1. Mambo ka o kyayilamo kwamba’mba Yehoba ye mwina byonse? (Monai kipikichala kitanshi.)

YEHOBA ye walengele bintu byonse. Ye mwine mwina “jiulu . . . ne mwiulu mwine ne ntanda ne bintu byonse bijipo.” (Mpitu. 10:14; Lum. 4:11) Mambo a kuba’mba Yehoba ye walengele bantu bonse, ko kuba’mba bonse bantu banji. (Sala. 100:3) Pano bino, kufumatu ne kala, kuji bantu bamo Yehoba bo atela’mba bantu banji mu jishinda japusanako na bantu bonse.

2. Bañanyi bo baambapo mu Baibolo amba bantu ba Yehoba bapusanako na bantu bonse?

² Salamo 135 waamba pa bapopweshi ba Yehoba ba kishinka bajingako kala mu Isalela amba “kya bunonshi kyanji.” (Sala. 135:4) Kabiji buku wa Hoseya waambijile jimo amba bantu bamo babula bena Isalela bakekala bantu ba Yehoba. (Ho. 2:23) Bungauzhi bwa kwa Hoseya bwafikile kimye Yehoba kyo atendekele kusala bantu babujile bena Isalela bakalama pamo ne Kilishitu mwiulu. (Byu. 10:45; Loma 9:23-26) Kino “kisaka kyazhila” ke “kya bunonshi” kya Yehoba. Bantu baji mu kino kisaka bashingwa na mupashi wazhila kabiji bebasala kuya na kwikala mwiulu. (1 Pe. 2:9, 10) Lesa umona byepi jibumba jikatampe ja bena  Kilishitu ba kishinka baji na luketekelo lwa kwikala pano pa ntanda? Nabo Yehoba wibatela’mba “bantu” banji “basalwa.”—Isa. 65:22.

3. (a) Bañanyi baji na bulunda bwawama ne Yehoba lelo jino? (b) Tusakwisamba pa ka mu uno mutwe?

³ Lelo jino, “kajitanga kacheche,” ko kuba’mba bantu baji na luketekelo lwa kwikala mwiulu, ne “mikooko ikwabo,” ko kuba’mba bantu baji na luketekelo lwa kwikala pano pa ntanda, bonsetu baji mu jitanga jimo Yehoba jo anemeka bingi. (Luka 12:32; Yoa. 10:16) Tumusanchila bingi Yehoba pa pa kwikala na bulunda bwawama ne aye. Uno mutwe usakwamba pa mashinda avula mo twakonsha kumweshesha’mba tusanchila Yehoba pa kwitusala kwikala balunda nanji.

4. Ñanyi jishinda jimo jo tumwesheshamo kusanta kwi Yehoba pa kwikala na bulunda bwawama ne aye, kabiji Yesu waubile byepi kino?

⁴ Tumwesha’mba tusanchila Yehoba inge twipana kwi aye na muchima yense. Umvwe twabatizhiwa mu mema, tumwesha patoka’mba twipana kwi aye kabiji twaswa kumukookela. (Hebe. 12:9) Yesu naye byo byo aubile kimye kyo abatizhiwe, kyajingatu nobe wabuujilenga Yehoba amba: “Nkeba bingi kuba kyaswa muchima wenu, anweba Lesa wami.” (Sala. 40:7, 8, tubyambo twa munshi.) Yesu wipaine mwine kuba kyaswa muchima wa Yehoba nangwa kya kuba wasemekejilwe mu kisaka kya bantu bepaine kwi Lesa.

5, 6. (a) Yehoba waubile byepi kimye kyabatizhiwe Yesu? (b) Ambai kifwanyikizho kibena kumwesha ene mambo Yehoba o asanchila inge twipana kwi aye nangwa kya kuba bintu byonsetu byanji?

