1. Ñanyi bukine bo mwafunjile kimye kyo mwatendekele kufunda Baibolo?

 NANCHI mubena kuvuluka bintu byonse byo mwafunjile kimye kyo mwatendekele kufunda Baibolo nyi? Mwafwainwa mwaumvwine bingi bulongo kuyuka’mba Lesa uji na jizhina. Nangwa kampe kimutekeneshe kuyuka’mba Lesa kechi usoka bantu mu mujilo wa helo ne. Kabiji kyamweka mwasangalele bingi kuyuka’mba mukamonañana jibiji na balongo ne balunda nenu bafwa mu paladisa pano pa ntanda.

2. Kununga pa kufunda bukine bwa mu Baibolo, ñanyi bintu byo mwaubile bimukwashishe kwendanga mu bukine? (Efisesa 5:1, 2)

² Kutwajijila kufunda Baibolo kwimulengejile kutemwa bingi Yehoba. Buno butemwe bwimukwashishe kwingijisha byo mwafunjile. Mwaingijishenga mafunde a mu Baibolo pa kufuukula bintu. Mwatendekele kulanguluka ne kuba bintu bulongo mambo mwakebelenga kutookesha Lesa ku muchima. Mwalondejilenga Shetu wa mwiulu byonkatu mwana byo alondela bansemi bamutemwa.—Tangai Efisesa 5:1, 2.

3. Ñanyi mepuzho o twafwainwa kwishikisha atweba bene?

³ Kimo kimye twakonsha kwishikisha’mba, ‘Nanchi luno namutemwa bingi Yehoba kukila byo namutemenwe kimye kyo natendekele kufunda bukine nyi? Nanchi ndanguluka ne kubila bintu monka Yehoba mo akebela ne kumwesha butemwe ku balongo ne banyenga nyi?’ Nangwatu inge twayuka’mba kechi twatemwa Yehoba ne balongo ‘byonka byo twibatemenwe kala ne,’ kange tulefulwe ne. Kino kyo kyamwekejile ne bena Kilishitu batanshi. Yesu kechi wibakaine ne. Ne atweba kechi uketukana ne. (Lum. 2:4, 7) Yesu wayukile kuba’mba twakonsha kwikala na butemwe bo twajinga nabo kala kimye kyo twatendekele kufunda bukine.

4. Ñanyi bintu byo tusakwisambapo mu uno mutwe?

 ⁴ Mu uno mutwe, tusakwisamba pa byo twafwainwa kutwajijila kutemwa Yehoba ne bakwetu. Kepo tusakufunda bintu byawama bifuma mu kutemwa Yehoba ne balongo ne banyenga.

5-6. Ñanyi makatazho apichilemo Paulo mu mwingilo wanji wa kusapwila, kabiji ñanyi kintu kyamulengejile kutwajijila kwingijila Yehoba?

⁵ Mutumwa Paulo waingijilenga Yehoba na lusekelo, bino kechi kyamupeelejile kuba bino kimye kyonse ne. Mutumwa Paulo waendelenga miseke yalepa bingi kabiji kechi kyapeelele kwenda mu o a moba ne. Kimye kimo pa lwendo, Paulo ‘wapichilenga mu bizumba bya pa mikola’ ne ‘kukeba kumwipaya ku tupondo.’ Kabiji pa bimye bimo balwanyi banji bamupuminenga. (2 Ko. 11:23-27) Kabiji kimye kimo balongo kechi basanchijilenga Paulo pa byo ebikilengako kwibakwasha ne.—2 Ko. 10:10; Fili. 4:15.

⁶ Ñanyi kintu kyakwashishe Paulo kutwajijila kwingijila Yehoba? Paulo wafunjile byubilo bya Yehoba byavula bingi mu Binembelo ne ku bintu byo apichilengamo. Paulo washiinwe’mba Yehoba wamutemenwe bingi. (Loma 8:38, 39; Efi. 2:4, 5) Kabiji naye watemenwe bingi Yehoba. Paulo wamwesheshe byo atemenwe Yehoba “byo ebengijilenga bazhijikwa ne byo atwajijile na kwibengijila.”—Hebe. 6:10.

