1, 2. (a) Mambo ka o kyaikela kintu kya maana kwikala ku lubaji lwa Yehoba? (b) Tusakwisamba pa ka mu uno mutwe?

KE KINTU kya maana kukakachila kwi Yehoba. Kafwako muntu uji na bulume, maana nangwa butemwe kukila Lesa wetu ne. Atweba bonse tukeba kwikala ku lubaji lwanji. (Sala. 96:4-6) Bino bapopweshi ba Lesa bamo bakankalwa kutwajijila kwikala ku lubaji lwa Yehoba umvwe bapita mu lukatazho.

² Mu uno mutwe, tusakwisamba pa bantu bamo baambanga’mba bajinga ku lubaji lwa Yehoba bino saka boba bintu bimufichisha ku muchima. Mashimikila abo anema bingi, mambo asakwitufunjisha byo twakonsha kutwajijila kwikala ba kishinka kwi Yehoba.

3. Mambo ka Yehoba o akwashishe Kaina, kabiji wamubuujile’mba ka?

³ Twayai twisambe pe Kaina. Walangulukanga’mba upopwela Yehoba kechi balesa ba bubela ne. Pano bino, Lesa wakaine mpopwelo yanji. Yehoba wamwene kuba’mba mu muchima wa kwa Kaina mwajinga byubilo byatama. (1 Yoa. 3:12) Yehoba wajimwineko Kaina amba: “Umvwe ube byawama, nanchi kechi nsakukutemwa nenyi? Pakuba inge ubule kuba byawama, bubi bwa kubelamina ku  kibelo, kabiji bubena kukeba kukukwata buzha; nanchi wakonsha kwibushinda nyi?” (Nte. 4:6, 7) Mu jishinda jikwabo, Yehoba wabuujilenga Kaina amba, “Inge walapila ne kufuukulapo kwikala ku lubaji lwami, ne amiwa nsakwikala ku lubaji lobe.”

4. Kaina wafwainwe kuba byepi pa kuba’mba ekale ku lubaji lwa Yehoba?

⁴ Umvwe Kaina wapimpwile milanguluko yanji, Yehoba inge watambwijile mpopwelo yanji. Bino Kaina kechi waswile bukwasho ne. Kubula kuleka milanguluko yanji yatama kwamulengejile kuba byatama. (Yako. 1:14, 15) Kaina byo ajinga mwanyike kechi walangulukilepo’mba ukasatukila Yehoba ne. Bino wakaine lujimuno lwa Lesa kabiji waipayile nkasanji.

5. Ñanyi ndangulukilo yakonsha kwitulengela kubula kwikala na bibusa bya Yehoba?

⁵ Byonka byajinga Kaina, mwina Kilishitu lelo jino wakonsha kubanga byubilo byatama bino saka abena kwamba’mba upopwela Yehoba. (Yuda 11) Wakonsha kutendeka kwikala na milanguluko ya bulalelale, nshiji nangwa kushikwa bakwabo bena kilishitu. (1 Yoa. 2:15-17; 3:15) Kwikala na bino byubilo kwakonsha kulengela muntu kulenga mambo. Wakonsha kupayankana mu busapwishi ne kupwila kimye kyonse. Kabiji bantu kechi bakonsha kuyuka milanguluko yetu nangwa bintu byo tuba ne, bino Yehoba umona byonse kabiji wayuka inge kine tuji ku lubaji lwanji.—Tangai Yelemiya 17:9, 10.

6. Yehoba witukwasha byepi kushinda bya kusakasaka byatama?

⁶ Nangwa byonkabyo, Yehoba kechi ufikenatu kwitusankilapo ne. Inge bantu bafuma mu jishinda janji, Yehoba Lesa wibatundaika’mba: “Bwelai kwi amiwa ne amiwa nkabwela kwi anweba.” (Mala. 3:7) Yehoba wayuka’mba kitukatazha kusankilapo byubilo byatama, bino ukeba’mba tushindenga bubi. (Isa. 55:7) Umvwe twauba bino, Lesa ukekala ku lubaji lwetu ne kwitukwasha kwikala na bulume bwa ‘kushinda’ bya kusakasaka byatama.—Nte. 4:7.

7. Solomone waonawine byepi bulunda bwanji ne Yehoba?

⁷ Twakonsha kufunjilako byavula kwi Mfumu Solomone. Byo ajinga mwanyike, watalanga kwi Yehoba kuba’mba amutangijile. Lesa wamupele maana ne mwingilo wa kushimika nzubo ya Lesa mu Yelusalema. Bino Solomone waonawine bulunda bwanji ne Yehoba. (1 Mfu. 3:12; 11:1, 2) Mizhilo ya Lesa yaambile’mba mfumu wa Bahebelu kechi “akevuzhizhe bakazhi ne, pa kuba’mba muchima wanji akabule kuya mungi.” (Mpitu. 17:17) Solomone kechi wakookejile uno muzhilo ne, wasongwele banabakazhi 700. Kabiji wajinga ne na bantombo 300. (1 Mfu. 11:3) Banabakazhi bavula bo asongwele kechi bajinga bena Isalela ne, bapopwelanga balesa ba bubela. Onkao mambo, Solomone walengulwile Muzhilo wa Lesa wakainye kusongola banabakazhi ba ku byalo bingi.—Mpitu. 7:3, 4.

