1. Jashi jo baambile pa kushonkena mu 1935 jalengejile nsongwalume umo kuba byepi?

NSONGWALUME umo wabatizhiwe saka aji na myaka 18, mu 1926. Bansemi banji bajinga mu jibumba ja Bafunda Baibolo. Bajinga na baana babalume basatu ne baana babakazhi babiji. Bano baana bebafunjishe pe Yehoba Lesa ne kulondela Yesu Kilishitu. Bafunda Baibolo bonse bajingako pa kyo kimye bajangako ku shinkwa ne kutoma binyu pa Kijiilo kya Nkambo kya Mabanga pa mwaka pa mwaka. Ne uno nsongwalume naye wajangako. Nangwa byonkabyo, luketekelo lwanji lwa kulutwe lwapimpwilwe kimye kyo atelekele ku jashi janemene bingi jajinga na mutwe wa kuba’mba “Jibumba Jikatampe.” Jino jashi jaambiwe mu 1935 na Mulongo J. F. Rutherford pa kushonkena kwaikejile mu muzhi wa Washington, D.C., ku U.S.A. Ñanyi kintu kyafunjile Bafunda Baibolo pa kuno kushonkena?

2. Ñanyi bukine bwalumbulwile Mulongo Rutherford mu jashi janji?

² Mu jashi janji, Mulongo Rutherford walumbulwile bantu balenga “jibumba jikatampe” batongolwa pa Lumwekesho 7:9. Mwaka wa 1935 saka akyangye kufika, Bafunda Baibolo bayukile’mba jibumba jikatampe ke bantu baji na kalwitabilo kacheche bakaya mwiulu. Mulongo Rutherford waingijishe Binembelo kulumbulula kuba’mba bantu balenga jibumba jikatampe kechi  bebasala kuya na kwikala mwiulu ne. Bino abo ke mikooko ikwabo * ya kwa Kilishitu bakapuluka “malwa akatampe” ne kwikala pano pa ntanda myaka ne myaka. (Lum. 7:14) Yesu walayile’mba: “Nji na mikooko ikwabo, yabula ya mu kino kipaka; ino nayo nafwainwa kwiileta, ne ayo ikomvwa jiwi jami, kabiji ikekala jitanga jimo ne kafunga umo.” (Yoa. 10:16) Onkao mambo, mikooko ikwabo, ke Bakamonyi ba kwa Yehoba ba kishinka baji na luketekelo lwa kwikala pano pa ntanda mu Paladisa. (Mat. 25:31-33, 46) Twayai twisambe pa ino ndumbulwilo ya katataka ya bukine bwa mu Baibolo byo yapimpwile luketekelo lwa bantu ba Yehoba bavula, kubikapotu ne yewa mulongo wa myaka 18.—Sala. 97:11; Maana 4:18.

3-4. Pa kushonkena kwa mu 1935, ñanyi kintu kyayukile bantu bavula batainweko, kabiji mambo ka?

³ Bantu basangalele bingi pa kushonkena kimye ñambi kyo ashikishe bajinga mu luonde amba: “Aba bonse baji na luketekelo lwa kwikala pano pa ntanda myaka ne myaka bemane?” Mulongo watainwe ku kuno kushonkena washimikizhe’mba, bantu bavula batainweko baimene. Kepo Mulongo Rutherford abijikile’mba: “Talai! Jibumba jikatampe!” Ponkapo bantu bonse bajinga mu luonde babijikile na lusekelo. Aba baimene bayukile’mba kechi bebasajile kwi Lesa kuya na kwikala mwiulu ne. Bayukile’mba kechi bashingilwe mupashi wa Lesa ne. Juba jalondejilepo ja kushonkena, Bakamonyi bakatataka 840 babatizhiwe, kabiji bavujijilepo bajinga mikooko ikwabo.

