1. Mambo ka Kivuluko o kyaikela juba janema bingi mu mwaka? (Luka 22:19, 20)

 BANTU ba Yehoba bamona Kivuluko kya lufu lwa kwa Kilishitu kuba’mba ke juba janema bingi mu mwaka. Kino kyo kintu kyonkatu Yesu kyo akambizhe baana banji ba bwanga kuvulukanga. (Tangai Luka 22:19, 20.) Kuji bintu byavula bibena kwitulengela kuba’mba tukataanwe ku kino Kivuluko. Twayai twisambe pa bino bintu bimo.

2. Ñanyi bintu bimo bitulengela kutengela kutaanwa ku Kivuluko?

² Kivuluko kitulengela kulanguluka pa buneme bwa bukuzhi. Kituvululamo mashinda o twafwainwa kumwesheshamo lusanchilo pa kitapisho kya kwa Yesu. (2 Ko. 5:14, 15) Kabiji kitulengela kwikala na kimye kya kwikosesha atweba bene na bene. (Loma 1:12) Balongo ne banyenga bavula baleka kupwila nabo bataanwako pa mwaka pa mwaka ku kino Kivuluko. Bamo babwela kwi Yehoba na mambo a kwibatambwila bulongo ku balongo ne banyenga. Bantu bavula beya ku Kivuluko, batendeka kufunda Baibolo na mambo a bintu byawama byo bamona ne kumvwa. Abino byonse bitulengela kumona Kivuluko kwikala kintu kyanema bingi mu bwikalo bwetu.

3. Kivuluko kitukwatankanya byepi pamo mwaya ntanda yonse? (Monai kipikichala.)

³ Akilangulukai ne pa Kivuluko byo kitukwatankanya pamo mwaya ntanda yonse. Bakamonyi ba kwa Yehoba bapwila pamo mwaya ntanda kimye kya mabanga juba saka jibena kuya na kuzhika. Bonse tuteleka ku jashi jamba pa bukuzhi kyo bwanemena. Twimba nyimbo ya kutota Yehoba ibiji. Tupishamo bipashañano kabiji tukumbula’mba “amena” ku milombelo ina. Bipwilo byonse mwaya ntanda byuba bino bintutu bimo pa jino jonka juba. Yehoba  ne Yesu bomvwa bingi bulongo byo twibanemeka mu jino jishinda mwaya ntanda yonse.

4. Ñanyi bintu byo tusakwisambapo mu uno mutwe?

⁴ Mu uno mutwe, tusakwisamba ano mepuzho: Twakonsha kunengezha byepi muchima wetu pa mambo a Kivuluko? Twakonsha kukwasha byepi bantu bakwabo kumwenamo mu Kivuluko? Kabiji twakonsha kukwasha byepi balongo ne banyenga baleka kusapwila nangwa kupwila? Kukumbula ano mepuzho kusakwitukwasha kwinengezha kuba’mba tukataanwe ku jino juba janema bingi.

TWAKONSHA KUNENGEZHA BYEPI MUCHIMA WETU PA MAMBO A KIVULUKO?

5. (a) Mambo ka o twafwainwa kulangulukilanga pa ene mambo bukuzhi o bwanemena? (Sala. 49:7, 8) (b) Ñanyi bintu byo mwafunjilako ku vidyo wa kuba’mba Mambo ka Yesu o Afwijile?

⁵ Jishinda jimo janema jo twakonsha kunengezhezhamo muchima pa mambo a Kivuluko, ke kulanguluka pa buneme bwa kitapisho kya bukuzhi kya kwa Yesu Kilishitu. Kechi twakonsha kwikuula atweba bene ku bundengamambo ne lufu ne. (Tangai Sala. 49:7, 8; kabiji monai vidyo wa kuba’mba Mambo ka Yesu o Afwijile?) a Na mambo a butemwe, Yehoba wanengezhezhe Mwananji kwiya na kwitupulusha kabiji Yesu naye wipaine kwiya na kwitufwila. (Loma 6:23) Kulanguluka languluka pa bintu byawama bitubila Yehoba ne Yesu, kwitulengela kutwajijila kunemeka lunengezho lwa bukuzhi. Tusakwisamba pa bintu bimo byalengejile Yehoba kupana Mwananji kwikala bukuzhi, ne Yesu naye kwipana nangwa kya kuba kyakonsheshe kwibakatazha kuba bino. Patanshi, twayai twisambe pa kyalengejile kupana bukuzhi.

6. Ñanyi bintu byalengejile kupana bukuzhi?

