BAPOYA bya kupoyapoya batulukile matafwali a kusoka avula bingi o baingijishe pa kushimika muzhi wa Babilona. Kwesakana na byaambile shayuka upoya bya kupoyapoya aye Robert Koldewey, matafwali a uno mutundu be asokanga mu bisha bya mujilo byajinga “pangye ya muzhi pajinga maloba awama ne nkunyi . . . yavula.”

Bapoya bya kupoyapoya bataana’mba babitumbafumu ba mu Babilona baingijishanga bino bisha bya mujilo kusokelamo bintu bikwabo byakankamikanga bantu. Shayuka wayuka mwapichile bwikalo bwa bena Asilya aye Paul-Alain Beaulieu waambile’mba: “Mabuku avula anembele bena Babilona alumbulula’mba mfumu wakambizhe’mba bonse babujile kumukookela nangwa babujile kunemeka bintu byazhila be batayanga mu kisha kya mujilo.” Buku umo ye banembele mu moba a Mfumu Nebukaneza waambile’mba: “Bonaunai, basokai, . . . mu kitofu . . . sonselaiko nkunyi yavula pa kuba’mba mujilo atemeshe, batayai mu mujilo pa kuba’mba bafwe.”

Kino kivululamo bantu batemwa kutanga Baibolo jishimikila jiji mu Danyela kitango 3. Tutanga’mba Mfumu Nebukaneza walengele kipashañano kikatampe kya ngolode mu musanza wa Dula pangye ya muzhi wa Babilona. Bahebelu basatu abo ba Shadalaka, Meshaka ne Abedenego byo bakaine kufukamina kipashañano Nebukaneza wazhingijile bingi wakambizhe’mba “bekisonsele kisha kya mujilo bimye bitanu na bibiji kukila byo bekisonsela kimye kyonse,” kabiji wakambizhe’mba bano banabalume basatu ‘bebataye mu kisha kya mujilo.’ Nangwa byonkabyo, malaika wabulume wibapokolwele ku lufu.—Da. 3:1-6, 19-28.

Ano matafwali o batulukile mu Babilona amwesha’mba biji mu Baibolo bya kine. Pa matafwali avula banembelepo byambo bya kutota mfumu. Byambo bimo ke bya kuba’mba: “Nebukaneza, Mfumu wa Babilona . . . Kipango kyo nashimikile amiwa Mfumu Mukatampe . . . Baana bami mo bakalamanga myaka ne myaka.” Bino byambo bipasha na byambo biji pa Danyela 4:30 Nebukaneza po etotele’mba: “Nanchi uno kechi ye muzhi Mukatampe wa Babilona ye nashimikijile ba ku bufumu na bulume bwami, ngovu ne na lukumo lwami nenyi?”