1. Mumvwa byepi ku muchima pa bukine bo mwafunda?

 BANTU ba Yehoba batemwa bingi bukine buji mu Mambo a Lesa. Pa Mambo a Lesa po paimena lwitabilo lwetu. (Loma 10:17) Twashiinwa kuba’mba Yehoba ye watendekeshe kipwilo kya bena Kilishitu kyaikala “jishiki ne jikinko ja bukine.” (1 Timo. 3:15) Kabiji tunekenena ‘babena kwitutangijila’ betulumbulwila bukine bwa mu Baibolo ne kwitupa mikambizho kwesakana na mwayila kyaswa muchima wa Lesa.​—Hebe. 13:17.

2. Kwesakana Yakoba 5:19, ñanyi kintu kyakonsha kwitumwekela inge twafunda bukine?

² Nangwa kya kuba twafunda bukine kabiji twayuka’mba twafwainwa kulondelanga mikambizho yo tutambwila mu jibumba ja Lesa, twakonsha kusenduka mu bukine. (Tangai Yakoba 5:19.) Satana ukebesha atweba kuleka kuketekela byaamba Baibolo nangwa kuleka kulondela mikambizho yo tutambwila mu jibumba ja Lesa.​—Efi. 4:14.

3. Mambo ka o twafwainwa kutwajijila kukookela bukine? (Efisesa 6:13, 14)

³ Tangai Efisesa 6:13, 14. Katatakatu Diabola akengijishe bubela kujimbaika bisaka bya bantu bonse pa kuba’mba bikasatukile Yehoba. (Lum. 16:13, 14) Kabiji twayuka kuba’mba Satana ukengila papelela bulume bwanji pa kuba’mba ajimbaike bantu ba Yehoba. (Lum. 12:9) Onkao mambo, kyanema bingi kuyuka bukine bo twafunda byo bwapusana na bubela butundaika Satana ne kutwajijila kukookela bukine. (Loma 6:17;  1 Pe. 1:22) Kuba bino kwanema bingi mambo ko kuketulengela kupuluka malwa akatampe.

4. Ñanyi bintu byo tusakwisambapo mu uno mutwe?

⁴ Mu uno mutwe, tusakufunda pa byubilo bibiji byakonsha kwitukwasha kuyuka bukine buji mu Baibolo ne kulondela mikambizho yo tutambwila mu jibumba ja Lesa. Kepo tusakwisamba pa bintu bisatu byakonsha kwitukwasha kutwajijila kukookela bukine.

BYUBILO BYAKONSHA KWITUKWASHA KUYUKA BUKINE

5. Moyo wa kwakamwa Yehoba witukwasha byepi kuyuka bukine?

⁵ Moyo wa kwakamwa Yehoba. Inge twaikala na moyo wa kwakamwa Yehoba, tukamutemwa bingi kya kuba kechi tukakebanga kuba bintu byakonsha kumufichisha ku muchima ne. Tukeba kufunda kuyuka kyawama ne kyatama ne bukine bo twafunda byo bwapusana na bubela butundaika Satana pa kuba’mba twitabilwe kwi Yehoba. (Maana 2:3-6; Hebe. 5:14) Onkao mambo, kechi twafwainwa kwikala na moyo wa kuchiina bantu kya kuba twaleka ne kutemwa Yehoba ne, mambo bintu bitokesha bantu ku muchima javula kechi bitokesha Yehoba ku muchima ne.

