Mulongo Nicolas ne mukazhanji Céline bapichile mu lukatazho lwapusanako. Baswile mwingilo ye bebapeele ku musampi wa mu France wa kuya na kwingijila ku kipwilo kya katataka. Baambile’mba: “Patanshitu twatemenwe bingi, pano bino, twatendekele kutonga balunda netu bo twashile. Pa kyokyo kimye kechi twakilengelepo balunda mu kipwilo kya katataka mo twavilukijile ne.” a Na mambo a makatazho eyako inge mwaviluka, ñanyi bintu byakonsha kwimukwasha kutwajijila kwikala na lusekelo inge mwavilukila mu kipwilo kya katataka? Balongo ne banyenga bakonsha kwimukwasha byepi? Kabiji mu ñanyi mashinda mo mwakonsha kutundaikila bakwenu, ne bakwenu nabo kwimutundaika?

BINTU BINA BYAKONSHA KWIMUKWASHA KUYUKA BYA KUBA NA MAKATAZHO

1. Ketekelai mwi Yehoba. (Sala. 37:5) Nyenga Kazumi wikala mu kyalo kya Japan washile kipwilo kyo ajingamo pa myaka 20 kimye bamwata wanji kyo bebatumine kuya na kwingijila nkito ku mpunzha ikwabo. Uno nyenga ‘wafikizhe byepi jishinda janji kwi Yehoba’? Waambile’mba: “Nalombele kwi Yehoba bimye byavula kuba’mba ankwashe pa bijikila byonse byo najinga nabyo na mambo a kuvilukila ku mpunzha ingi. Kimye kyonse kyo nalombelenga kwi Yehoba, wampelenga bulume bwa kuchinchika.”

Mwakonsha kutwajijila byepi kuketekela mwi Yehoba? Byonkatu kijimwa byo kikebewa mema ne kajo mu mushiji pa kuba’mba kikome bulongo, ne atweba lwitabilo lwetu lukebewa mema ne kajo ka kifwanyikizho pa kuba’mba lukose. Mulongo Nicolas ye twaambapo kala wataaine kuba’mba kulanguluka languluka pa byaubile Abalahama, Yesu ne Paulo, banabalume bepaine bingi kuba kyaswa muchima wa Lesa, kwamulengejile kuketekela mwi Yehoba kuba’mba ukamukwashanga. Kufunda Baibolo kimye kyonse kukemukwasha kuyuka mwa kubila na lupimpu lwakonsha kumweka mu bwikalo bwenu kabiji kuba bino kukemukwasha kuyuka bintu byavula byo mwakonsha kwingijisha pa kutundaika bakwenu mu kipwilo kya katataka.

 2. Kange mwesakanyenga kipwilo ko mwafuma na kipwilo kya katataka kyo mwaiyamo ne. (Sapwi. 7:10) Mulongo Jules byo afumine ku kyalo kya Benin ne kuya ku United States, wataaineko bisho byapusana bingi na ko afumine. Waambile’mba: “Nalangulukilenga’mba nafwainwa kubuula muntu yense mwapita bwikalo bwami.” Na mambo a kuba’mba kino kyapuseneko na byo baubanga kwabo ko afumine, watendekele kwitolwela ku balongo ne banyenga. Nangwa byonkabyo, byo atendekele kuyuka balongo ne banyenga bulongo, wapimpwile jishinda jo amwenejilengamo bintu. Waambile’mba: “Luno nayuka’mba atweba bantu twi bamotu kechi na mambo a ko twikela pano pa ntanda ne. Mo twambila ne mo tubila bintu, kyo kintu kipusanakotu. Kyanema bingi kumonanga bantu byonka byo baji.” Onkao mambo, kechi mwafwainwa kwesakanyanga kipwilo kya katataka na ko mwafuma ne. Nyenga painiya aye Anne-Lise, waambile’mba: “Navilukile pa kuba’mba mfunde bintu bipya kechi amba bintu byo nkataana ko naya bikesakanatu pamo na ko nafuma ne.”