8. Ñanyi bintu byaubile Solomone byafichishe Yehoba ku muchima?

⁸ Solomone byo alekele kukookela mikambizho ya Yehoba, mu kuya kwa kimye kyamulengejile kuba bintu byatama. Solomone washimikile kya kusokelapo bitapisho kwi lesa wa mukazhi Ashatoleta ne kikwabo kya lesa wa bubela Kemoshi. Watendekele kupopwela balesa ba bubela bapopwelanga bakazhi banji. Washimikile bino bya kusokelapo bitapisho mu mapunzha onse pa mutumba watalañana na Yelusalema, konka ko ashimikijile nzubo ya Yehoba. (1 Mfu. 11:5-8; 2 Mfu. 23:13) Kampe Solomone wijimbaikilenga mwine amba Yehoba  ukamulekelako mambo inge watwajijila na kupana bitapisho mu nzubo ya Lesa.

9. Ñanyi bintu byafuminemo Solomone byo alengulwile lujimuno lwa Lesa?

⁹ Yehoba kechi utalapotu inge muntu walenga mambo ne. Baibolo waamba’mba: “Yehoba wamuzhingijile Solomone, mambo muchima wanji wafumineko kwi Yehoba . . . , yenka wamwekele kwi aye jibiji ne kumujimunako pa mambo a kino kintu, kuba’mba kechi wafwainwa kupopwela balesa bangi ne. Bino aye kechi wakookejile mukambizho wa Yehoba ne.” Kyafuminemo, Lesa walekele kumukwasha. Baswaine Solomone pa bufumu kechi balaminenga kisaka kyonse kya bena Isalela ne, kabiji bisemi byonse byalondejilepo byapichilenga mu bya malwa byavula bingi.—1 Mfu. 11:9-13.

10. Ki ka kyakonsha konauna bulunda bwetu ne Yehoba?

¹⁰ Byonkatu byo kyajinga kwi Solomone, kintu kyonawina bingi bantu bulunda bwabo ne Lesa ke kupwanañana na bantu babula kuyuka ne kunemeka mizhilo ya Yehoba. Bamo bakonsha kwikala mu kipwilo, pano bino, bulunda bwabo ne Lesa saka bwakooka. Bakwabo bakonsha kwikala ba mu kisemi, bo mwikala nabo kipikipi, bo mwingila nabo nkito, nangwa bo mufunda nabo sukulu babula kupopwela Yehoba. Inge balunda netu kechi banemeka mizhilo ya Yehoba ne, bakonsha kwitonawina bulunda bwetu ne Lesa.

11. Ki ka kyakonsha kwitukwasha kuyuka balunda bo twafwainwa kuchinuzhuka?

¹¹ Tangai 1 Kolinda 15:33. Bantu bavula babula kupopwela Lesa bajiko na byubilo byawama, kabiji kechi boba bintu byatamishatu ne. Inge byo biji bantu bo mupwanañana nabo, nanchi mwakonsha kwamba’mba ke balunda bawama nyi? Mwafwainwa kwiipuzha inge kya kuba kupwanañana na bobo bantu kwakonsha kukosesha bulunda bwenu ne Yehoba. Nanchi bakonsha kwimukwasha kufwenya kwipi ne Lesa nyi? Ñanyi bintu byo banemeka mu bwikalo bwabo? Nanchi batemwa kwambatu pa mafwashonyi, mali, bipe, bya kisangajimbwe, nangwa kukeba kwikala na bintu byavula nyi? Nanchi javula batemwa kwamba byatama pa bakwabo nangwa kusengula kubi nyi? Yesu witujimwineko’mba: “Kanwa kamba monka mwavujila biji mu muchima.” (Mat. 12:34) Inge mwamona’mba bantu bo mupwanañana nabo bakonsha kwimonawina bulunda bwenu ne Yehoba, mwafwainwa kuleka kupwanañana nabo nangwatu kupwisha bulunda bwenu.—Maana 13:20.

12. (a) Ñanyi kintu Lesa kyo alumbulwijile bena Isalela byo bafuminetu mu Ijipita? (b) Bena Isalela baambile’mba ka Lesa byo ebabuujile’mba ukeba kumwingijilatu bunke bwanji?

