1. Byonka byaubile Mfumu Davida, atweba bamo twakonsha kushikisha’mba ka?

ATWEBA bonse tukeba kwikala ku matwi nzoo. Kafwako muntu umvwa bulongo kwikala na bijikila ne. Pano bino, bimye bimo, twakonsha kwikala na bijikila. O ene mambo bakalume ba Yehoba bamo o bakonsha kushikisha Yehoba byonka byashikishe Mfumu Davida amba: “Bimye binga byo nkekala na bijikila, ne bulanda mu muchima wami pa juba pa juba?”—Sala. 13:2.

2. Tusakwisamba pa ka mu uno mutwe?

² Nangwa kya kuba atweba bonse bimye bimo twikala na bijikila, bino kuji bintu byo twakonsha kuba pa kuba’mba tukepesheko bijikila. Mu uno mutwe, tusakwisamba pa bintu bimo byakonsha kwituletela bijikila. Apa bino twisambe mashinda atanu na jimo akonsha kwitukwasha kutekanya byo tubena kupita mu makatazho.

3. Ñanyi bintu byakonsha kwituletela bijikila, kabiji nanchi tuji na bulume bwa kukanya bino bintu kubiwa nyi?

³ Kuji bintu byavula bingi byakonsha kwituletela bijikila. Kabiji kechi twakonsha kukanya bino bintu kuba’mba bibule kumweka ne. Akilangulukai pa kino: Kechi tuji na bulume bwa kukanya mitengo ya kajo, bivwalo, nangwa mali a kusonkela mazubo abena kuyilako peulu pa mwaka pa mwaka ne. Kabiji kechi tuji na bulume bwa kupimpula byubilo bya bakwetu bo twingila nabo nkito, nangwa bakwetu baana ba sukulu pa kuba’mba baleke kwitweseka  kuba’mba twikale babula bukishinka, nangwa kwivwanga mu byubilo bya bulalelale ne. Kabiji kechi twakonsha kukanya bantu mu nyaunda yetu kuba’mba baleke byubilo byatama ne. Tubena kumona bino bintu na mambo a kuba’mba tubena kwikala mu ntanda muji bantu bavula babula kulondela mafunde a mu Baibolo. Satana, lesa wa pano pa ntanda, wayuka’mba bantu bamo bakonsha kuswisha “[bijikila] bya mu buno bwikalo” kwibalengela kuleka kwingijila Yehoba. (Mat. 13:22; 1 Yoa. 5:19) O ene mambo mu ntanda kyo mwavujila bintu bileta bijikila.

4. Ki ka kyakonsha kumweka inge twaakamwa bingi pa mambo a makatazho?

⁴ Twakonsha kwakamwa bingi pa makatazho o tubena kupitamo kya kuba ketukankalwe ne kulanguluka pa bintu bikwabo. Kampe twakonsha kwakamwa’mba kechi tukekala na mali avula a kupotamo bikebewa ne, nangwa kwakamwa’mba tukakolwa ne kukankalwa kuya ku nkito nangwa kwitupanga nkito. Kabiji twakonsha kwakamwa’mba kwendapo twaleka kwikala ba kishinka kwi Lesa inge betweseka kuba’mba tulale mizhilo ya Lesa. Katatakatu Satana akalengele bantu banji kulukuka bantu ba Lesa. Onkao mambo, twakonsha kwakamwa pa byo tukoba kimye kyo baketulukuka. Twakonsha kwishikisha’mba, ‘Nanchi kyatama kwikala na bijikila na mambo a bino bintu nyi?’

5. Yesu watazhizhe mwepi byo aambile’mba: “Kilekai kubambisha michima”?

⁵ Twayuka kuba’mba Yesu wabuujile baana banji ba bwanga amba: “Kilekai kubambisha michima.” (Mat. 6:25) Nanchi kibena kulumbulula’mba kechi twakonsha kwikalapo na kijikila nenyi? Ine. Ne bakalume ba Yehoba ba kishinka ba kala nabo baikalanga na bijikila, bino Yehoba watwajijile kwibatemwa. * (1 Mfu. 19:4; Sala. 6:3) Yesu witutundaikilenga kuba’mba kechi twafwainwa kukizhamo kwikala na bijikila na mambo bintu bya mu buno bwikalo kya kuba ke tukankalwe kwingila bulongo mwingilo wa Lesa ne. Pano twakonsha kuba byepi inge twaikala na bijikila?—Monai kakitenguluzha ka kuba’mba “ Bya Kuba pa Kuba’mba Tukepesheko Bijikila.”

