1. Kwesakana na byaamba 3 Yoano 3, 4, ki ka kitulengela kwikala na lusekelo?

FWANYIKIZHAI lusekelo lwajinga na mutumwa Yoano kimye kyo aumvwine’mba bantu bo akwashishe kufunda bukine batwajijila kwingijila Yehoba mu bukishinka. Bano bena Kilishitu ba kishinka bapichilenga mu makatazho avula, kabiji Yoano waingijile na ngovu kwibakwasha kwikala na lwitabilo lwakosa kabiji wibamonangatu nobe baana banji. Ne atweba tusangalala bingi inge baana betu bo twisemena nangwa boba bo twafunjisha bukine bepana bene kwi Yehoba ne kutwajijila kumwingijila.—Tangai 3 Yoano 3, 4.

2. Ñanyi kintu Yoano kyo anembejile makalata?

² Mu mwaka wa 98 C.E., Yoano waikalanga mu Efisesa nangwa kwipi na uno muzhi. Kyamweka wavilukijile ku uno muzhi kimye kyo bamukasulwile mu kaleya pa jikuji ja Patamosa. Pa kyonkakya kimye, mupashi wa Yehoba po po amutangijile kunemba makalata asatu. Kine kintu kyo anembejile ano makalata ke kutundaika bena Kilishitu ba kishinka kutwajijila kwikala na lwitabilo mwi Yesu ne kutwajijila kwenda mu bukine.

3. Ñanyi mepuzho o tusakukumbula?

³ Yoano ye mutumwa washajilepo kabiji waakaminwe bingi pa bafunjishi ba bubela byo bakonsheshe kutwala bipwilo mungi. * (1 Yoa. 2:18, 19, 26) Bano bansatuki baambilenga’mba bayukile Lesa, bino kechi bakookelanga mikambizho ya Yehoba ne. Mu uno mutwe tusakwisamba pa lujimuno lwapaine Yoano na lutangijilo lwa mupashi wa Lesa. Byo tusakubanga bino, tusakukumbula ano mepuzho asatu: Kwenda mu bukine kulumbulula ka? Ñanyi mikiika yo twikala nayo pa kwenda mu bukine? Kabiji twakonsha kwikwasha byepi  atweba bene na bene kutwajijila kwenda mu bukine?

4. Kwesakana na byaamba 1 Yoano 2:3-6 ne 2 Yoano 4, 6, ñanyi bintu byavwangwamo mu kwenda mu bukine?

⁴ Pa kuba’mba twende mu bukine, twafwainwa kuyuka bukine buji mu Mambo a Lesa, Baibolo. Kikwabo, twafwainwa “kulondela mikambizho [ya Yehoba].” (Tangai 1 Yoano 2:3-6; 2 Yoano 4, 6.) Yesu ye tufunjilako bya kukookela Yehoba. Onkao mambo, jishinda janema kumwesheshamo amba tukookela Yehoba ke kupichila mu kulondela bulongo mu ngayo ya kwa Yesu.—Yoa. 8:29; 1 Pe. 2:21.

5. Twafwainwa kushiinwa’mba ka?

⁵ Pa kuba’mba tutwajijile kwenda mu bukine, twafwainwa kushiinwa kuba’mba Yehoba ye Lesa wa bukine, ne kuba’mba byonse byo etubuula mu Mambo anji, Baibolo, bya kine. Kabiji twafwainwa kushiinwa kuba’mba Yesu ye Mesiasa walailwe. Bantu bavula ano moba bazhinauka inge kya kuba Yesu washingwa kwikala Mfumu wa Bufumu bwa Lesa. Yoano wapaine lujimuno lwa kuba’mba kwajinga “bajimbijimbi bavula,” bajimbaikilenga boba babujile kujimba mizhazhi mu bukine bo bafunjile pe Yehoba ne Yesu. (2 Yoa. 7-11) Yoano wanembele’mba: “Nanchi muntu wa bubela kechi yewa ukana’mba Yesu kechi ye Kilishitu nenyi?” (1 Yoa. 2:22) Jishinda jimotu jo twakonsha kuchinuzhukilamo kujimbaikwa ke kufunda Mambo o Lesa. Inge twafunda Mambo a Lesa po po tukayuka Yehoba ne Yesu. (Yoa. 17:3) Kabiji tukashiinwa’mba tuji na bukine.

