1. Inge ke mulanguluke pa biji Yehoba, ñanyi bintu biiya mu milanguluko yenu?

 NANCHI mwakifwanyikizhapo kala Yehoba byo aji nyi? Inge mubena kwisamba nanji mu lulombelo, ñanyi bintu byo mulangulukapo? Yehoba kechi twakonsha kumumona ne. Pano bino, Baibolo wamulumbulula mu mashinda apusana pusana. Yehoba bamutela’mba “jo juba jetu kabiji jo jikebo jetu,” kabiji amba “mujilo usokañana.” (Sala. 84:11; Hebe. 12:29) Mu kimwesho kyo amwene, Ezikyo walumbulwile Yehoba amba uji nobe jibwe ja safila, kyela kibekauka ne kyeya kyamwekelenga nobe kakongolo. (Ezi. 1:26-28) Ano mashinda o bamulumbulwilamo Yehoba akonsha kwitulengela kukankamana nangwa kumvwa moyo.

2. Ñanyi bintu byakonsha kulengela bantu bamo kukankalwa kufwenya kwipi ne Yehoba?

² Na mambo a kuba’mba kechi tumumona Yehoba ne, kyakonsha kwitukatazha bingi kuswa kuba’mba witutemwa. Bamo balanguluka’mba Yehoba kechi wakonsha kwibatemwa ne, na mambo a bintu byatama byo bapichilemo mu bwikalo bwabo. Kampe kechi bajingapo na bashabo bebatemenwe ne. Yehoba wayuka byo tumvwa ku muchima ne byo kyakonsha kwitukatazha kufwenya kwipi ne aye. Pa kuba’mba etukwashe kuyuka byo aji, witubuula kupichila mu Mambo anji kuba’mba ye Lesa wa kifyele.

3. Mambo ka o twafwainwa kufunjila pa butemwe bwa Yehoba?

³ Butemwe kyo kyambo kilumbulula bulongo Yehoba byo aji. (1 Yoa. 4:8) Baibolo waamba’mba Lesa butemwe. Butemwe bo bumulengela kuba bintu byonse byo oba. Butemwe kyo kyubilo kikatampe kimulengela kubila byawama bantu bonse, bamutemwa ne babula kumutemwa. (Mat. 5:44, 45) Mu uno mutwe, tusakwisamba bingi pe Yehoba ne pa butemwe bwanji. Kufunda byavula pe Lesa kuketulengela kumutemwa bingi.

 YEHOBA WITUTEMWA BINGI

4. Kuyuka’mba Yehoba wa kifyele kwitulengela kumvwa byepi ku muchima? (Monai kipikichala.)

⁴ “Yehoba ye wa kifyele.” (Yako. 5:11) Mu Baibolo, Yehoba wiesakanya aye mwine ku mwanamukazhi wa kifyele. (Isa. 66:12, 13) Akilangulukai pa inetu wa butemwe byo ata muchima mwananji wa lukeke. Umushikula ne kumuzemauna pa maulu na kifyele ne kwamba nanji na jiwi jakooka ja lusekelo. Inge mwana watendeka kujila nangwa kampe paji bibena kukola, umubila bintu byonse byo abena kukeba. Ne atweba inge paji kibena kwitukatazha, twakonsha kuketekela Yehoba kwitukwasha. Nembi wa Masalamo wanembele’mba: “Bijikila byamvujiile, anweba mwantekeneshe ne kunsangajika.”​—Sala. 94:19.

