1-2. Ñanyi bintu bibena kupitamo bantu ba Yehoba bavula, kabiji byakonsha kwibalengela kwikala byepi?

AKILANGULUKAI pa bino bintu bisatu bimweka: Mulongo mwanyike bamutaana na kikola kyatama bingi kikookesha mubiji. Mulongo uji na myaka kukila pa 50 bamupanga nkito, kabiji waesekesha kukeba nkito ikwabo, bino wapulwilamotu mabula. Nyenga wakoma ubena kukankalwa kwingila byo aingilanga mu mwingilo wa Yehoba.

² Inge mubena kupita mu lukatazho lumo pa makatazho atongolwa peulu, mwakonsha kumona nobe kechi mwanema ne. Abino bintu byo twaambapo byakonsha kwimupwishisha lusekelo, kwimulengela kwilengulula, kabiji byakonsha kwimulengela kwikala na makatazho na bakwenu.

3. Satana ne bantu banji bamona byepi bumi bwa bantu?

³ Ino ntanda imwesha byubilo bya Satana. Satana ulengela bantu kulanguluka kuba’mba kechi banema ne. Wafwile shinji Evwa kupichila mu kumubuula’mba ukakasuluka inge wasatukila Lesa, nangwa kya kuba wayukile’mba mu kusatukila Lesa mufuma lufu. Satana kimye kyonse ye utangijila bya busulu, bya bumulwila ntanda ne bya bupopweshi biji pano pa ntanda. Onkao mambo, kechi twakonsha kukumya pa kumona basulu bavula, bamulwila ntanda, ne bantangi ba bupopweshi byo babula kunemeka bumi bwa bantu ne kubula kutako muchima ku byo balanguluka ne.

4. Tusakwisamba pa ka mu uno mutwe?

 ⁴ Pakuba Yehoba ukeba’mba tuyuke’mba twanema, kabiji witukwasha inge ketupite mu bintu byakonsha kwitulengela kwilengulula. (Sala. 136:23; Loma 12:3) Uno mutwe waamba pe Yehoba byo etukwasha mu bino bintu: (1) Inge twakolwa, (2) inge twayanda, ne (3) inge kukoma kubena kwitulengela kumona nobe kafwako byo tubena kuba mu mwingilo wa Yehoba ne. Bino patanshi, twayai tufunde ene mambo o twafwainwa kushiinwa kuba’mba Yehoba witunemeka atweba bonse.

5. Ñanyi kishinka kimwesha’mba Yehoba wanemeka bingi bantu?

⁵ Nangwa kya kuba twalengelwe kufuma ku lukungu, bino twanema bingi. (Nte. 2:7) Langulukai pa bishinka bimo bimwesha kuba’mba Yehoba witunemeka. Walengele bantu na bulume bwa kumwesha byubilo byanji. (Nte. 1:27) Onkao mambo, Lesa wanemeka bantu kukila bilengwa byonse kabiji witupa luusa pa ntanda ne banyama.—Sala. 8:4-8.

6. Ñanyi kishinka kikwabo kimwesha’mba Yehoba wanemeka bantu bambulwa kulumbuluka?

⁶ Nangwatu Adama byo alengele mambo, Yehoba watwajijile kunemeka bantu. Witunemeka bingi kya kuba wapaine Mwananji ye atemwa aye Yesu kwikala bukuzhi bwa bundengamambo bwetu. (1 Yoa. 4:9, 10) Na mambo a bukuzhi, Yehoba ukasangula boba bafwa na mambo a bundengamambo bwa Adama, “baoloka ne babula koloka.” (Byu. 24:15) Baibolo umwesha kuba’mba Lesa witunemeka bingi nangwa kya kuba kechi tuji na butuntulu bwa mubiji bwawama ne, twi bayanji nangwa twakota.—Byu. 10:34, 35.

7. Ñanyi bishinka bikwabo bilengela bakalume ba Lesa kushiinwa’mba Yehoba wibanemeka?

