1. Mambo ka o kyanemena kwinengezhezha jimo ku bya malwa?

 UMVWE twinengezhezha jimo malwa akatampe saka akyangye kutendeka, tukapuluka. Umvwe kwamweka kya malwa bantu benengezhezha jimo bo bapuluka, kabiji bakwashako ne bakwabo. Kipamo kimo kikwasha bantu mu Europe kyaambile’mba: “Bantu benengezhezha jimo bulongo bo bapuluka.”

2. Mambo ka o twafwainwa kwinengezhezha jimo malwa akatampe saka akyangye kutendeka? (Mateo 24:44)

² “Malwa akatampe” akatendekatu nobe mu kukopa kwa jiso. (Mat. 24:21) Malwa akatampe akapusana bingi na malwa akwabo mambo twayukila jimo kuba’mba akamweka, kechi aketubazhimuna ne. Myaka 2,000 yapitapo, Yesu wajimwineko baana banji ba bwanga kwinengezhezha jimo ku jino juba. (Tangai Mateo 24:44.) Umvwe twinengezhezha jimo kiketukwasha kuchinchika mu kimye kya malwa akatampe ne kukwasha bakwetu nabo kuchinchika.—Luka 21:36.

3. Kuchinchika, kifyele ne butemwe biketukwasha byepi kwinengezhezha jimo malwa akatampe saka akyangye kutatula?

³ Twafwainwa kwikala na bino byubilo bisatu byafwainwa kwitukwasha kwinengezhezha jimo malwa akatampe saka akyangye kutendeka. Tukoba byepi umvwe betwambila’mba tusapwile byambo bya luzhachisho kabiji inge bantu ke betukanye? (Lum. 16:21) Twafwainwa kuchinchika pa kuba’mba tukookele Yehoba ne kuketekela’mba uketuzhikijila. Twafwainwa kuba byepi inge bintu bimo nangwa bintu byonse bya balongo ne banyenga yetu byaonaika? (Ha. 3:17, 18) Kwibobila kifyele kuketulengela kwibakwasha. Ñanyi kintu kyo tukoba inge bisaka bya bantu bikakwatankana pamo bitulukuka kabiji kino kyalengela ke twikale pamo na balongo ne banyenga yetu? (Ezi. 38:10-12) Twafwainwa kwibatemwa bingi pa kuba’mba baketukwashe mu kimye kyakatazha.

4. Baibolo umwesha byepi amba twafwainwa kutwajijila kuchinchika, kwikala na kifyele ne butemwe?

 ⁴ Mambo a Lesa etutundaika kutwajijila kuchinchika, kwikala na kifyele ne butemwe. Luka 21:19 waamba’mba: “Umvwe mwachinchika, mukapulusha bumi bwenu.” Kolose 3:12 waamba’mba: “Vwalai . . . kifyele.” Kabiji 1 Tesalonika 4:9, 10 waamba’mba: “Lesa wimufunjisha kwitemwa [anweba] bene na bene. . . . Bino balongo bami, tubena kwimutundaika namba, mukijishemotu kuba kino.” Bino byambo byonse bebinembejile baana ba bwanga bamwesheshenga kuchinchika, kifyele ne butemwe. Nangwa byonkabyo batwajijile kufunda byo bafwainwe kumweshanga bino byubilo. Ne atweba byo byo twafwainwa kubanga. Kwisamba pa bena Kilishitu batanshi byo bamwesheshe bino byubilo kusakwitukwasha kuyuka ne atweba byo twafwainwa kuba. Kepo tusakumona byo twafwainwa kulondela byaubile baana ba bwanga ne kumwesha’mba twinengezhezha jimo malwa akatampe saka akyangye kutendeka.