5. Butemwe bwa Yehoba bubula kwaluka bwitukwasha byepi?

⁵ Yehoba ye wa butemwe bubula kwaluka. (Sala. 103:8) Aye kechi witusankilapo nangwa inge twauba kintu kyatama ne. Kisaka kya Isalela kyafichishanga bingi Yehoba ku muchima pa bimye byavula. Pano bino na mambo a butemwe bwanji, walekelangako mambo bantu banji balapilanga ne kuleka bintu byatama byo baubanga. Waambijile kisaka kya Isalela amba: “Wanemene bingi kwi amiwa, nakunemekele kabiji nakutemenwe bingi.” (Isa. 43:4, 5) Butemwe bwa Lesa kechi bwaaluka ne. Twafwainwa kutwajijila kuketekela Yehoba kwitukwasha. Nangwatu inge twalenga mambo akatampe, Yehoba kechi witusankilapo ne. Inge twalapila ne kubwela kwi Yehoba, aye ukatwajijila kwitutemwa. Walaya’mba ‘uketulekelako mambo etu onsetu.’ (Isa. 55:7) Baibolo walumbulula’mba kwitulekelako mambo kukalengela Yehoba ‘kwitukokolosha.’​—Byu. 3:19.

6. Kinembelo kya Zekaliya 2:8 kitufunjishapo ka pe Yehoba?

⁶ Tangai Zekaliya 2:8. Na mambo a kuba’mba Yehoba witutemwa, uyuka biji mu michima yetu kabiji ukebesha kwituzhikijila. Umvwa bingi kutama ku muchima inge tubena kupita mu makatazho. Onkao mambo, twafwainwa kuketekela kuba’mba ukakumbula milombelo yetu inge twamulomba’mba: “Ndamai nobe kantu ka pa jiso jenu.” (Salamo 17:8) Jiso ke kinungwa kya ku mubiji kyanema bingi kabiji kechi jikeba kwijitowa ne. Onkao mambo, Yehoba witwesakanya ku kantu ka pa jiso janji. Kijitu nobe ubena kwamba’mba, ‘Muntu yense wakonsha kwimuba kyatama, anweba bantu bami, ko kuba’mba ubena kukeba konauna kintu kyami kyanema bingi.’

7. Mambo ka o twafwainwa kushiinwa’mba Yehoba witutemwa?

 ⁷ Yehoba ukeba’mba tushiinwe kuba’mba witutemwa atweba bonse pa muntu pa muntu. Pano bino wayuka’mba na mambo a bintu byo twapichilemo kala, twakonsha ke tuzhinauke inge wakonsha kwitutemwa nangwa ne. Nangwa kampe luno tubena kupita mu bintu byakonsha kwitulengela kubula kushiinwa’mba Yehoba witutemwa. Ñanyi kintu kyafwainwa kwitulengela kushiinwa’mba Yehoba witutemwa? Ke kufunda pe Yehoba byo atemwa Yesu, bashingwa ne atweba bonse.

YEHOBA BYO AMWESHA BUTEMWE BWANJI

8. Mambo ka Yesu o ashiinwe’mba Bashanji bamutemwa?

⁸ Yehoba ne Mwananji baikala pamo myaka yavula bingi ya kukankalwa kubala kukila bilengwa byonse. Pa myaka yavula yo baikele pamo mwiulu, baikele na bulunda bwakosa bingi. Yehoba wamwesheshe’mba watemwa bingi Yesu byonka byaamba Mateo 17:5. Yehoba inge wakebelenga inge waambiletu’mba: ‘Uno ye muntu mo mmwena lusekelo.’ Pano bino byo akebelenga kuba’mba tuyuke’mba watemwa bingi Yesu, wamutelele amba “Mwanami ye natemwa.” Yehoba wasekejile mwi Yesu ne mu mwingilo ye amupele. (Efi. 1:7) Yesu kechi wazhinaukanga pa butemwe bwajinga na Bashanji pe aye ne. Wayukile kufuma panshi ya muchima kuba’mba Bashanji bamutemenwe bingi. Wabwezhezhe bwezhezhengapo kwamba’mba Bashanji bamutemenwe bingi.​—Yoa. 3:35; 10:17; 17:24.