⁶ Bukuzhi buji nobe mali o bapana kupota kintu kyaelekele. Muntu mutanshi aye Adama, byo bamulengele wajinga walumbuluka. Byo alengele mambo, wielejile bumi bwa myaka ne myaka aye mwine ne baana banji bonse pamo. Yesu wapaine bumi bwanji bwalumbuluka kwikala kitapisho kuba’mba apote kintu kyanema kyaelele Adama. Mu bwikalo bwanji bonse pano pa ntanda, Yesu “kechi walengelepo mambo ne, kabiji mu kanwa kanji kechi mwalupukilepo byambo bya bujimbijimbi ne.” (1 Pe. 2:22) Yesu byo afwile, wapaine bumi bwanji bwalumbuluka bwaesakene na bobwa bwaelele Adama.—1 Ko. 15:45; 1 Timo. 2:6.

7. Yesu byo ajinga pano pa ntanda, ñanyi meseko amo o apichilengamo?

⁷ Yesu byo ajinga pano pa ntanda, wakookejilenga Shanji wa mwiulu nangwa kya kuba wapichilenga mu meseko avula. Yesu byo ajinga mwanyike, wakookejilenga bansemi banji babujile kulumbuluka nangwa kya kuba aye wajinga walumbuluka. (Luka 2:51) Byo akomeneko, wakaine byamubuujilenga bantu bakwabo bakebelenga’mba abulenga kukookela bansemi banji ne kubula kwikala wa kishinka kwi Yehoba. Kabiji Yesu byo akomene, washinjile meseko afuminenga kwi Satana Diabola kubikapotu ne bintu Satana byo amwambijile’mba obe byakonsheshe kumulengela kubula kwikala wa kishinka kwi Yehoba. (Mat. 4:1-11) Satana wakebeshenga Yesu kulenga mambo pa kuba’mba abule kupana bukuzhi.

8. Ñanyi meseko akwabo achinchikile Yesu?

⁸ Yesu byo aingijilenga mwingilo wa kusapwila pano pa ntanda, wachinchikile ne meseko akwabo. Bamumanyikilenga ku balwanyi banji ne kukeba kumwipaya. (Luka 4:28, 29; 13:31) Kabiji kechi waumvwanga bulongo pa byalubankanyanga baana banji ba bwanga ne. (Mako 9:33, 34) Byo bakebelenga kumwipaya, bamumanyikile ne kumwambila mwenga. Kabiji wafwile lufu lwatama bingi luleta bumvu. (Hebe. 12:1-3) Kabiji wachinchikile lweseko lukatampe lwapeleleko kwa kubula Yehoba kumuzhikijila. b​—Mat. 27:46.

9. Kulanguluka pa kitapisho kya kwa Yesu kwimulengela kuba ka? (1 Petelo 1:8)

 ⁹ Yesu wamanamine bingi pa kubatu’mba apane bukuzhi. Yesu wapichile mu meseko avula bingi ne kupana bumi bwanji kwitukuula ku bundengamambo ne lufu. Kulanguluka languluka pa bino byonse kwitulengela kumutemwa bingi.​—Tangai 1 Petelo 1:8.

10. Bukuzhi bwalengejile Yehoba kumvwa byepi ku muchima?

¹⁰ Pano twayai twisambe pe Yehoba. Ñanyi kintu Yehoba kyo aubile pa kuba’mba Yesu apane bukuzhi? Yehoba ne Yesu baji na bulunda bwakosa bingi nabiji bobwa bwa mwana ne shanji. (Maana 8:30) Akilangulukai pe Yehoba byo aumvwinenga ku muchima, Mwananji aye Yesu byo apichilenga mu makatazho avula pano pa ntanda. Kwa kubula nangwa kuzhinaukatu ne, Yehoba kyamukolele bingi ku muchima pa kumona Mwananji byo bamumanyikilenga, kumukana ne kumweseka.

11. Ambaipo kintu kimo kimwesha Yehoba byo aumvwinenga ku muchima Yesu byo bamwipayile.

¹¹ Nsemi yense wafwishapo kala mwana, wayuka kuba’mba kino kileta bingi bulanda bukatampe. Twaketekela kuba’mba bafu bakasangulwa. Nangwa byonkabyo, inge twafwisha kitukola bingi ku muchima. Kino kitukwasha kuyuka Yehoba byo aumvwinenga ku muchima Mwananji byo amanaminenga ne kufwa pa joja juba mu kimye kya mwela wa mebele mu mwaka wa 33 C.E. c​—Mat. 3:17.

12. Ñanyi bintu byo twafwainwa kuba mu moba a kunangijila ku Kivuluko?