⁵ Yehoba waumvwine byepi Yesu byo abatizhiwe? Baibolo waamba’mba: “Yesu byo abatizhiwe, ponkapo watuntukile mu mema; ne jiulu jashinkukile, kabiji Yoano wamwene mupashi wa Lesa saka ekila pe aye nobe nkunda. Ponkapo ne jiwi jafumine mwiulu amba: ‘Uno ye Mwanami ye natemwa, mo mmwena lusekelo.’” (Mat. 3:16, 17) Nangwa kya kuba Yesu wajinga Mwana Lesa mwiulu, bino Yehoba waumvwine bulongo pa kumona Mwananji wipana kumwingijilatu aye yenka kwapwa. Ne atweba inge twipana, Yehoba umvwa bingi bulongo, kabiji uketupesha.—Sala. 149:4.

⁶ Fwanyikizhai kuba’mba nsemi wa mulume wapa mwananji wamukazhi kajo kawama bingi. Uno mwana watolapo kajo kamo ne kupa bashanji. Nanchi kano kajo kechi kajinga ka uno nsemi nenyi? Pano wakonsha kutambula byepi kajo kamupa mwananji amba bupe saka kajinga kanji? Nsemi watemwa mwananji kechi wakonsha ne kulanguluka pa ano mepuzho ne. Pakuba ukomvwa bingi bulongo kutambula buno bupe mambo bubena kumwesha byamutemwa mwananji. Ukanemeka bingi buno bupe bwafuma ku mwananji kukila kajo konse ko aji nako. Kyo kimotu, Yehoba umvwa bingi bulongo inge twipana atweba bene kumwingijilatu bunke bwanji.—Lupu. 34:14.

7. Malakai walumbulwile byepi Yehoba byo omvwa inge bantu bepana kumwingijila?

⁷ Tangai Malakai 3:16. Umvwe mukyangye kwipana ne kubatizhiwa, langulukai pa buneme bwa kubila bino. Kufumatu kimye kyo mwasemekelwe mwi bantu ba Yehoba pamo na bantu bonse. Pano bino, fwanyikizhai Yehoba byo akonsha kumvwa bulongo inge mwipana anweba bene kuba kyaswa muchima wanji na mambo a kuyuka’mba ye mfumu wa bilengwa byonse. (Maana 23:15) Yehoba naye uyuka bantu bepana kwi aye, kabiji unemba mazhina abo mu “buku wa kwibavulukilako.”

8, 9. Aba banembwa mu “buku wa kwibavulukilako” Yehoba ukeba’mba bobenga ka?

 ⁸ Pa kuba’mba jizhina jetu jinembwe mu ‘buku wa kwituvulukilako’ twafwainwa kubapo bimo. Malakai waambile’mba twafwainwa ‘kwakamwanga Yehoba ne kulangulukanga pa jizhina janji.’ Umvwe ke tupopwele muntu nangwa kintu kyonsetu, jizhina jetu bakonsha kwijifutamo mu buku wa Yehoba wa bumi.—Lupu. 32:33; Sala. 69:28.

⁹ Kwipana kwi Yehoba kechi kulumbululatu kumulaya’mba tukobanga kyaswa muchima wanji ne kubatizhiwa ne. Abino ke bintu byo tubatu jimo, bino kupopwela Yehoba kechi kukapwa ne. Onkao mambo, pa kuba’mba tutwajijile kwikala ku lubaji lwa Yehoba twafwainwa kutwajijila kumukookela pa kino kimye ne kimye kya kulutwe.—1 Pe. 4:1, 2.

10. Ñanyi lupusano lwafwainwa kwikala pa bantu bengijila Yehoba ne babula kumwingijila?

¹⁰ Mu mutwe wafumako twaambile pa mashimikila a bantu banembwa mu Baibolo nabiji Kaina, Solomone ne bena Isalela. Bonse bapopwelanga Yehoba, pano bino, kechi bamupopwelanga na muchima yense ne. Mashimikila a bano bantu abena kwitufunjisha kuba’mba bonse baji ku lubaji lwa Yehoba bafwainwa kutwajijila kwikala baoloka ne kushikwa bubi. (Loma 12:9) Yehoba waambile ne pa “lupusano luji pa muntu waoloka ne muntu mubi, ne pa muntu wingijila Lesa ne ubula kumwingijila.”—Mala. 3:18.

