BENA KILISHITU batanshi baingijile bingi na mukoyo kusapwila “mambo awama a Bufumu” ku bantu bavula. (Mat. 24:14) Bamo bayile na kusapwila mu byalo bingi. Mutumwa Paulo wayile na kusapwila ku kibunji kitelwa luno amba Turkey, kabiji waingijile bingi na mukoyo mwingilo wanji wa bumishonale. * Byo kyafikile mu 2014, saka papita myaka 2,000, mu kyalo kya Turkey mwajinga mukwekele wiikajila wa kusapwila. Ki ka kyalengejile’mba kwikale uno mukwekele? Kabiji bañanyi baingijileko mu uno mukwekele?

Mu kyalo kya Turkey muji basapwishi kukila pa 2,800, bino bantu bonse mu kino kyalo baji 79 milyonyi. Kino kibena kulumbulula’mba musapwishi umo wafwainwa kusapwila bantu 28,000. Na mambo a kino, basapwishi basapwijilekotu bantu bacheche ba mu kino kyalo. O ene mambo o kwaikejile mukwekele wiikajila pa kuba’mba basapwile ku bantu bavula. Balongo ne banyenga nobe 550 bayuka mulaka wa ku Turkey, bafumine mu byalo mo bajinga ne kuya ku Turkey. Baingijile pamo na basapwishi ba mu kino kyalo mu uno mukwekele wiikajila. Ki ka kyafuminemo?

Basapwijile ku bantu bavula. Kipwilo kimo kya mu muzhi wa Istanbul kyanembele’mba: “Bantu byo betumwenenga, baipwizhenga’mba: ‘Nanchi muji na kushonkena kuno nyi? Mambo twamona Bakamonyi ba kwa Yehoba bajitu konse konse!’” Kabiji kipwilo kiji mu muzhi wa Izmir kyanembele’mba: “Mwanamulume umo wajinga po bemikila myotoka ya icheche waipwizhe mukulumpe mu kipwilo amba, ‘Ki ka kibena kubiwa mu nyaunda yetu? Nanchi luno mwatendeka kusapwila bingi kukila kala nyi?’” Kine, bantu bemwenejile basapwishi byo basapwijilenga.

Basapwishi bafumine mu byalo bingi baumvwine bingi bulongo pa kwingilako mu uno mukwekele. Ba Steffen bafumine ku kyalo kya Denmark, baambile’mba: “Moba onse inge naya na kusapwila, nataananga bantu babula kuyuka Yehoba. Naumvwanga bingi bulongo pa kuyuka’mba mbena kukwasha bantu kuyuka jizhina Yehoba.” Ba Jean-David bafumine ku France banembele’mba: “Twasapwijile maola avula mu mukwakwatu umo. Kino kintu kyawamine bingi. Bantu bavula kechi bayukile Bakamonyi ba kwa Yehoba ne. Pa mazubo onse betutambwijilenga bulongo kabiji  twisambilenga nabo, kwibatambisha mavidyo ne kwibashila mabuku.”

Balongo ne banyenga 550 baingijileko uno mukwekele bapele bantu mabuku 60,000 mu milungutu ibiji. Uno mukwekele walengejile kusapwila ku bantu bavula.

Kizaku kya kwingila mwingilo kyabayile. Uno mukwekele walengejile balongo ba mu kyokya kyalo kwikala na kizaku kya kwingila mwingilo. Bavula batendekele kulanguluka kutendeka mwingilo wa kimye kyonse. Bapainiya mu kyalo kya Turkey bavujijileko bingi pa bañondo 12 balondejilepo kufuma kimye kya uno mukwekele.

Balongo ne banyenga bafumine ku byalo bingi baambile’mba kwingilako uno mukwekele kwibakwasha ne byo babwela kwabo. Nyenga Şirin, wafumine ku Germany, wanembele’mba: “Balongo ba ku kyalo kya Turkey bengila bingi bulongo busapwishi bwa kushukilwa. Amiwa naumvwanga bumvu kwingilako busapwishi bwa kushukilwa. Naubile bingi bulongo pa kwingilako uno mukwekele, mambo bintu byo nafunjilako ku balongo ba mu Turkey, kubikapotu ne milombelo yo nalombelenga, byankwashishe kukepeshako bumvu. Nayile ne na kusapwila pa kiteshenyi ne kupa bantu matalakiti. Luno kechi ñumvwa bumvu byonka byo naumvwanga kala ne.”

Mulongo Johannes wafumine ku Germany waambile’mba: “Kwingilako uno mwingilo kwamfunjishe bintu byavula. Balongo mu Turkey bakebesha kufunjisha bantu bavula bukine. Basapwila konse ko bataana bantu. Byo nabwelele ku Germany, ne amiwa nafuukwilepo kwingila byonka byo bengila. Luno nebikako kusapwila ku bantu bavula kukila kala.”

Nyenga Zeynep wafumine ku France waambile’mba: “Uno mukwekele wankwashishe kuwamishako busendwe bwa kusapwila. Wankwashishe kwingila mwingilo kwa kubula moyo ne kuketekela mwi Yehoba.”