9. Ñanyi kyambo kimwesha Yehoba byo atemwa bashingwa? Lumbululai. (Loma 5:5)

⁹ Kabiji Yehoba umwesha’mba watemwa bingi bashingwa (Tangai Loma 5:5.) Akimonai kyambo kya kuba’mba “bebuyuzha.” Buku umo waamba pa bya mu Baibolo walumbulula’mba “buno butemwe buji nobe mema abena kukonkolokela pe atweba kufuma mu kakola.” Ino ndumbulwilo ya byambo yamwesha patoka kuba’mba Yehoba watemwa bingi bashingwa. Bashingwa nabo bayuka kuba’mba ‘Lesa wibatemwa.’ (Yuda 1) Mutumwa Yoano waambile pa bashingwa byo bomvwa ku muchima byo anembele amba: “Monai butemwe Tata bo etutemwa, pa kwitutela’mba baana ba Lesa!” (1 Yoa. 3:1) Pano nanchi Yehoba watemwatu bashingwa kwapwa nyi? Ine. Yehoba witutemwa atweba bonse.

10. Ñanyi kintu kikatampe kimwesha’mba Yehoba wimutemwa bingi?

¹⁰ Ñanyi kintu kikatampe kimwesha’mba Yehoba witutemwa? Ke bukuzhi. Kabiji buno bukuzhi bumwesha butemwe bukatampe bo etumwesha kukila butemwe bwakonsha kwitumwesha muntu yense. (Yoa. 3:16; Loma 5:8) Yehoba wapaine Mwananji ye atemwa bingi kufwila bantu bonse pa kuba’mba etukuule ku bundengamambo ne kwikala balunda nanji. (1 Yoa. 4:10) Kulanguluka languluka pa kintu kyanema kitubila Yehoba ne Yesu kuketulengela kuyuka’mba betutemwa bingi atweba bonse pa muntu pa muntu. (Nga. 2:20) Bololoke kechi bo bwalengejile Yehoba kupana bukuzhi pa kuba’mba abwezhe kyokya kyaelekele ne. Wibupaine na mambo a butemwe. Yehoba wamwesha’mba witutemwa bingi byo apaine kintu kyanema bingi kwi aye, ko kuba’mba Yesu. Yehoba waswishishe Mwananji kwiya na kumanama ne kwitufwila.

11. Ñanyi kintu kyo twafunda pa kinembelo kya Yelemiya 31:3?

¹¹ Byonka byo twisambapo kala, Yehoba kechi umweshatu’mba witutemwa ne, bino witubuula ne kuba’mba witutemwa bingi. (Tangai Yelemiya 31:3.) Yehoba witukokela kwi aye mambo witutemwa bingi. (Esakanyaiko Mpitulukilo ya mu Mizhilo 7:7, 8.) Kafwako kintu nangwa muntu wakonsha kwitwabanya na butemwe bwanji ne. (Loma 8:38, 39) Pano nga buno butemwe bwimulengela kumvwa byepi ku muchima? Tangai Salamo 23 ne kumona Davida byo aumvwine pa  butemwe ne kifyele kyamumwesheshe Yehoba, ne anweba kino byo kyakonsha kwimutundaika.

BUTEMWE BWA YEHOBA BWIMULENGELA KUMVWA BYEPI?

12. Mwakonsha kulumbulula byepi Salamo 23?

¹² Tangai Salamo 23:1-6. Salamo 23 ke lwimbo witulengela kuketekela’mba Yehoba witutemwa kabiji wa kifyele. Davida nembi wa uno Salamo, walumbulwile bulunda bwakosa bo ajinga nabo ne Yehoba Kafunga wanji. Davida waumvwanga kuzhikijilwa na mambo a kumutangijila kwi Yehoba kabiji kino kyamulengejile kuketekela bingi mwi aye. Davida wayukile’mba Yehoba ukatwajijila kumumwesha butemwe mu bwikalo bwanji bonse. Pano ñanyi kintu kyamulengejile kushiinwa’mba Yehoba ukatwajijila kumutemwa?

13. Mambo ka Davida o aketekejile’mba Yehoba ukatwajijila kumuta muchima?

¹³ “Kechi nkakajilwa kintu nangwa kimo ne.” Davida wayukile’mba Yehoba wamutele muchima mambo wamubilanga byonse byo akebanga. Davida wayukile’mba Yehoba wajinga mulunda nanji kabiji wamubilanga bibusa. O ene mambo o ayukijile’mba nangwa bintu bikakatazhepotu byepi kulutwe, Yehoba ukatwajijila kumubila bintu byonse byo akeba. Na mambo a kuba’mba Davida wayukile’mba Yehoba wamutemenwe bingi ne kumuta muchima, kino kyamulengejile kubula kwikala na bijikila ne kutwajijila kwikala wa lusekelo.​—Sala. 16:11.