⁴ Bakamonyi bavula batelekele ku jino jashi kubikapotu ne nsongwalume ye twaji kwambapo ku ntendekelo, balekele kujako ku shinkwa ne kutoma katomeno ka binyu pa Kijiilo kya Nkambo kya Mabanga. Mulongo umo waambile byonka byaambile bavula amba: “Kivuluko kya mu 1935 kyo kyapeleleko kujako ku shinkwa ne kutoma binyu bya pa Kivuluko. Kyajinga bino, mambo Yehoba kupichila mu mupashi wanji wazhila kechi wansajile kuya mwiulu ne. Pakuba luketekelo lwami lwajinga lwa kwikala pano pa ntanda ne kwingilako mwingilo wa kuwamisha ino ntanda kwikala paladisa.” (Loma 8:16, 17; 2 Ko. 1:21, 22) Kufumatu kyo kya kimye, jibumba jikatampe jabaya bingi kabiji babena kwingijila pamo na bashingwa bashalapo. *

5. Yehoba umona byepi boba baleka kujako bipashañano bya pa Kivuluko?

⁵ Yehoba wamwenenga byepi boba balekele kuja shinkwa ne kutomako binyu pa Kivuluko panyuma ya mwaka wa 1935? Kabiji Yehoba umona byepi Bakamonyi babatizhiwa bajako shinkwa ne kutomako binyu bya pa Kijiilo kya Nkambo kya Mabanga lelo jino, bino mu kuya kwa kimye bayuka’mba kechi bashingwa kya kine ne? (1 Ko. 11:28) Bamo bajanga bipashañano bya pa Kivuluko na mambo a kuba kechi bayukile bulongo luketekelo lwabo ne. Bino umvwe baswa’mba balubankenye, baleka kujako batwajijila ne kwingijila Yehoba mu bukishinka, Lesa ukebabajila pa mikooko ikwabo. Nangwa kya kuba baleka kuja shinkwa ne kutoma binyu, bino batwajijila kutaanwa ku Kivuluko mambo basanchila Yehoba ne Yesu pa kyo bebobijile.

6. Yesu wakambizha bamalaika kuba byepi?

⁶ Na mambo a kuba’mba malwa akatampe ajitu pepi, kyanema bingi kwisamba pa byambo bikwabo biji mu Lumwekesho kitango 7 byaamba pa bena Kilishitu bashingwa ne mikooko ikwabo. Yesu wakambizhe bamalaika bana kutwajijila kukwata mwela wa lonaiko. Kechi bafwainwe kulekako uno mwela kuba’mba eye pa ntanda ne, posotu bakapwishe kubika tutetesho pa bena Kilishitu bonse bashingwa. Kubika tutetesho kulumbulula’mba Yehoba wamona kuba’mba bano bantu ba kishinka. (Lum. 7:1-4) Bano balongo ba kwa Kilishitu bashingwa inge batwajijila kwikala ba kishinka, bakatambula mfweto ya kwikala bamfumu ne bañanga pamo ne Kilishitu mwiulu. (Lum. 20:6) Yehoba, Yesu ne bamalaika bakomvwa bingi bulongo inge ba 144,000 bashingwa batambula mfweto yabo ya mwiulu.

7. Kwesakana na byaamba Lumwekesho 7:9, 10, bañanyi Yoano bo amwene, kabiji baubilenga byepi? (Monai kipikichala kya pa nkupiko.)

⁷ Yoano byo apwishishe kumona bano ba 144,000 bamfumu ne bañanga, wamwene ne kintu kikwabo kyawama bingi. Wamwene “jibumba jikatampe” jikapuluka pa Amagedonyi. Kupusanako na jibumba jitanshi jo amwene, jibumba ja bubiji jabaya bingi kabiji ja kukankalwa kubala. (Tangai Lumwekesho 7:9, 10.) ‘Bavwajile minkukumba itoka.’ Kino kibena kulumbulula’mba belamine ne “kwifumyako ku biko” bya ino ntanda ya kwa Satana, kabiji batwajijile kwikala ba kishinka kwi Lesa ne Kilishitu. (Yako. 1:27) Babijikilenga kuba’mba bebapulusha na mambo a byaubile Yehoba ne Yesu, Mwana Mukooko wa Lesa. Kabiji balamine mapambo a bisonga mu maboko abo, kumwesha’mba baswa kuba’mba Yesu ye Mfumu ye batongola kwi Yehoba.—Esakanyaiko Yoano 12:12, 13.