⁷ Tuji ne na bishinka bikwabo bitulengela kushiinwa’mba Yehoba witunemeka. Wituleta pepi ne aye kabiji wamwene byo twatambwijile mambo awama. (Yoa. 6:44) Byo twatendekele kufwenya kwipi ne Yehoba, aye naye wafwenyenye kwipi ne atweba. (Yako. 4:8) Kabiji Yehoba wingijisha kimye ne ngovu kwitufunjisha ne kwitumwesha kuba’mba twanema bingi kwi aye. Wayuka byo tuji atweba bonse pa muntu pa muntu luno kabiji wayuka ne byo twakonsha kuwamishako byubilo byetu. Kabiji witololako mambo witutemwa. (Maana 3:11, 12) Abino bishinka bimwesha’mba Yehoba witunemeka bingi.

8. Byambo byanembwa pa Salamo 18:27-29 byakonsha kwitukwasha byepi kwikala na milanguluko yawama inge tubena kupita mu makatazho?

⁸ Bantu bamo balengulwile Mfumu Davida, bino aye mwine wayukile’mba Yehoba wamutemenwe kabiji wamukwashanga. Kuyuka kino kwamukwashishe kuchinchika makatazho o apichilengamo. (2 Sam. 16:5-7) Inge twaikala na bijikila nangwa tubena kupita mu makatazho, Yehoba wakonsha kwitukwasha kumwena bintu mu jishinda japusanako kabiji wakonsha kwitukwasha kushinda mikiika yonse. (Tangai Salamo 18:27-29.) Inge Yehoba witukwasha, kafwako kyakonsha kwitukanya kumwingijila na lusekelo ne. (Loma 8:31) Pano twayai twisambe pa bintu bisatu bimweka po twafwainwa kuvulukanga kuba’mba Yehoba witutemwa kabiji witunemeka.

9. Kukolwa kwakonsha kwitulengela kwimonanga byepi atweba bene?

⁹ Kukolwa kwakonsha kwituletela binyenge ne kwitulengela kumona nobe kechi twanema ne. Twakonsha kumvwa kutama ku muchima inge twayuka’mba bakwetu bamona’mba kuji byalubankana pe atweba nangwa inge kya kuba twaketekelatu mu bukwasho bwa bakwetu. Nangwatu inge kya kuba bakwetu kechi bayuka kikola kyo twakolwa ne,  twakonsha kutendeka kumvwa bumvu na mambo a kuba’mba tubena kukankalwa kwingila byo twaingilanga kala. Inge tubena kupita mu makatazho a uno mutundu, Yehoba wakonsha kwitutundaika. Wakonsha kwitutundaika byepi?

10. Kwesekana na byaamba Byambo bya Maana 12:25, ñanyi kintu kyakonsha kwitukwasha inge tubena kukolwa?

¹⁰ Inge twakolwa, “byambo byawama” byakonsha kwitusangajika. (Tangai Byambo bya Maana 12:25.) Mu Baibolo, Yehoba witubuula bintu byavula byawama bituvululamo kuba’mba twanema kwi aye nangwa kya kuba twakolwa. (Sala. 31:19; 41:3) Inge saka tutanga byambo bya Lesa bimye byavula, Yehoba uketukwasha kuyuka bya kuba na bijikila biya na mambo a kukolwa.

11. Mulongo umo watambwijile byepi bukwasho bwa Yehoba?

¹¹ Akilangulukai pa byapichilemo ba Jorge. Byo bajingatu banyike, ba Jorge bebakwachile na kikola kyatama bingi kibaya bukiji kabiji kibalengejilenga kumona nobe kechi banema ne. Ba Jorge baambile’mba: “Kechi nayukile bya kuba na kino kikola ne, mambo naumvwanga bingi bumvu pa kumona bantu byo bantajishanga na mambo a kino kikola. Kino kikola byo kyabayile, nalangulukilenga pa bwikalo bwami byo bukapimpulwa. Najinga bingi na bulanda, kabiji nasashijile Yehoba kunkwasha.” Yehoba wibakwashishe byepi? Baambile’mba: “Na mambo a kuba’mba kyankatazhanga kukwatakanya bintu inge mbena kutanga, bantundaikile kutangangatu byambo bicheche biji mu buku wa Masalamo bimwesha Yehoba byo ata muchima bakalume banji. Natanganga bimye byavula bino binembelo pa juba pa juba, kabiji byantekeneshanga bingi. Mu kuya kwa kimye, bantu bakwabo bamwene kuba’mba natendekele  kwikala na lusekelo. Baambile ne kuba’mba muchima wami wa lusekelo wibatundaikanga bingi. Namwene kuba’mba Yehoba wakumbula milombelo yami. Wankwashishe kupimpula byo nemonanga amiwa mwine. Natendekele kuta muchima pa byaamba Mambo anji pa byo ammona nangwa kya kuba mbena kukolwa.”