¹² Kutendeka luno kufika ne pa juba ja Kivuluko, mwakonsha kufunda pa bukuzhi pa Kupopwela kwa Kisemi nangwa pa lufunjisho lwa pa bunke. Mwakonsha kwingijisha Buku wa Kukwasha Bakamonyi ba kwa Yehoba Kukebakeba Bishinka nangwa mabuku akwabo akonsha kwimukwasha kuyukilapo bishinka bikwabo byaamba pa bukuzhi. d Kabiji londelai mutanchi wa kutanga Baibolo mu moba a Kivuluko uji mu Mutanchi wa Kupwila kwa Bwikalo ne Mwingilo wa Bena Kilishitu. Pa juba ja Kivuluko, mwafwainwa kutamba vidyo wanema bingi wa pa Kupopwela kwa Lukelo. Inge twanengezha michima ku Kivuluko, kiketupelela bingi kukwasha bakwetu nabo kumwenamo.​—Eze. 7:10.

KWASHAI BANTU KUMWENAMO

13. Ñanyi kintu kitanshi kyo twafwainwa kuba pa kuba’mba bantu bakwabo nabo bamwenemo mu Kivuluko?

¹³ Twakonsha kukwasha byepi bantu kumwenamo mu Kivuluko? Kintu kitanshi kyo  twafwainwa kuba ke kwibeta kwiya na kutaanwako. Kununga pa bantu bo twisamba nabo mu mwingilo, twafwainwa kunemba ne mutanchi wa bantu bo twayuka bo tukeba kwita kuba’mba bakeye na kutaanwako. Bano bakonsha kwikala balongo betu, bo twingila nabo ku nkito, bo tufunda nabo ku sukulu ne bantutu bakwabo bo twayuka. Nangwa kya kuba kechi tuji na tupepala twa kwichilapo bantu ku Kivuluko twavula ne, twakonsha kwibatumina misabilo pa kiñambañamba kyabo. Inge twauba bino, bavula bakonsha kwiya na kutaanwako ku Kivuluko.​—Sapwi. 11:6.

14. Lumbululai ene mambo o kyanemena kupa muntu kapepala ka kumwichilapo ku Kivuluko.

¹⁴ Inge mwatwajila muntu kapepala ka kumwichilapo ku Kivuluko, kino kimutundaika kwiya na kutaanwako. Juba jimo, nyenga wasongolwa ku muntu wabula Kamonyi, wakuminye bingi mwatawanji byo amubuujile’mba usakuya nanji na kutaanwa ku Kivuluko. Ñanyi kintu kyamulengejile kukumya? Mambo pa bimye byavula wamwitanga kuya na kutaanwa ku Kivuluko, bino kechi wayangako ne. Pano ñanyi kintu kyalengejile kuba’mba aswe kuya na kutaanwako pa kikye kimye? Waambile’mba: “Bampele kapepala ka kungichilapo kuya na kutaanwa ku Kivuluko.” Kabiji mukazhanji wamulumbulwijile’mba mukulumpe umo mu kipwilo ye ayuka ye wamwichile kuya na kutaanwako. Kufumatu yewa mwaka, mwatawanji watwajijile kutaanwa ku Kivuluko.

15. Ñanyi bintu byo twafwainwa kuvulukanga inge tubena kwita bantu kwiya na kutaanwa ku Kivuluko?

¹⁵ Vulukainga kuba’mba bantu beya na kutaanwa ku Kivuluko bakonsha kwikala na mepuzho kikatakata inge kyo kimye kitanshi kutaanwako ku kupwila kwetu. Onkao mambo, twafwainwa kulanguluka pa mepuzho o bakonsha kwitwipuzha ne kwinengezhezha jimo kwiakumbula. (Kolo. 4:6) Bamo bakonsha kwiipuzha mepuzho nabiji a kuba’mba: ‘Ñanyi bintu bikekalako?’ ‘Kupwila kukekala kwa maola anga?’ ‘Bivwalo bya mutundu ka byo nafwainwa kuvwala?’ ‘Nanchi nafwainwa kupana mali pa kuba’mba ntaanweko nyi?’ ‘Nanchi bakapishamo nsanyi ya kubikamo mali nyi?’ Onkao mambo, inge tubena kwita muntu kuya na kutaanwa ku Kivuluko, twafwainwa kumwipuzha’mba: “Nanchi muji  na mepuzho nyi?” Kepo twafwainwa kukumbula mepuzho onse o aipuzha. Kabiji twakonsha kwingijisha vidyo wa kuba’mba Kuvuluka Lufu lwa kwa Yesu ne wa kuba’mba Ñanyi Bintu Byubiwa pa Nzubo ya Bufumu? pa kuba’mba tukwashe muntu kuyuka bikala kupwila kwetu. Lufunjisho 28 luji mu buku wa kuba’mba Mukekala Myaka, muji bishinka byawama byo twakonsha kwisamba nanji.

