DAVIDA mwina Isalela ye waambile byambo biji peulu bya kutakaika mwanamukazhi wamutundaijile. Uno mwanamukazhi wajinga Abigaila. Ki ka kyalengejile Davida kumutakaika, kabiji twakonsha kufunjilako ka?

Davida wamonañene na uno mwanamukazhi muka kusongolwa kimye kyo anyemenenga Mfumu Saulo. Abigaila wajinga muka Nabala, mwanamulume wajinga na matanga akatampe a mikooko waikalanga mu kibunji kya mitumba ku kabeta ka ku bulenge bwa Yuda. Davida ne banabalume bo ajinga nabo bajingatu ‘nobe nsakwa yazhokolokele’ bakafunga ba kwa Nabala ne matanga abo. Palutwe kacheche, Davida watumine bantu banji kwi Nabala kuya na kulomba ‘byonse byo akonsheshe kwibapa,’ ko kuba’mba bya kuja. (1 Sam. 25:8, 15, 16) Inge twalanguluka pa mwingilo waingijile Davida ne bantu banji wa kuzhikijila matanga a kwa Nabala ne bakafunga banji, twakonsha kumona kuba’mba byo alombele kechi byavujile ne.

Bino Nabala wamwesheshe bumbulwamaana bwanji monka mwayila jizhina janji jilumbulula’mba “Wabula Maana” nangwa’mba “Wakosama.” Wakumbwile na bukaji ne mwenga kukana byalombele Davida. Onkao mambo, Davida wafuukwilepo kuya na kukambula Nabala na mambo kwamba byatama ne kumutana byo alombele. Nabala ne ba mu kisemi kyanji bafwainwe kumona bya malwa na mambo a kukosama kwanji.—1 Sam. 25:2-13, 21, 22.

Abigaila byo ayukile bintu byatama byafwainwe kufuma mu kintu kyafuukwilepo Davida kuba, waubilepo kimo. Wasashijile Davida na mushingi kuba’mba abule kuba kintu kyafwainwe konauna bulunda bwanji na Yehoba. Kabiji wapele Davida ne bantu banji kajo kavula. Davida naye waswile kuba’mba Yehoba wamutumine kuba’mba amukanye kulenga mambo akatampe kwi Lesa. Davida waambijile Abigaila amba: “Maana obe atotwe! Ubilwe bibusa na mambo a kunkanya lelo jino kwikala na mambo a mashi.” —1 Sam. 25:18, 19, 23-35.

Twamona kuba’mba kechi twafwainwa kwikala babula kusanta pa byawama byo betubila byonka byajinga Nabala ne. Kabiji inge twamona’mba bakwetu babena kukeba kuba kyatama, twafwainwa kumonapo jishinda ja kwibakwashishamo. Twakonsha kwamba byonka byaambile nyimbi wa masalamo byo alombele kwi Lesa amba: “Mfunjishai milangwe ne maana.”—Sala. 119:66.

Bakwetu bakonsha kumona maana ne milangwe mu byo tuba. Umvwe betubuula nangwa ne, bino bakonsha kumvwa bulongo byonka byaumvwine Davida waambile’mba: “Maana obe atotwe!”