12. Inge mubena kukolwa, mwakonsha kutambula byepi bukwasho bwa Yehoba?

¹² Inge mubena kukolwa, yukai kuba’mba Yehoba wayuka byo mubena kupitamo. Musashijilai kuba’mba emukwashe pa kuba’mba mwikale na milanguluko yawama pa bintu byo mubena kupitamo. Apa bino mwaingijisha Baibolo kukeba byambo bya lutekenesho Yehoba byo abikamo. Tai muchima pa byepelo bimwesha kuba’mba Yehoba wanemeka bingi bakalume banji. Umvwe saka muba bino, mukamona kuba’mba Yehoba ubila lusa bonse bamwingijila mu bukishinka.—Sala. 84:11.

13. Inge nkito yapwa, mutwe wa kisemi wakonsha kumvwa byepi?

¹³ Mutwe wa kisemi yense ukeba kukebela ba mu nzubo yanji bikebewa mu bwikalo. Fwanyikizhai kuba’mba mutwe wa kisemi bamupanga nkito kwa kubula mambo. Waeseka na ngovu kukeba nkito ikwabo, bino wapulwilamotu mabula. Na mambo kino, wakonsha kumona nobe kafwako kyo abena kuba ne. Kuta muchima pa milaye ya Yehoba kwakonsha kumukwasha byepi?

14. Ñanyi bishinka bilengela Yehoba kufikizha milaye yanji?

¹⁴ Yehoba ufikizha milaye yanji kimye kyonse. (Yosh. 21:45; 23:14) Uji na bishinka byavula bimulengela kuba bino. Kishinka kitanshi ke kya kuba’mba kufikizha  milaye kubingisha jizhina janji. Yehoba walaya kuba’mba ukalama bakalume banji ba kishinka, kabiji witwika mutembo wa kufikizha uno mulaye. (Sala. 31:1-3) Kikwabo, Yehoba wayuka kuba’mba twakonsha kulefulwa inge wabula kulama bulongo ba mu kisemi kyanji. Witulaya kwitukebela bya mu bwikalo ne kwitukwasha kutwajijila kumwingijila mu bukishinka, kabiji kafwako kyakonsha kumukanya kufikizha uno mulaye wanji ne.—Mat. 6:30-33; 24:45.

15. (a) Ñanyi lukatazho lwapichilemo bena Kilishitu batanshi? (b) Kinembelo kya Salamo 37:18, 19 kitukwasha kushiinwa’mba ka?

¹⁵ Inge saka tuvuluka ene mambo Yehoba o afikizhizha milaye yanji, twakonsha kushiinwa kuba’mba uketukwasha inge twakankalwa mwa kumwena mali. Akilangulukai pa byapichilemo bena Kilishitu batanshi. Byo kwabuukile lupato lukatampe lwa kushikwa kipwilo kyajinga mu Yelusalema,‘bonse bapalañene kufumyakotu batumwa.’ (Byu. 8:1) Fwanyikizhai kyafuminemo. Buyanji! Bena Kilishitu bashile mazubo abo ne busulu. Bino Yehoba kechi wibalekelejile ne; nabo kechi balekele kumwingijila na lusekelo ne. (Byu. 8:4; Hebe. 13:5, 6; Yako. 1:2, 3) Yehoba wakwashishe bano bena Kilishitu ba kishinka, kabiji uketukwasha ne atweba.—Tangai Salamo 37:18, 19.