¹² Twakonsha kufunjilako byavula ku kyamwekejile bena Isalela byo bafuminetu mu  Ijipita. Bantu bakonkene munshi ya mutumba wa Sinai. Yehoba wamonañene nabo mu jishinda ja kukumya. Ku mutumba kwafinjile jikumbi jafichiletu bwii. Yehoba walengejile mvula kutatauka ne kubesha, mutumba wafutumukilenga bwishi, kabiji kwajinga kyaumvwanyikilenga nobe kuvuma kukatampe kwa lusengo. (Lupu. 19:16-19) Kepo Yehoba esolwele ku bena Isalela amba ke ‘Lesa ukeba bantu kumwingijilatu bunke bwanji.’ Wibalayile’mba ukekala wa kishinka ku boba bamutemwa ne kulama mikambizho yanji. (Tangai Kulupuka 20:1-6.) Kyajingatu nobe Yehoba ubena kubuula bantu banji amba, “Inge mwaikala ku lubaji lwami, ne amiwa nkekala ku lubaji lwenu.” Inge mwajingako inge mwaubile byepi pa kumvwa mulaye wa Yehoba Lesa wa kuba’mba ukekala wa kishinka kwi anweba? Kwa kubula nangwa kuzhinaukatu ne, inge mwaubiletu byonka byaubile bena Isalela. “Baambile na jiwi jimotu amba: ‘Byambo byonse byaamba Yehoba twaswa kwibyuba.’” (Lupu. 24:3) Pano bino, byo papichiletu kimye kicheche, kwamwekele kintu kyalengejile bena Isalela kuleka kwikala ba kishinka.

13. Ñanyi kintu kyalengejile bena Isalela kuleka kwikala ba kishinka?

¹³ Bena Isalela baumvwine bingi moyo pa kumona jikumbi jifita, kubesha kwa mvula ne biyukilo bikwabo byamwesheshe bulume bukatampe bwa Lesa. Onkao mambo, baambijile Mosesa kuba’mba aye na kwisamba ne Yehoba ku Mutumba wa Sinai. (Lupu. 20:18-21) Mosesa wayile pa mutumba peulu kabiji kechi wabwelele bukiji ne. Nanchi bena Isalela baikele mu kiselebwa kwa kubula ntangi wa ketekelwa nyi? Kyamweka lwitabilo lwabo lwaimenejile pa ntangi ye bamonanga na meso aye Mosesa. Baakaminwe kabiji baambijile Alona amba: “Tulengele lesa etutangijile, mambo kechi twayuka kintu kyamwekela uno Mosesa muntu witufumishe mu kyalo kya Ijipita ne.”—Lupu. 32:1, 2.

14. Bena Isalela bejimbaikilenga bene amba ka, kabiji Yehoba waubile byepi na mambo a byubilo byabo?

¹⁴ Bena Isalela bayukile’mba kupopwela bankishi ajinga mambo akatampe kwi Yehoba. (Lupu. 20:3-5) Nangwa byonkabyo, batendekele kupopwela mwana ñombe wa ngolode. Nangwa kya kuba bamwesheshe kubula lukookelo, bena Isalela bejimbaikilenga bene amba bajinga ku lubaji lwa Yehoba. Alona watelele kuno kupopwela mwana ñombe wa ngolode amba, “kijiilo kwi Yehoba.” Yehoba waubilepo byepi? Wamwene’mba bamusatukila. Ponkapo Yehoba wabuujile Mosesa amba bantu “batamisha” kabiji “basenduka mu jishinda jo nebakambizhe kuyamo.” Yehoba wazhingijile, kabiji wafuukwilepo kuvizha kisaka kyonse kya bena Isalela.—Lupu. 32:5-10.

15, 16. Mosesa ne Alona bamwesheshe byepi amba bajinga ku lubaji lwa Yehoba? (Monai kipikichala kitanshi.)

¹⁵ Pano bino, Yehoba kechi wibavizhizhe bena Isalela ne. Na mambo a lusa lwanji, wapele bapopweshi banji ba kishinka kimye kya kumwesha’mba bajinga ku lubaji lwanji. (Lupu. 32:14) Mosesa byo amwene bantu na kubijika, kwimba ne kuzhiila nkishi, washikwile mwana ñombe wa ngolode ne kumuvingakanya yense ke bungatu. Kepo abijikile’mba: “Ñanyi uji ku lubaji lwa Yehoba? Eye ko nji!” “Bena Levi bonse bakonkene konka ko ajinga.”—Lupu. 32:17-20, 26.

