“MWINGILO wa kunowa kine wabaya, pakuba ba mingilo bakepa. Onkao mambo, lombai Mwine mwina mwingilo wa kunowa kuba’mba atume ba mingilo mu mwingilo wanji wa kunowa.” (Luka 10:2) Abino byambo byaambile Yesu kala papita ne myaka 2,000 byalumbulula bulongo kibena kumweka mu kyalo kya Myanmar lelo jino. Mambo ka? Mu Myanmar mujitu basapwishi 4,200 babena kusapwila mambo awama ku bantu 55 milyonyi baji mu kino kyalo.

Nangwa byonkabyo, “Mwine mwina mwingilo wa kunowa” aye Yehoba, ubena kutundaika balongo ne banyenga mu byalo byapusana pusana kuya na kwingijila ku Asia pa kuba’mba bakwasheko mu mwingilo wa kunowa. Ñanyi kintu kibalengejile kusha byalo byabo? Ñanyi kintu kibakwashishe pa kuba’mba baviluke? Kabiji ñanyi mapesho o babena kwiyowa? Twayai tumone.

Myaka ya kunyuma, painiya wa ku Japan, aye Kazuhiro, wafwile kashita ne kupungila kabiji bamunyemesheshe ku kipatela. Ba dokotala bamukanyishe kwendesha motoka pa myaka ibiji. Mulongo Kazuhiro wakankamenetu. Wishikishe mwine’mba, ‘Nsakwingilanga byepi mwingilo ye natemwa wa bupainiya?’ Walombele na mukoyo kuba’mba Yehoba amukwashe kutwajijila mu mwingilo wa bupainiya.

Ba Kazuhiro bashimikizhe’mba: “Byo papichiletu ñondo umo, mulunda nami wayile na kwingijila ku Myanmar waumvwine lukatazho lo najinga nalo. Wantuminejile foni ne kwamba’mba: ‘Mu Myanmar twingijishatu masakya. Inge waiya kuno ukatwajijila kusapwila kwa kubula kwendesha motoka.’ Naipwizhe ba dokotala inge nakonsheshe kuya ku Myanmar. Nakuminye bingi ba dokotala byo bambuujile’mba: ‘Dokotala wafunda pa bikola bya ku bongo wa ku Myanmar waiya na kwingijilako mu Japan. Nsakumubuula lukatazho lobe. Inge kikola kyobe kikabwelepo jibiji, ukakukwasha.’ Namwene kuba’mba byambuujile dokotala wajinga mukumbu wafumine kwi Yehoba.”

Ponkapotu ba Kazuhiro batumine nkalata ku ofweshi wa musampi wa ku Myanmar kwipuzha kuba’mba abo ne benakwabo bakaye na kwingijilako bupainiya. Byo papichiletu moba atanu, ofweshi wa musampi wakumbwile’mba, “Iyai, tubena kukeba bapainiya bavula.” Ba Kazuhiro ne benakwabo ba Mari, bapoteshe myotoka yabo, batambula ne bipepala bya kutwelelapo mu kyalo kikwabo, kabiji bapotele ne machikichi a ndeke. Lelo jino, baji mu jibumba ja mulaka wa kwamba na maboko mu muzhi wa Mandalay, kabiji baji bingi na lusekelo. Ba Kazuhiro baambile’mba: “Kino kitulengela kukosesha lwitabilo lwetu mu mulaye wa Lesa uji pa Salamo 37:5, wa  kuba’mba: ‘Fikizha jishinda jobe kwi Yehoba; ketekela mwi aye, ne aye ukakukwasha.’”

Mu 2014, Bakamonyi ba kwa Yehoba mu Myanmar baikele na kushonkena kukatampe. Kwataainwe bantu bafumine mu byalo bikwabo. Umo pa bataainweko wajinga nyenga wa myaka 34 wafumine ku United States, aye Monique waambile’mba: “Byo nabwelele ku kufuma ku kushonkena, nalombele kwi Yehoba kuba’mba ankwashe kufuukulapo byo nakonsheshe kuba mu bwikalo. Onkao mambo, nesambile na bansemi pa bikonkwanyi byami bya mu mwingilo wa Lesa. Banswishishe kuba’mba nafwainwa kubwela ku Myanmar, bino papichile kimye kyabaya ne kulombapo bimye byavula pa kuba’mba mfuukulepo.” Ba Monique balumbulula kyalengejile.