7. Ñanyi bintu byo twafwainwa kuba pa kuba’mba tutwajijile kutemwa Yehoba?

⁷ Twafwainwa kutwajijila kutemwa Yehoba inge saka tutanga Mambo anji. Inge mubena kutanga Baibolo, kwatakanyai byo mubena kutanga byo byaambapo pe Yehoba. Ishikishai’mba, ‘Jino jishimikila jamwesha byepi’mba Yehoba wantemwa? Kabiji ñanyi bishinka byakonsha kundengela kutemwa Yehoba?’

8. Lulombelo lwakonsha kwitukwasha byepi kumutemenwako Yehoba?

⁸ Kintu kikwabo kyakonsha kwitukwasha kutwajijila kutemwa Yehoba ke kulomba kimye kyonse. (Sala. 25:4, 5) Yehoba naye ukakumbula milombelo yetu. (1 Yoa. 3:21, 22) Nyenga Khanh wikala ku Asia, waambile’mba: “Kala natemenwe Yehoba na mambo a byo nafunjile pe aye, bino luno namutemenwako bingi mambo namona byo akumbula milombelo yami. Kino kyalengela’mba ngubenga bintu bitookesha Yehoba ku muchima.” b

9. Timoti wamwesheshe byepi kuba’mba watwajijile kutemwa bingi balongo ne banyenga?

⁹ Byo papichile myaka kufuma kimye Paulo kyo aikele ke mwina Kilishitu, wamonañene ne Timoti nsongwalume wawamine bingi muchima. Timoti watemenwe bingi Yehoba ne bantu. Paulo waambijile bena Filipai amba: “Kechi njipo na muntu mukwabo wa kwimutumina uji na muchima nobe aye ukateshako muchima ku bijikila byenu ne.” (Fili. 2:20) Paulo kechi waambile pa kya bupe kyajinga ne Timoti kya kuba bintu bulongo nangwa kwamba bulongo ne. Bipwilo Timoti byo aingijile byakebeshenga bingi aye kwibifwakesha jibiji.—1 Ko. 4:17.

10. Kutemwa balongo ne banyenga kwalengejile ba Anna ne benakwabo kuba ka?

¹⁰ Nangwatu atweba tumonapo mashinda amo a kukwashishamo balongo ne banyenga bena Kilishitu bakwetu. (Hebe. 13:16) Akilangulukai pe Anna, ye twaambilepo mu mutwe wafumako. Kipuupu kikatampe byo kyapwile, aye ne bamwatawanji bafwakashijile  kisemi kimo kya Bakamonyi kabiji bataaine’mba kipuupu kyapaamunapo musemi wa nzubo ya kino kisemi. Bivwalo bya kino kisemi, byonse byajinga mateshitu. Nyenga Anna waambile’mba: “Twasendele bivwalo byabo, twibichapile kabiji twibikiishile ne kwibichimpa bulongo. Nangwa kya kuba uno mwingilo ye twaingijile wajingatu mucheche, walengela twaikala balunda na kino kisemi.” Kutemwa balongo ne banyenga ko kwalengejile ba Anna ne benakwabo kukwasha kino kisemi.—1 Yoa. 3:17, 18.

11. (a) Bakwetu bomvwa byepi inge bamona twamwesha’mba twibatemwa? (b) Kwesakana na Byambo bya Maana 19:17, Yehoba uba byepi umvwe twamwesha’mba twatemwa bakwetu?