11. Mambo ka o kyanemena kwisolola patoka ku bantu amba twingijilatu Yehoba bunke bwanji?

¹¹ Jishinda jikwabo ja kumwesheshamo’mba tusanchila Yehoba pa kwitusala kwikala bantu banji ke jino: “Bantu bonse” bafwainwa kuyuka’mba tuji ku lubaji lwa Yehoba. (1 Timo. 4:15; Mat. 5:16) Iipuzhai amba: ‘Ñanchi bantu bammona’mba ne wa kishinka kwi Yehoba nyi? Nanchi nesolola patoka amba nekamonyi wa kwa Yehoba nyi?’ Twakonsha kufichisha bingi Yehoba ku muchima inge ketukankazhame kwisolola kuba’mba tuji ku lubaji lwanji.—Sala. 119:46; Tangai Mako 8:38.

12, 13. Ñanyi bintu bilengela bantu bamo kubula kwibayuka’mba Bakamonyi ba kwa Yehoba?

 ¹² Kyatamakotu ke kya kuba’mba bantu bamo befya kya kuba kechi mwakonsha kuyuka ‘lupusano luji pa muntu wingijila Lesa ne ubula kumwingijila’ ne, mambo a kulondela “mupashi wa pano pa ntanda.” (1 Ko. 2:12) Uno ye mupashi ulengela bantu kuta muchima ku “kuba bintu bikeba mubiji.” (Efi. 2:3) Nangwa kya kuba betufundako bimye byavula pa uno mutwe pano bino bamo batwajijila kuvwala bivwalo byabula kufwainwa. Bavwala bivwalo byakwata ku mubiji ne bimwesha biji mukachi, nangwatu ku kipwilo. Nangwa kulondela ntendelo ne ngichikilo yabula kufwainwa. (1 Timo. 2:9, 10) Na mambo a kino, inge baji pa jibumba ja bantu, kikatazha kuyuka uji ku lubaji lwa Yehoba ne “mulunda na bya pano pa ntanda.”—Yako. 4:4.

¹³ Bakamonyi bamo kechi basankilapo byubilo bya mu ino ntanda ne. Umvwe baya ku bijiilo, bazhatu nobe bantu ba ku ntanda. Kabiji pa makeyala abo a pa intaneti babikapo bipikichala ne byambo bimwesha ndangulukilo ya ino ntanda. Kampe na mambo a kuba’mba kechi bebapanga mu kipwilo, kwibabika pa bizhila nangwa kwibanenauna pa byubilo byabo bincha ne, bakonsha kulengela balongo ne banyenga babena kwibikako kwikala na byubilo byawama ku meso a Yehoba nabo kutendeka kulondela byubilo byatama.—Tangai 1 Petelo 2:11, 12.

14. Twafwainwa kuba byepi pa kuba’mba tuzhikijile bulunda bwetu na Yehoba?

¹⁴ Bintu byonse biji mu ino ntanda bitulengela kuta muchima pa “bya kusakasaka bya mubiji ne bintu bisakasaka meso ne muntu kwimwesha na bintu byo aji nabyo mu bwikalo.” (1 Yoa. 2:16) Na mambo a kuba’mba tuji ku lubaji lwa Yehoba, witujimunako “kukana byubilo bya bumbulwa kwakamwa Lesa ne bya kusakasaka bya pano pa ntanda,” kabiji twikala na milanguluko yawama “ne kwikala baoloka ne kumwesha munema wa kunemeka Lesa mu buno bwikalo.” (Titu. 2:12) Mu ñambilo yetu, njiilo, ntomeno, mvwajilo,  ñingijilo, ne byonse byo tuba, bantu bafwainwa kuyuka’mba twingijila Yehoba.—Tangai 1 Kolinda 10:31, 32.

15. Mambo ka o twafwainwa kubila lusa bapopweshi bakwetu ne kwibatemwa?

¹⁵ Tumwesha’mba tusanchila Yehoba inge ketubile bapopweshi bakwetu byawama. Nabo baji ku lubaji lwa Yehoba. Umvwe saka tuvuluka kino kishinka, tukobilanga balongo ne banyenga lusa ne kwibatemwa. (1 Tesa. 5:15) Yesu wabuujile baana banji ba bwanga amba: “Kino kyo kyo bakayukilako bonse amba mwi baana bami ba bwanga, umvwe mwitemwa anwe bene na bene.”—Yoa. 13:35.

