MUTWE WA KUFUNDA 4
Ene Mambo o Tutainwa ku Kivuluko
“Saka muba kino mu kumvuluka.”—LUKA 22:19.
LWIMBO 20 Mwapaine Mwanenu Ye Mwatemwa
BIJI MU UNO MUTWE *
1-2. (a) Ñanyi kimye kyo tuvuluka balongo betu bafwa? (b) Ñanyi kintu kyatendekeshe Yesu saka akyangye kufwa?
NANGWA kya kuba papita myaka yavula kufuma pafwijile balongo betu, kechi tuleka kwibavuluka ne. Twibavuluka bingi kikatakata pa juba jo bafwile.
2 Pa mwaka pa mwaka, twikala pa bantu bavula mwaya ntanda bapwila na kuvuluka juba jafwile muntu ye twatemwa bingi aye Yesu Kilishitu. (1 Pe. 1:8) Tupwila pamo na kuvuluka muntu wapaine bumi bwanji kwikala bukuzhi bwa kukuula bavula ku bundengamambo ne lufu. (Mat. 20:28) Yesu wakebelenga baana banji ba bwanga kuvuluka lufu lwanji. Bufuku bwapeleleko pano pa ntanda, watendekeshe kijiilo kya mabanga kabiji wakambizhe’mba: “Saka muba kino mu kumvuluka.” *—Luka 22:19.
3. Tusakwisamba pa ka mu uno mutwe?
3 Pa bantu batanwa ku Kivuluko kya lufu lwa kwa Kilishitu, paji bantu bacheche baji na luketekelo lwa kuya mwiulu. Bino bavula batanwako baji na luketekelo lwa kwikala pano pa ntanda. Mu uno mutwe, tusakwisamba pa ene mambo ano mabumba abiji kyo atengela kutanwa ku Kivuluko pa mwaka pa mwaka. Kabiji tusakwisamba byo tumwenamo mu kutanwa ku Kivuluko. Twayai tutendekelepo kwisamba pa ene mambo bashingwa o batainwa ku Kivuluko.
ENE MAMBO BASHINGWA O BATAINWA KU KIVULUKO
4. Mambo ka bashingwa o bajilako ku shinkwa ne kutoma binyu pa Kivuluko?
4 Pa mwaka pa mwaka, bashingwa batengela kutanwa ku Kivuluko ne kujako ku bipashañano. Mambo ka o bajilako ku shinkwa ne kutoma binyu? Pa kuba’mba tukumbule buno bwipuzho, langulukai pa kyamwekele bufuku bwa kwa Yesu bwapeleleko pano pa ntanda. Kijiilo kya Lupitailo byo kyapwile, Yesu watendekeshe kijiilo kitelwa’mba Kijiilo kya Nkambo kya Mabanga. Wapaine shinkwa ne binyu ku batumwa banji ba kishinka 11 ne kwibambila’mba jai ne kutoma. Yesu wibabuujile pa lulayañano lubiji, ko kuba’mba lulayañano lupya ne lulayañano lwa Bufumu. * (Luka 22:19, 20, 28-30) Aluno lulayañano lwashinkwile jishinda ja boba batumwa ne bakwabo ja kwikala bamfumu ne bañanga mwiulu. (Lum. 5:10; 14:1) Bashingwa bashalapo * bo bonkatu baji mu lulwe lulayañano lubiji, kabiji bo bakonsha kujako ku shinkwa ne kutoma binyu pa Kivuluko.
5. Ñanyi bintu byayuka bashingwa pa luketekelo lo bebapa?
5 Kishinka kikwabo kilengela bashingwa kutanwa ku Kivuluko ke kino: Kutanwa ku Kivuluko kwibalengela kulanguluka pa luketekelo lwabo. Yehoba wibapa luketekelo lwanema bingi lwa kwikala na bumi bwa myaka mwiulu, kwingijila pamo ne Yesu Kilishitu ne ba 144,000 bonse. Kabiji kyakila pa byonse, bakekala pepi ne Yehoba Lesa. (1 Ko. 15:51-53; 1 Yoa. 3:2) Bashingwa bayuka’mba bebeta kuya na kwiyowa ano mapesho mwiulu. Bino pa kuba’mba bakatambule ano mapesho a mwiulu, bafwainwa kutwajijila kwikala ba kishinka kufika ne ku lufu. (2 Timo. 4:7, 8) Bashingwa bomvwa bingi bulongo kulanguluka pa ano mapesho. (Titu. 2:13) Pano kiji byepi ku “mikooko ikwabo”? (Yoa. 10:16) Ñanyi bishinka bimo bibalengela kutanwa ku Kivuluko?
