Batata bajinga bakulumpe mu kipwilo kya United Church of Canada monka mu muzhi mo twaikalanga. Onkao mambo betwambilanga, amiwa ne banyenga yami kuya ku mafunjisho a banyike aikalangako ku chechi pa Mulungu pa Mulungu. Kepo 11 koloko twayanga nabo ku chechi. Mute twayanga na bamama ku Nzubo ya Bufumu. Kitupeelejile bingi kumona mafunjisho a buno bupopweshi bubiji byo apusene.

Bamama batendekele kubuulako balunda nabo ba Bob ne ba Marion Hutcheson bintu byo bafunjilenga, kabiji nabo baikele ke Bakamonyi ba kwa Yehoba. Mu 1958 Mulongo ne Nyenga Hutcheson bansendele pamo na baana babo babalume basatu ku Kushonkena Kukatampe kwa kuba’mba Kuba Kyaswa Muchima wa Lesa kwa moba atanu na asatu kwaikajile mu Muzhi wa New York. Kulanguluka pa kokwa kushonkena kwandengejile kuyuka’mba kechi kibapeelejile kunsenda ne, bino mvuluka bintu byawama byamwekele byapimpwile bwikalo bwami.

Saka nkiji mwanyike twaikalanga pa fwamu po twalele bañombe, bankumba, mikooko ne banzolo. Nalangulukilenga kuya ku sukulu na kufunda bya kwikala dokotala wa banyama. Bamama babuujileko mukulumpe mu kipwilo umo. Uno mukulumpe wamvulwilemo’mba tubena kwikala mu “moba a kupelako” Kabiji wakebelenga’mba namubuule bikekala bulunda bwami ne Yehoba inge naya ku univesiti myaka yavula na kufunda. (2 Timo. 3:1) Kino kyandengejile kufuukula’mba kechi nkaya na kufunda ku univesiti.

Nangwa byonkabyo, natendekele kulanguluka pa byo nkobanga inge napwisha sukulu wa ku sekondale. Nangwa kya kuba nayanga mu busapwishi pa Kibelushi ne pa Mulungu kechi naingilanga na lusekelo ne, kabiji kechi nalangulukangapo’mba nkekala painiya ne. Batata ne bankasabo babujile Bakamonyi ba kwa Yehoba bantundaikanga kutwela nkito  pa kampanyi katala pa kwivimbila ku mapuso kaji mu Toronto. Batata ba banyike bajinga na kifulo kikatampe pa yewa kampanyi. Onkao mambo, naswile kutwela nkito.

Mu Toronto, naingijilenga kimye kyabaya ku nkito kabiji napwanañananga na bantu babujile Bakamonyi ba kwa Yehoba. Bano bantu bankanyanga kuya na kupwila ne kusapwila kimye kyonse. Patanshi naikalanga na bankambo babujile Bakamonyi ba kwa Yehoba, pano bino byo bafwile, natendekele kukeba kukwabo kwa kwikala.

Ba Hutcheson ne bena kwabo bansendeleko kuya na kushonkena mu 1958, bajinga nobe bansemi kwi amiwa. Bañambijile’mba mvilukile kwabo kabiji bankwashishe bingi kukosesha bulunda bwami ne Yehoba. Mu 1960, amiwa ne mwanabo John twabatizhiwe. John watendekele bupainiya kabiji wantundaikilenga kwingila kimye kyabaya mu busapwishi. Balongo mu kipwilo bamwene’mba naingijilenga bingi bulongo kabiji bantongwele kwikala kalama ye tutela luno’mba Kalama wa Kupwila kwa Bwikalo ne Mwingilo.

Mu 1966, nasongwele ba Randi Berge, bapainiya baingilanga bingi na mukoyo bakebanga kuya na kusapwila kwakepa basapwishi. Kalama wa mwanzo witukwashishe ne kwitutundaika kuya na kukwasha kipwilo kyajinga ku Orillia mu Ontario. Ponkapotu twalongele ne kuviluka.

Aku tufikatu mu Orillia, naikele painiya kabiji twaingijilanga pamo na ba Randi. Naingijile na lusekelo byonka byaingijilenga ba Randi. Byo naingijilenga bupainiya na ngovu, naumvwinenga bingi bulongo kwingijisha Baibolo pa kufunjisha bantu ne kumona Mambo a Lesa byo ebafikilenga pa muchima. Kyansangajikile bingi kumona ba mulume ne mukazhi bo nakwashishe kufunda bukine byo bapimpwile byubilo byabo ne kutatula kwingijila Yehoba.