6. Moyo wa kuchiina bantu walengejile byepi bakulumpe ba pa bitota jikumi ba bena Isalela kubula kwamba bukine?

⁶ Inge ketuchiine bantu kukila kuchiina Lesa twakonsha kutendeka kuketekela bintu byapusana na bukine bo twafunda. Akilangulukai pa bakulumpe ba pa bitota 12 baendejile kyalo kya Kenana Yehoba kyo alayile kupa bena Isalela. Bamwendela ntanda jikumi bakizhizhemo kuchiina bena Kenana kukila byo batemenwe Yehoba. Baambijile bakwabo bena Isalela amba: “Kechi twakonsha kulwa na bano bantu ne, mambo bakosa kwitukila.” (Bala. 13:27-31) Kwesakana na mumwena bantu, bena Kenana bakosele kukila bena Isalela. Nangwa byonkabyo, muntu yense walangulukilenga’mba bena Isalela kechi bakonsha kushinda  balwanyi babo ne, wamwesheshenga’mba kechi waketekela mwi Yehoba ne. Bano bamwendela ntanda jikumi bafwainwe kuta muchima pa bintu Yehoba byo akebelenga bena Isalela kuba. Kabiji bafwainwe kulanguluka langulukanga pa bintu byawama Yehoba byo ebobijile panyuma kacheche. Kuba bino, kwakonsheshe kwibakwasha kuyuka’mba bulume bwa bena Kenana kechi bwaesakene na Yehoba Lesa wa bulume bonse ne. Kupusanako na bakwabo bamwendela ntanda babujile luketekelo, Yoshua ne Kaleba abo bakebelenga kwitabilwa kwi Yehoba. Baambijile bantu amba: “Inge Yehoba wasekela mwi atweba, ko kuba’mba uketutwala mu kyokya kyalo ne kwitupakyo.”​—Bala. 14:6-9.

7. Twakonsha kuba byepi pa kuba’mba tutwajijile kwikala na moyo wa kwakamwa Yehoba? (Monai ne kipikichala.)

⁷ Pa kuba’mba tutwajijile kwikala na moyo wa kwakamwa Yehoba, twafwainwa kulangulukanga pa bintu bitokesha Yehoba ku muchima inge tubena kufuukula bintu. (Sala. 16:8) Inge mubena kutanga mashimikila a mu Baibolo, mwafwainwa kwiipuzha’mba: ‘Inge kintu kya uno mutundu kyammwekela, nakonsha kufuukula byepi?’ Fwanyikizhai kuba’mba mubena kuteleka ku sawakya watama waleta bakulumpe ba pa bitota jikumi ba bena Isalela. Nanchi mwakonsha kuketekela uno sawakya ne kwikala na moyo wa kuchiina bantu nangwa abya mwakonsha kufuukulapo kutwajijila kutemwa Yehoba ne kumutokesha ku muchima kukila kwikala na moyo nyi? Kisaka kyonse kya bena Isalela kyakaine kwitabila bukine bwaambile Yoshua ne Kaleba. Ne kyafuminemo, Yehoba kechi waswishishe bano bena Isalela kutwela mu Ntanda ya Mulaye ne.​—Bala. 14:10, 22, 23.

8. Ñanyi kyubilo kyo twafwainwa kwibikako kwikala nakyo kabiji mambo ka?

⁸ Kwipelula. Yehoba usolola bukine ku bantu bepelula. (Mat. 11:25) Twipelwile pa kuba’mba tufunde bukine. (Byu 8:30, 31) Nangwa byonkabyo, twafwainwa kujimuka pa kuba’mba tubulenga kwitota. Inge ketwitote, twakonsha kutendeka kulanguluka’mba milanguluko yetu ijitu pamo na mafunde a mu Baibolo ne mikambizho yo tutambwila mu jibumba ja Yehoba.

9. Twakonsha kutwajijila byepi kwikala bepelula?

⁹ Pa kuba’mba tutwajijile kwikala bepelula twafwainwa kuvulukanga’mba atweba bantu twakepa bingi kwi Yehoba. (Sala. 8:3, 4) Kabiji twafwainwa kulombanga kwi Yehoba kwitukwasha kwikala bepelula ne kwikala na muchima wa kufunda. Yehoba uketukwasha kunemeka milanguluko yanji yo tufunda mu Baibolo ne mu jibumba janji. Inge mubena kutanga Baibolo, kebainga bishinka bimwe-sha’mba Yehoba watemwa bantu bepelula kabiji washikwa bantu betota ne kwilundumika. Kabiji mwafwainwa kwibikako kwikala bepelula inge bemupapo mwingilo umo wa kutangijila bakwenu.

BYO TWAKONSHA KUTWAJIJILA KUKOOKELA BUKINE

10. Ñanyi bantu Yehoba bo aingijisha kupana mikambizho ne kutangijila bantu banji?