¹⁶ Nangwa kya kuba Alona ye walengele nkishi, bino walapijile kabiji wasajilepo kwikala ku lubaji lwa Yehoba pamo na bena Levi bonse. Bano bantu ba kishinka kechi bakebelengatu kwikala ku lubaji lwa Yehoba konka ne, bino balekele ne kupwanañana na bandengamambo. Bafukwilepo kintu kyawama bingi, mambo pa jonka ja juba bantu bavula  bafwile na mambo a kupopwela nkishi. Bino aba bajinga ku lubaji lwa Yehoba bapulukile, kabiji Lesa walayile kwibapesha.—Lupu. 32:27-29.

17. Tufunjilako ka ku byambo byanembele Paulo pa mwana ñombe wa ngolode?

¹⁷ Mutumwa Paulo waambilepo pa kino kyamwekele kya kupopwela mwana ñombe wa ngolode amba: “Bino bintu byaikala bya kufunjilako atweba, kuba’mba . . . kange tupopwelenga bankishi, byonka byo baubile bamo mwi abo ne; . . . bebinembele kwitujimunako atweba bo yafikila mpelo ya buno bwikalo. Onkao mambo, awa ulanguluka’mba waimana, ajimuke kuchina’mba wakapona.” (1 Ko. 10:6, 7, 11, 12) Byonka byaambile Paulo, nangwatu bapopweshi ba kine bakonsha kwivwanga mu byubilo byatama. Bano bantu bakonsha ne kulanguluka’mba bulunda bwabo ne Yehoba bwatwajijila. Kukeba kwikala balunda na Yehoba nangwa kwambatu’mba twibakishinka kechi kulumbulula’mba twi balunda ba kine ne aye ne.—1 Ko. 10:1-5.

18. Ñanyi kintu kyakonsha kwitulengela kufuma kwi Yehoba, kabiji ñanyi bintu byakonsha kufumamo?

¹⁸ Byonkatu bena Isalela byo baakaminwe Mosesa byo abujile kubwela bukiji kufuma ku Mutumba wa Sinai, ne bena Kilishitu nabo bakonsha kwikala na bijikila inge kebamone nobe juba ja Yehoba ja luzhachisho ne ntanda ipya byabanda. Kyakonsha kumweka nobe ino milaye iji kwalepa nangwa nobe kechi ya kine ne. Umvwe twabula kujimuka, ino ndangulukilo yakonsha kwitulengela kuleka kutangizhako kyaswa muchima wa Yehoba ne kutatu muchima pa bintu byetu. Mu kuya kwa kimye, twakonsha kufuma kwi Yehoba ne kutendeka kuba byubilo byatama byo twabulanga kulangulukapo kimye kyo twajinga na bulunda bwakosa na Lesa.

19. Ñanyi kishinka kyo twafwainwa kubula kulubako, kabiji mambo ka?

¹⁹ Twafwainwa kuyuka’mba Yehoba ukeba kumukookela na muchima yense ne kumwingijilatu bunke bwanji. (Lupu. 20:5) Umvwe twafuma mu bupopweshi bwa Yehoba, ko kuba’mba tubena kuba kyaswa muchima wa Satana, kabiji mukafuma kalulu kuvimba meso. Onkao mambo, Paulo waambile’mba: “Kechi mwafwainwa kutoma mu katomeno ka Yehoba ne mu katomeno ka bandemona ne; kechi mwafwainwa kuja ku ‘tebulu wa Yehoba’ ne ku tebulu wa bandemona ne.”—1 Ko. 10:21.

20. Yehoba wakonsha kwitukwasha byepi inge twalenga mambo?

²⁰ Kaina, Solomone ne bena Isalela ku mutumba wa Sinai bonse balengele mambo. Bano bantu bafwainwe ‘kulapila ne kwaluluka.’ (Byu. 3:19) Yehoba kechi ufikenatu kukana bantu banji inge balenga mambo ne. Walekejileko Alona mambo. Ne lelo jino, Yehoba wakonsha kwitujimunako kupichila mu mashimikila aji mu Baibolo, mabuku alumbulula Baibolo nangwa bakwetu bena Kilishitu. Umvwe twaumvwina lujimuno, twafwainwa kuketekala’mba Yehoba uketumvwina lusa.

21. Twafwainwa kutwajijila kuba ka umvwe kwamweka bintu byakonsha kwitulengela kuleka kwikala ba kishinka kwi Yehoba?

²¹ Lusa lukatampe lwa Yehoba lwingila mwingilo wanema bingi. (2 Ko. 6:1) Lwitukwasha “kukana byubilo bya bumbulwa kwakamwa Lesa ne bya kusakasaka bya pano pa ntanda.” (Tangai Titusa 2:11-14.) Byo tubena kwikala “mu buno bwikalo,” twakonsha kupita mu bintu byakonsha kwitulengela kuleka kupopwelatu Yehoba bunke bwanji. Twayai tutwajijile kwikala ku lubaji lwanji, mambo ‘twafwainwa kumwakamwa Yehoba Lesa wetu, kumwingijila, ne kumukakachila.’—Mpitu. 10:20.