8. Lumwekesho 7:11, 12 witubuula’mba ka pa kisemi kya Yehoba kya mwiulu?

⁸ Tangai Lumwekesho 7:11, 12. Aba baji mwiulu baubile byepi byo bamwene jibumba jikatampe? Yoano wamwene bonse ba mu kisemi kya Yehoba kya mwiulu byo basangalele pa kumona jibumba jikatampe saka jitota Lesa. Kisemi kya Yehoba kya mwiulu kikasangalala bingi kino kimwesho byo kikafika kimye jibumba jikatampe kyo jikafuma mu malwa akatampe.

9. Kwesakana na byaamba Lumwekesho 7:13-15, baji mu jibumba jikatampe babena kuba byepi luno?

⁹ Tangai Lumwekesho 7:13-15. Yoano waambile’mba jibumba jikatampe “bachapa minkukumba yabo ne kwiitokesha mu mashi a Mwana Mukooko.” Kino kilumbulula’mba baji na jiwi ja mu muchima jatoka kabiji baoloka ku meso a Yehoba. (Isa. 1:18) Abano bantu bepana ne kubatizhiwa, baji lwitabilo lwakosa mu kitapisho kya kwa Yesu, kabiji baji na bulunda bwakosa ne Yehoba. (Yoa. 3:36; 1 Pe. 3:21) Onkao mambo, bafikilamo kwimana kulutwe ya jitanda ja Lesa ne kumwingijila “mute ne bufuku” pano pa ntanda. Nangwatu luno, babena kwingila na mukoyo mwingilo wa kusapwila pa Bufumu ne kufunjisha bantu kwikala ke baana ba bwanga. Kabiji babena kutangizhako bintu bya Bufumu bwa Lesa mu bwikalo bwabo.—Mat. 6:33; 24:14; 28:19, 20.

10. Jibumba jikatampe jashiinwa’mba ka, kabiji ñanyi mulaye ye batengela ukafika?

¹⁰ Jibumba jikatampe jikapuluka pa malwa akatampe jashiinwa kuba’mba Lesa ukebalama balongo. Mambo ka? Mambo “awa waikala pa jitanda ukavungulwila tente wanji pe abo.” Mulaye watengela mikooko ikwabo pa kimye kyabaya ukafika. Uno mulaye ke wa kuba’mba: “[Lesa] ukashimuna mipolo yonse ku meso abo, ne lufu, mabingo, kujila ne misongo kechi bikekalako jibiji ne.”—Lum. 21:3, 4.

11-12. (a) Kwesakana na byaamba Lumwekesho 7:16, 17, ñanyi mapesho abena kutengela jibumba jikatampe? (b) Mikooko ikwabo yakonsha kuba byepi pa Kivuluko, kabiji mambo ka?

 ¹¹ Tangai Lumwekesho 7:16, 17. Lelo jino, bantu ba Yehoba bamo babena kumanama na bipowe bya nzala na mambo a buyanji nangwa malwañano ku mpunzha ko bekala. Bakwabo bebakasa na mambo a lwitabilo lwabo. Pano bino, aba baji mu jibumba jikatampe baji na lusekelo mambo bayuka’mba byo bakapuluka lonaiko lwa ino ntanda, bakekala na kajo kavula. Kabiji Yehoba ukatwajijila kwibafunjisha. Kimye Yehoba kyo akonauna ntanda ya kwa Satana, jibumba jikatampe jikapuluka ku “kyuya” kya bukaji bwanji bo aketulwila pa bisaka bya bantu. Malwa akatampe inge apwa, aba bakapuluka, Yesu ukebatangijila “ku masulo atupauka mema a bumi [bwa myaka ne myaka].” Akilangulukai pa kino: Jibumba jikatampe jiji na luketekelo lwawama bingi. Bonse kechi bakafwapo ne.—Yoa. 11:26.