¹⁰ Twajijilai kuketekela lutangijilo lo tutambwila mu jibumba ja Yehoba. Ku bena Isalela ba kala Yehoba waingijishe Mosesa ne Yoshua kupa bantu banji mikambizho. (Yosh. 1:16, 17) Yehoba wapeshanga bena Isalela inge kebamone bano banabalume kuba’mba baimenangako Lesa. Byo bapichile myaka yavula, kipwilo kya bena Kilishitu kyalengelwe. Pa kikye kimye, Yehoba waingijishenga batumwa 12 kutangijila bantu banji. (Byu. 8:14, 15) Palutwe kacheche, jino jibumba javwangilemo bakulumpe mu kipwilo bakwabo ba mu Yelusalema. Na mambo a kulondela lutangijilo lwafuminenga ku bano  banabalume ba kishinka, “bipwilo byakoselenga mu lwitabilo ne bantu baitabijile bavujijilengako pa juba pa juba.” (Byu. 16:4, 5) Ne mu ano moba, Yehoba witupesha bingi inge ketulondele lutangijilo lufuma mu jibumba janji. Pano Yehoba umvwa byepi ku muchima inge ketukane kukookela bantu bo atongola kwitutangijila? Pa kuba’mba tukumbule buno bwipuzho, twayai twisambe pa byamwekejile bena Isalela byo bayilenga mu Ntanda ya Mulaye.

11. Ñanyi bintu byamwekele ku bena Isalela ba kala balengulwilenga Mosesa ye batongwele kwi Lesa kutangijila bantu Banji? (Monai ne kipikichala.)

¹¹ Pa kimye kimo bena Isalela byo bayilenga mu Ntanda ya Mulaye, banabalume bamo bayile nkuwa balengulwilenga Mosesa ne mwingilo Yehoba ye amupele. Baambile’mba: “Jibumba jonse [kechi Mosesa yenkatu ne,] jazhila kabiji Yehoba uji mukachi kabo.” (Bala. 16:1-3) Nangwa kya kuba “jibumba jonse” jajinga jazhila ku mu meso a Lesa, bino Yehoba wasajile Mosesa kutangijila bantu Banji. (Bala. 16:28) Bansatuki byo balengulwile Mosesa, Yehoba ye ye balengulwilenga. Kechi batele muchima pa byakebelenga Yehoba ne, pakuba batele muchima pa byo bakebelenga abo bene, ko kuba’mba bulume ne kutumbalala. Lesa wakambwile bantangi batundaikilenga bunsatuki kuvwangakotu ne bantu bavula baswishishe bunsatuki bwa bano bantangi. (Bala. 16:30-35, 41, 49) Ne lelo jino Yehoba washikwa bantu bonse balengulula mikambizho ifuma mu jibumba janji.

12. Mambo ka o twafwainwa kutwajijila kuketekela jibumba ja Yehoba?

¹² Twafwainwa kutwajijila kuketekela jibumba ja Yehoba. Inge kyamwekeshatu patoka kuba’mba twafwainwa kupimpulako mu ngumvwino ya bukine bwa mu Baibolo nangwa mu mwingilo wetu wa Bufumu, aba batangijila kechi bazhinyazhinya kupimpulako ne. (Maana 4:18) Boba bino, mambo kintu kyo bakebesha ke kutokesha Yehoba ku muchima. Kabiji pa kufuukula bintu, bebikako bingi  kwingijisha Mambo a Lesa muji mizhilo ilondela bantu ba Yehoba bonse.

13. “Musango wa byambo byawama” ulumbulula ka, kabiji ñanyi kintu kyo twafwainwa kuba?

¹³ ‘Kwachishainga ku musango wa byambo byawama.’ (2 Timo. 1:13) “Musango wa byambo byawama” ulumbulula mafunjisho a bena Kilishitu ataanwa mu Baibolo. (Yoa. 17:17) Mafunjisho a uno mutundu po paimena byonse byo twaitabilamo. Jibumba ja Yehoba jitufunjisha kukakachila ku ano mafunjisho. Inge twatwajijila kuba bino, Yehoba uketupesha.

