1. Ñanyi bintu byakatazha byapichilemo Davida?

 DAVIDA wanyemenenga pa kuba’mba apulushe bumi bwanji. Saulo wajinga mfumu wa bena Isalela wajinga bingi na bulume, kabiji wakebelenga kwipaya Davida. Davida byo akebelenga bya kuja, wayile mu muzhi wa Noba kabiji walombele bashinkwa batanu. (1 Sam. 21:1, 3) Mu kuya kwa kimye, aye ne banabalume bo ajinga nabo bayile na kufyama mu jiyengo. (1 Sam. 22:1) Ki ka kyalengejile Davida kwikala mu luno lukatazho?

2. Saulo wibikile byepi mu kizumba kikatampe? (1 Samwela 23:16, 17)

² Saulo waubijile bingi Davida kichima mambo bantu bamutemenwe bingi kabiji bamutakaikilenga na mambo a kushinda makondo avula. Saulo wayukile ne kuba’mba na mambo a kubula lukookelo, Yehoba wamukaine kabiji wasajile Davida kuba’mba ye ukaswana pa bufumu. (Tangai 1 Samwela 23:16, 17.) Pano bino, Saulo wakijinga mfumu wa bena Isalela, kabiji wajinga na nzhita ikatampe ne bantu bavula bamutundaikilenga. Onkao mambo, Davida wanyemene pa kuba’mba apulushe bumi bwanji. Abya kine Saulo walangulukilenga’mba wakonsheshe kukanya Lesa kulengela Davida kwikala mfumu nyi? (Isa. 55:11) Baibolo kechi waambapo ne, bino twakonsha kushiinwa kuba’mba Saulo wibikilenga mwine mu kizumba kikatampe. Aba balwa ne Lesa kechi bashinda ne.

3. Nangwa kya kuba Davida wapichilenga mu makatazho, milanguluko yanji yajinga byepi?

³ Davida wajinga muntu wipelula. Kechi wisajile mwine kwikala mfumu wa bena Isalela ne. Yehoba ye wamusajile. (1 Sam. 16:1,  12, 13) Saulo washikilwe bingi Davida. Bino Davida kechi wapelemo Yehoba mambo amba ye wamulengejile kwikala mu lukatazho ne. Kabiji kechi wijizhainyepo kimye kyo ajinga na tukajo tucheche ne byo afyaminenga mu jiyengo ne. Pano bino, kyamweka kyonka kimye kyo afyamine mu jiyengo kyo kyo anembele lwimbo wawama bingi wa kutota Lesa ne byambo paimena uno mutwe bya kuba’mba: “Aba bamukeba Yehoba kechi bakakajilwa kintu nangwa kimo kyawama ne.”—Sala. 34:10.

4. Ñanyi mepuzho o tusakukumbula, kabiji mambo ka ano mepuzho kyo anemena?

⁴ Lelo jino, bakalume ba Yehoba bavula bimye bimo kechi bekala na kajo nangwa bintu bikwabo bikebewa mu bwikalo ne. * Kino kyamweka ku bakalume ba Lesa bavula kikatakata mu kimye kya mwalo. Kabiji “malwa akatampe” byo afwenya kala pepi, twafwainwa kuketekela kupita mu bintu byakilamo ne kukatazha. (Mat. 24:21) Byo twayuka bino bishinka, kyanema bingi kukumbula ano mepuzho ana: Mu ñanyi jishinda Davida mo abujijile ‘kukajilwa kintu nangwa kimo kyawama’? Mambo ka o twafwainwa kufunjila kutondwa na bintu byonka byo tuji nabyo? Mambo ka o twafwainwa kuketekela kuba’mba Yehoba uketulama? Kabiji twakonsha kwinengezha byepi ku bintu bikamweka kulutwe?

5-6. Salamo 23:1-6 witukwasha byepi kuyuka mwatazhizhe Davida byo aambile’mba bakalume ba Lesa “kechi bakakajilwa kintu nangwa kimo kyawama ne”?