5. Bena Kilishitu batanshi bachinchikile byepi meseko?

⁵ Bena Kilishitu batanshi bafwainwe kuchinchikanga. (Hebe. 10:36) Bapichilenga mu makatazho apichilengamo bantu bakwabo bavula pa kyonkakya kimye. Na mambo a kuba’mba bajinga bena Kilishitu, bapichilengatu ne mu makatazho akwabo. Bavula bebamanyikilenga ku bantangi ba bupopweshi bwa Bayudea, bandama kyalo ba mu Loma ne ku bisemitu byabo. (Mat. 10:21) Kabiji bebikilengako bingi kubula kulondela mafunjisho a bantu basendukile mu lwitabilo bakebelenga kwabanya kipwilo. (Byu. 20:29, 30) Bano bena Kilishitu batwajijile kwikala ba kishinka. (Lum. 2:3) Ñanyi bintu byo baubile? Balangulukile pa bantu bashinjile meseko bo baambapo mu Binembelo nabiji Yoba. (Yako. 5:10, 11) Balombele kwi Lesa kuba’mba ebakoseshe. (Byu. 4:29-31) Kabiji balangulukilenga’mba Yehoba ukebapesha umvwe batwajijila kuchinchika.—Byu. 5:41.

6. Tufunjilako ka ku byaubile Merita pa kuba’mba achinchike?

⁶ Ne atweba inge ketutange mashimikila a bantu bachinchikile o baambapo mu mambo a Lesa ne mu mabuku etu ne kulanguluka langulukapo tukachinchika meseko. Bino byo byaubilenga nyenga Merita wa ku AIbania kabiji kino kyamulengejile kuchinchika bintu byatama byamubilenga ba mu kisemi. Waambile’mba: “Jishimikila ja kwa Yoba jiji mu Baibolo jantundaikile bingi. Yoba wamanamine bingi nangwa kya kuba kechi wayukile kwafuminenga lukatazho lwanji ne, waambile’mba: ‘Kufikatu ne byo nkafwa, kechi nkasankilapo bulumbuluke bwami ne.’ (Yoba 27:5) Nalangulukile pa makatazho anji byo abayile kukila ami. Amiwa nayukile kwafuminenga makatazho ami, pa kuba Yoba kechi wayukile ne.”

7. Ñanyi kintu kyo twafwainwa kufunda kuba lonka luno nangwatu inge kechi tubena kupita mu makatazho akatampe ne?

⁷ Tukatwajijila kuchinchika inge saka tulomba kwi Yehoba javula ne kumubuula bijikila byetu byonse. (Fili. 4:6; 1 Tesa. 5:17) Kampe pa kino kimye kechi mubena kupitapo mu lukatazho lukatampe ne. Nangwa byonkabyo, nanchi mulomba kwi Yehoba kuba’mba emukwashe umvwe mwazhingila, kechi mwayuka byo mwafwainwa kuba ne, nangwa inge kimumwekela kimushinka bulaka? Umvwe kimye kyonse mulomba kwi Lesa kuba’mba emukwashe mu bintu bicheche byo mupitamo pa juba pa juba, kechi mukazhinyazhinya kumubuula inge lukatazho lukatampe lwimufikila ne. Kepo mukashiinwa’mba Lesa wayuka kimye kyo afwainwa kwimukwasha kabiji ukemukwasha.—Sala. 27:1, 3.

8. Mwafwainwa kufunjilako ka ku byuba Mira? (Yakoba 1:2-4) (Monai ne kipikichala.)

⁸ Umvwe luno tuchinchika meseko kiketupeelela bingi kuchinchika malwa akatampe  inge akatendeke. (Loma 5:3) Mambo ka o twaambila bino? Balongo ne banyenga bavula bamba’mba kuchinchika lukatazho lumo kwibalenga kuchinchika ne lukwabo. Umvwe bachinchika lukatazho na bukwasho bwa Yehoba, lwitabilo lwabo lukoselako. Kabiji bayuka’mba Yehoba ukeba kwibakwasha. Na mambo a kuba’mba baitabila mwi Yehoba bachinchika lukatazho lukwabo lo bakonsha kupitamo. (Tangai Yakoba 1:2-4.) Mira, painiya mu Albania wataana’mba kuchinchika meseko o apichilengamo kunyuma kwamukwasha kuchinchika meseko o apitamo luno. Uswa’mba kimye kimo ulanguluka’mba ye yenkatu ubena kupita mu makatazho avula bingi. Pano bino inge walanguluka pe Yehoba byo amukwasha myaka 20 yapitapo witundaika mwine’mba: ‘Twajijila kwikala wa kishinka. Kange uleke kwingijila Yehoba wakukwasha kuchinchika makatazho onse o wapitamo ne.’ Ne anweba langulukainga pe Yehoba byo emukwasha kuchinchika. Shiinwai’mba umona byo muchinchika kabiji ukemufweta. (Mat. 5:10-12) Kepo malwa akatampe byo akatendeka, akataana mwafunda kala kuchinchika kabiji mukatwajijila kuchinchika.