“Yesu watundaikile baana banji ba bwanga ‘kubajila jimo mali a kwingijisha.’ Onkao mambo, neshikishe amiwa mwine’mba: ‘Nanchi nakonsha kuviluka nyi? Inge navilukila ku kyalo kikwabo, nanchi nkakonsha kutaana mwa kumwena bya mu bwikalo kwa kubula kutaya kimye kyabaya ku nkito nyi?’” Kabiji baambile’mba: “Namwene kuba’mba kechi najinga na mali avula a kukonsha kuvilukila ku kyalo kingi ne.” Pano baubile byepi pa kuba’mba baviluke?—Luka 14:28.

Ba Monique bashimikizhe’mba: “Juba jimo bakulumpe pa nkito bangichile’mba ngye na kwibamona. Naakaminwe, mambo nalangulukilenga’mba bakeba kumpanga nkito. Pano bino, bansanchijile pa byo naingilanga bulongo mingilo. Kepo bambuujile’mba basakumbikilapo mali akwabo a kunsanchila pa kwingila bulongo kabiji ano o mali o nakebelenga pa kuba’mba mbwezhe nkongole yo najinga nayo.”

Ba Monique bavilukijile ku Myanmar mu December 2014, kabiji ne luno bakiji konka. Bomvwa byepi pa kwingijila ku mpunzha kwakepa basapwishi? Baambile’mba: “Nji bingi na lusekelo pa kwingijila kuno. Mbena kufunjisha bantu basatu Baibolo. Umo uji na myaka 67. Jonse pa kuñimuna bamwemwesela ne kumpakachilamo. Bajijile ne mipolo byo bafunjile amba jizhina ja Lesa, Yehoba. Baambile’mba: ‘Kyo kimye kitanshi kyo naumvwapo kuba’mba jizhina ja Lesa Yehoba. Wimwanyike bingi, bino wamfunjisha bintu byanema bingi byo nabujile kuyuka.’ Ne amiwa najijile. Bino bintu byo bindengela kwikala na lusekelo pa kwingijila kwakepa basapwishi.” Katatakatu papo, ba Monique bataainwe ku Sukulu wa Basapwishi ba Bufumu.

Kikwabo kyatundaikile bamo kuya na kwingijila ku Myanmar ke sawakya waambile pa kino kyalo wajinga mu Buku wa Mwaka wa Bakamonyi ba kwa Yehoba wa 2013. Nyenga uji na myaka ya mu ma 30 aye Li waikalanga monka mu Asia. Uno nyenga waingilanga nkito ya kimye kyonse, bino sawakya wajinga mu Buku wa Mwaka wamulengejile kufuukulapo kuya na kwingijila ku Myanmar. Waambile’mba: “Kimye kyo nataainwe ku kushonkena kukatampe mu 2014 mu muzhi wa Yangon, namonañene na ba mulume ne mukazhi bayile na kwingijila kwakepa basapwishi mu nyaunda ya mulaka wa Kichainizi mu Myanmar. Na mambo a kuba’mba ñamba Kichainizi, nafuukwilepo kuya ku Myanmar na kutundaika jibumba ja Kichainizi. Nakwatankene ne Monique, kabiji twavilukijile ku Mandalay. Yehoba witukwashishe kutaana nkito ya bufunjisha pa sukulu umo ya kwingila pa moba amo mu mulungu, kabiji twataaine ne nzubo yajingatu pabwipi. Nangwa kya kuba kwatwa bingi kyuya kabiji tupita mu makatazho amo, bino tuji bingi na lusekelo kwingijila kuno. Bantu mu Myanmar bekala bwikalo bwapeela, bino baji bingi na mushingi kabiji baswa kuteleka ku mambo awama. Kindetela bingi lusekelo pa kumona Yehoba byo abena kutangijila mwingilo kuno. Nashiinwa’mba kyo kyaswa muchima wa Yehoba kuba’mba amiwa ngiye kuno ku Mandalay.”