Byo twafwakashijile muzhi wa Toronto, twamonañene na mulongo Arnold MacNamara waingijilanga pa Betele. Witwipwizhe inge twafwainwe kwingila mwingilo wa bupainiya bwiikajila. Nakumbwile’mba: “Nakonsha kwingijila konse kufumyakotu muzhi wa Quebec.” Kechi nakebelenga kuya na kwingijila mu  muzhi wa Quebec ne, mambo nalangulukilenga pa bintu byatama byaambilenga bazungu mu ba Canada pa bantu ba mulaka wa Kifulenchi mu kibunji kya Quebec. Pa kyo kya kimye bantu baimenejile kafulumende kabiji bakebelenga kibunji kya Quebec kutambula bwana bwa bene kufuma ku bena Canada.

Ba Arnold baambile’mba: “Pa kino kimye mu Quebec mo monka mo tubena kutuma bapainiya beikajila kwapwa.” Ponkapo naswile kuya. Nayukile’mba ba Randi bakebeshe kuya na kwingijila kokwa. Mu kuya kwa moba nayukile’mba kino kyo kintu kimo kyawama kyo twafuukwilepo bulongo mu bwikalo bwetu.

Milungu itanu ya kufunda Kifulenchi byo yapwile, amiwa ne ba Randi ne kisemi kikwabo twayile ku Rimouski, palepa makilomita 540 ku kabeta ka buyeke musela bwa Montreal. Nangwa byonkabyo, twajinga na byavula bya kufunda mu uno mulaka mambo kino kyamwekeletu patoka byo natangilenga bya kubijika pa kupwila. Nafwainwe kwamba’mba pa kushonkena ko tukekala nako tukatambwila “bena Austria” bavula. Pano bino, na mambo a kuba’mba ntelelo ya jizhina ja kyalo ipasha na ntelelo ya ñonyi umo mukatampe, naambile’mba tukatambwila “bañonyi bakatampe.”

Saka tukikala mu Rimouski, kwaishile banyenga bana baingijile bingi na mukoyo pamo na mulongo Heberdeau ne mwina kwanji ne baana babo babakazhi babiji. Bano bonse twatendekele kwikala nabo. Mulongo ne Nyenga Huberdeau bafuukwilepo’mba tusonkelenga nzubo yajinga na bibamba mwa kulaala bitanu na bibiji mo twaikelenga atweba bonse bapainiya yo twatelanga’mba Nzubo Itoka mambo beipentele musombelo utoka ne mashiki ayo ajinga palutwe nao ajinga atoka. Kimo kimye pa ino nzubo twaikalangapo 12 nangwa 14. Amiwa ne ba Randi twajinga bapainiya beikajila kabiji javula twayanga na kusapwila lukelo, mute ne mu kimye kya muntuwa muntuwa. Onkao mambo, twaumvwanga bingi bulongo mambo kimye kyonse twaikalanga na bakwingila nabo mu busapwishi mu kimye kya muntuwa muntuwa nangwatu mu bañondo bamashika.

Twakwatankene bingi na bano bapainiya ba kishinka kya kuba twaikele ke kisemi kimo. Kimye kimo twaikalanga pamo na kota mujilo nangwa juba bonse jo twatekelanga pamo kajo. Mulongo umo wajinga ñimbi, onkao mambo, javula pa Kibelushi bufuku twaimbanga ne kuzha.

Bantu bavula mu Rimouski bakebanga bingi kufunda Baibolo. Byo papichile myaka itanu twimwenejile bantu bavula bo twafunjishe Baibolo byo bepaine ne kubatizhiwa. Kipwilo kyaikele na basapwishi 35.

Mu Quebec, twafunjile bingi bulongo bya kwikala basapwishi. Twimwenejile Yehoba byo etukwashishe mu busapwishi ne kwitupa bintu bya mu bwikalo byo tukeba. Kabiji twafunjile kutemwa bantu baambanga Kifulenchi, kutemwa mulaka wabo ne kisho kyabo. Kino kitulengejile kutemwa bantu ba bisho byapusana pusana.—2 Ko. 6:13.