¹¹ Umvwe twamwesha lusa ne kutemwa bakwetu, bafwainwa kumona’mba tubena kweseka kulondela Yehoba kabiji kechi bafwainwa kulubako kino kintu kyawama kyo twibobijile ne. Khanh, ye twaambapo kala uvuluka bingi bamukwashishe. Waambile’mba: “Nsanchila bingi banyenga bansendanga mu busapwishi. Baiyanga pa nzubo na kunsenda, bangitanga ne kujila pamo kajo ne kumona’mba nafikatu bulongo ku nzubo. Luno nayuka namba uno wajinga mwingilo mukatampe bingi. Kabiji baubilenga bino byonse na lusekelo.” Nangwa byonkabyo, kechi bantu bonse baketusanchila pa byonse byo twibobila ne. Khanh waambile pa bonse bamukwashishe’mba: “Ndanguluka’mba ne amiwa nafwainwe kwibobilapo bintu byawama, bino kechi nayuka bonse ko bekala ne. Pano bino, Yehoba wibobila byawama. Kabiji ndomba kuba’mba Yehoba akebafwete pa byonse byo bangubijile.” Byaambile Khanh bya kine. Yehoba umona byonse byawama byo tubila bakwetu nangwatu tuntu tucheche to twibobila. Umona’mba twauba kintu kyanema bingi kabiji twamukongwesha ye ukebafweta.—Tangai Byambo bya Maana 19:17.

12. Ñanyi bintu balongo byo bafwainwa kuba bimwesha’mba batemwa bakwabo? (Monai ne kipikichala.)

 ¹² Umvwe mwi balongo, mwafwainwa kumwesha byepi’mba mwatemwa bakwenu kabiji ñanyi bintu byo mwafwainwa kuba byakonsha kwibakwasha? Nsongwalume umo aye Jordan waipwizhe mukulumpe mu kipwilo bintu byo afwainwa kuba byakonsha kukwasha balongo ne banyenga mu kipwilo. Mukulumpe mu kipwilo wamusanchijile pa byo epaine kwingijila balongo ne banyenga kabiji wamubuujile bintu bikwabo byo akonsheshe kuba. Waambile’mba Jordan afikenga bukiji pa Nzubo ya Bufumu ne kwimuna bakwabo bonse, kukumbulapo pa kupwila, kusapwila kimye kyonse pamo na ba mu jibumba mo ajinga ne kulangulukapo bintu bimo byo afwainwa kuba byakonsha kukwasha bakwabo. Jordan byo aubile bino byonse, wafunjile bya kwingila mingilo imo kabiji wafunjile kutemwa bingi balongo ne banyenga. Jordan wafunjile’mba mulongo inge waikala nkwasho mu kipwilo kechi po po atendeka kukwasha bakwabo ne, bino utwajijila kwibakwasha.—1 Timo. 3:8-10, 13.

13. Butemwe bwalengejile byepi mulongo Christian kufikilamo kwikala mukulumpe mu kipwilo jibiji?

¹³ Ñanyi kintu kyo mwafwainwa kuvulukanga inge kala mwajinga bankwasho nangwa bakulumpe mu kipwilo? Yehoba uvuluka mingilo yenu yo mwaingijile myaka ya kala ne butemwe byo bwimulengejile kwingila mingilo yenu. (1 Ko. 15:58) Kabiji nangwatu luno umona byo mwatwajijila kumwesha butemwe ku bakwenu. Mulongo Christian walefwilwe bingi byo bamufumishe pa bukulumpe. Bino waambile’mba: “Nafuukwilepo kubanga bintu byafwainwa kundengela kutwajijila kwingijila Yehoba inge ne mukulumpe mu kipwilo nangwa ne.” Mukuya kwa moba, bamutongwele  kwikala jibiji mukulumpe mu kipwilo. Mulongo Christian waambile’mba: “Patanshitu naakaminwe bingi kwingila uno mwingilo. Bino nalangulukile’mba inge Yehoba ye wantongola jibiji kwikala mukulumpe mu kipwilo, nafwainwa kwingila mambo namutemwa kabiji natemwa balongo ne banyenga.”