⁵ Davida walumbulwilenga ka byo aambile’mba bakalume ba Yehoba “kechi bakakajilwa kintu nangwa kimo kyawama ne”? Kwisamba pa byambo bipasha na bino byo anembele mu Salamo 23 kwakonsha kwitukwasha kuyuka mo atazhizhe. (Tangai Salamo 23:1-6.) Davida watendekele uno salamo na byambo bya kuba’mba: “Yehoba ye Kafunga wami. Kechi nkakajilwa kintu nangwa kimo ne.” Kepo mu salamo yense, Davida watongwele bintu byanema bingi, nabiji bintu byawama byamupele Yehoba na mambo a kuba’mba waswile kuba’mba Yehoba ye  Kafunga wanji. Yehoba wamutangijilenga “mu mashinda a bololoke,” kabiji watwajijile kukwasha Davida mu bimye byawama ne bimye byatama. Davida wayukile kuba’mba bwikalo mu “munyemvu wavula” wa Yehoba kechi bwikalo bwabula makatazho ne. Bimye bimo, walefulwanga, kabiji kyaikalangatu nobe ubena kwenda “mu kimpachiko mwafiitatu bwii,” kabiji wajinga ne na balwanyi. Bino na mambo a kuba’mba Yehoba wajinga Kafunga wanji, Davida kechi ‘wachinanga kumukozha ne.’

⁶ Onkao mambo, uno ye mukumbu wa bwipuzho bwa kuba’mba: Mu ñanyi jishinda Davida mo abujijile ‘kukajilwa kintu nangwa kimo kyawama’? Wajinga na byonse byakebewenga pa kuba’mba atwajijile kufwenya kwipi ne Yehoba. Lusekelo lwanji kechi lwaimenejile pa kwikala na bintu byavula mu bwikalo ne. Davida watondelwe na bintu byonka byamupele Yehoba. Bintu byanemene bingi kwi aye ke bintu byamupele Lesa ne byo amuzhikijilanga.

7. Kwesakana na byaamba Luka 21:20-24, ñanyi bintu byapichilemo bena Kilishitu bamo baikalanga mu Yudea?

⁷ Byambo byaambile Davida bitukwasha kuyuka kuba’mba kechi twafwainwa kunemekesha bintu bya mu bwikalo ne. Twakonsha kwikala na lusekelo na mambo a bintu byo tuji nabyo, pano bino, kechi byo bintu byo twafwainwa kunemekesha mu bwikalo bwetu ne. Kino kyo kishinka kyanema bingi kyafunjile bena Kilishitu bamo baikalanga mu Yudea. (Tangai Luka 21:20-24.) Yesu wibajimwineko kuba’mba kimye kikafika muzhi wa Yelusalema kyo ‘bakamuzhokoloka ku mazhita.’ Wibabuujile kuba’mba inge kino kyamweka, bafwainwe “kunyemena ku mitumba.” Kuba bino ko kwafwainwe kwibalengela kupuluka, pano bino, kino kyalumbulwilenga kusha bintu byabo byavula. Myaka ya kunyumakwe, Kyamba kya Usopa kyaambile’mba: “Bashile majimi ne mazubo abo, kabiji kechi basendelepo bintu byajinga mu mazubo abo ne. Baketekejile kuba’mba Yehoba ukebazhikijila ne kwibakwasha, kabiji banemekele kumupopwela kukila bintu bikwabo byamwekanga nobe byanema.”

8. Ñanyi lufunjisho lwanema lo tufunjilako ku bintu byamwekejile bena Kilishitu baikalanga mu Yudea?