6. Ki ka kyakonsha kulengela banyike kuleka kwenda mu bukine?

⁶ Bena Kilishitu bonse bafwainwa kujimuka kuchina’mba bakebatwala mungi na mambo a buntemwamaana bwa bantu. (1 Yoa. 2:26) Kikatakata banyike bena Kilishitu bafwainwa kujimuka na kino kizumba. Nyenga wa ku France uji na myaka ya kusemwa 25 aye Alexia * waambile’mba: “Byo nakijinga ku sukulu, nafunjile lufunjisho lwa kuba’mba bilengwa byaishilekotu bine, ne mafunjisho akwabo a bantu kabiji ano mafunjisho andengejile kutendeka kuzhinauka bukine. Bimye bimo ano mafunjisho aumvwanyikanga nobe a kine. Bino nalangulukile kuba’mba kechi kyayijilemo kulengulula mafunjisho a mu Baibolo ne kuketekela byonse byaambanga bafunjishi ne.” Alexia wafunjile buku waamba pa bilengwa. * Byo papichiletu milungu icheche luzhinauko lo ajinga nalo lwapwile. Alexia waambile’mba: “Nashiinwe kuba’mba byambo biji mu Baibolo bya kine. Kabiji nafunjile kuba’mba kulondela mafunde ajimo kukandetela lusekelo ne mutende.”

7. Twafwainwa kuchinuzhuka bwikalo bwa mutundu ka, kabiji mambo ka?

 ⁷ Bena Kilishitu bonse, bakulumpe ne banyike, bafwainwa kuchinuzhuka bwikalo bwa bukakongolo mutoma kubiji. Yoano waambile’mba kechi twakonsha kwenda mu bukine saka twikala bwikalo buncha ne. (1 Yoa. 1:6) Inge tukeba Yehoba kwitutemwa, twafwainwa kuvulukanga kimye kyonse kuba’mba Yehoba umona byonse byo tuba. Kino kibena kulumbulula’mba kafwako mambo alenga muntu mu bufyamfya ne, mambo byonsetu byo tuba Yehoba wibimona.—Hebe. 4:13.

8. Ñanyi kintu kyo twafwainwa kuchinuzhuka?

⁸ Kechi twafwainwa kumona bubi byonka byo bebumona ku bantu ba mu ino ntanda ne. Mutumwa Yoano wanembele’mba: “Umvwe twaamba’mba, ‘Bundengamambo tufwabo,’ ko kuba’mba tubena kwijimbaika atwe bene.” (1 Yoa. 1:8) Mu moba ajingako Yoano, bansatuki baambilenga’mba muntu wakonsha kulenga mambo kyanshijitu kabiji watwajijila kwikala na bulunda bwawama ne Lesa. Ano moba, tubena kwikala na bantu baji na yonka ino milanguluko. Bavula bamba’mba baitabila mwi Lesa, bino kechi baswa byaamba Yehoba pa bubi ne, kikatakata pa kyubilo kya bulalelale. Yehoba byo aamba’mba bubi, abo bamba’mba kyaswishiwa muntu kuba byo byo inge bo bwikalo bo asalapo.

9. Mambo ka o kyawamina banyike kuba bintu byaamba Baibolo amba byo byawama?

⁹ Kikatakata banyike bena Kilishitu bakonsha kwibakanjikizha ku baana ba sukulu bakwabo nangwa ku bakwabo mo bengijila nkito kubula kukookela byaamba Baibolo pa bulalelale. Kino kyo kyamwekejile ne Aleksandar. Waambile’mba: “Bansongwakazhi bamo pa sukulu bankanjikizhanga’mba ndaale nabo. Baambilenga’mba na mambo a kuba’mba kechi najingapo na mukambwe wa mukazhi ne, ko kuba’mba nalaalanga na bakwetu banabalume.” Inge mwapita mu meseko a uno mutundu, vulukainga kuba’mba inge mwauba kyo mwayuka Baibolo kyo aamba’mba kyo kyawama, mukenemeka anweba bene, mukalamawizha  butuntulu bwenu bwa mubiji ne kubula kwikala na jiwi ja mu muchima jizhachisha, kabiji mukakosesha bulunda bwenu ne Yehoba. Kabiji kimye kyonse inge mwashinda lweseko, kikemupelelanga kuba bintu byawama. Kabiji vulukainga kuba’mba ndangulukilo yatama iji na bantu ba mu ino ntanda kutazha ku bulalelale ifuma kwi Satana. Onkao mambo, inge mwakana kwikala na ndangulukilo ya bantu ba mu ino ntanda, ‘mukamushinda aye mubi.’—1 Yoa. 2:14.