Bavula baya na kwingijila kwakepa basapwishi bemwena buwame bwa kulomba. Akyumvwai byaubile ba Jumpei ne benakwabo ba Nao, bonse baji na myaka ya mu ma 30. Bajinga mu kipwilo kya mulaka wa kwamba na maboko mu Japan. Mambo ka o bavilukijile ku Myanmar? Ba Jumpei bashimikizhe’mba: “Amiwa  ne bakazhi bami twalangulukangapo kuya na kwingijila kwakepa basapwishi ba Bufumu mu kyalo kikwabo. Mulongo umo ye twajinga nanji mu kipwilo kya mulaka wa kwamba na maboko mu Japan naye wavilukijile ku Myanmar. Nangwa kya kuba kechi twalamine mali avula ne, bino twavilukile mu May 2010. Balongo ne banyenga mu Myanmar betutambwijile bingi bulongo.” Uno mulongo umvwa byepi pa kwingijila mu nyaunda ya mulaka wa kwamba na maboko mu Myanmar? Waambile’mba: “Kuji bantu bavula bingi bakeba kufunda bukine. Inge twibatambisha mavidyo a mu mulaka wa kwamba na maboko, bomvwa bingi bulongo. Tuji bingi na lusekelo pa kufuukulapo kwiya na kwingijila Yehoba kuno.”

Ba Jumpei ne ba Nao bataana kwepi mali a kwingijisha? Ba Jumpei baambile’mba: “Byo twapwishisheko myaka isatu, twashajiletu na mali acheche a kwikwashishamo, kabiji kechi twajinga na mali a kusonkela ku nzubo mwaka walondejilepo ne. Amiwa ne benakwami twalombelepo bingi na mukoyo. Kwa kubula ne kuketekela, twatambwijile nkalata kufuma ku ofweshi wa musampi kwitubuula kuba’mba betutongola kwikala bapainiya beikajila pa kimye kicheche. Twaketekejile mwi Yehoba, kabiji twimwenejile byo etuta muchima. Witukwasha mu mashinda apusana pusana.” Katatakatu papo, ba Jumpei ne ba Nao bataainwe ku Sukulu wa Basapwishi ba Bufumu.

Ñanyi kintu kyalengejile mulongo uji na myaka 43 wa jizhina ja Simone, mwina Italy, ne mwinakwanji aye Anna wa myaka 37 mwina New Zealand, kuvilukila ku Myanmar? Ba Anna baambile’mba: “Sawakya ye twatangile mu Buku Wa Mwaka wa mu 2013 waambile pa Myanmar. Ba Simone baambile’mba: “Ke kintu kyanema bingi kwingijila mu Myanmar. Bwikalo kuno bwapeela bingi, kabiji nji na kimye kyabaya kya kwingila mwingilo wa Yehoba. Kitusangajika bingi pa kumona Yehoba byo abena kwitulama byo tubena kwingijila ku mpunzha kwakepa basapwishi.” (Sala. 121:5) Ba Anna baambile’mba: “Nji na lusekelo lukatampe kukila kala. Twikala bwikalo bwapeela. Ngikala na bamwata wami kimye kyabaya, kabiji butemwe bwetu bwabayilako. Kabiji tuji na balunda bavula bingi. Bantu kechi bakana kwisamba na Bakamonyi ne, kabiji bavula bakeba kufunda bukine.” Mu ñanyi mashinda?

Ba Anna bashimikizhe’mba: “Juba jimo, pa kisankanyi nasapwijile mwana sukulu ufunda pa sukulu mukatampe kabiji namulayile kubwelako. Byo nabweleleko, waichileko ne mulunda nanji. Byo nabweleleko ja bubiji waichijilepo balunda nanji bakwabo. Mu kuya kwa kimye, waichijilepo ne bakwabo. Luno mfunjisha batanu.” Ba Simone baambile’mba: “Bantu mu nyaunda bakasuluka kabiji bakeba kufunda. Bavula baji bingi na kizaku kya kufunda. Kimyetu kyo kikepa pa kuba’mba twibafunjishe bonse.”