14. Yehoba umwesha byepi’mba wituta muchima?

¹⁴ Yehoba wituta bingi muchima kikatakata inge bintu byatama bitumwekela mu bwikalo bwetu. Claire, a waingijila pa Betele myaka kukila pa 20, kechi wayukile bya kukwasha kisemi kyanji byo bapichilenga mu makatazho akatampe ne. Bashanji bakolelwe kikola kya kalepu  (stroke), nkasanji wamukazhi bamupangile mu kipwilo, busulu bwa kisemi bwaponene kabiji bebangachile nzubo ku ba ku banki. Yehoba wamwesheshe byepi’mba wibata muchima? Claire waambile’mba: “Yehoba watwajijile kukwasha ba mu kisemi kyami kabiji wibapelenga byonse byo bakebelenga pa juba pa juba. Yehoba witupelenga bintu byavula bingi kukila ne byo twakebelenga. Javula ndanguluka pe Yehoba byo etukwasha kabiji kechi nkalubamo butemwe bo etumwesha ne. Bino bintu byonse bitubila Yehoba byankwasha kutwajijila kumwingijila na lusekelo nangwa kya kuba mbena kupita mu makatazho akwabo.”

15. Mambo ka Davida o aumvwijile’mba bamukokolosha? (Monai kipikichala.)

¹⁵ “Unkokolosha.” Pa bimye bimo Davida waikalanga na bijikila na mambo a makatazho ne meseko o apitangamo. (Sala. 18:4-6) Nangwa byonkabyo, Yehoba wamukokoloshanga mambo wamutele muchima ne kumumwesha kifyele. Yehoba watangijilanga mulunda nanji wajinga na makatazho ku “munyemvu wavula” ne ku “mapunzha a kukokolokelamo kwavula mema.” Kino kyalengejile Davida kwikala na bulume ne kutwajijila kwingijila Yehoba na lusekelo.​—Sala. 18:28-32.

16. Butemwe bwa Yehoba bwimukokolosha byepi?

¹⁶ Po pamotu ne lelo jino, “na mambo a butemwe bwa Yehoba bubula kwaluka kechi twavila” byo tubena kupita mu meseko ne makatazho a mu bwikalo bwetu ne. (Jila. 3:22; Kolo. 1:11) Akilangulukai pa byamwekejile Rachel. Wajinga bingi na binyenge kimye mwatawanji kyo amushile ne kuleka kwingijila Yehoba mu kimye kya mwalo wa COVID-19. Yehoba wamukwashishe byepi? Waambile’mba: “Yehoba watwajijile kummwesha butemwe. Waingijishenga balunda nami kwikala pamo ne amiwa, kundetela kajo, kuntumina Binembelo pa foni ne kuntundaika, kuseka nabo kabiji bamvulwilengamo kuba’mba Yehoba watwajijila kunta muchima. Nsanchila bingi Yehoba pa kumpa kisemi kimmwesha butemwe.”

17. Mambo ka Davida o aambijile’mba “kechi nchiina kunkozha ne”?

¹⁷ “Kechi nchiina kunkozha ne, mambo muji ne amiwa.” Javula bumi bwa kwa Davida bwaikalanga mu kizumba, kabiji wajinga na balwanyi bavula bajinga bingi na bulume. Nangwa byonkabyo, kumutemwa kwi Yehoba kwamulengelanga kumvwa kuzhikijilwa. Mu makatazho onse o apitangamo, Davida wayukile’mba uji ne Yehoba kabiji kino kyamutekeneshanga bingi. O ene mambo o aimbijile’mba: “[Yehoba] wampokolwele ku bintu byonse byangubishenga moyo.” (Sala. 34:4) Pa bimye bimo Davida waumvwanga bingi moyo. Pano bino, kuyuka’mba Yehoba wamutemwa kwamulengelanga kuleka kumvwa moyo.