16. Tufunjilako ka ku Mizhilo ya Mosesa yaamba pe Yehoba byo atemwa bantu banji?

¹⁶ Pa kuba’mba tuyuke byo twakonsha kubilanga bakwetu byawama mu kipwilo, twayai twisambe pa bishinka byalondelapo. Mu nzubo ya Yehoba mwajinga bipe byo baingijishangatu ku mpopwelo ya kine. Mizhilo ya Mosesa yalumbulwile byo bafwainwe kwingijisha bino bipe, kabiji bonse babulanga kwibingijisha bulongo bebepayanga. (Bala. 1:50, 51) Umvwe kya kuba Yehoba wanemekele bingi bipe byo baingijishanga pa kumupopwela, ko kuba’mba ukazhikijila ne bapopweshi banji ba kishinka bo asala kwikala bantu banji. Yehoba wabuujile bantu banji amba: “Yense ukwata pe anweba ukwata pa kantu ka pa jiso jami.”—Zeka. 2:8.

17. Yehoba ‘uteleka ne kumvwa’ ñanyi bintu?

¹⁷ Malakai waambile’mba Yehoba “watelekelenga ne kumvwa” bantu banji byo besambilenga bene na bene. (Mala. 3:16) Kwambatu kine, Yehoba “wayuka banji.” (2 Timo. 2:19) Kabiji wayukishatu bulongo byo tuba ne byo twamba. (Hebe. 4:13) Umvwe ketubule kubila bapopweshi bakwetu lusa, Yehoba ‘uteleka ne kumvwa.’ Bino inge tutambwila benyi, twibampanyi, tulekelako bakwetu mambo ne kwibobila lusa, twafwainwa kushiinwa’mba Yehoba umona byonse bino byo tuba.—Hebe. 13:16; 1 Pe. 4:8, 9.

18. Twakonsha kumwesha byepi amba tusanchila Yehoba pa kwitusala kwikala ku lubaji lwanji?

¹⁸ Tukeba kumwesha’mba tusanchila Yehoba pa kwitusala kwikala ku lubaji lwanji. Twayuka kuba’mba kwipana kwi aye ke kintu kyanema bingi. Nangwa kya kuba twikala mu “kisemi kyatama kabiji kyaluwankana,” tukeba bantu kuyuka’mba twi bantu “babula kaneneno kabiji babula mambo, . . . [ne] kusama nobe byeya pano pa ntanda.” (Fili. 2:15) Onkao mambo, twafwainwa kushikwa bubi. (Yako. 4:7) Kabiji twatemwa bapopweshi bakwetu ne kwibanemeka, mambo twayuka’mba nabo bantu ba Yehoba.—Loma 12:10.

19. Yehoba ufweta byepi bantu banji?

¹⁹ Baibolo walaya’mba: “Yehoba kechi ukebataya bantu banji [ne].” (Sala. 94:14) Nangwa tupite mu bya malwa, Yehoba kechi uketutaya ne. Nangwatu lufu kechi lwakonsha kulengela Yehoba kuleka kwitutemwa ne. (Loma 8:38, 39) “Mambo umvwe twaikala na bumi, twikala nabo na mambo a Yehoba kabiji inge twafwa, tufwila mwi Yehoba. Onkao mambo, nangwa tuji na bumi nangwa twafwa twi ba kwa Yehoba.” (Loma 14:8) Tubena kutengela juba Yehoba jo akasangula balunda nanji bonse ba kishinka bafwa. (Mat. 22:32) Nangwatu luno tubena kwiyowa mapesho avula. Byonkatu byaamba Baibolo amba: “Kyo kya lusekelo akya kisaka kya bantu kiji na Lesa wakyo Yehoba, bantu bo asala kwikala bunonshi bwanji.”—Sala. 33:12.