14. Bena Kilishitu bamo balekele byepi kukwachisha ku “musango wa byambo byawama”?

¹⁴ Ñanyi kintu kyakonsha kumweka inge twaleka kukwachisha ku “musango wa byambo byawama”? Akilangulukai pa kino. Mu myaka kitota kitanshi, bena Kilishitu bamo basampenyenga mañwiñwi kuba’mba juba ja Yehoba jafika. Kyamweka, kwajinga nkalata yanembele mutumwa Paulo ibalengejile kutendeka kwamba bino. Mu kifulo kya kutekanya pa kuba’mba bomvwishe bishinka, bena Kilishitu bamo ba mu Tesalonika baitabijile ano ma-ñwiñwi kabiji beasampenyenga. Inge baji bavulukile bintu bibafunjishe Paulo kimye kyo ajinga nabo, inge kechi baitabijile bino byambo bya bubela ne. (2 Tesa. 2:1-5) Paulo wajimwineko balongo banji kubula kwitabila bintu byonse byo baumvwanga. Kabiji pa kuba’mba ebakwashe kubula kuba bino kulutwe, Paulo wapezhezheko mu nkalata yanji yo anembejile bena Tesalonika na byambo bya kuba’mba: “Amiwa Paulo yami nanemba luno lwimu na kuboko kwami, ko kayukilo ka mu makalata onse; bino byo byo nnemba.”​—2 Tesa. 3:17.

15. Twakonsha kwizhikijila byepi ku byambo bya bubela bimweka nobe bya kine? Ambaipo kimo kyamwekele. (Monai ne bipikichala.)

¹⁵ Ñanyi bintu byo tufunjilako ku byambo Paulo byo anembejile bena Tesalonika? Inge twaumvwa byambo byapusana na byo twafunda mu Baibolo nangwa masawakya abena kumvwanyika nobe a kine, twafwainwa kwingijisha milangwe. Mu kyalo kyo batelenga kala amba Soviet Union, balwanyi betu basampenye nkalata yo baambile’mba yafumine ku ofweshi mukatampe wa ntanda yonse. Ino  nkalata yatundaikile balongo bamo kwilengela jibumba jabo japusanako. Ino nkalata yamwekelenga nobe ya kine. Pano bino, balongo ba kishinka abo kechi bajimbaikilwe ne. Bayukile kuba’mba byambo byajinga mu ino nkalata kechi byaswañene na bintu byo bafunjile ne. Lelo jino, balwanyi bashikwa bukine bakonsha kwingijisha intaneti pa kuba’mba betongole ne kwitwabanya. Mu kifulo ‘kyakupelawizha kuzhinauka,’ twakonsha kwizhikijila inge twalangulukishapo bulongo pa bintu byo twaumvwa nangwa byo twatanga inge byaesakana na bukine bo twafunda.​—2 Tesa. 2:2; 1 Yoa. 4:1.

16. Kwesakana na Loma 16:17, 18, ñanyi kintu kyo twafwainwa kuba inge bamo bafuma mu bukine?

¹⁶ Twajijilai kukwatankana na balongo ne banyenga ba kishinka kwi Yehoba. Lesa ukeba atweba kumupopwelanga saka twakwatankana. Tukatwajijilatu kukwatankana inge twakwachisha ku bukine. Inge muntu wasenduka mu bukine, kino kileta mabano mu kipwilo. O ene mambo Lesa o etujimwinako kuba’mba twafwainwa ‘kwibachinuzhukanga.’ Inge twabula kuba bino, bakonsha kwitusendula mu bukine.​—Tangai Loma 16:17, 18.

17. Ñanyi bintu byawama byo tumwenamo inge twayuka bukine ne kwibukwachisha?

¹⁷ Inge twayuka bukine ne kwibukwachisha, tukatwajijila kufwenya kwipi ne Yehoba ne kukosesha lwitabilo lwetu. (Efi. 4:15, 16) Tukazhikijilwa ku mafunjisho a bubela a kwa Satana ne masawakya a bubela kabiji Yehoba uketuzhikijila mu kimye kya malwa akatampe. Twajijilai kukwachisha ku byambo bya kine “ne Lesa wa mutende ukekala ne anweba.”​—Fili. 4:8, 9.