Basapwishi bakwatankene bingi. Bavula batundaikilwe bingi pa kumona balongo bafumine mu byalo byapusana pusana byo betemwa ne kukwatankana. Jean-David, ye twaambapo kala waambile’mba: “Twimwenejile balongo byo batambwila benyi bulongo.” Kabiji wanungilepo’mba: “Betumonangatu amba twi balunda nabo kabiji nobe balongo bo basemwa nabo. Betutambwijile mu mazubo abo. Natangangatu mu  mabuku etu amba twi banabankazhi ba ntanda yonse, pano luno nemwena na meso. Kyandengejile kumvwa bingi bulongo na mambo a kwikala mu jibumba ja Yehoba, kabiji namusanchila bingi pa kunswisha kwingilako uno mukwekele.”

Nyenga Claire wafumine ku France waambile’mba: “Bamo bafumine ku Denmark, bakwabo ku France, Germany, ne ku Turkey, pano bino, twajingatu kisemi kimo. Kyajingatu nobe Lesa wafumyapo mipaka yonse ya byalo.”

Nyenga Stéphanie wafumine ku France wanungilepo’mba: “Uno mukwekele witufunjishe’mba kutemwa Yehoba ko kwitulengela kukwatankana, kechi bisho byetu nangwa milaka ne.”

Bavula bafumine mu byalo bikwabo batendekele kulanguluka pa kuvilukila ku Turkey kuba’mba bakaye na kukwashako mwingilo mukatampe ubena kukebewa kwingila. Bamo baviluka ne kala. Tubena kusanchila bingi balongo ne banyenga baya na kwingijila kubena kukebewa ba mingilo bavula.

Akilangulukai pa kajibumba ka basapwishi 25 kaikela ku mpunzha ya kwalepa bingi mu kino kyalo. Pa myaka yavula bingi, kwajingatu mukulumpe mu kipwilo umo. Fwanyikizhai basapwishi byo basangalele mu mwaka wa 2015, byo kwavilukijile balongo ne banyenga batanu na umo kufuma ku Germany ne ku Netherlands!

Nga aba baya na kwingijila ku Turkey bambapo’mba ka pa bwikalo bwabo kokwa? Bimye bimo bwikalo bukatazha, bino kwingijila kwakepa basapwishi mufuma byawama bingi. Umvwai byaambapo bamo:

Mulongo wasongola uji na myaka ya mu ma 40 wafumine ku Spain aye Federico, waambile’mba: “Kubula kwikala na bintu byavula bya ku mubiji, kwankwasha kubula kwikala na bya kutabataba ne kundengela kuta muchima pa bintu byanemesha.” Abya watundaikile bakwabo kwingilako uno mwingilo nyi? Wakumbwile’mba: “Ee, kwa kubula nangwa kuzhinaukatu ne. Inge waya ku kyalo kikwabo na kukwasha bantu kuyuka Yehoba, ko kuba’mba wipana kwi aye kuba’mba akakuzhikijilenga. Kya kine, wakonsha kwimwena Yehoba byo alama bantu banji bulongo.”

 Mulongo mukwabo wasongola uji na myaka pepi na 60 wafumine ku Netherlands aye Rudy waambile’mba: “Kituletela bingi lusekelo kwingilako pakatampe mwingilo wa kusapwila, ne kufunjisha bantu bavula bingi babujile kumvwapo kala bukine. Kumona bantu byo basangalala inge bafunda bukine kwituletela bingi lusekelo.”

Mulongo wasongola uji na myaka ya mu ma 40 wafumine ku Germany, aye Sascha waambile’mba: “Kimye kyonse inge naya na kusapwila, ntaana bantu bakyangye kumvwapo kala bukine. Kukwasha bano bantu kuyuka Yehoba kundetela bingi lusekelo.”

Nyenga wasongolwa uji na myaka ya mu ma 30 wafumine ku Japan, aye Atsuko waambile’mba: “Kala nakebanga kuba’mba Amagedonyi iye bukiji. Bino byo twavilukijile ku Turkey, namusanchila Yehoba pa kubula kuleta Amagedonyi bukiji. Inge namona Yehoba byo abena kutangijila mwingilo wanji wa kusapwila, kindengela kufwenya kwipi ne aye.”

Nyenga uji na myaka ya mu ma 30 wafumine ku Russia, aye Alisa, waambile’mba: “Kwingijila Yehoba mu uno mwingilo kwandengela kutompa buwame bwanji.” (Sala. 34:8) Wanungilepo amba: “Yehoba waikala Mulunda nami kabiji Tata ye mbena kuyukilapo byavula pe aye mu bintu byapusana pusana byo mpitamo. Mpita mu bintu bindetela bingi lusekelo ne kwimwena byo ampesha!”

Mukwekele wa kusapwila wajingako mu Turkey walengejile bantu bavula kumvwa mambo awama. Pano bino, kukiji manyaunda avula bingi kuji bantu bakyangye kumvwapo mambo awama. Pa juba pa juba balongo ne banyenga baya na kwingijila ku Turkey bataana bantu bakyangye kufundapo pe Yehoba. Nanchi mwakonsha kutemwa kuya na kwingijila ku ano manyaunda nyi? Inge ibyo, twimutundaika’mba: “Inunai meso enu mumone majimi byo atoka kala afwainwa kunowa.” (Yoa. 4:35) Nanchi mwakonsha kuya na kukwashako mwingilo wa kusapwila mu byalo bikwabo muji majimi “atoka kala afwainwa kunowa” nyi? Umvwe ibyo, tendekaiko lonka luno kwinengezha pa kuba’mba mukafikizhe kikonkwanyi kyenu. Mwafwainwa kuyuka kino kishinka: Kwingilako pakatampe mu mwingilo wa kusampanya mambo awama “monse mwapela ntanda” kukemuletela bingi mapesho!—Byu. 1:8.