6. Kwesakana na byaamba Filipai 4:6, 7, ki ka kyakonsha kwitukwasha kukepeshako bijikila?

⁶ (1) Lombainga bimye byavula. Inge mwaakamwa na mambo a lukatazho lumo, lombai kwi Yehoba kuba’mba emukwashe. (1 Pe. 5:7) Yehoba wakonsha kukumbula milombelo yenu kupichila mu kwimupa “mutende wa Lesa wakila milanguluko ya bantu.” (Tangai Filipai 4:6, 7.) Yehoba ukemupa mutende kupichila mu mupashi wanji wazhila wa bulume.—Nga. 5:22.

7. Ñanyi kintu kyo twafwainwa kuvulukanga pa kulomba kwi Lesa?

⁷ Pa kulomba kwi Yehoba, mubuulai byonse biji ku muchima wenu. Shinkamikainga milombelo yenu. Mubuulai lukatazho lo mubena kupitamo, kabiji mulumbulwilai byo mubena kumvwa na mambo a lolo lukatazho. Inge pajipo jishinda ja kupwishishamo lolo lukatazho, lombai maana ne bulume bwa kuba byobyo. Inge kafwako kyo mwakonsha kubapo pa lolo lukatazho ne, lombai Yehoba kwimukwasha kubula kukizhamo kwakamwa. Umvwe ke mushinkamike milombelo yenu, mu kuya kwa kimye, mukemwena Yehoba byo akakumbula milombelo yenu. Inge mukumbu wabula kufika bukiji, kuleka kulomba ne. Yehoba ukeba’mba mushinkamikenga milombelo yenu ne kutoñaminamo mu milombelo.—Luka 11:8-10.

8. Ñanyi bintu byo twafwainwa kuvwangangamo mu milombelo yetu?

⁸ Byo mutwika Yehoba bisendwa byenu kupichila mu milombelo, esekainga ne kubikamo  byambo bya kusanta. Kyanema bingi kulanguluka pa bintu byawama bitubila Lesa nangwatu inge tubena kupita mu makatazho. Inge kya kuba pa bimye bimo kimukatazha kutaana byambo byo mwakonsha kwingijisha pa kwamba biji ku muchima, vulukainga kuba’mba Yehoba ukumbula ne milombelo ipitu nabiji ya kuba’mba, ‘Yehoba, nkwashai.’—2 Moba 18:31; Loma 8:26.

9. Twafwainwa kuba byepi inge twaakamwa?

⁹ (2) Ketekelai mu maana a Yehoba, kechi kuketekela maana enu ne. Kimye kyajingako ngauzhi Isaya, bantu ba mu Yuda baakaminwe bingi kuba’mba bakebalukuka ku bena Asilya. Kechi bakebelenga kwibashinda ku bena Asilya ne. Onkao mambo, balombele bena Ijipita kwiya na kwibakwasha. (Isa. 30:1, 2) Yehoba wibajimwineko kuba’mba kuketekela mu bena Ijipita mukafumatu kalulu kuvimba meso. (Isa. 30:7, 12, 13) Kupichila mwi Isaya, Yehoba wabuujile bantu byo bafwainwe kuba pa kuba’mba bazhikijilwe. Waambile’mba: “Mukekala na bulume inge mwatekanya ne kunketekela.”—Isa. 30:15b.

10. Mu ñanyi bintu bimo mo twafwainwa kumwesha’mba twaketekela mwi Yehoba?

¹⁰ Twakonsha kumwesha byepi amba twaketekela mwi Yehoba? Langulukai pa bintu bimo bimweka. Fwanyikizhai kuba’mba mwataana nkito ya kufola mali avula kabiji ino nkito ikemulengela kukankalwa kwingila mingilo ya Lesa byonka byo mwaingilanga kala. Nangwa kampe muntu umo pa nkito wimufwalama, bino awo muntu kechi kalume wa Lesa wabatizhiwa ne. Nangwa fwanyikizhai’mba wa mu kisemi kyenu wimwambila’mba: “Usalepo kimo, kwikala mulongo wami, nangwa kwingijila Lesa wobe.” Mu bino byonse byo twaambapo, kyakonsha kwimukatazha bingi kufuukulapo, bino Yehoba ukemukwasha kufuukulapo bulongo. (Mat. 6:33; 10:37; 1 Ko. 7:39) Bwipuzho ke bwa kuba’mba, Abya mukaketekela mu lutangijilo lwa Yehoba pa kufuukulapo bya kuba nyi?

11. Ñanyi mashimikila a mu Baibolo o twakonsha kufunda pa kuba’mba tutwajijile kwikala mu mutende inge kuji babena kwitukanya kwingijila Lesa?