14. Tubena kufunjilako ka ku byaambile nyenga wikala mu kyalo kya Georgia?

¹⁴ Kabiji bantu ba Yehoba bamwesha’mba batemwa bakwabo. (Mat. 22:37-39) Nyenga Elena wikala mu kyalo kya Georgia waambile’mba: “Patanshitu, natemenwe mwingilo wa kusapwila mambo akuba natemenwe bingi Yehoba. Kutwajijila kutemwa Shetu wa mwiulu ko kwandengejile kutwajijila kutemwa bakwetu. Nafwanyikizhenga makatazho o bapichilengamo ne bintu byo nafwainwe kwisamba nabo byafwainwe kwibafika pa muchima. Kutwajijila kulanguluka pa bino bintu kwandengelanga kukebesha kwibakwasha.”—Loma 10:13-15.

15-16. Kwesakana na bipikichala, ñanyi mapesho o twikala nao inge ketumweshe butemwe ku bakwetu?

¹⁵ Inge twamwesha balongo betu butemwe, kechi bo bonkatu bamwenamo ne. Mwalo wa COVID-19 byo atendekele, mulongo Paolo ne bena kwanji bakwashishe banyenga bakoma bavula kufunda bya kusapwila kwingijisha foni nangwa biñambañambatu bikwabo. Nyenga umo patanshi kechi wayukile bya kwingijisha foni bulongo ne, pano  bino bamufunjishe bya kwiingijisha bulongo mu mwingilo. Waichile balongo banji kwiya na kutaanwa ku Kivuluko. Balongo banji 60 batainweko ku Kivuluko kwingijisha kiñambañamba. Nyenga ne balongo banji bonse bamwenejilemo na mambo a bukwasho bwafumine kwi ba Paolo ne benakwabo. Kabiji nyenga wanembejile ba Paolo amba: “Twimusanchila bingi pa kwitufunjisha atweba bakote. Kechi nkalubamo Yehoba byo etutemwa ne byo mwaingijile na ngovu kwitukwasha.”

¹⁶ Ba Paolo bafunjileko kintu kimo kyanema bingi. Bavulukile’mba butemwe bwanema kukila maana nangwa bintu muntu byo ayuka. Baambile’mba: “Kala najinga kalama wa mwanzo. Luno mvuluka kuba’mba kampe basapwishi bakonsha kulubamo majashi o naambile, pano bino bakivuluka bintu bimo byo nebobijile bibakwashishe.”

17. Bañanyi bakwabo bamwenamo inge twamwesha butemwe ku bakwetu?

¹⁷ Inge twamwesha’mba twatemwa bakwetu, tumwenamo mu mashinda o twabujilenga ne kuketekela. Ba Jonathan bekala mu kyalo kya New Zealand, baswile kino. Juba jimo pa Kibelushi mute saka wazonga bamwene painiya saka asapwila bunke bwanji. Ba Jonathan bafuukwilepo kwingilanga na uno painiya pa Kibelushi mute jonse. Pa kyokya kimye, kechi bamwene kyo bafuukwilepo kuba byo kibakwashishe ne. Baambile’mba. “Kala kechi natemenwe mwingilo wa kusapwila mu bwikalo bwami ne. Bino byo natelekelenga ku byafunjishenga painiya ne kumona byawama byafuminengamo mu mwingilo wanji, naikele na mukoyo wa kusapwila. Kabiji uno mulongo waikele ke mulunda nami kabiji wankwashishe kutemwa mwingilo ne kufwenya kwipi ne Yehoba.”

18. Ñanyi bintu Yehoba byo akeba’mba tubenga?

¹⁸ Yehoba ukeba atweba bonse kutwajijila kumutemwa ne kutemwa bakwetu. Byonkatu byo twafunda, twafwainwa kutwajijila kutemwa Yehoba umvwe saka tutanga mambo anji, kulanguluka langulukapo ne kwisamba nanji mu lulombelo. Twafwainwa kutwajijila kumwesha’mba twatemwa balongo ne banyenga inge saka twibakwasha. Inge butemwe bwabaya, tukafwenya kwipi ne Yehoba ne ku balongo ne banyenga yetu. Kabiji tukekala balunda myaka ne myaka.