9. Bena Kilishitu ba mu Antioka wa mu Silya baubilepo ka kumwesha kifyele ku balongo ne banyenga?

⁹ Akilangulukai pa byaubile bena Kilishitu baikalanga mu Yudea byo kwaishile kipowe kya nzala kikatampe. Balongo ne banyenga ba mu Antioka wa mu Silya byo baumvwine kino, baubijile kifyele balongo ne banyenga ba mu Yudea. Onkao mambo, baubilepo kintu kimo pa kuba’mba bakwashe bano balongo ne banyenga. “Bafuukwilepo kupana bintu byo bakonsheshe kupana, ne kutuma kajo ka kutuuka ku balongo baikelenga mu Yudea.” (Byu. 11:27-30) Bena Kilishitu bajinga mu Antioka bafuukwilepo kukwasha balongo ne banyenga bamanaminenga na mambo a kipowe kya nzala kikatampe nangwa kya kuba bajinga kwalepa.—1 Yoa. 3:17, 18.

10. Mu ñanyi mashinda mo tumweshesha kifyele ku bapopweshi bakwetu inge kwamweka bya malwa? (Monai ne kipikichala.)

¹⁰ Lelo jino tubila balongo ne banyenga kifyele inge twayuka’mba babena kumanama na mambo a mvula wa kipupu kikatampe nangwa na mambo a makatazhotu akwabo. Tuba bino, inge twaipuzha bakulumpe mu kipwilo umvwe twafwainwa kukwashako mu mwingilo umo, twapanako mali a kutundaika mwingilo wa ntanda yonse nangwa kulombelako balongo ne banyenga baji mu lukatazho. b (Maana 17:17) Mu 2020, balengele Tuvoto Twakukwasha Baponenwa na bya Malwa kukila 950 pa kuba’mba bakwashe bonse bakebelenga bukwasho mu kimye kya mwalo wa COVID-19. Tubena kusanchila balongo ne banyenga bepaine kwingilako uno mwingilo. Na mambo a kubila balongo ne banyenga kifyele bapaine bintu byavula bingi ne kwibakwasha kutwajijila kwingijila Yehoba. Mu mapunzha amo bawamishe mazubo a balongo ne banyenga ne mazubo a kupopwelamo Lesa aonaikile.—Esakanyaiko 2 Kolinda 8:1-4.

11. Ñanyi bintu byo tuba bimwesha’mba tunemeka Yehoba?

¹¹ Umvwe twamwesha kifyele mu kimye kya malwa, bantu bamona byo twipana kukwasha bakwetu. Mu 2019, kinkunkwila kyaonawine Nzubo ya Bufumu mu Bahamas. Balongo ne banyenga byo bafuukwilepo kushimukulula Nzubo ya Bufumu besambile na kampanyi kamo ka buntungi kuba’mba kebabuule mali o bafwainwe kwingijisha pa kuba’mba mwingilo yense apwe. Mukulumpe wa kampanyi wibambijile’mba: “Nkanengezha. . . bingijisho, ba mingilo ne bintu byonse bya kushimukulwila. . . . Nkemubila  bino byonse kyatu. Mbena kukebatu kutundaika jibumba jenu. Natemwatu byo mumwesha kifyele ku balunda nenu.” Bantu bavula mu ntanda kechi bamuyuka Yehoba ne. Bino bavula bamona Bakamonyi ba kwa Yehoba byo boba pa kukwasha bakwabo. Kituletela bingi lusekelo kuyuka’mba kifyele kyo tumwesha bakwetu kilengela bantu bakwabo kukeba kuyuka Yehoba uji na “lusa lwavula.”—Efi. 2:4.