16. Ñanyi bintu byakonsha kwitulengela kulanguluka’mba kampe Yehoba kechi wanemeka mpopwelo yetu ne?

¹⁶ Inge twakoma, twakonsha kutendeka kumona nobe kechi tubena kwingijila Yehoba mo kyafwainwa ne. Mfumu Davida naye wafwainwa wajinga na milanguluko ya uno mutundu byo akotele. (Sala. 71:9) Yehoba wakonsha kwitukwasha byepi?

17. Twakonsha kufunjilako ka ku byamwekejile nyenga wa jizhina ja Jheri?

 ¹⁷ Akilangulukai pa byapichilemo nyenga wa jizhina ja Jheri. Uno nyenga bamwichile kutanwa ku misambo ya bya kulama bulongo Nzubo ya Bufumu, bino kechi wakebelenga kuyako ne. Waambile’mba: “Nakota, nafwilwa, kabiji kechi nayuka mwingilo pa kuba’mba Yehoba añingijishe ne. Kafwako byonji ne.” Bufuku bwa kutwala ku juba ja misambo, walumbulwijile Yehoba mu lulombelo byonse byajinga mu muchima wanji. Juba jalondejilepo byo afikile pa Nzubo ya Bufumu, watwajijile kuzhinauka inge kya kuba’mba wafwainwe kutanwako ku ino misambo. Kimye kya mwisambo, ñambi umo wakoseshe kishinka kya kuba’mba kintu kyanema ke muchima wa kwipana kuba’mba Yehoba etufunjishe. Ba Jheri bavuluka’mba: “Nalangulukilenga’mba, ‘Nepana kuba’mba Lesa amfunjishe.’ Natendekele kujila byo namwene kuba’mba Yehoba wakumbwile milombelo yami. Lesa wamvulwilengamo kuba’mba nji na kintu kyanema kyo nakonsha kumupa, kabiji wipaine kumfunjisha.” Byo bavulukilenga kino kyamwekele ba Jheri baambile’mba: “Byo nayilenga ku misambo, najinga na moyo, kulefulwa ne kumona nobe kechi nanema ne. Bino pa kufumako, najinga na luketekelo, natundaikilwe, ne kuyuka’mba nanema.”

18. Baibolo umwesha byepi kuba’mba Yehoba utwajijila kunemeka mpopwelo yetu nangwa kya kuba twakota?

¹⁸ Inge twakota, twafwainwa kushiinwa kuba’mba kukiji mingilo Yehoba yo akeba’mba twingilenga. (Sala. 92:12-15) Yesu witufunjishe kuba’mba nangwa kya kuba mingilo yo twingila yakonsha kumweka nobe kechi yanema ne, bino Yehoba wiinemeka bingi. (Luka 21:2-4) Onkao mambo, tai muchima pa byo mwakonsha kuba. Nabiji kwamba pe Yehoba, kulombelako balongo ne banyenga, ne kutundaika bakwenu kutwajijila kwikala ba kishinka. Yehoba wimumona’mba mwi ba mwingilo uno ne aye, na mambo a kwipana kumukookela, kechi na mambo a bintu byo muba ne.—1 Ko. 3:5-9.

19. Ñanyi lutundaiko lo tutaana pa Loma 8:38, 39?

¹⁹ Tusanta bingi pa kwingijila Yehoba, Lesa wanemeka bingi boba bamwingijila. Witulengele kuba’mba tubenga kyaswa muchima wanji, kabiji bupopweshi bwa kine bwituletela bingi lusekelo. (Lum. 4:11) Nangwa kya kuba bantu mu ntanda bakonsha kwitumona nobe kechi twanema ne, bino Yehoba witunemeka bingi. (Hebe. 11:16, 38) Inge twaikala na binyenge na mambo a kukolwa, buyanji, nangwa bukote, twayai tuvulukenga’mba kafwako kintu kyakonsha kwitwabanya na butemwe bwa Shetu wa mwiulu ne.—Tangai Loma 8:38, 39.