Kechi tupopwelatu Yehoba mu bujibumba, pa kupwila, pa kubuñana ne pa kushonkena ne. Bino tumupopwela ne pa bunke bwetu ne pa kupopwela kwa kisemi. Ano o mashinda amo o mwakonsha kwingijisha pa kufunda Baibolo pa bunke bwenu nangwa pa kupopwela kwa kisemi:

• Nengezhai kupwila kwa kipwilo. Mwakonsha kufunda nangwa kwimba nyimbo yo mukengijisha pa kupwila ne kukwasha ba mu kisemi kunengezha byo bakakumbulapo pa kupwila.

• Tangai jishimikila ja mu Baibolo. Inge mwapwisha kutanga jishimikila, lengai kipikichala kya bintu byo mwatanga mu jishimikila nangwa kunemba bishinka byo mwafundamo.

• Tangai pa lulombelo lo banemba mu Baibolo ne kwisamba byo lwakonsha kwimukwasha kuwamishako milombelo yenu.

• Tambai vidyo uji pa jw.org ne kwisambapo na bakwenu nangwa kunemba bishinka byo mwaji kutemwa mu vidyo.

• Nengezhai bya kwamba mu mwingilo wa kusapwila ne kumwesha byo mukebyamba.

• Mwakonsha kumona bilengwa na Lesa ne kulanguluka langulukapo nangwa kwisamba pa byobyo bilengwa byo bibena kwimufunjishapo pe Yehoba. a