12. Kumwesha kifyele lelo jino kwitukwasha byepi kwinengezhezha jimo malwa akatampe saka kutendeka? (Lumwekesho 13:16, 17)

¹² Tukamweshanga byepi kifyele mu kimye kya malwa akatampe? Bantu bonse babula kutundaika makafulumende a ino ntanda bapita mu makatazho luno kabiji bakapita mu makatazho mu kimye kya malwa akatampe. (Tangai Lumwekesho 13:16, 17.) Balongo ne banyenga yetu bakeba kwibakwasha pa kuba’mba bakapuluke. Umvwe mfumu wetu aye Kilishitu Yesu akachibile bantu mambo, tukeba aketutaane tubena kumwesha kifyele ku bakwetu kabiji aketwambile’mba “swanai Bufumu.”—Mat. 25:34-40.

13. Kwesakana na Loma 15:7, bena Kilishitu batanshi waubile ka pa kuba’mba betemwe bene na bene?

¹³ Bantu bonse bayukile’mba bena Kilishitu batanshi betemenwe bene na bene. Nanchi kibapeelejile kumwesha buno butemwe nyi? Langulukai pa byajinga kipwilo kya mu Loma. Bamo bajinga Bayudea bafunjile kukookela Mizhilo ya Mosesa, bakwabo bajinga ba mu bisaka bikwabo kabiji bakomejile mu bisho byapusana pusana. Bamo nabo bajinga bazha, pakuba bakwabo bajinga baana ba bene kabiji kyamweka bamo bajinga bankambo ya bazha. Bano bena Kilishitu bamwesheshe byepi kuba’mba betemenwe bene na bene nangwa kya kuba bisho byabo byapusene? Mutumwa Paulo wibatundaikile’mba “itambwilainga anwe bene na bene.” (Tangai Loma 15:7.) Walumbulwilenga ka? Kyambo kyatuntululwa’mba “itambwilainga” kilumbulula kumwesha kifyele muntu ye mwatambwila nangwa kumutambwila bulongo nabiji kumutwezha mu nzubo yenu ne kumulengela kukasuluka. Paulo wabuujile Filemonyi bya kutambwila muzha wanyemene aye Onesimusa amba: “Umutambwile bulongo.” (File. 17) Kabiji Pilisila ne Akwila batambwijile Apolosa wabujile kuyuka byavula pa bwina Kilishitu byo “bamusendele ku mbaji.” (Byu. 18:26) Bena Kilishitu batanshi kechi baswishishe bisho byabo byapusana pusana kwibalengela kubula kwitemwa bene na bene ne.

14. Ba Anna ne bena kwabo bamwesheshe byepi butemwe?

¹⁴ Ne atweba tumwesha’mba twatemwa balongo ne banyenga inge twaikala balunda nabo. Javula kino kibalengela nabo kwitutemwa. (2 Ko. 6:11-13) Langulukai pa byaubile ba Anna ne bena kwabo. Byo bayile ku Muzhika wa Africa ko bebatumine mu mwingilo wa bumishonale mwalo wa COVID-19 watendekele. Na mambo a mwalo kechi bapwilanga pamo na balongo ne banyenga mu Nzubo ya Bufumu ne. Bino bamwesheshe byepi butemwe? Baingijishenga foni ne biñambañambatu bikwabo kwisambilamo na balongo ne banyenga ne kwibabuula’mba babena kukebesha bingi kwi bayuka. Bisemi byaumvwine bingi bulongo kabiji bibatumijile mafoni ne tubyambo twa pa foni. Mambo ka bano bamishonale o bakebejile kuyuka balongo ne banyenga? Ba Anna baambile’mba: “Kechi ndubako butemwe bwammwesheshe balongo ne banyenga ne bo bamwesheshe kisemi kyami mu bimye byawama ne byakatazha ne. Kabiji butemwe bwabo bwandengela kutendeka kumwesha butemwe ku balongo ne banyenga.”