10. Kinembelo kya 1 Yoano 1:9 kitukwasha byepi kwingijila Yehoba na jiwi ja mu muchima jatoka?

¹⁰ Twaswa kuba’mba Yehoba ye uji na luusa lwa kwitubuula biji bubi. Kabiji twibikako kubula kulenga mambo. Bino inge twalenga mambo, tusolola mambo etu kwi Yehoba mu milombelo. (Tangai 1 Yoano 1:9.) Kabiji inge twalenga mambo akatampe, tulomba bukwasho ku bakulumpe mu kipwilo Yehoba bo apa mwingilo wa kwitukwasha. (Yako. 5:14-16) Nangwa byonkabyo, kechi twafwainwa kutwajijila na kwizhachisha pa mambo o twalengele kala ne. Mambo ka? Mambo Shetu wa butemwe wapaine Mwananji kwikala kitapisho kya bukuzhi pa kuba’mba mambo etu alekelwe. Inge Yehoba waamba’mba ukalekelako mambo bandengamambo balapila, kechi ubepa ne. Onkao mambo, kafwako kyakonsha kwitulengela kuleka kwingijila Yehoba na jiwi ja mu muchima jatoka ne.—1 Yoa. 2:1, 2, 12; 3:19, 20.

11. Twakonsha kwizhikijila byepi ku mafunjisho akonsha konauna lwitabilo lwetu?

¹¹ Twafwainwa kukana mafunjisho a bansatuki. Kufumatu kimye kyalengelwe kipwilo kya bwina Kilishitu, Diabola ubena kwingijisha bajimbijimbi bavula bingi kubyala luzhinauko mu michima ya bakalume ba Lesa ba kishinka. Onkao mambo, twafwainwa kwikala na maana a kuyuka lupusano luji pa byambo bya kine ne bya bubela. * Balwanyi betu bakonsha kwingijisha Intaneti nangwa misabilo ya pa intaneti ya kwisambilamo na bantu kukeba kwitulengela kuleka kwingijila Yehoba ne kuleka kutemwa balongo mu kipwilo. Vulukainga  mwine mwina buno bubela ne kwibukana.—1 Yoa. 4:1, 6; Lum. 12:9.

12. Mambo ka o twafwainwa kukosesha lwitabilo lwetu mu bukine bo twafunda?

¹² Pa kuba’mba tushinde meseko a kwa Satana, twafwainwa kukosesha luketekelo lwetu mwi Yesu ne kuyuka Yehoba byo abena kumwingijisha kuba kyaswa muchima wanji. Kabiji twafwainwa kuketekela boba Yehoba ubena kwingijisha kwitupa kajo ka ku mupashi lelo jino. (Mat. 24:45-47) Tukosesha luketekelo lwetu kupichila mu kufunda Mambo a Lesa. Kabiji lwitabilo lwetu lukekala nobe kichi kyatwezha mizhazhi panshi pene. Paulo waambilepo kintu kipashako kimye kyo anembejile kipwilo kya mu Kolose. Waambile’mba: “Monka mo mwatambwijile Kilishitu Yesu Nkambo, endelainga monka mwi aye, saka mwatabilamo, ne kushimikwa monka ne kukoselamo mu lwitabilo.” (Kolo. 2:6, 7) Kafwako kintu Satana nangwa bantu banji kyo bakoba kyakonsha kulengela mwina Kilishitu kuleka kwenda mu bukine ne.—2 Yoa. 8, 9.

13. Twafwainwa kuketekela ka, kabiji mambo ka?

¹³ Twafwainwa kuketekela kuba’mba bantu ba mu ino ntanda baketushikwa. (1 Yoa. 3:13) Yoano wituvululamo kuba’mba “pano pa ntanda ponse paji mu bulume bwa kwa aye mubi.” (1 Yoa. 5:19) Mpelo ya ino ntanda byo yafwenya kala pepi, bukaji bwa kwa Satana busakubayilangakotu. (Lum. 12:12) Wingijisha mashinda apusana-pusana abula kumweka patoka, nabiji kakose ka kuba bulalelale nangwa bubela bwa bansatuki. Kabiji uketulukukanga ne luntunanwa, nabiji kwitumanyika. Satana wayuka’mba washalatu na kakimye kacheche ka kwitwesekelamo kuba’mba tuleke kusapwila nangwa konauna lwitabilo lwetu. O ene mambo o tubujila kukumya inge twaumvwa’mba mwingilo wetu bamukanya nangwa bamushinka mu byalo bimo. Nangwa byonkabyo, balongo ne banyenga baji mu bino byalo batwajijila kuchinchika. Babena kumwesha kuba’mba nangwa kya kuba Satana etulukukepotu byepi tukatwajijila kwikala ba kishinka.

