Ubilainga Kifyele “Bantu Bonse”
YESU byo afunjishenga baana banji ba bwanga bya kusapwila mambo awama, walumbulwile’mba bantu bamo bakakananga kutambwila byambo bya Bufumu. (Luka 10:3, 5, 6) Byo tuya na kusapwila, tutaana bantu bazhingila nangwa betwambila mwenga. Kwambatu kine, kino kyakonsha kukatazha bingi kubila kifyele bantu ba uno mutundu.
Muntu uji na kifyele uyuka bintu byakajilwa bantu ne makatazho o bapitamo, kabiji wibomvwina lusa ne kukeba kwibakwasha. Pano bino, inge twaleka kubila kifyele bantu bo tutaana mu mwingilo, kechi tukasapwilanga na mukoyo ne. Bino inge twaikala na kifyele, kikekalatu nobe tubena kusonsela nkunyi pa mujilo, ko kuba’mba tukekala na mukoyo wa kusapwila.—1 Tesa. 5:19.
Twakonsha kuba byepi pa kuba’mba twikale na kifyele nangwatu inge bintu byakatazha? Twayai twisambe pe Yehoba, Yesu ne mutumwa Paulo byo twakonsha kufunjilako kwi abo bya kumwesha kifyele.
IKALAI NA KIFYELE BYONKA BIJI YEHOBA
Pa myaka yavula yapitapo, Yehoba watenkenya bantu baleta mwenga pa jizhina janji. Kabiji utwajijila kubila bantu lusa “babula kusanta ne babi.” (Luka 6:35) Lusa lwanji lumwekela mu kutekanya. Yehoba ukeba’mba “bantu bonse” bapuluke. (1 Timo. 2:3, 4) Nangwa kya kuba Lesa washikwa bubi, pano bino, wanemeka bantu kabiji kechi ukeba muntu nangwa umo amba akafwe ne.—2 Pe. 3:9.
Yehoba wayuka mashinda engijisha Satana pa kupofula michima ya bantu babula kwitabila. (2 Ko. 4:3, 4) Bantu bavula bebafunjisha mafunjisho a bubela saka bakijitu banyike, na mambo a kino, kibakatazha bingi kufunda bukine. Yehoba ukebesha bingi kukwasha bantu ba uno mutundu. Twayuka byepi?
Akilangulukai pe Yehoba byo aubile na bena Ninevwa. Nangwa kya kuba bajinga na byubilo bya bukapondo, Yehoba waambijile Yona amba: “Nanchi ne amiwa kechi nafwainwa kubila lusa Ninevwa muzhi mukatampe, muji bantu kukila 120,000 babula kuyuka kyawama ne kyatama . . . nenyi?” (Yona 4:11) Yehoba wamwene’mba bena Ninevwa kechi bayukile bukine pe aye ne, kabiji wibobijile lusa ne kutuma Yona kuya na kwibajimunako.
Ne atweba twafwainwa kumonanga bantu byonkatu Yehoba byo ebamona. Byonkatu byo oba, ne atweba twafwainwa kukwasha bantu kuba’mba bayuke Lesa nangwatu inge bamweka kubula kutako muchima.
IKALAI NA KIFYELE BYONKA BIJI YESU
Byonka biji Bashanji, Yesu naye waubilanga lusa bantu bajinga na nzala ya kukeba kuyuka bukine. “Byo amwene mabumba wiobijile lusa, mambo basubakene ne kupelelwa nobe mikooko yabula kafunga.” (Mat. 9:36) Yesu wayukile kibalengejile kwikala bino. Aba baishile na kuteleka kwi aye bebafunjishe mafunjisho a bubela kabiji bebamanyikanga ku bantangi babo ba bupopweshi. Nangwa kya kuba wayukile’mba bavula kechi basakutako muchima ku byo afunjishenga ne, na mambo a mikiika yapusana pusana, bino Yesu “watendekele kwibafunjisha bintu byavula bingi.”—Mako 4:1-9.
Kechi twafwainwa kuzhingila inge muntu ye twasapwila pa kimye kitanshi wakana ne
Inge bwikalo bwapimpulwa, bantu bakonsha kupimpula milanguluko yabo ne kukeba kufunda bukine
Umvwe bantu bakana mambo awama o tusapwila, twafwainwa kuyuka ene mambo o bakaina. Bamo kampe balengulula Baibolo nangwa bwina Kilishitu na mambo a byubilo byatama biji na bantu betela’mba bena Kilishitu. Kabiji kampe bakwabo bebabuula bya bubela pa bintu byo twaitabilamo. Bakwabo nabo kampe bebambila mukeyu ku bakwabo mu kimasamasa nangwa balongo babo inge besamba ne atweba.
Bamo bapita mu bintu byakatazha bingi bibalengela kubula kukeba kumvwa mambo awama o tusapwila. Mishonale wa jizhina ja Kim waambile’mba: “Ku lubaji lumo lwa nyaunda yetu, kuji bantu bavula bingi bo baonawijile bipe byabo byonse na mambo a nkondo. Kechi balangulukapo’mba bintu bikawama kulutwe ne. Bakakilwa kabiji kechi baketekela bantu ne. Mu ino mpunzha, bantu bavula bakana kwibasapwila. Juba jimo bampumine kimye kyo nayilenga na kusapwila.”