Pano ñanyi bintu byo baubile pa kuba’mba bafuukulepo kuvilukila ku Myanmar? Ba Mizuho bafumine ku Japan, bashimikizhe’mba: “Amiwa ne bamwatawami ba Sachio, twalangulukangapo bingi pa kuya na kwingijila ku mpunzha kwakepa basapwishi, bino kechi twayukile kwa kuya ne. Byo twatangile sawakya wajinga mu Buku wa Mwaka wa 2013 waambile pa kyalo kya Myanmar,  twaumvwine bingi bulongo pa mashimikila ajingamo kya kuba twatendekele ne kulangulukapo kumona inge twakonsheshe kuya na kwingijila ku Myanmar.” Ba Sachio banungilepo’mba: “Twafuukwilepo kuya na kufwakesha muzhi mukatampe wa Yangon mu kyalo kya Myanmar pa mulungu umo kuba’mba tuyuke kino kyalo byo kiji. Kuno kufwakasha kwitulengejile kushiinwa kuba’mba twakonsha kuvilukilako.”

Ba Rodney ne benakwabo ba Jane, bafumine ku Australia, bonse babiji baji na myaka ya mu ma 50, ne mwanabo wa mulume aye Jordan ne wa mukazhi Danica, baingijila kwakepa basapwishi ku Myanmar kutendeka mu 2010. Ba Rodney baambile’mba: “Twatundaikilwe bingi pa kumona bantu byo baji na nzala ya kukeba Mambo a Lesa. Mbena kutundaika ne bisemi bikwabo kuya na kwingijila ku mapunzha aji nobe Myanmar.” Mambo ka? “Uno mwingilo wakwasha kisemi kyetu kufwenya kwipi ne Yehoba. Banyike bavula balabamatu na mafoni, myotoka, kukeba makito, ne bintutu bikwabo. Pakuba baana betu bapayankana na kufunda byambo bya kwingijisha mu mwingilo. Babena kufunda bya kwisamba na bantu babula kuyuka Baibolo ne bya kukumbulapo pa kupwila, kabiji babena kufunda ne bintu bikwabo byakunza mpopwelo yetu.”

Mulongo Oliver uji na myaka 37 wafumine ku United States, walumbulula ene mambo o atundaikila bakwabo kwingilako uno mwingilo amba: “Kwingijila Yehoba ku kyalo kingi kuji bwikalo bwapusana na bo wapijilwa, mufuma byawama bingi. Kuya na kwingijila ku kyalo kikwabo kwankwasha kukinka manungo mwi Yehoba mu bintu byonse. Kwingijila pamo na bantu bo nabujile kuyuka kala bino baitabila mu bintu byonka byo naitabilamo kwankwasha kumona kuba’mba kafwako kintu kikwabo kyanema kukila Bufumu bwa Lesa ne.” Kufikatu ne lelo jino, ba Oliver ne benakwabo ba Anna, batwajijila kwingila na mukoyo mu nyaunda ya Kichainizi.

Nyenga uji na myaka 52 aye Trazel, wafumine ku Australia, ne kuvilukila ku Myanmar mu 2004. Waambile’mba: “Aba baji na bwikalo bwakonsha kwibaswisha, mbena kwibatundaika kuya na kwingijila ku mpunzha kwakepa basapwishi. Nataana kuba’mba inge wipana kwingila, Yehoba ukupesha. Kechi nayukilepo’mba nkekalanga bino ne. Mbena kwikala bwikalo bwa lusekelo bo nabujilenga ne kuketekela.”

Twaketekela bino byambo bya lutundaiko byaambile boba babena kwingijila kwakepa basapwishi ku Myanmar bisakwimutundaika kulangulukapo kuya na kukwasha bantu baji na michima ya kukeba kufunda bukine baji mu mapunzha mo babula kusapwila javula. Kya kine, bantu babena kwingijila kwakepa basapwishi babena kwimwita’mba, “Abukilai kuno ku Myanmar, mwitukwashe.”