Bakulumpe mu kipwilo nabo kechi bafwainwa kwesakanyanga bintu byo biji mu kipwilo kya katataka mo baiya na ko bafuma ne. Inge balongo babena kuba bintu mu jishinda japusanako mu kipwilo kya katataka mo mwaiya, kino kechi kilumbulula’mba babena kulubankanya ne. Kyanema bingi kuyuka biji bintu ku mpunzha ko mwavilukila saka mukyangye kwibabuula mo bafwainwa kubilanga bintu. (Sapwi. 3:1, 7b) Balongo ne banyenga bafwainwa kufunjila ku jishinda jo mubena kubilamo bintu kechi kwibakanjikizha kulondela milanguluko yenu ne.​—2 Ko. 1:24.

3. Payankanai mu kipwilo kya katataka mo muji. (Fili. 1:27) Nangwa kya kuba kuviluka kwakatazha kabiji pakebewa kimye kyabaya kya kwinengezha, kyanema bingi kutendeka kuya na kupwila mu kipwilo kya katataka aku muvilukatu. Balongo ne banyenga bafwainwa kwimumonanga javula mu kipwilo kya katataka pa kuba’mba bemuyuke bulongo ne kwimukwasha. Nyenga Lucinda wavilukijile mu muzhi mukatampe mu South Africa pamo na baana banji babakazhi babiji waambile’mba: “Balunda nami bantundaikile kupayankana mu kipwilo kya katataka, kwingijila pamo nabo mu mwingilo ne kukumbulapo pa kupwila pa kuba’mba twiyuke nabo bulongo. Kabiji twabuujile balongo kuba’mba mu nzubo mwetu mwakonsha kwikelanga kusambakana kwa kuya mu mwingilo.”

“Inge kemwingijile pamo” na balongo ne banyenga mingilo ya Lesa pa kipwilo kya katataka, ke jishinda jawama bingi ja kwikelamo na “lwitabilo mu mambo awama.” Nyenga Anne-Lise, ye twaambapo kala, bamutundaikile ku bakulumpe mu kipwilo kusapwilanga pamo na basapwishi bonse mu kipwilo kya katataka. Ñanyi kintu kyafuminemo? Waambile’mba: “Nafikenejiletu kuyuka’mba jino ke jishinda jawama bingi ja kwiyukilamo na balongo ne banyenga mu kipwilo.” Kabiji nayukile kuba’mba kwipana kwingilako mingilo nabiji kuwamisha ne kulama bulongo Nzubo ya Bufumu kulengela balongo ne banyenga kuyuka’mba pano kyo kipwilo kyenu. Inge mwapayankana mu kipwilo kya katataka, balongo ne banyenga bakemukasulukila kabiji mukatendeka kwibamona’mba kyo kisemi kyenu kya katataka.

4. Ikalai na balunda ba katataka. (2 Ko. 6:11-13) Inge kemukasulukile balongo ne banyenga, kimupeelela kwikala balunda nabo. Onkao mambo,  mwafwainwa kufikanga bukiji ku kupwila ne kubula kuya bukiji inge mwapwisha kupwila pa kuba’mba mwikalenga na kimye kya kwisamba nabo ne kwibayuka bulongo. Ibikaingako kuyuka mazhina abo. Inge kemuvuluke mazhina abo, kwibakasulukila ne kwisamba nabo, nabo bakakeba kwimuyuka bulongo ne kwikala balunda nenu.

Mu kifulo kya kwifya ku balongo ne banyenga byo muji pa kuba’mba bemutemwe, balengelai kwimuyuka byonka byo muji. Mwakonsha kufunjilako ku nyenga Lucinda waambile’mba: “Luno tuji na balunda mambo twatendekelangapo kwibeta ku nzubo kwetu.”

“ITAMBWILAINGA ANWE BENE NA BENE”

Bamo kechi bakasuluka kuya na kupwila pa Nzubo ya Bufumu na bantu bo babula kuyuka bulongo ne. Onkao mambo, mwakonsha kuba byepi pa kuba’mba mulengele bantu ba katataka baiya mu kipwilo kyenu kukasuluka? Mutumwa Paulo watundaikile’mba: “Itambwilainga anwe bene na bene, byonkatu Kilishitu byo etutambwijile.” (Loma 15:7) Inge bakulumpe mu kipwilo kebalondele byaubile Kilishitu, bakonsha kulengela ba katataka baiya mu kipwilo kukasuluka. (Monai kakitenguluzha ka kuba’mba “ Ñanyi Bintu Bikemukwasha Inge Mwavilukila ku Kipwilo Kikwabo?”) Nangwa byonkabyo, bonse mu kipwilo kuvwangakotu ne baana, bakonsha kulengela ba katataka baiya mu kipwilo kukasuluka ne kwikala balunda nabo.