⁸ Twakonsha kufunjilako ñanyi lufunjisho lwanema ku bintu byapichilemo bena Kilishitu bamo baikalanga mu Yudea? Kyamba kya Usopa kyo twaambapo kala kyaambile’mba: “Kulutwe, tukapita mu meseko akasolola byo tumona bintu bya mu bwikalo. Nanchi twanemeka bingi bintu bya mu bwikalo nyi, inyi kintu kyo twanemeka bingi ke lupulukilo lwetu ne kwikala ba kishinka kwi Lesa? Kimye kikafika mpelo, tukapita mu makatazho kabiji tukaleka kuba bintu bimo byo twatemwa. Byonkatu bena Kilishitu batanshi byo banyemenemo mu Yudea, ne atweba twafwainwa kwinengezha kuba bintu byonse bikakebewanga pa kuba’mba tukapuluke.” *

9. Byambo mutumwa Paulo byo afunjileko Bahebelu bimutundaika byepi?

⁹ Fwanyikizhai byo kyakatezhe ku bano bena Kilishitu kusha bintu byabo byonse ne kuya na kutendeka bwikalo kipya-kipya. Bafwainwe kwikala na lwitabilo ne kuketekela mwi Yehoba kuba’mba ukebakwasha kwikala na bintu byanema bikebewa mu bwikalo. Bino kwajinga kintu kyafwainwe kwibakwasha. Byo kwashajile myaka itanu bena Loma kwiya na kutaya Yelusalema mu kañumbwañumbwa, mutumwa Paulo wafunjileko Bahebelu amba: “Mwikale babula kutemwa mali, sekelainga mu bintu byonka byo muji nabyo. Mambo aye waamba’mba: ‘Kechi nkakusha ne, kabiji kechi nkakulekelela ne.’ Kuba’mba tukose ne kwamba’mba: ‘Yehoba ye nkwasho wami; kechi nakonsha kuchina ne, muntu angube ka.’” (Hebe. 13:5, 6) Aba baumvwijile mafunde a kwa Paulo bena Loma saka bakyangye kwiya na kulukuka muzhi kechi kibakatezhe kutendeka kwikala bwikalo bwa katataka ku mpunzha ikwabo kwabujile bintu byavula ne. Bashiinwe kuba’mba Yehoba ukebakwasha kwikala na  bintu byanema bikebewa mu bwikalo. Byambo byaambile Paulo bitukwasha ne atweba kuketekela kuba’mba Yehoba uketukwasha kwikala na bintu byanema bikebewa mu bwikalo.

10. “Kyafyamika” kitubuula Paulo kyo ki ka?

¹⁰ Paulo waambile byambo bipashako kimye kyo afunjileko Timoti, kabiji bino byambo bitukwasha ne atweba. Wanembele’mba: “Onkao mambo, byo tuji na kajo ne bivwalo, tusekela mu bino bintu.” (1 Timo. 6:8) Nanchi kino kibena kulumbulula’mba kechi twafwainwa kujanga kajo kawama ne, kwikala mu nzubo yawama ne, nangwa kupota bivwalo bya katataka nenyi? Akino kechi kyo kishinka kyaambilengapo Paulo ne. Paulo waambilenga’mba twafwainwa kusekela mu bintu byonka byo tuji nabyo. (Fili. 4:12) Akino kyo “kyafyamika” kyafunjile Paulo. Kintu kyanema bingi kyo tuji nakyo ke bulunda bwetu na Lesa, kechi bintu bya mu bwikalo byo tuji nabyo ne.—Ha. 3:17, 18.

11. Ñanyi lufunjisho lo tufunjilako ku byambo Mosesa byo aambile ku bena Isalela?