¹² Mikooko ikwabo isanchila Yehoba ne Yesu pa luketekelo lwanema bingi lo baji nalo. Kechi bebasajile kuya mwiulu ne, bino nabo banema bingi kwi Yehoba. Bonsetu, bashingwa ne mikooko ikwabo batota Lesa ne Kilishitu. Jishinda jimo jo bobilamo kino ke kutaanwa ku Kijiilo kya Nkambo kya Mabanga.

13-14. Mambo ka bashingwa ne mikooko ikwabo o bafwainwa kutaainwa ku Kivuluko kya lufu lwa Kilishitu?

¹³ Mu ino myaka, pa bantu 1,000, pataanwatu muntu umo ujako shinkwa ne kutoma binyu bya pa Kivuluko. Kino kimwesha’mba mu bipwilo byavula mwaya ntanda kechi muji bajako ku bipashañano bya pa Kivuluko ne. Kino kibena kulumbulula’mba bavula bataanwa ku Kivuluko baji na luketekelo lwa kwikala pano pa ntanda. Pano mambo ka o bataainwa ku Kijiilo kya Nkambo kya Mabanga? Kijitu pamo na kutaanwa ku masongola. Bantu bataanwako mambo bakeba kumwesha’mba batemwa bobo babena kutwela mu masongola ne kwibatundaika. Onkao mambo, mikooko ikwabo itaanwa ku Kivuluko mambo ikeba kumwesha’mba batemwa Kilishitu ne bashingwa, kabiji bakeba kwibatundaika. Kikwabo, mikooko ikwabo itaanwa ku Kivuluko kuba’mba bamweshe lusanchilo lwabo pa kitapisho kya kwa Yesu. Mambo kino kitapisho kyo kyalengela’mba bekale  na luketekelo lwa bumi bwa myaka ne myaka pano pa ntanda.

¹⁴ Kishinka kikwabo kyanema kilengela mikooko ikwabo kutaanwa ku Kivuluko ke kukookela mukambizho wa kwa Yesu. Yesu byo atendekeshe kino kijiilo kyanema na batumwa banji ba kishinka, wibabuujile’mba: “Saka muba kino mu kumvuluka.” (1 Ko. 11:23-26) Onkao mambo, bakatwajijila kutaanwa ku Kijiilo kya Nkambo kya Mabanga kufikatu ne kimye bashingwa bonse kyo bakafumapo pano pa ntanda. Kabiji mikooko ikwabo itako bantu bonse kuba’mba bakataanwe nabo ku Kivuluko.

15. Twakonsha kutota byepi Lesa ne Kilishitu pa Kivuluko?

¹⁵ Pa Kivuluko, tutota Lesa ne Kilishitu mu nyimbo ne mu milombelo. Jashi jo bakamba uno mwaka ke ja kuba’mba “Santainga pa Bintu Bimubila Lesa ne Kilishitu!” Jino jashi jiketukwasha kutwajijila kusanchila Yehoba ne Kilishitu. Kimye kyo bakapishangamo bipashañano, atweba tukataanwako baketuvululamo byo bimenako. Abino bipashañano bimenako mubiji ne mashi a kwa Yesu. Tukalanguluka pe Yehoba byo amwesheshe butemwe bwanji pa kutuma Mwananji kwiya na kwitufwila kuba’mba tukekale na bumi. (Mat. 20:28) Muntu yense watemwa Shetu wa mwiulu ne Mwananji ukataanwako ku Kivuluko.