ENE MAMBO MIKOOKO IKWABO O ITAINWA KU KIVULUKO
6. Mambo ka mikooko ikwabo o itainwako ku Kivuluko pa mwaka pa mwaka?
6 Mikooko ikwabo itanwa ku Kivuluko kabiji kechi ijako ku shinkwa ne kutoma binyu ne, bino bekala na lusekelo kumonako bino bintu. Aba baji na luketekelo lwa kwikala pano pa ntanda batendekele kwibeta kwiya na kutanwa ku Kivuluko mu mwaka wa 1938. Kyamba kya Usopa kya March 1, 1938, kyaambile’mba: “Kyayilamo bingi mikooko ikwabo kutanwa ku Kivuluko ne kumona byo kikala. . . . Kyafwainwa kwikala kimye kya lusekelo ne kwi abo.” Byonkatu byo kikala ku bantu bo baita ku masongola kuya na kutanwakotu, ne mikooko ikwabo nayo yumvwa bulongo kutanwa ku Kivuluko.
7. Mambo ka mikooko ikwabo o itengela kuteleka ku jashi ja Kivuluko?
7 Mikooko ikwabo nayo ilanguluka pa luketekelo lwayo. Batengela kuteleka ku jashi ja Kivuluko mambo jamba kikatakata pe Kilishitu ne ba 144,000 bo akalamanga nabo byo bakobila bantu ba kishinka mu Bukalama bwa Myaka Kiumbi. Mu kimye kikalamanga Mfumu wabo aye Yesu Kilishitu, aba bo akalamanga nabo mwiulu bakamukwashako kwalula ino ntanda kwikala paladisa ne kukwasha bantu bambulwa kulumbuluka ba lukookelo kwikala balumbuluka. Kiletela bingi lusekelo bantu bavula batanwa ku Kivuluko byo bafwanyikizha bintu byo bikekala kulutwe kimye kikafika bungauzhi bwa mu Baibolo, nabiji bobwa buji pa Isaya 35:5, 6; 65:21-23; ne Lumwekesho 21:3, 4. Kupichila mu kwifwanyikizha abo bene ne balongo babo bafwa baji mu ntanda ipya, kilengela luketekelo lwabo lwa kulutwe kukoselako kabiji kibatundaika kutwajijila kwingijila Yehoba.—Mat. 24:13; Nga. 6:9.
8. Ñanyi kishinka kikwabo kilengela mikooko ikwabo kutanwa ku Kivuluko?
8 Langulukai pa kishinka kikwabo kilengela mikooko ikwabo kutanwa ku Kivuluko. Bakeba kumwesha byo batemwa bashingwa ne kwibatundaika. Mambo a Lesa aambijile jimo kuba’mba bashingwa ne boba baji na luketekelo lwa kwikala pano pa ntanda bakengijilanga pamo saka bakwatankana. Mu ñanyi jishinda? Twayai twisambeko pa bimo.
9. Bungauzhi bwanembwa pa Zekaliya 8:23 bumwesha byepi mikooko ikwabo byo imona bashingwa?
9 Tangai Zekaliya 8:23. Abuno bungauzhi bwalumbulula bulongo mikooko ikwabo byo yatemwa balongo ne banyenga yabo bashingwa. Byambo bya kuba’mba “Muyudea” ne “anweba” byambatu pa jibumba jimo, ko kuba’mba bashingwa bashalapo. (Loma 2:28, 29) “Bantu jikumi bafuma mu milaka yonse ya bisaka bya bantu” bemenako mikooko ikwabo. ‘Bakwachisha,’ ko kuba’mba bakwatankena pamo na bashingwa mu bupopweshi bwa kine. Onkao mambo, pa juba ja Kivuluko, mikooko ikwabo imwesha byo yatemwa bashingwa kupichila mu kutanwa bonse ku Kivuluko.
10. Yehoba wauba byepi pa kuba’mba afikizhe bungauzhi buji pa Ezikyo 37:15-19, 24, 25?
10 Tangai Ezikyo 37:15-19, 24, 25. Yehoba wafikizha buno bungauzhi kupichila mu kulengela bashingwa ne mikooko ikwabo kwingijila pamo saka bakwatankana. Abwe bungauzhi bwaamba pa tubichi tubiji. Aba baji na luketekelo lwa kuya mwiulu baji nobe kakichi ka “kwa Yuda” (kisaka mwafumanga bo basalanga kwikala bamfumu mu Isalela), kabiji aba baji na luketekelo lwa kwikala pano pa ntanda baji nobe kakichi ka kwa “Efelaimu.” * Yehoba walayile kukwatankanya pamo ano mabumba abiji pa kuba’mba akekale ke “kakichi kamo.” Kino kibena kulumbulula’mba bengijila pamo saka bakwatankana ne kwibatangijila ku Mfumu wabo umotu aye Kilishitu Yesu. Pa mwaka pa mwaka, bashingwa ne mikooko ikwabo batanwa ku Kivuluko, kechi nobe mabumba abiji apusana ne, bino “jitanga jimo” jo batangijila ku “kafunga umo.”—Yoa. 10:16.