18. Kuyuka kuba’mba Yehoba wimutemwa kwimukosesha byepi inge mwaumvwa moyo?

¹⁸ Kuyuka’mba Yehoba witutemwa kwitukosesha  byepi inge tubena kupita mu makatazho akonsha kwitulengela kumvwa moyo? Painiya aye Susi walumbulula aye ne mwatawanji byo baumvwine ku muchima kimye mwanabo wa mulume kyo eipayile. “Kintu kyatama inge kyakumwekela kipezha bingi maana ne kupwisha bulume. Pano bino tumvwa kuzhikijilwa na mambo a kuba’mba Yehoba witumwesha kifyele.” Rachel ye twaambapo kala waambile’mba: “Juba jimo bufuku muchima wami byo alukuchile na mambo a kwakamwa ne kumvwa moyo, nalombele na jiwi ja peulu kwi Yehoba. Ponkapotu naumvwine’mba Yehoba wankokolosha byonkatu inetu byo alelezha mwana waji kujilanga ne kuponena mu tulo. Kwambatu kine, kechi nkalubamo bino bintu byammwekejile ne.” Mukulumpe mu kipwilo aye Tasos bamukashile mu kaleya myaka ina na mambo a kukana kutwela bushilikale. Yehoba wamwesheshe byepi amba wamutemwa ne kumuta muchima? Waambile’mba: “Yehoba wangubijile bintu byavula bingi kukila ne byo nakebelenga. Kino kyandengejile kushiinwa ne kuketekela mwi aye na muchima wami yense. Kabiji kwingijisha mupashi wanji, Yehoba wankwashishe kwikala na lusekelo nangwa kya kuba napichilenga mu makatazho avula bingi mu kaleya. Kino kyankwashishe kuyuka’mba inge natwajijila kuketekela mwi Yehoba, aye ukatwajijila kuntemwa. Onkao mambo, naikele painiya wa kimye kyonse saka nji mu kaleya.”

FWENYAI KWIPI NE LESA WENU UJI NA KIFYELE

19. (a) Twakonsha kulomba byepi inge twayuka’mba Lesa witutemwa? (b) Ñanyi binembelo byaamba pa butemwe bwa Yehoba byo mwatemwa bingi anweba pa bunke bwenu? (Monai kakitenguluzha ka kuba’mba “ Binembelo Bitukwasha Kuyuka’mba Yehoba Witutemwa Bingi.”)

¹⁹ Bintu byonse byo twisambapo byamwesha patoka kuba’mba Yehoba, “Lesa wa butemwe” uji ne atweba. (2 Ko. 13:11) Wituta muchima atweba bonse pa muntu pa muntu. Twashiinwa kuba’mba ‘betuzhokoloka ku butemwe bwanji bubula kwaluka.’ (Sala. 32:10) Inge twatwajijila kulanguluka languluka pa butemwe bo etumwesha, tumona byo etuta muchima kabiji tufwenya kwipi ne aye. Twakonsha kulomba kwi aye saka twakasuluka ne kumubuula kuba’mba tukeba aye kutwajijila kwitutemwa. Twakonsha kumubuula bijikila byonse byo tuji nabyo ne kushiinwa kuba’mba umvwa byo tumubuula kabiji ukebesha kwitukwasha.​—Sala. 145:18, 19.

20. Butemwe bwa Yehoba bwitulengela kufwenya byepi kwipi ne aye?

²⁰ Byonkatu byo tufwenya ku mujilo inge kuji mashika pa jojo juba, ne butemwe bwa Yehoba byobyo bwitulengela kufwenya kwipi ne aye. Nangwa kya kuba Yehoba witutemwa bingi, bino witumwesha ne kifyele. Onkao mambo, twafwainwa kwikala na lusekelo mambo Yehoba witutemwa. Na mambo a kuba’mba Yehoba witutemwa, twayai ne atweba twambe’mba: “Namutemwa Yehoba”!​—Sala. 116:1.