Kwakubula nangwa kuketekelatu ne, ofweshi wa musampi witubuujile kuvilukila mu taunyi wa Tracadie, ku kitulu kyaikela ku musela wa New Brunswick. Kino kitukatezhe mambo po po twasonkejiletu nzubo jikwabo kabiji twafunjishengako maawala achechetu pa sukulu umo. Kunungapo, bantu bo twafunjishanga Baibolo po po baikeletu basapwishi kabiji kwashajiletu moba acheche kutendeka kushimika Nzubo ya Bufumu.

Pa Kibelushi ne pa Mulungu twalombelepo bingi pa mulanguluko wa kuvilukila ku Tracadie, kabiji twakiyileko ne kumona’mba aya mpunzha yapusene bingi na Rimouski. Nangwa byonkabyo, twafuukwilepo’mba twafwainwa kuya mambo Yehoba byo byo abena kukeba. Kimye kyonse twaubanga bitubuulanga Yehoba kabiji twamwene byo afumishengapo mikika. (Mala. 3:10) Kitupeelejile bingi kuviluka  mambo ba Randi bajinga na bulunda bwakosa ne Yehoba, kabiji bajinga bingi na bisela ne muchima wa kubula kwitemwa.

Mu kyokya kipwilo mo twavilukijile mwajingatu mukulumpe mu kipwilo umo aye Robert Ross. Waingilanga bupainiya pamo na mwinakwanji Linda kabiji byo basemene mwana bafuukwilepo kwikala konkakwa. Nangwa kya kuba bajinga na mwingilo mukatampe wakukomesha mwanabo, byo baubilenga bitutundaikile bingi, mambo bajinga na muchima wa kutambwila benyi ne mukoyo wa kusapwila.

Byo twaingijile bupainiya myaka ibiji mu Tracadie, twatambwijile mwingilo mukwabo ye twabujilenga ne kuketekelatu ne, wa kwingijila mu mwanzo. Twaingijile myaka itanu na ibiji mu myanzo ya Kizungu. Kepo betutwajile mu mwanzo wa Kifulenchi mu Quebec. Ba Léonce Crépeault bo bajinga bakalama ba nkambi betu bansanchilanga bingi pa majashi o naambanga. Bino palutwe kacheche, batatwile kungipuzha’mba: “Ñanyi kintu kyo twafwainwa kuba pa kuba’mba ano majashi afikenga bantu pa muchima?” a Kuno kunta muchima kwankwashishe kufunjishanga bulongo ne kwingijisha bintu byapeelejile bantu kumvwa.

Mwingilo wanema ye mvuluka ke Mwingilo ye bampele pa Kushonkena Kukatampe kwa kuba’mba “Lwitabilo Lwashinda” kwajingako mu 1978 mu Montreal. Naingijilenga ku Depatimenti Wanengezhezhenga Kajo. Twaketekejilenga bantu 80,000 kutanwako kabiji twafwainwe kwibajisha kwingijisha jishinda japusene na jishinda jo twaingijishanga kala. Bintu byonse byapimpwilwe ko kuba’mba bingijisho, kajo ne bya kwikanengezha. Twaingijishenga mafuliji akatampe 20 bino kimo kimye akankelwenga kwingila bulongo. Byo kwashajile juba jimo kutendeka kushonkena kechi twatwelele bukiji mu kibanza kuba’mba tunengezhe bulongo byonse ne, na mambo a makayo ajingamo. Twatwelelenga ke pakachi ka bufuku ne kutendeka kwingila pa kuba’mba saka bukyangye kukya, tunengezhezhe jimo kajo ka kwiaula bantu. Twakookele bingi, bino nafunjile byavula bingi na mambo a kwingila na balongo bepaine kwingila na ngovu, bakomene mu maana kabiji bavujile bisela. Kyandetejile bingi lusekelo kutanwako ku kokwa kushonkena kwajinga mu Quebec, mu kibunji mwajinga bingi lumanamo pakachi ka ma 1940 ne 1950.

Nafunjile bintu byavula bingi mu kwingijila pamo na bakalama bakwetu pa kushonkena kwaikalangako mu Montreal. Mwaka uno, ba David Splane, baji mu  Jibumba Jitangijila luno bo bajinga ba Kalama ba Kushonkena. Pa kushonkena kwalondejilepo yami najinga kalama wa kushonkena. Ba David bankwashishe ne kundengela kwingila bingi bulongo uno mwingilo.