16. Mu ñanyi mashinda bashingwa ne mikooko ikwabo mo babujila kupusana?

¹⁶ Lesa kechi wanemekapo jibumba jimo kukila jibumba jikwabo pa bashingwa ne mikooko ikwabo ne. Kabiji kafwapo jibumba jo atemwa kukila jikwabo ne. Bonsetu, bashingwa ne mikooko ikwabo, Lesa wibanemeka kabiji wibatemwa bingi. Twayuka bino mambo wapainetu kintu kimo pa kupota bashingwa ne mikooko ikwabo. Wapaine Mwananji yenkawa umotu ye atemwisha. Lupusano lujipotu ke luketekelo lo baji nalo. Bonse bashingwa ne mikooko ikwabo bafwainwa kutwajijila kwikala ba kishinka kwi Lesa ne Kilishitu. (Sala. 31:23) Kabiji vulukainga kuba’mba, Lesa wingijishatu mupashi wanji umo pa bonse. Kino kibena kulumbulula’mba Yehoba upana mupashi wanji ku muntu yense kwesakana na bibena kukebewa ku yeo muntu, mushingwa nangwa wa mu mikooko ikwabo.

17. Bashingwa bashalapo babena kutengela ñanyi kintu?

¹⁷ Bena Kilishitu bashingwa kechi basemwatu na luketekelo lwa kuya na kwikala mwiulu ne. Lesa ye wibapa luno luketekelo. Balangulukapo pa luketekelo lwabo ne kulombapo, kabiji batengela kutambwila mfweto yabo mwiulu. Kechi bayuka ne mibiji yabo ya bumupashi byo ikekala mwiulu ne. (Fili. 3:20, 21; 1 Yoa. 3:2) Nangwa byonkabyo, batengela kimye kyo bakamonañana  ne Yehoba, Yesu, ne bamalaika, ne bashingwa bakwabo bonse baya kala mwiulu. Kabiji babena kutengela kwikala bamfumu mu Bufumu bwa mwiulu.

18. Ñanyi bintu bibena kutengela mikooko ikwabo?

¹⁸ Mikooko ikwabo yanemeka bingi luketekelo lwabo lwa kwikala myaka ne myaka pano pa ntanda. Bantu basemwatu na luno luketekelo. (Sapwi. 3:11) Batengela kimye kyo bakakwashako kwalula ino ntanda yonse kwikala ke paladisa. Kabiji babena kutengela kimye kyo bakashimika mazubo abo, kujimba bichi bya bipangwa, ne kusema baana balumbuluka. (Isa. 65:21-23) Kabiji babena kutengela kimye kyo bakapitañananga mu mapunzha apusana-pusana ntanda yonse na kumona mitumba, bichi ne tulunga twa mema. Ne kufunda byavula pe Yehoba kupichila mu kumona bilengwa byanji. Kabiji kyakila pa byonse, baji bingi na lusekelo pa kuyuka’mba bulunda bwabo ne Yehoba bukatwajijila kukoselako.

19. Kivuluko kitulengela kuba byepi atweba bonse, kabiji uno mwaka kikekalako pa ñanyi juba?

¹⁹ Yehoba wapa kalume wanji yense luketekelo lwawama bingi lwa bwikalo bwa kulutwe. (Yele. 29:11) Kivuluko kya lufu lwa kwa Kilishitu kilengela atweba bonse kutota Lesa ne Kilishitu pa byo betubila pa kuba’mba tukekale na bumi bwa myaka. Kwambatu kine, kimye kya Kivuluko ke kimye kyawama bena Kilishitu ba kine kukonkana pamo. Kikekalako pa kuzhika juba pa Kibelushi, pa 27 March 2021. Uno mwaka, bavula bakataanwa ku kuno kupwila kwanema mu mutende. Bakwabo bakataanwako nangwa kya kuba bebemena ku ntundwa. Kabiji bakwabo bakekala na Kivuluko saka baji mu kaleya. Yehoba, Yesu, bamalaika ne bena Kilishitu bashingwa baya kala mwiulu byo baketutalanga, bipwilo byonse, mabumba, ne pa muntu pa muntu, mwane bonse tukekale na Kivuluko kyawama bingi.