15. Ñanyi bintu byo tufunjilako kwi nyenga Vanessa pa byo twafwainwa kutemwa balongo ne banyenga bonse? (Monai ne kipikichala.)

¹⁵ Atweba bonse tuji mu bipwilo muji balongo  ne banyenga baji na byubilo byapusanako na byetu. Twafwainwa kutwajijila kwibatemwa inge twata muchima pa byubilo byabo byawama. Nyenga Vanessa, wingijila mu New Zealand kyamukatezhe bingi kutemwa balongo ne banyenga bamo mu kipwilo. Bino wafuukwilepo kutayanga kimye kyabaya na balongo ne banyenga bajinga na byubilo byo ashikilwe. Kuba bino kwamukwashishe kumonanga byubilo byabo byawama byamwenenga Yehoba. Waambile’mba: “Kufumatu kimye bamwatawami kyo baikele bakalama ba mwanzo, tutaya kimye kyabaya na balongo ne banyenga bavula bingi baji na byubilo byapusana na byetu kabiji kimpeelela kumvwañana nabo. Luno natemwa balongo ne banyenga bavula bingi bapusana pusana. Yehoba naye wibatemwa bingi mambo bantu banji bo aswisha kumupopwela baji na bisemwa ne byubilo byapusana pusana.” Umvwe twafunda kumona bakwetu byonkatu Yehoba byo ebamona tukatwajijila kwibatemwa.—2 Ko. 8:24.

16. Mambo ka o kikanemena kutemwa balongo ne banyenga mu kimye kya malwa akatampe? (Monai ne kipikichala.)

¹⁶ Kutemwa balongo ne banyenga kuketukwasha bingi mu kimye kya malwa akatampe. Yehoba uketuzhikijila byepi inge malwa atendeka? Akilangulukai pe Yehoba byo abuujile bantu banji kuba kimye Babilona kyo bamulukukile. Waambile’mba: “Anweba bantu bami, twelai mu mazubo enu a mukachi, ne kushinka binzhilo byenu. Mukafyamemo pa kakimye kacheche posotu ne bukaji byo bukapita.” (Isa. 26:20) Kyamweka ne atweba tukalondela yenka uno mukambizho mu kimye kya malwa akatampe. ‘Mazubo a mukachi’ kyamweka abena kwimenako bipwilo byetu. Yehoba witulaya’mba uketuzhikijila mu kimye kya malwa akatampe inge twatwajijila kukwatankana na balongo ne banyenga yetu. Onkao mambo, twafwainwa kwingila na ngovu kutemwa balongo ne banyenga luno mambo kupuluka kwetu po po kukemena.

17. Inge twinengezhezha jimo luno, ñanyi bintu byo tukoba mu kimye kya malwa akatampe?

¹⁷ “Juba jikatampe ja Yehoba” jikaleta malwa pa bantu bonse. (Zefwa. 1:14, 15) Bantu ba Yehoba nabo bakamanama. Bino umvwe twinengezhezha jimo lonka luno kechi tukalukusha muchima ne, pakuba tukatekanya ne kukwasha bakwetu. Tukachinchika makatazho onse o tukapitamo. Umvwe bakwetu ba mu lwitabilo bamanama tukepaana kwibakwasha, kwibamwesha kifyele ne kwibapa byonse byo bakakajilwa. Kabiji inge twafunda kutemwa balongo ne banyenga luno, kiketupeelela bingi kwibatemwa mu kimye kya kulutwe. Kepo Yehoba aketupa bumi bwa myaka ne myaka mu ntanda mo tukabula kuvuluka bya malwa ne lumanamo lonse.—Isa. 65:17.