Bishiino bimwesha’mba Yesu waikele Ñanga Mwine Mukatampe kimye kyo abatizhiwe mu mwaka wa 29 C.E. Twayuka byepi? Kimye kyo abatizhiwe, Yesu wamwesheshe kuba’mba wapaine bumi bwanji pa kya kusokelapo bitapisho kya kifwanyikizho, ko kuba’mba wipaine kuba “kyaswa muchima” wa Lesa. (Nga. 1:4; Hebe. 10:5-10) Na mambo a kuba’mba kya kusokelapo bitapisho ke kintu kyanema bingi mu nzubo ya Lesa, ko kuba’mba nzubo ya Lesa ya ku mupashi yatendekele kwikalako kimye kyabatizhiwe Yesu. Nzubo ya Yehoba ya ku mupashi imenako byonse bikebewa pakuba’mba tumupopwelenga mu jishinda jawama kupichila mu kitapisho kya bukuzhi kyapaine Yesu.—Mat. 3:16, 17; Hebe. 5:4-6.

Nzubo ikatampe ya ku mupashi yafwainwe kwikala na ñanga mwine mukatampe. Onkao mambo, Yehoba washingile Yesu “mupashi wazhila ne na bulume” kuba’mba ekale ñanga mwine mukatampe. (Byu. 10:37, 38; Mako 1:9-11) Pano twakonsha kushiinwa byepi kuba’mba Yesu bamutongwele kwikala Ñanga Mwine Mukatampe saka akyangye kufwa ne kusangulwa? Mwingilo waingilanga Alona ne bakwabo baswaine pe aye kwikala bañanga bene bakatampe monka mwayijile Mizhilo ya Mosesa kusakwitukwasha kukumbula buno bwipuzho.

Mizhilo yaambile’mba ñanga mwine mukatampe ye wafwainwe kutwela Mwine Mwazhijisha mu tente wa lusambakeno. Kabiji ye watwelanga Mwine Mwazhijisha kimye kyo bashimikile nzubo ya Lesa. Pajinga kipembe kyaabenye Mwazhila ne Mwine Mwazhijisha. Ñanga mwine mukatampe watwelangatu Mwine Mwazhijisha pa Juba ja Kufuchilamo Mambo. (Hebe. 9:1-3, 6, 7) Alona ne bakwabo baswainenga pa kifulo kyanji bebashingile manyi kwikala bañanga bene bakatampe saka bakyangye kutendeka kupita pa “kipembe” kyajinga mu tente wa lusambakeno. Yesu naye wafwainwa washingilwe kwikala Ñanga Mwine Mukatampe wa nzubo ikatampe ya Yehoba ya ku mupashi saka akyangye kufwa ne “kupichila mu kipembe, ko kuba’mba, mubiji wanji” kuya mwiulu. (Hebe. 10:20) Na mambo a kino, mutumwa Paulo waambile’mba Yesu waishile “saka aji ñanga mukatampe” ne kutwela “mu tente mukatampe wawamisha wabula kulengwa na maboko,” ko kuba’mba “mwiulu.”—Hebe. 9:11, 24.

Kechi pajipo lupusano pa kimye lulayañano lupya kyo lwaikajikilwe ne kimye kyo lwatatwile kwingila ne. Mambo ka? Mambo Yesu byo ayile mwiulu ne kupana bumi bwanji bwalumbuluka bwa bumuntu na mambo a atweba, waubile kintu kitanshi pa bintu bisatu byalengejile kuba’mba lulayañano lupya lwikajikwe. Abino byonka bintu byo byalengejile kuba’mba lulayañano lutendeke kwingila. Ñanyi bintu byonkabyo?

Kitanshi, Yesu wayile kwi Yehoba; kya bubiji, wapaine buneme bwa kitapisho kyanji kwi Yehoba; apa bino ne kyapelako, Yehoba watambwile buneme bwa mashi a kwa Yesu aichikile. Lulayañano lupya lwatendekele kwingila kimye kyaubiwe bino bintu.

Baibolo kechi witubuula kimye Yehoba kyo atambwile buneme bwa kitapisho kya kwa Yesu ne. Onkao mambo, kechi twakonsha kutongola kine kimye lulayañano lupya kyo lwaikajikilwe ne kimye kyo lwatatwile kwingila ne. Nangwa byonkabyo, twayuka kuba’mba Yesu wayile mwiulu byo kwashajile moba jikumi kwikala na Pentekosita. (Byu. 1:3) Byo papichiletu kimye kicheche kufuma po ayijile mwiulu, wapaine buneme bwa kitapisho kyanji kwi Yehoba, kabiji naye watambwile. (Hebe. 9:12) Kishiino kimwesha kino ke kintu kyamwekele pa Pentekosita. (Byu. 2:1-4, 32, 33) Kino kyafwainwa kyo kimye lulayañano lupya kyo lwaikajikilwe ne kutatula kwingila.

Mu kwipipisha, lulayañano lupya lwaikajikilwe ne kutatula kwingila kimye Yehoba kyo atambwile buneme bwa mashi a kwa Yesu. Luno lulayañano lwatendekele kwingila na Ñanga Mwine Mukatampe aye Yesu ñambi wa luno lulayañano.—Hebe. 7:25; 8:1-3, 6; 9:13-15.