11. “Mikooko” yo baambapo pa Mateo 25:31-36, 40 imwesha byepi amba itundaika balongo ba kwa Kilishitu?
11 Tangai Mateo 25:31-36, 40. “Mikooko” yaambilepo Yesu mu kishimpi kyanji imenako bantu baoloka mu kimye kya ku mpelo baji na luketekelo lwa kwikala pano pa ntanda, ko kuba’mba mikooko ikwabo. Batundaika mu bukishinka balongo ba kwa Kilishitu bashingwa bashalapo kupichila mu kwibakwasha kwingila mwingilo wanema bingi, wa kusapwila ntanda yonse ne kufunjisha bantu kwikala baana ba bwanga.—Mat. 24:14; 28:19, 20.
12-13. Ñanyi mashinda akwabo mikooko ikwabo mo itundaikila balongo ba kwa Kilishitu?
12 Pa mwaka pa mwaka mu milungu ya kunangijila ku Kivuluko, mikooko ikwabo itundaika balongo ba kwa Kilishitu kupichila mu kwingilako mukwekele wa ntanda yonse wa kwita bantu ku Kivuluko. (Monai ka kitenguluzha ka kuba’mba “ Nanchi Mubena Kulanguluka Kwingilako Pakatampe mu Kimye kya Kivuluko Nyi?) Kabiji bamona kuba’mba byonse bya kwingijisha pa Kivuluko byanengezhiwa nangwa kya kuba mu kipwilo kyabo kafwamo bajako ne. Mikooko ikwabo yumvwa bulongo kutundaika balongo ba kwa Kilishitu mu ano mashinda. Ino mikooko yayuka kuba’mba Yesu umona byo bobila balongo banji bashingwa nobe ye ye babena kubila.—Mat. 25:37-40.
13 Ñanyi bishinka bikwabo byanungwapo bitulengela kutanwa ku Kivuluko nangwa kya kuba luketekelo lwetu lwapusana?
ENE MAMBO BONSE O TUTAINWAKO
14. Yehoba ne Yesu betumwesha byepi butemwe bukatampe?
14 Tusanta bingi pa butemwe bwitumwesha Yehoba ne Yesu. Yehoba witumwesha butemwe mu mashinda avula, bino kuji jishinda jimo jakila onse. Lesa wetu witumwesheshe butemwe bukatampe kupichila mu kutuma Mwananji ye atemwisha kwiya na kwitumanamina ne kwitufwila. (Yoa. 3:16) Kabiji twayuka’mba Yesu naye wamwesheshe butemwe bukatampe kupichila mu kupana bumi bwanji na mambo a atweba. (Yoa. 15:13) Kafwako kyo twakonsha kupa Yehoba ne Yesu pa butemwe bo betumwesha ne. Bino twakonsha kumwesha’mba tusanta kupichila mu byo twikala bwikalo bwetu pa juba pa juba. (Kolo. 3:15) Kabiji tutanwa ku Kivuluko mambo tukeba kuvuluka butemwe bwitutemwa Yehoba ne Yesu ne kumwesha byo twibatemwa ne atweba.
15. Mambo ka bashingwa ne mikooko ikwabo o banemekela bupe bwa bukuzhi?
15 Twanemeka bingi bupe bwa bukuzhi. (Mat. 20:28) Bashingwa banemeka bukuzhi mambo po paimena luketekelo lwabo. Na mambo a lwitabilo lwabo mu kitapisho kya Kilishitu, Yehoba wibatela’mba baoloka kabiji amba baana banji. (Loma 5:1; 8:15-17, 23) Kabiji mikooko ikwabo nayo isanta pa bukuzhi. Na mambo a lwitabilo mu kitapisho kya Kilishitu, baji na bulunda bwawama ne Lesa, bakonsha kumwingijila mingilo yazhila ne kwikala na luketekelo lwa kupuluka “malwa akatampe.” (Lum. 7:13-15) Jishinda jimo bashingwa ne mikooko ikwabo jo bamwesheshamo’mba basanta pa bukuzhi, ke kutanwa ku Kivuluko pa mwaka pa mwaka.
16. Ñanyi kishinka kikwabo kitulengela kutanwa ku Kivuluko?
16 Kishinka kikwabo kitulengela kutanwa ku Kivuluko ke kya kuba’mba tukeba kukookela Yesu. Nangwa kya kuba twapusana luketekelo lwetu lwa kulutwe, atweba bonse pa muntu pa muntu tukeba kukookela mukambizho wapaine Yesu pa juba jo atendekeshe Kivuluko wa kuba’mba: “Saka muba kino mu kumvuluka.”—1 Ko. 11:23, 24.