Byo twaingijile myaka 36 mu mwanzo, mu 2011 bansajile kwikala mufunjishi wa Sukulu wa Bakulumpe mu Kipwilo. Mu yoya myaka ibiji amiwa ne ba Randi twalaajile pa myanya yapusana pusana 75, bino twamwenejilemo mu kwipana kwetu. Kimye kyonse bakulumpe mu kipwilo inge bapwisha sukulu wabo wa mulungu umo basantanga pa kumona Jibumba Jitangijila byo jibata muchima ne kwibakwasha kukosesha bulunda bwabo ne Yehoba.

Pa kupitapo moba, natendekele kufunjisha mu Sukulu wa Basapwishi ba Bufumu. Javula baana ba sukulu bakookanga bingi ne kukakilwa na mambo a kuvula kwa bintu bya kuba bibalengelanga kupayankana bingi nabiji kufunda maawala atanu na abiji pa juba, kutanga maawala asatu jonse saka bakyangye kulaala ne mingilo ya kuba ina nangwa itanu mu mulungu. Amiwa ne mufunjishi mukwetu twibalumbulwijile’mba bakonsha kubatu bulongo kana na bukwasho bwa Yehoba. Mvuluka baana ba sukulu byo bakuminyenga ne kwamba’mba baubilenga bingi bulongo inge baketekela mwi Yehoba kuba’mba usakwibakwasha.

Muchima wa bamama wa kukeba kukwasha bakwabo walengejile bantu bo bafunjishanga Baibolo kutendeka kwingijila Yehoba kabiji walengejile batata kupimpula milanguluko yabo pa byo bamonanga bukine. Byo papichile moba asatu kufuma pafwijile bamama, batata betukumishe bingi, byo baishile ku Nzubo ya Bufumu ne kuteleka ku jashi ja mvula bantu. Kutatulatu joja juba batwajijile kutanwa ku kupwila myaka 26 yalondejilepo. Nangwa kya kuba batata kechi batizhiwe ne, bakulumpe mu kipwilo bambuujile’mba bo baikalanga batanshi kufika ku kupwila kimye kyonse.

Amiwa ne banyenga yami twafunjileko byavula ku bamama. Banyenga yami byonse basatu ne bena kwabo batwajijila kwingijila Yehoba mu bwikalo bwabo. Nyenga yami umo wingijila pa ofweshi wa musampi uji ku Portugal kabiji mukwabo naye wingijila pa uji mu Haiti.

Amiwa ne Randi twibapainiya beikajila mu Hamilton, mu muzhi wa Ontario. Kimye kyo twajinga mu mwanzo twalondelanga basapwishi ku bantu bo bafunjishanga Baibolo ne ku bo besambanga nabo. Pano luno twimwena bantu bo tufunjisha Baibolo byo bafunda kutemwa Yehoba. Tutundaikwa bingi inge twamona Yehoba byo abena kukwasha balongo ne banyenga mu bimye byawama ne byakatazha. Kabiji kino kikosesha bulunda bwetu ne abo.

Inge twalanguluka pa mwapita bwikalo bwetu bonse, tusanta bingi pa balongo ne banyenga byo betutele muchima ne kwitukwasha. Kino kitulengela ‘muchima wa kukebesha’ kukwasha bakwetu ne kwibatundaika kutwajijila kwingijila Yehoba kwesakana na papelela bulume bwabo. (2 Ko. 7:6, 7) Mu kisemi kimo twakwashishe mulongo wajinga na bakazhi ne baana babiji bajinga mu mwingilo wa kimye kyonse. Twamwipwizhe inge ulangulukapo pa kwikala painiya. Wakumbwile’mba ukwasha bano bapainiya basatu baji mu kisemi kyanji. Onkao mambo, namushikishe’mba: “Nanchi wakonsha kwibakwasha kukila bibakwasha Yehoba nyi?” Namutundaikile’mba ne obewa wakonsha kwikala na lusekelo lonka lo bajipo nalo. Byo papichile bañondo batanu na umo waikele ke painiya.

Amiwa ne ba Randi tukatwajijila kubuula “kisemi kikalondelapo” pe Yehoba ne pa “mingilo [yanji] ya kukumya,” kabiji twaketekela kuba’mba nabo bakatwajijila kwingijila Yehoba byonka byo twatwajijila kumwingijila.—Sala. 71:17, 18.