Kutambwila bakwetu kwavwangamo kwibetako ku nzubo kwetu ne kwibakwasha mu bintutu bikwabo. Nyenga umo watwajile nyenga mukwabo wavilukijile mu kipwilo kyabo na kumupishañanya mu taunyi ne kumumwesha kwaikela kiteshenyi kya masakya ne mashitima ko akonsha kukanjijila. Byaubile uno nyenga byalengejile nyenga wa katataka kukasuluka mu kipwilo kya katataka mo avilukijile.

KUVILUKA KE JISHINDA JIMO JA KUKOMENAMO KU MUPASHI

Inge luzhiye ubena kukoma, kikoba kyanji kipimpulwa bimye byavula pa kuba’mba ekale na byapi ne kutendeka kutumbuka. Po pamotu, inge mwavilukila mu kipwilo kya katataka, mwafwainwa kusankilapo bijikila byakonsha kwimulengela kukankalwa kutumbuka mu bukifwanyikizho nangwa’mba kukankalwa kwingijila Yehoba bulongo. Mulongo Nicolas ne mukazhanji Céline baambile’mba: “Kuviluka kwawama bingi mambo  kwitufunjisha byavula. Kuyuka bantu ba katataka ne kupijilwa na mpunzha yo twavilukijileko kwitulengejile kwikala na byubilo bikwabo byawama.” Mulongo Jean-Charles ye twaji kwambapo ku ntendekelo wambile pa bintu byawama byamwenejilemo kisemi kyanji amba: “Mu kipwilo kya katataka mo twavilukila, baana betu babena kuba bingi bulongo kabiji bulunda bwabo ne Yehoba bwakoselako. Byo papichile bañondo bacheche kufuma po twavilukijile, mwanetu wamukazhi watendekele kwamba majashi a mu kupwila kwa mukachi ka mulungu kabiji mwanetu wamulume naye waikele musapwishi wabula kubatizhiwa.”

Ibyepi inge kuji bintu bimo byakonsha kwimulengela kubula kuvilukila ku mpunzha kwakepa basapwishi ba Bufumu? Mwakonsha kulengela kipwilo kyenu kya kala kyo mujimo kwikala kya katataka inge mwaingijisha bintu byo twisambapo mu uno mutwe. Mwafwainwa kutwajijila kuketekela mwi Yehoba ne kupayankana mu kipwilo kyenu kupichila mu kwingijila pamo na bakwenu mu mwingilo ne kwikala na balunda ba katataka nangwa kukosesha bulunda bwenu na balunda ba kala. Kampe mwakonsha kukwasha bakwenu ba katataka mu bintu bimo nangwa bakajilwa. Byo kiji kuba’mba butemwe bo buyukisha bena Kilishitu ba kine, kumwesha buno butemwe kukemulengela kufwenya kwipi ne Yehoba. (Yoa. 13:35) Mwafwainwa kushiinwa’mba, “bitapisho bya uno mutundu bitokesha Lesa ku muchima.”​—Hebe. 13:16.

Nangwa kya kuba kuviluka kwakonsha kuleta makatazho, bena Kilishitu bavula bavilukila ku bipwilo bya katataka babena kwingijila Yehoba na lusekelo bingi. Byo byo kyakonsha kwikala ne kwi anweba. Nyenga Anne-Lise waambile’mba: “Kuvilukila ku bipwilo bya katataka kwankwashishe kushinkwisha muchima wami.” Nyenga Kazumi luno washiinwa kuba’mba, kuvilukila ku kipwilo kikwabo kukalengela Yehoba kwimukwasha mu mashinda o akyangye kwimukwashapo kala. Nga Mulongo Jules waamba-po’mba ka? Waamba’mba: “Balunda bo nataana bankwasha kukasuluka. Nji bingi na lusekelo mu kipwilo kya katataka mo nji kabiji kechi nkeba ne kuvilukamo ne.”