¹¹ Bintu byo tulanguluka’mba byo byo tukeba mu bwikalo byakonsha kupusana na byayuka Yehoba. Langulukai pa bintu Mosesa byo abuujile bena Isalela byo bapwishishe myaka 40 mu kiselebwa amba: “Yehoba Lesa wenu wimupesha mu bintu byonse byo mwauba. Aye wayukishatu bulongo byo mubena kwenda mu kino kiselebwa kikatampe. Yehoba Lesa wenu waikala ne anweba pa ino myaka 40 kabiji kechi mwakajilwapo kintu nangwa kimo ne.” (Mpitu. 2:7) Mu ino myaka 40, Yehoba wapelenga bena Isalela manna a kuja. Bivwalo byabo byonka byo bafumine  nabyo mu Ijipita kechi byafwilenga ne. (Mpitu. 8:3, 4) Nangwa kya kuba bamo kechi bamwenenga bino bintu kuba’mba byavujile ne, bino Mosesa wavulwilemo bena Isalela amba bajinga na byonse byakebewenga mu bwikalo. Tukasangajika muchima wa Yehoba inge twafunda kusekela mu bintu byonka byo tuji nabyo. Ukeba’mba tumusanchilenga pa bintu byo etupa ne kuyuka’mba ke bupe bwafuma kwi aye.

12. Ki ka kimwesha’mba Davida kechi wiketekejile mwine ne, waketekejile mwi Yehoba?

¹² Davida wayukile’mba Yehoba wa kishinka kabiji wata muchima bantu bamutemwa. Nangwa kya kuba bumi bwanji bwajinga mu kizumba kimye kyo anembele Salamo 34, Davida wajinga na lwitabilo lwakosa mwi Yehoba kya kuba washiinwe kuba’mba “malaika wa Yehoba” ‘wamuzhokolokelenga.’ (Sala. 34:7) Kampe Davida waesakenyenga malaika wa Yehoba ku mushilikale uzhokoloka muzhi na kumusopa ku balwanyi. Nangwa kya kuba aye mwine Davida wajinga mushilikale wabujile moyo kabiji Yehoba wamulayile bufumu, Davida kechi waketekejile mu bulume bwa kwasa mabwe kwingijisha kinzhipunzhipu nangwa mu bulume bwa kwingijisha mpoko kushinda balwanyi banji ne. (1 Sam. 16:13; 24:12) David waketekejile mwi Lesa ne kushiinwa kuba’mba malaika wa Yehoba ‘upokolola boba bamwakamwa.’ Kya kine kuba’mba ano moba kechi tuketekela Lesa kwituzhikijila mu jishinda ja kukumya ne. Pano bino, twayuka kuba’mba bonse baketekela mwi Yehoba batambula bumi bwa myaka ne myaka nangwatu inge bafwa luno.

13. Kimye kiketulukuka Gogi wa Magogi, mambo ka o tukamwekelangatu nobe makusu a mwitolele, bino mambo ka o tukabujila kwakamwa? (Monai kipikichala kya pa nkupiko.)

¹³ Katatakatu tukapite mu lweseko lukamwesha inge luketekelo lwetu mwi Yehoba lwa kuba’mba uketuzhikijila lwakosa nangwa ne. Gogi wa Magogi, ko kuba’mba bisaka bya bantu byo bikakwatankana ne kulukuka bantu ba Lesa, tukamona nobe bumi bwetu buji mu kizumba. Tukakebewanga kushiinwa kuba’mba Yehoba wakonsha kwitupokolola. Bisaka bya bantu biketumonangatu nobe mikooko yabula wa kwiizhikijila. (Ezi. 38:10-12) Kechi tukekalapo na bilwilo ne, kabiji kechi tukafundapo bya kulwa nkondo ne. Bisaka bya bantu bikalanguluka’mba kechi kikakatazha kwituzhiya ne. Kechi bakamona bintu byo tumona na meso etu a lwitabilo ne, ko kuba’mba nzhita ya bamalaika ikazhokoloka bantu ba Lesa konse konse saka benengezha kwituzhikijila. Bisaka bya bantu kechi bikamona bano bamalaika ne, mambo kechi biji na lwitabilo mwi Lesa ne. Bakakumya bingi kimye mazhita a mwiulu kyo akeya na kwitupokolola.—Lum. 19:11, 14, 15.

14. Ñanyi bintu byo twakonsha kuba pa kuba’mba twinengezhe ku bintu biji kulutwe?