¹¹ (3) Funjilaiko ku bantu bajinga na byubilo byawama ne bajinga na byubilo byatama. Mu Baibolo muji mashimikila a bantu bavula amwesha buneme bwa kutekanya ne kuketekela mwi Yehoba. Byo musakufundanga ano mashimikila, langulukainga pa kyakwashishe bano bakalume ba Lesa kutwajijila kutekanya kimye kyo bebemenejile ku ntundwa ku balwanyi babo. Kije kikatampe kya Bayudea byo kyakambizhe batumwa kuleka kusapwila, kechi bachiine ne. Pakuba baambile na kuchinchika’mba: “Lesa ye kalama ye twafwainwa kukookela kechi bantu ne.” (Byu. 5:29) Nangwatu kimye kyo bebazhipawile, batumwa kechi babambishe michima yabo ne. Mambo ka? Mambo bayukile’mba Yehoba wajinga nabo. Basangajikile muchima wanji. Onkao mambo, batwajijile kusapwila mambo awama. (Byu. 5:40-42) Ne mwana wa bwanga aye Setepena byo kwashajiletu pacheche kuba’mba bamwipaye, kechi wabambishe muchima wanji ne, kabiji kilungi kyanji kyamwekelenga “nobe kya malaika.” (Byu. 6:12-15) Mambo ka? Mambo washiinwe kuba’mba wasangajikile muchima wa Yehoba.

12. Kwesakana na byaamba 1 Petelo 3:14 ne 4:14, mambo ka o twakonsha kwikela na lusekelo inge babena kwitumanyika?

¹² Batumwa bajinga na bishiino byamwesheshenga’mba Yehoba wajinga nabo. Wibapeele bulume bwa kuba bya kukumya. (Byu. 5:12-16; 6:8) Bino atweba Yehoba kechi witupapo bulume bwa kuba bya kukumya ne. Nangwa byonkabyo, kupichila mu Mambo anji, Yehoba witukwasha kuyuka’mba umvwe ke tumaname na mambo a bololoke, tusangajika muchima wanji kabiji uketupa mupashi wanji. (Tangai 1 Petelo 3:14; 4:14.) Onkao mambo, kechi twafwainwa kwakamwa pa byo tukoba kimye kyo tukapita mu lumanamo lukatampe kulutwe ne. Pakuba twafwainwa kuta muchima pa  byo twakonsha kuba luno pa kuba’mba tukoseshe luketekelo lwetu mwi Yehoba kuba’mba uketukwasha ne kwitupokolola. Byonka byaubile baana ba bwanga batanshi, ne atweba twafwainwa kuketekela mulaye wa kwa Yesu wa kuba’mba: “Nkemupa byambo ne maana akalengela balwanyi benu bonse kubula kwimukanya nangwa kwimupachika.” Kabiji Yesu witulayile kuba’mba: “Umvwe mwachinchika, mukapulusha bumi bwenu.” (Luka 21:12-19) Vulukainga kuba’mba Yehoba uvuluka bishinka byonse pa bakalume banji bafwa saka baji ba kishinka kwi aye, kabiji bino byo bikalengela’mba akebasangule.

13. Twakonsha kumwenamo byepi mu kufunda mashimikila a bantu bakankelwe kutekanya ne kuketekela mwi Yehoba?

¹³ Kabiji twakonsha kufunjilako ne ku boba bakankelwe kutekanya ne kuketekela mwi Yehoba. Kufunda ano mashimikila kusakwitukwasha kuchinuzhuka kuba bintu byatama byo baubile. Muntu umo waubile bino ke Mfumu Asa wa mu Yuda. Ku ntendekelo ya bukalama bwanji, waketekejile mwi Yehoba kimye kyo bamulukukile ku nzhita ikatampe, kabiji Yehoba wamukwashishe kushinda. (2 Moba 14:9-12) Pano bino, mu kwa kimye, nzhita icheche ya kwa Baasha Mfumu wa Isalela byo yaishile na kulwa nanji, Asa wapaine mali ku bena Silya kuba’mba bamukwashe. Kechi walombele kwi Yehoba kuba’mba amupokolole byonka byo aubile kimye kitanshi ne. (2 Moba 16:1-3) Kabiji byo anangijilenga ku mpelo ya bumi bwanji, wakolelwe kikola kikatampe, kabiji napo kechi waketekejile mwi Yehoba kuba’mba amukwashe ne.—2 Moba 16:12.

