Mepuzho Afuma ku Batanga
Ñanyi “mwanamukazhi” ye baambapo pa Isaya 60:1 kabiji mu ñanyi jishinda mo ‘aimena’ ne ‘kusama’?
Pa Isaya 60:1 tutangapo amba: “Obewa mwanamukazhi, imana usame, mambo kyeya kyobe kyaiya. Lukumo lwa Yehoba lwakusamina.” Byambo bikwabo bimwesha’mba uno “mwanamukazhi” wajinga Ziona nangwa’mba Yelusalema, wajinga muzhi mukatampe wa mu Yuda pa kyokya kimye. a (Isa. 60:14; 62:1, 2) Yelusalema waimenejilengako kisaka kyonse kya bena Isalela. Byambo bya kwa Isaya byakonsha kwitulengela kushikisha mepuzho abiji. Butanshi, kimye ka kabiji mu ñanyi jishinda Yelusalema mo ‘aimene’ ne ‘kusama’ mu bukifwanyikizho? Bwa bubiji, nanchi byambo bya kwa Isaya bibena kufika ne mu ano moba nyi?
Kimye ka kabiji mu ñanyi jishinda Yelusalema mo ‘aimene’ ne ‘kusama’ mu bukifwanyikizho? Yelusalema ne nzubo ya Lesa byashajiletu bikulukulu Bayudea byo bajinga mu buzha mu Babilona pa myaka 70. Nangwa byonkabyo, Babilona byo bamushinjile ku bena Meda ne bena Pelisha, bena Isalela baikalanga mu mapunzha apusana pusana mu Bufumu bwa Babilona babwelele kwabo ne kubwezha bupopweshi bwa kine. (Eze. 1:1-4) Kutendeka mu 537 B.C.E., bena Isalela ba kishinka bashajilepo kufuma mu mikoka yonse 12, nabo byo byo baubile. (Isa. 60:4) Batatwile kulambula bitapisho kwi Yehoba, kwikala na bijiilo ne kushimukulula nzubo ya Lesa. (Eze. 3:1-4, 7-11; 6:16-22) Lukumo lwa Yehoba lwatendekele kusamina jikwabo pa Yelusalema nangwa’mba bantu ba Lesa. Nabo baikele kyeya kya bukifwanyikizho ku bisaka bya bantu babujile kuyuka Yehoba.
Nangwa byonkabyo, bungauzhi bwa Isaya bwafikileko pacheche pa muzhi wa Yelusalema wa kala. Kechi bonse bena Isalela batwajijile kukookela Lesa ne. (Ne. 13:27; Mala. 1:6-8; 2:13, 14; Mat. 15:7-9) Palutwe kacheche bakaine ne Mesiasa, Yesu Kilishitu. (Mat. 27:1, 2) Mu 70 C.E., Yelusalema ne nzubo ya Lesa bebyonawine ja bubiji.
Yehoba waambijile jimo kuba’mba bintu bya uno mutundu bikamweka. (Da. 9:24-27) Kwambatu kine, kechi kyajinga kimye kya Yehoba kya kufikizha bungauzhi bonse buji mu Isaya kitango 60 ne.
Nanchi byambo bya kwa Isaya bibena kufika ne mu ano moba nyi? Ee, pano bino, bibena kufika pa mwanamukazhi mukwabo wa kifwanyikizho, ko kuba’mba “Yelusalema uji mwiulu.” Mutumwa Paulo wanembele pa uno mwanamukazhi amba: “Ye inetu.” (Nga. 4:26) Yelusalema uji mwiulu ke lubaji lwa jibumba ja Lesa ja mwiulu ja bilengwa bya mupashi bya kishinka. Baana banji bavwangamo Yesu ne ba 144,000 bena Kilishitu bashingwa byonka byajinga Paulo baji na luketekelo lwa kukekala mwiulu. Bena Kilishitu bashingwa ke “kisaka kyazhila” nangwa’mba “bena Isalela ba Lesa.”—1 Pe. 2:9; Nga. 6:16.
Yelusalema uji mwiulu ‘waimene’ byepi ne ‘kusama’? Waubile bino kupichila mu baana banji bashingwa baji pano pa ntanda. Monai bibamwekejile byo bipasha na bungauzhi buji mu Isaya kitango 60.