14. Ñanyi jishinda jimo jo twakonsha kukwashishamo balongo ne banyenga kutwajijila kwenda mu bukine?

¹⁴ Pa kuba’mba tukwashe balongo ne banyenga kutwajijila kwikala mu bukine, twafwainwa kwibobilanga lusa. (1 Yoa. 3:10, 11, 16-18) Twafwainwa kwimweshanga butemwe kimye kyonse, mu bimye byawama ne mu bimye bya makatazho. Nanchi mwayukapo umo wafwisha mulongo wanji kabiji ubena kukebewa lutekenesho nangwa kumukwashako bintu bikebewa mu bwikalo nyi? Nangwa abya mwaumvwa’mba bena Kilishitu bakwenu baponenwa na bya malwa kabiji babena kukebewa bukwasho bwa kushimukulula Mazubo a Bufumu nangwa mazubo abo nyi? Tumwesha byo twatemwa balongo ne banyenga ne kwibamwesha kifyele mu byo twamba ne byo tuba.

15. Kwesakana na byaamba 1 Yoano 4:7, 8, twafwainwa kuba byepi?

¹⁵ Tulondela Shetu wa mwiulu witutemwa inge twitemwa atwe bene na bene. (Tangai 1 Yoano 4:7, 8.) Jishinda janema jo twimwesheshamo butemwe ke kwilekelako mambo atweba bene na bene. Mukwetu wakonsha kwitukozha ku muchima kabiji walomba lulekelo lwa mambo. Tumwesha butemwe kupichila mu kumulekelako mambo ne kulubako. (Kolo. 3:13) Mulongo wa jizhina ja Aldo wazhingijile bingi byo aumvwine’mba mulongo ye anemekele bingi waamba byambo byatama pa bantu ba mu kisho kyanji. Aldo waambile’mba, “Nalombanga kwi Yehoba kimye kyonse kuba’mba ankwashe kubula kwikala na milanguluko yatama pa uno mulongo.” Bino Aldo waubilepo ne kintu kikwabo. Waipwizhe uno mulongo kuba’mba bakengijile pamo mu busapwishi. Byo baingijilenga pamo, Aldo walumbulwijile uno mulongo byo azhingijile pa byambo byo aambile. Aldo waambile’mba: “Mulongo byo aumvwine’mba byambo byanji byankozhezhe ku muchima, walombele lulekelo lwa mambo. Byaumvwanyikilenga jiwi janji byamwesheshe kuba’mba wilangulwishe bingi pa byambo byo aambile.  Twakoseshe bulunda bwetu ne kulubako ku kino kyamwekele.”

16-17. Twafwainwa kutwajijila kuba ka?

¹⁶ Mutumwa Yoano watemenwe bingi balongo banji kabiji wakebelenga kwibakwasha kwikala na lwitabilo lwakosa. Kino kyamwekela mu lujimuno lo ebajimwineko mu makalata anji asatu anembelwe na lutangijilo lwa mupashi. Kitutundaika bingi kuyuka’mba banabalume ne banabakazhi nabiji Yoano bashingwa kwikala bamfumu pamo ne Kilishitu.—1 Yoa. 2:27.

¹⁷ Twayai tulondelenga lujimuno lo twisambapo. Kabiji twayai tutwajijile kwenda mu bukine, ko kuba’mba kukookela Yehoba mu byonse byo tuba. Fundainga Mambo a Lesa ne kwiaketekela. Ikalai na lwitabilo lwakosa mwi Yesu. Kanai buntemwamaana bwa bantu ne mafunjisho a bansatuki. Chinuzhukai muteeto wa kwikala bukakongolo mutoma kubiji ne kwibikako kuchinuzhuka kulenga mambo. Kookelainga mizhilo yaoloka ya Yehoba. Kabiji twayai tukwashenga balongo kutwajijila kwikala na lwitabilo lwakosa kupichila mu kulekelako mambo boba betukozha ku muchima ne kukwasha bakajilwa. Tukatwajijila kwenda mu bukine nangwa kya kuba tubena kupita mu makatazho.