14. Twakonsha kufunjilako ka ku byalubankenye Asa?

¹⁴ Ku ntatwilo ya bukalama bwanji, Asa walombanga bukwasho bwa Yehoba umvwe waikala na lukatazho. Bino mu kuya kwa kimye, walekele kuketekela mwi Lesa. Watendekele kuketekela mu maana anji mwine. Patanshi, mulanguluko wa kwa Asa wa kulomba bukwasho bwa bena Silya pa kulwa na bena Isalela wamwekelenga nobe wawama. Bino kechi baikele mu mutende pa kimye kyabaya ne. Kupichila mwi ngauzhi, Yehoba wamubuujile’mba: “Na mambo a kuba mwaketekejile mwi mfumu wa Silya ne kubula kuketekela mwi Yehoba Lesa wenu, nzhita ya mfumu wa Silya yapuluka mu kuboko kwenu.” (2 Moba 16:7) Twafwainwa kujimuka, mambo inge ne, twakonsha kutendeka kuketekela mu maana etu pa kuba bintu kya kuba twakankalwa kulomba lutangijilo lwa Yehoba kupichila mu Mambo anji. Nangwatu inge tubena kufuukula kintu kya bukiji bukiji, twafwainwa kutekanya ne kuketekela mwi Yehoba. Umvwe twauba bino, Lesa uketukwasha kabiji tukafuukulapo bulongo.

15. Twakonsha kuba byepi inge tubena kutanga Baibolo?

¹⁵ (4) Labijilaipo byepelo bimo bya mu Baibolo. Umvwe mwataana byambo mu Baibolo bibena kumwesha’mba tukekala na bulume inge twatekanya ne kuketekela mwi Yehoba, esekai kwibilabijila pa kuba’mba mukabule kulubamo. Pa kuba’mba mwibilabijile, mwakonsha kwibitanga na jiwi ja peulu nangwa kwibinembapo pamo ne kupitulukamo pa bimye byavula. Yoshua bamukambizhe kutanga buku wa mizhilo kimye kyonse ne kulanguluka-langulukapo pa kuba’mba akobenga bintu na maana. Kutanga ano malamuna kwamukwashishe ne kubula moyo pa kutangijila bantu ba Lesa. (Yosh. 1:8, 9) Byambo byavula biji mu Mambo a Lesa byakonsha kwimukwasha kwikala na mutende wa mu milanguluko ne mu muchima inge ke mupite mu bintu byakonsha kwimuletela bijikila.—Sala. 27:1-3; Maana 3:25, 26.

16. Yehoba wingijisha byepi kipwilo kwitukwasha kubula kubambisha muchima ne kuketekala mwi aye?

¹⁶ (5) Pwanañanainga na bantu ba Lesa. Yehoba wingijisha balongo ne banyenga kwitukwasha kubula kubambisha muchima ne kuketekela mwi aye. Pa kupwila kwetu, tumwenamo mu mafunjisho o bamba pa mutuntamo, mu mikumbu yamba baji mu luonde, ne misambo yawama yo  twikala nayo na balongo ne banyenga. (Hebe. 10:24, 25) Kabiji twakonsha kutundaikwa bingi inge twabuulako balunda netu bo twaketekela mu kipwilo bintu bibena kwitukatazha mu milanguluko. “Byambo byawama” kufuma ku mulunda netu byakonsha kwitukwasha kukepeshako bijikila.—Maana 12:25.

17. Kwesakana na byaamba Bahebelu 6:19, luketekelo lwetu lwa Bufumu lwakonsha kwitukwasha byepi kushikimana inge tubena kupita mu makatazho?

¹⁷ (6) Twajijilai kukosesha luketekelo lwenu. Luketekelo lwetu lwa Bufumu luji “nobe kimiko kya mweo wetu,” kitukwasha kwikala bashikimana inge tubena kupita mu makatazho nangwa inge twaikala na bijikila. (Tangai Bahebelu 6:19.) Langulukainga pa mulaye wa Yehoba wa bwikalo bwawama mukabula bijikila. (Isa. 65:17) Fwanyikizhainga muji mu ntanda ipya ya mutende mukabula makatazho. (Mika. 4:4) Kabiji mukakosesha luketekelo lwenu kupichila mu kubuulako bantu pa ntanda ipya. Ingilainga papelela bulume bwenu mwingilo wa kusapwila ne kufunjisha bantu kwikala ke baana ba bwanga. Umvwe mwauba bino, mukakonsha kulumbulula bulongo “luketekelo lwenu kufika ne ku mpelo.”—Hebe. 6:11.

18. Ñanyi bintu byo tukapitangamo kulutwe, kabiji ki ka kiketukwasha kuchinchika?

¹⁸ Byo tubena kunangijila ku mpelo ya buno bwikalo, tusakupitanga mu makatazho avula aleta bijikila. Kinembelo kyetu kya mwaka wa 2021 kyakonsha kwitukwasha kubula kubambisha muchima. Tukekala na bulume bwa kuchinchika na mambo a kuketekela mwi Yehoba. Mu uno mwaka yense, twayai tumweshenga’mba twaketekela mu mulaye wa Yehoba wa kuba’mba: “Mukekala na bulume inge mwatekanya ne kunketekela.”—Isa. 30:15.