ATWEBA BONSE BYO TUMWENAMO MU KUTANWA KU KIVULUKO
17. Kivuluko kitukwasha byepi kufwenya kwipi ne Yehoba?
17 Tufwenya kwipi ne Yehoba. (Yako. 4:8) Byonkatu byo twafunda, kutanwa ku Kivuluko kwitulengela kulanguluka pa luketekelo lwitupa Yehoba ne butemwe bukatampe bo betumwesha. (Yele. 29:11; 1 Yoa. 4:8-10) Umvwe ketulanguluke pa luketekelo lwa kine lwa kulutwe ne pa butemwe bwitutemwa Lesa bubula kupwa, butemwe bo twatemwa Yehoba bubayilako ne bulunda bwetu ne aye bukoselako.—Loma 8:38, 39.
18. Kulanguluka languluka pa byaubile Yesu kwitulengela kuba byepi?
18 Kitutundaika kulondela byaubanga Yesu. (1 Pe. 2:21) Mu moba a kunangijila ku Kivuluko, tuta muchima pa kutanga mashimikila a mu Baibolo aamba pa milungu yapeleleko ya bwikalo bwa kwa Yesu pano pa ntanda, pa lufu lwanji, ne pa lusanguko lwanji. Kepo mabanga pa juba ja Kivuluko, jashi jituvululamo butemwe bwitutemwa Yesu. (Efi. 5:2; 1 Yoa. 3:16) Inge twatanga pa muchima wa kwipana wa kwa Yesu ne kulanguluka langulukapo, kitulengela “kwendanga byonka byo aendanga.”—1 Yoa. 2:6.
19. Twakonsha kutwajijila byepi kwikala mu butemwe bwa Lesa?
19 Twafuukulapo kutwajijila kwikala mu butemwe bwa Lesa. (Yuda 20, 21) Tutwajijila kwikala mu butemwe bwa Lesa kupichila mu kwibikako kumukookela mu byonse, kuzhijika jizhina janji, ne kusangajika muchima wanji. (Maana 27:11; Mat. 6:9; 1 Yoa. 5:3) Kutanwa ku Kivuluko kwitulengela kwikala bwikalo bumwesha kuba’mba tubena kubuula Yehoba amba, ‘Mbena kukeba kutwajijila kwikala mu butemwe bwenu myaka na myaka!’
20. Ñanyi bishinka byawama byo tuji nabyo bitulengela kutanwa ku Kivuluko?
20 Nangwa luketekelo lwetu lwa kuya mwiulu nangwa kwikala pano pa ntanda, tuji na bishinka byakonsha kwitulengela kutanwa ku Kivuluko. Pa mwaka pa mwaka inge twapwila pa jino juba ja Kivuluko, tuvuluka lufu lwa muntu umo ye twatemwa aye Yesu Kilishitu. Kyakila pa byonse, tuvuluka butemwe bukatampe bwitumwesheshe Yehoba pa kwitupa Mwananji kwikala bukuzhi bwetu. Uno mwaka, Kivuluko kikekalako mabanga pa Kitanu pa 15 April 2022. Twatemwa Yehoba ne Mwananji, onkao mambo, pa juba ja kuvuluka lufu lwa kwa Yesu, kafwako kintu kyanema kukila kutanwa ku Kivuluko ne.
LWIMBO 16 Totai Yehoba pa Mwananji, Washingwa
^ Aba baji na luketekelo lwa kuya mwiulu ne baji na luketekelo lwa kwikala pano pa ntanda, bonse tutengela kutanwa ku Kivuluko pa mwaka pa mwaka. Uno mutwe waamba pa bishinka byawama bya mu Binembelo bitulengela kutaanwa ku Kivuluko ne byo tumwenamo mu kuba bino.
^ Abino byambo byatuntululwa ne kuba’mba: “Kasa muba bibye mu kundanguluka amiwa.” (Buku wa Lesa).
^ Pa kuba’mba muyukilepo byavula pa lulayañano lupya ne lulayañano lwa Bufumu, monai mutwe wa kuba’mba ‘Mukekala “Bufumu bwa Bañanga’” mu Kyamba kya Usopa kya October 15, 2014, ma. 15-17.
^ KULUMBULULA BYAMBO: Byambo bya kuba’mba bashingwa bashalapo bilumbulula bena Kilishitu bashingwa bakiji pano pa ntanda.
^ Umvwe mukeba kuyukilapo bikwabo pa bungauzhi bwaamba pa tubichi tubiji to baambapo pa Ezikyo kitango 37, monai buku wa kuba’mba Yehoba Pano Wabwezha Bupopweshi bwa Kine! ma. 130-135, mafu. 3-17.