¹⁴ Twakonsha kuba byepi luno pa kuba’mba twinengezhe ku bintu bikamweka kulutwe? Kitanshi, kechi twafwainwa kulangulukanga’mba bintu bya mu bwikalo byanema ne, mambo juba jimo tukebisha. Kabiji twafwainwa kutondwa na bintu byonka byo tuji nabyo ne kumwena lusekelo mu bulunda bwetu ne Yehoba. Inge twamuyuka Lesa wetu bulongo, tukashiinwa kuba’mba uketupokolola kimye kiketuluka Gogi wa Magogi.

15. Ñanyi bintu byapichilemo Davida ku bwanyike byamulengejile kushiinwa kuba’mba Yehoba ukamukwashanga kimye kyonse?

¹⁵ Langulukai pa kintu kikwabo kyakwashishe Davida kyakonsha kwitukwasha kwinengezha ku meseko aji kulutwe. Davida waambile’mba: “Mutompai Yehoba mumone byo awama; ye mwine wa lusekelo awa muntu ufyama mwi aye.” (Sala. 34:8) Abino byambo byalumbulula ene mambo Davida o aketekejile mwi Yehoba. Davida bimye byavula wamwesheshe kuba’mba waketekejile  mwi Yehoba, kabiji Lesa wanji wamukwashanga kimye kyonse. Davida byo ajinga mwanyike, wayile na kulwa na kiyangala mwina Filishitiya aye Goliata kabiji wamubuujile’mba: “Lelo jonka Yehoba usakukupana mu maboko ami.” (1 Sam. 17:46) Mu kuya kwa kimye, Davida waingijilenga mfumu Saulo, kabiji Saulo wakebelenga kumwipaya pa bimye byavula bingi. Bino “Yehoba wajinga” ne Davida. (1 Sam. 18:12) Na mambo a kuba’mba Davida wimwenejile Yehoba byo amukwashishe kala, wayukile kuba’mba ukamukwasha mu makatazho o apichilengamo.

16. Mu ñanyi mashinda mo twakonshesha ‘kutompa’ buwame bwa Yehoba?

¹⁶ Umvwe twaketekela mwi Yehoba luno, tukashiinwa kuba’mba uketupokolola kulutwe. Twafwainwa kwikala na lwitabilo ne kuketekela mwi Yehoba pa kuba’mba tulombe juba ku nkito kuba’mba tutanwe ku kubuñana nangwa ku kushonkena, nangwa kulomba bakulumpe ba nkito kuba’mba bapimpuleko mutanchi wa nkito pa kuba’mba tutanwenga ku kupwila konse ne kwikala na kimye kyabaya kya kusapwila. Inge kya kuba mukulumpe wetu wa nkito wakana kuba kintu kyo twalomba, abya tuji na lwitabilo mwi Yehoba kuba’mba kechi uketusha nangwa kwitulekelela ne, ne kuba’mba kimye kyonse uketupanga bintu byanema bikebewa mu bwikalo? (Hebe. 13:5) Bavula baji mu mwingilo wa kimye kyonse bakonsha kushimikizha bintu byo bapitamo bimwesha Yehoba byo ebakwashishe kimye kyo bakajilwe. Yehoba wa kishinka.

17. Ñanyi kinembelo kya mwaka wa 2022, kabiji mambo ka o kyayilamo?

¹⁷ Na mambo a kuba’mba Yehoba uji ne atweba, kechi twakamwa bintu bikamweka kulutwe ne. Lesa wetu kechi uketulekelela inge twatwajijila kutangizhako Bufumu bwanji mu bwikalo bwetu ne. Pa kuba’mba tuvulukenga kimye kyonse kuba’mba twafwainwa kwinengezhezha jimo ku makatazho aji kulutwe, ne kuketekela kuba’mba Yehoba kechi uketulekelela ne, Jibumba Jitangijila jasala Salamo 34:10 kwikala kinembelo kyetu kya mwaka wa 2022: “Aba bamukeba Yehoba kechi bakakajilwa kintu nangwa kimo kyawama ne.”