Ki ka kyakwasha nyenga Kim kutwajijila kubila bantu kifyele nangwa kya kuba upita mu bino bintu? Waambile’mba: “Umvwe bantu banguba byatama, mvuluka byambo biji pa Byambo bya Maana 19:11 bya kuba’mba: ‘Maana a muntu afwomona bukaji bwanji.’ Kulanguluka pa mwapita bwikalo bwa bantu mu ino nyaunda kundengela kwibobila kifyele. Kabiji kechi bonse bo tutaana bakanama ne. Mu yonka ino nyaunda, muji baji na michima yawama kabiji baswa kuba’mba tukabweleko jikwabo.”
Twakonsha kwiipuzha’mba: ‘Inge kya kuba kechi nayukile bukine ne, nakonsha kuba byepi inge Bakamonyi ba kwa Yehoba baiya na kunsapwila?’ Twambe’mba bemubuula bya bubela pa Bakamonyi ba kwa Yehoba, ne anweba kampe mwakonsha kukana kwisamba nabo, kabiji mwakonsha kumvwa bulongo inge bemubila kifyele. Umvwe twavuluka mukambizho wa kwa Yesu wa kuba’mba twafwainwa kubilanga bakwetu bintu byonka byo tukeba’mba betubile, tukatundaikwa kubila bantu kifyele nangwatu inge bintu byakatazha.—Mat. 7:12.
IKALAI NA KIFYELE BYONKA BYAJINGA PAULO
Mutumwa Paulo waubijile kifyele bantu bamumanyikilenga. Mambo ka? Kechi walubilemo byajinga bwikalo bwanji bwa kala ne. Waambile’mba: “Kala najinga wa mwenga, wamanyikanga bantu kabiji wa bulunji. Nangwa byonkabyo, bangubijile lusa mambo naubilenga bino bintu mu bulubi ne mu kubula lwitabilo.” (1 Timo. 1:13) Wayukile’mba bamubijile lusa lukatampe kwi Yehoba ne Yesu. Kyamweka bamo bo asapwijilengako bajinga na byubilo byonka byo ajinga nabyo kala.
Bimye bimo, Paulo wasapwilanga bantu baitabijile mu mafunjisho a bubela. Waubile byepi? Pa Byubilo 17:16 pashimuna’mba Paulo byo ajinga mu Atene, “kyamukolele bingi ku muchima pa kumona muzhi byo ayujile na bankishi.” Nangwa byonkabyo, waingijishe kintu kyonka kyamukolele ku muchima kushimuna bukamonyi. (Byu. 17:22, 23) Waingijishanga mashinda apusana pusana pa kusapwila kwesakana na nkomeno ya bantu “kuba’mba umvwe kyakonsheka mpulushepo bamo.”—1 Ko. 9:20-23.
Inge bantu bakana kwibasapwila, nangwa baitabila mu mafunjisho a bubela, twafwainwa kulondela byaubile Paulo. Twakonsha kwingijisha bintu byo twayuka pa mafunjisho abo ne kwibakwasha kufunda “mambo awama a bintu byawama.” (Isa. 52:7) Nyenga Dorothy waambile’mba: “Bantu bavula mu nyaunda yetu bebafunjisha’mba Lesa washinta kabiji uzhachisha bantu. Nebasanchila pa kwitabila mwi Lesa, apa bino nebabuula byaamba Baibolo pa byubilo bya Yehoba byawama ne milaye yanji ya kulutwe.”
“SHINDAINGA BUBI NA BYAWAMA”
“Moba a kupelako” byo abena kunangijila ku mpelo, twafwainwa kuketekela’mba bantu bamo bo tusapwilako “bakataminangakotu.” (2 Timo. 3:1, 13) Bino kino kechi kyafwainwa kwitulengela kuleka kubila bantu kifyele ne kwitupwishisha lusekelo ne. Yehoba wakonsha kwitupa bulume bwa ‘kushinda bubi na byawama.’ (Loma 12:21) Painiya wa jizhina ja Jessica waambile’mba: “Javula ntaana bantu betota kabiji betulengulula atweba ne byambo byo tusapwila. Kizhingijisha bingi. Inge natatula mwisambo, ndomba lulombelo lwa kishinshi kwi Yehoba kuba’mba ankwashe kumona yewo muntu byonka byo amumona. Kino kinkwasha kubula kuzhingila, kabiji ndanguluka pa byo nakonsha kumukwasha.”
Tuya na kukeba boba baji na michima ya bukishinka ya kukeba bumi bwa myaka ne myaka
Bamo baswa kwibakwasha ne kufunda bukine
Twafwainwa ne kulanguluka pa byo twakonsha kutundaika basapwishi bakwetu. Ba Jessica baambile’mba: “Inge umo pe atweba bamwambila byatama mu mwingilo, ngesekesha na ngovu kubula kuta muchima pa kyokyo kyamweka. Pakuba mpimpula mwisambo ne kutendeka kwamba pa bintu byawama byo tumwenamo mu mwingilo wetu nangwa kya kuba bantu bamo bakana.”
Yehoba wayuka makatazho onse o tupitamo pa kwingila mwingilo. Umvwa bingi bulongo inge ketubile bantu kifyele byonka byo oba. (Luka 6:36) Pano bino, Yehoba kechi ukatwajijila kubila bantu kifyele myaka ne myaka ne. Twafwainwa kushiinwa’mba wayuka kimye kyawama kyo akafumyapo ino ntanda yatama. Onkao mambo, twafwainwa kwingila na mukoyo mwingilo wa kusapwila mpelo saka ikyangye kufika. (2 Timo. 4:2) Twayai tutwajijile kwingila mwingilo wetu na mukoyo ne kubila kifyele “bantu bonse.”
