, mambo kechi tukeba kumuvuula ne, bino tukeba kuvwajilapo mukwabo, kuba’mba akya kifwa bekimine ku bumi.” (2 Ko. 5:4) Bano bena Kilishitu kechi bashikwa bumi bwabo kya kuba ke bakebe kufwa bukiji ne. Pakuba bomvwa bulongo kwikala bomi kabiji bakeba kwingijila Yehoba pamo na bisemi byabo ne balunda nabo moba onse. Bino mu bintu byonse byo boba, kechi balubako luketekelo lwabo lwa lukumo lwa bwikalo bwa kulutwe ne.—1 Ko. 15:53; 2 Pe. 1:4; 1 Yoa. 3:2, 3; Lum. 20:6.

14. Ñanyi bintu bibula kumwesha’mba muntu washingwa mupashi wazhila?

¹⁴ Kampepo mubena kulanguluka inge kya kuba Yehoba wimushinga mupashi wazhila. Inge byo byo mubena kulanguluka, langulukai pa ano mepuzho: Nanchi mumvwa’mba muji na kizaku kya kuba kyaswa muchima wa Yehoba nyi? Nanchi mumvwa’mba muji bingi na mukoyo mu mwingilo wa kusapwila nyi? Nanchi mumvwa bulongo kufunda Mambo a Lesa ne kufunda pa bintu “byazhika bya Lesa” nyi? (1 Ko. 2:10) Nanchi mulanguluka’mba Yehoba ubena kwimulengela kwingila bintu bikatampe mu busapwishi bwenu nyi? Nanchi mwatemwa bingi bakwenu ne kukebesha kwibakwasha kuyuka Yehoba nyi? Nanchi mwimwena bishiino bya kuba’mba Yehoba wimukwasha mu mashinda avula mu bwikalo bwenu nyi? Inge mwakumbula’mba ee ku ano mepuzho onse, nanchi kimwesha’mba bemwita kuya mwiulu nyi? Ine, kechi byo kyalumbulula ne. Mambo ka? Mambo bakalume ba Lesa bonse bakonsha kumvwa byonka bino, bashingwa nangwa ne. Kabiji kupichila mu mupashi wanji wazhila, Yehoba wakonsha kupa kalume wanji yense bulume, nangwa ukaya mwiulu nangwa ne. Kabiji kishinka ke kya kuba’mba, inge mubena kuzhinauka inge mwashingwa mupashi wazhila nangwa ne, ko kuba’mba kechi mwashingwa ne. Aba bo basala kwi Yehoba kechi bazhinauka ne.

15. Twayuka byepi amba kechi bonse batambula mupashi wa Lesa bo basala kuya mwiulu ne?

¹⁵ Mu Baibolo mwanembwa bantu bavula bajinga ba kishinka batambwile mupashi wazhila, bino kechi bajinga na luketekelo lwa kuya mwiulu ne. Davida bamutangijilanga ku mupashi wazhila. (1 Sam. 16:13) Mupashi wazhila wamukwashishe kumvwisha byazhika byaamba pe Yehoba ne kumutangijila  kunembako mbaji imo ya mu Baibolo. (Mako 12:36) Nangwa byonkabyo, mutumwa Petelo waambile’mba Davida “kechi wayile mwiulu ne.” (Byu. 2:34) Yoano Mubatizhi wayujile na “mupashi wazhila.” (Luka 1:13-16) Yesu waambile’mba kafwako nangwa umo wakila Yoano ne, bino waambile’mba Yoano kechi ukekala mu bufumu bwa mwiulu ne. (Mat. 11:10, 11) Yehoba waingijishe mupashi wanji wazhila kupa bano banabalume ngovu ya kuba bintu bikatampe, bino kechi waingijishe mupashi wanji kwibasala kuya na kwikala mwiulu ne. Nanchi kino kibena kulumbulula’mba kechi bajinga ba kishinka byonka byajinga boba bo basajile kuya na kulama mwiulu nenyi? Ine. Kino kibena kulumbulula’mba Yehoba ukebasangula kabiji bakekala mu Paladisa pano pa ntanda.—Yoa. 5:28, 29; Byu. 24:15.

16. Ñanyi kilambu bakalume ba Lesa bavula kyo batengela lelo jino?

¹⁶ Bakalume ba Lesa bavula lelo jino kechi baji na luketekelo lwa kuya mwiulu ne. Byonkatu byajinga Abalahama, Sala, Davida, Yoano Mubatizhi ne banabalume ne banabakazhi bakwabo bavula bo baambapo mu Baibolo, batengela kwikala pano pa ntanda kimye kikalamanga Bufumu bwa Lesa.—Hebe. 11:10.

17. Ñanyi mepuzho o tukesambapo mu mutwe walondelapo?

¹⁷ Na mambo a kuba’mba bashingwa bamo tukiji nabo pano pa ntanda, twakonsha kwikala na mepuzho. (Lum. 12:17) Twakonsha kwiipuzha mepuzho nabiji ano: bashingwa bafwainwa kwimona byepi abo bene? Inge kya kuba muntu umo mu kipwilo kyenu watendeka kujako shinkwa ne kutomako binyu pa Kivuluko, mwafwainwa kumumonanga byepi? Ibyepi inge kya kuba bantu babena kwamba’mba bashingwa babena kuvujilakotu? Nanchi mwafwainwa kwakamwa nyi? Tukakumbula ano mepuzho mu mutwe walondelapo.