Bena Kilishitu bashingwa ‘baimene’ mambo bajinga mu mfishi ya kifwanyikizho kimye bunsatuki bwaambijilwe jimo kyo bwasampukijile ne pakatele batumwa byo bafwile. (Mat. 13:37-43) Pa kyokya kimye baikele bazha mu Babilona Mukatampe, ko kuba’mba bupopweshi bwa bubela bwa ntanda yonse. Bashingwa batwajijile kwikala bazha kufikatu ne “kimye kya ku mpelo ya buno bwikalo.” Kino kimye kyatendekele mu mwaka wa 1914. (Mat. 13:39, 40) Palutwe kacheche, mu 1919, bebafuminye mu buzha kabiji ponkapotu batatwile kusamisha kyeya kya kifwanyikizho byo basapwijilenga na mukoyo mambo awama a Bufumu. b Pa myaka yavula yapitapo, bantu ba mu bisaka byonse baiya mu kino kyeya kuvwangakotu ne bena Isalela ba Lesa bashalapo, ko kuba’mba “bamfumu” batongolwa pa Isaya 60:3.—Lum. 5:9, 10.
Mu kimye kya kulutwe, bena Kilishitu bashingwa bakasampanya kyeya kifuma kwi Yehoba. Mu ñanyi jishinda? Inge bafwa ne kuya mwiulu, bakekala lubaji lwa “Yelusalema Mupya,” nangwa’mba musongwa wa Kilishitu wa ba 144,000 bamfumu kabiji bañanga.—Lum. 14:1; 21:1, 2, 24; 22:3-5.
Yelusalema Mupya ukengila mwingilo wanema bingi pa kufikizha bungauzhi buji pa Isaya 60:1 (Esakanyai Isaya 60:1, 3, 5, 11, 19, 20 na Lumwekesho 21:2, 9-11, 22-26) Byonkatu Yelusalema wajinga pano pa ntanda byo yajinga mpunzha mwaikalanga bamfumu balamanga mu Isalela, ne Yelusalema Mupya ne Kilishitu bo bakekala kafulumende ukalamanga mu ntanda ipya. Pano mu ñanyi jishinda Yelusalema Mupya mo “[akekijila] kufuma mwiulu kwi Lesa”? Ukekila kupichila mu bintu byo akoba pano pa ntanda. Bantu bakamwa Lesa bafuma mu bisaka byonse bya bantu, ‘bakendanga mu kyeya kyanji.’ Kabiji bakebapokolola ku bundengamambo ne lufu. (Lum. 21:3, 4, 24) Kikafumamo, ke “[kubwezha] bintu byonse byo byajinga patanshi,” byonka byaambijile jimo Isaya ne bangauzhi bakwabo. (Byu. 3:21) Kubwezha bintu byonse kwatendekele kimye Kilishitu kyo aikele mfumu kabiji kukapwa ku mpelo ya Bukalama Bwanji bwa Myaka Kiumbi Kimo.
a Pa Isaya 60:1, Baibolo wa Binembelo bya Ntanda Ipya waingijisha kyambo kya kuba’mba “mwanamukazhi” mu kifulo kya “Ziona” nangwa “Yelusalema,” mambo byambo bya Kihebelu bya kuba’mba “imana” ne “usame” bibena kwamba pa mwanamukazhi ye batela’mba “obewa.”
b Kubwezha bupopweshi bwa kine kwaubiwe mu 1919, nako bekulumbulula pa Ezikyo 37:1-14 ne Lumwekesho 11:7-12. Ezikyo waambijile jimo pa kubwezha mu bukifwanyikizho bena Kilishitu bonse bashingwa baikele mu buzha myaka yavula. Bungauzhi buji mu Lumwekesho bubena kwamba pa kusemwa jikwabo kwa mu bukifwanyikizho kwa ka jibumba kacheche ka balongo bashingwa byo bakankelwenga kwingila na mukoyo pa ka kimye kacheche na mambo a kwibakasa mu kaleya. Mu 1919, bebatongwele kwikala “kalume wa kishinka kabiji wa maana.”—Mat. 24:45; monai buku wa kuba’mba Yehoba Pano Wabwezha Bupopweshi bwa Kine!, ji. 118.