16. Ñanyi bintu bikwabo bantu bataanwa ku Kivuluko byo bakonsha kukeba kuyuka?

¹⁶ Bantu bataanwa ku Kivuluko bakonsha kwikala na mepuzho akwabo. Bakonsha kukumya ene mambo o babujile kumonapo muntu nangwa umo na kuja shinkwa nangwa kutoma binyu nangwa ene mambo bantu bachechetu bo bajiile shinkwa ne kutoma binyu. Kabiji bakonsha kukumya ene mambo o twikela na Kivuluko jimotu mu mwaka. Kabiji bakonsha kukeba kuyuka inge Bakamonyi ba kwa Yehoba bapwila mu jishinda jimotu. Nangwa kya kuba abino byonse bebyambapo mu Jashi ja Kivuluko, bantu bataanwako kimye kitanshi bakonsha kukeba kwibalumbulwila bulongo. Mutwe uji pa jw.org wa kuba’mba “Mambo ka Bakamonyi ba kwa Yehoba o Bavulukila Kijiilo kya Nkambo kya Mabanga mu Jishinda Japusanako na Bupopweshi Bukwabo?” wakonsha kwitukwasha kukumbula mepuzho abo amo. Tukeba kwingila papelela bulume bwetu kukwasha bantu bonse baji “na michima ya bukishinka” kumwenamo mu kuno kupwila. Twafwainwa kuba bino Kivuluko saka kikyangye kufika, kimye kya Kivuluko ne panyuma ya Kivuluko.​—Byu. 13:48.

KWASHAI BALEKA KUSAPWILA NANGWA KUPWILA

17. Bakulumpe mu kipwilo bakonsha kukwasha byepi baleka kusapwila nangwa kupwila? (Ezikyo 34:12, 16)

¹⁷ Mu kimye kya Kivuluko, bakulumpe mu kipwilo bakonsha kukwasha byepi baleka kusapwila nangwa kupwila? Bamweshai’mba mwibata bingi muchima. (Tangai Ezikyo 34:12, 16.) Kivuluko saka kikyangye kufika, mwafwainwa kwibavululamo kwiya na kutaanwako. Babuulai’mba mwibatemwa kabiji amba mubena kukebesha bingi kwibakwasha. Ingijishai mashinda onse kwibeta kwiya na kutaanwa ku Kivuluko. Umvwe baiya, mwafwainwa kwibatambwila na lusekelo. Kivuluko inge kyapita, twajijilai kwibafwakesha  nangwa kwibatumina foni bano balongo ne banyenga pa kuba’mba mwibakwashe kubwela kwi Yehoba.​—1 Pe. 2:25.

18. Atweba bonse twakonsha kuba byepi pa kuba’mba tukwashe baleka kusapwila nangwa kupwila? (Loma 12:10)

¹⁸ Atweba bonse mu kipwilo twakonsha kukwasha baleka kusapwila nangwa kupwila kutaanwa ku Kivuluko. Mu ñanyi jishinda? Twafwainwa kwibamwesha butemwe, kifyele ne kwibanemeka. (Tangai Loma 12:10.) Tuvulukenga kuba’mba bano balongo ne banyenga kyakonsha kwibakatazha kutendeka kupwila jikwabo. Kampe balanguluka’mba balongo ne banyenga mu kipwilo kechi bakonsha kwibatambwila bulongo ne. e Onkao mambo, twafwainwa kuchinuzhuka kwibepuzha mepuzho akonsha kwibalengesha bumvu nangwa kwamba bintu byakonsha kwibakozha ku muchima. (1 Tesa. 5:11) Bano balongo ne banyenga ke bakwetu ba mu lwitabilo. Kitusangajika bingi kupopwela Yehoba nabo pamo jikwabo.​—Sala. 119:176; Byu. 20:35.

19. Ñanyi bintu byo tumwenamo mu kuvuluka lufu lwa kwa Yesu?

¹⁹ Yesu witukambizhe kuvulukanga lufu lwanji pa mwaka pa mwaka kabiji kino kitusangajika bingi. Inge twauba bino, tumwenamo bintu byawama atweba bene ne bakwetu pamo mu mashinda avula. (Isa. 48:17, 18) Kino kitulengela kutwajijila kutemwa Yehoba ne Yesu. Tumwesha lusanchilo pa byo betubila. Bulunda bwetu na bakwetu bena Kilishitu bukoselako. Kabiji twakonsha kukwasha bantu bakwabo kumwenamo byawama mu bukuzhi. Twayai twibikeko kuba bintu byakonsha kwitulengela kwinengezha kutaanwa ku Kivuluko, juba janema bingi mu mwaka.